Jobu 10 - Ika

Isi Nke Iri Jobu Sị Nị Chuku Rotọn'a Nsọngbu Gha Alị Lala

¹ “Elu m a gụgụọ m ndụn; m k'e kuchanrịn nwan k'ọ rị m, gi ize rị m ẹfọ ku k'ọ rị m.

² M k'a sị Chuku: Amalẹ m ikpe — ka gwa m ihiẹn ị sị nị ya kẹ m mẹ.

³ Ọ sụọdẹ i nwan asụọ n'ị bịangbu ịhịan ra, e lelịa ihiẹn hụn i ke — bụ ị hụ a mụyeni eje-ndị lẹ eje ihiẹn wẹ rị e ro ẹmụ?

⁴ Ẹnya ị nọdẹ nwan kẹ nke ịhịan ra? Y'e gidẹ nwan ẹnya ịhịan mmaka e lee ihiẹn ra?

⁵ Ndụn ị nọdẹ nwan kẹ nke ịhịan ra? Y'a tọdẹ nwan ẹkẹrẹ sụọ kẹ ịhịan-mmaka ra?

⁶ Kị haịn nwan i gi a chọ ebe m nọ mẹ njọ, a chọhunmẹ njọ ẹka m —

⁷ bụ y'a marịnghọ nị onwọnni ihiẹn m mẹ, nị onwọnzikwọnị onyẹ k'a saẹka gbapụha m ẹka ị?

⁸ Ẹka ị kpụ m, mẹmẹ m. N'i tikpọzị m nwan?

⁹ Nyanhan n'ị kpụ m kẹ w'a kpụ ụrụa. N'i gizi m nwan họnrin uzunzun?

¹⁰ Ẹlẹ i hupụha m kẹ mirin-ẹran, kpụ m kẹ mirin-ẹran kpụrụnị,

¹¹ gi akpụkpọ lẹ uru kpumẹ m, gi ọkpụkpụ lẹ akwanran wegbama m?

¹² Ịyụ ye m ndụn, e mẹni m ẹfọma, ịyụ gi ẹnya ile hụn i lepụ m chemẹ mmọn m.

¹³ Kanị ihiẹnni kẹ i zuemẹ imẹ obi i — ẹghẹẹ, a marịnghọ m nị ya wụ ihiẹn rị ị obi:

¹⁴ M mẹ njọ, y'a gụntọnị m'a, y'a nịkọ m mẹ njọ la mmaka.

¹⁵ M mẹ njọ — nsọngbu! Ọsụọn'a nị onwọnni ihiẹn m mẹ, asakọ m ẹka weshi isi elu, makẹni ifẹnrẹn e mẹgbugụọ m, nsọngbu m e bugụọ m lue.

¹⁶ M wepụhahụ isi, y'a chụ m kẹ ẹwọrọ dọn a chụ ihiẹn, mẹzi m ihiẹn — gizi m ghọsị ikẹn i hụn a tụ egun.

¹⁷ Y'e mẹ m ihiẹn e mẹcheni, e gi ẹ a shịagbu m ẹri, olulu i rị e busọn m hụ a waye; ndị agha ị hụ a maye m ọmaye-ọmaye.

¹⁸ K'i wepụhanị m ẹfọ nnẹ m? K'ọ rị m a nwụnhụngụọ m nị ẹnya ọwụlẹ d'a hụn m,

¹⁹ nọkẹ ihiẹn rịtulẹni ndụn, a gha wẹ ẹfọ-nnẹ m bu m d'e li!

²⁰ Ogẹn m a gụmagụọnị? Hatu m nwan ye ni m ghọghọdẹ ẹkẹrẹ —

²¹ m gini d'a lashi ebe wẹ ghalẹni e jẹn a lụa, alị ẹkpa-ishi, gbagbu enwẹn ẹ ishi,

²² alị ọhịhị kachanrịn a gba, alị mẹ bii hụn nwọnlẹni k'ọ nọ, alị hụn ukpẹ rịn'a nọ kẹ ishi.”