Jobu 1 - Ika

Isi Nke Ohu Kẹ Jobu E Bi

¹ O nwọn okẹnnyẹ ohu bi alị Uzu; ẹfan a wụ Jobu. Okẹnnyẹni wụ onyẹ ezioku; onwọn nkọrịanị; ọ tụ egun Chuku; ara gi eje-ihiẹn mẹ ẹhụ.

² Ikẹnnyẹ ẹsa lẹ ikpoho ẹtọ k'ọ mụ.

³ O nwọn atụnrụn nnụ-uku ẹsa (7,000), anyịnyan-mkpukpuke nnụ-uku (3,000), okẹn-efin nnụ-uku (1,000) wẹ gi a rụn ugbo lẹ jaki ọgụn-isẹn kwasị nnụ (500). Idibo ẹ buzikwọ ọda. Ya kachanrịn ịhịan ile rị Ẹbamịn ọwụwa-ẹnyanwụn ụwa ọdanfịn e hi.

⁴ Ụmụ a ikẹnnyẹ a kpọyesọnmẹ oriri iwe wẹ — o ru onyẹ, o ru onyẹ. Wẹ kpọye, a kpọ wẹ umunẹ wẹ ikpoho ẹtịtọ hụ d'e sọn wẹ ri, ra.

⁵ Ụmụ Jobu rigụ oriri ndị ahụn, Jobu e zi ozi kpọ wẹ, fepụ wẹ ẹhụ kẹ Osolobuẹ dọn ku. Ụz'ụtụntụn biribiri ọ chụnnị onyẹ-onyẹ imẹ wẹ ẹjan w'a dụn ọkụn — makẹni, o ru ọ sị enwẹn ẹ, “Onyẹ maị kẹ ụmụ m e mẹgụọ njọ, kpọ Chuku iyi imẹ obi wẹ.” Ẹnịna kẹ Jobu e mẹ ogẹn ile.

Ihiẹn Jobu A Sụọ Osolobuẹ, A Fụ Ekwensụ

⁶ Ụhụọhịn ohu, ndị mmọn-ozi pụha ihun Osolobuẹ, Ekwensụ nkẹ nọ bịa imẹ igunrun wẹ.

⁷ Osolobuẹ nọ jụ Ekwensụ, “Ebe ị gha bịa?” Ekwensụ nọ sị, “M rị a ghahunmẹ imẹ ụwa ile, e jẹnjẹn, e jẹnlụa — ebahụn kẹ m gha bịa.”

⁸ Ya Osolobuẹ nọ sị Ekwensụ, “Y'e lekpọgụọ odibo m wụ Jobu? Onwọnni onyẹ nọ kẹ ya elu ụwa; onyẹ ezioku k'ọ wụ; onwọn nkọrịanị; ọ tụ egun Chuku; ara gi eje-ihiẹn mẹ ẹhụ.”

⁹ Ekwensụ nọ sị Osolobuẹ, “Kị k'e mẹ Jobu agbayelẹ Chuku?

¹⁰ Bụ y'a tụnhunmẹgụọ ya lẹ ezi-lẹ-ụlọ a lẹ ihiẹn ile o nwọn mgbọn? Y'a gọzigụọ ihiẹn ile o buche ẹka, anụ a a bagbarị alịnị ile.

¹¹ Tịnpụ nwan ẹka mẹtụ ihiẹnni ile o nwọn — omẹni ọ kpọkọ ị iyi ihun i.”

Kẹ Osolobuẹ Dọn Lele Jobu

¹² Osolobuẹ nọ sị Ekwensụ, “Ọ maka. Ihiẹn ile o nwọn rị ị nwan ẹka. Ka emẹtụlẹ okẹnnyẹ ahụn lẹ enwẹn ẹ ẹka.” Ya kẹ Ekwensụ nọ gha ebe Osolobuẹ rị pụ.

¹³ Ụhụọhịn ohu, ụmụ Jobu ikẹnnyẹ lẹ ikpoho rị iwe nwa a okẹnnyẹ hụn onyẹchẹn, e ri ihiẹn-oriri, a ra manya,

¹⁴ onyẹ ohu nọ gbaha d'e kunrun Jobu, sị a, “Ebe okẹn-efin i rị a dụkpọ alị imẹ ugbo, jaki i nkẹ rị ẹhụ ebẹhụ e ri ẹfịfịa,

¹⁵ ndị Sabia nọ zụnbanhan, kpọnrin wẹ, gi ọpịa gbu idibo i — mmẹ sụọ wanahịn d'a gwa ị.”

¹⁶ Odibo hụ eke kugụ kẹ odibo ọzọ banhanzị, sị, “Ọkụn Chuku gha igwere bịa, dụngbu atụnrụn ị lẹ idibo i. Mmẹ sụọ wanahịn, m nọ bịa d'a gwa ị!”

¹⁷ Odibo hụ eke kugụ kẹ onyẹ ọzọ bịazị, sị, “Ndị Kal'di alị Babilọnụ dọn enwẹn wẹ itu ẹtọ zụnbanhan igunrun anyịnyan-mkpukpuke i, kpụnrụn wẹ, gi ọpịa gbuchanrịn idibo i. Mmẹ sụọ wanahịn d'a gwa ị.”

¹⁸ O ke kugụ kẹ odibo ọzọ banhanzị, sị, “Ụmụ ị ikẹnnyẹ lẹ ikpoho rị iwe nwa ị hụn onyẹchẹn, e ri ihiẹn-oriri, a ra manya,

¹⁹ okẹn ẹbi nọhụ gha atụ bịa, kpọkwasị ụlọ hụ azụụn ile. Ọ nọ dangbuchanrịn ụmụ ị ile. Mmẹ sụọ wanahịn d'a gwa ị.”

²⁰ Ya Jobu nọ lihi ọtọ, dọka ẹwuru ye enwẹn ẹ olu, kọpụ ntutu ẹ. Ya ọ nọ dannị Osolobuẹ alị, fe ẹ,

²¹ sị: “Ọtọ kẹ m gi gha ẹfọ nnẹ m pụha, ọtọ hụ kẹ m k'e gi la. Osolobuẹ ye; Osolobuẹ e werigụọ; ọjịja-mma ya rịnị ẹfan Osolobuẹ!”

²² Ihiẹnni ile mẹni emẹni Jobu mẹ njọ — ọ kọrịanịnị Chuku.