Jerimaya 9 - Ika

Isi Nke Itenẹi Ẹnya Ezuni Jerimaya Kwan Ẹkwan

¹ K'ọ rị m, isi m ile wụ iyi-iyi; k'o furu, ẹnya m wụ isi-mirin ẹnya-mirin! Nkẹ m hụ a kwan ẹkwan uhinhin lẹ efinnaị, a kwan ndị nke m wẹ gbu.

² K'ọ rị m, m nwọn ebe m'a gbashi imẹ atụ, ebe ndị-ijẹn a ranhịn, kẹni m yeni ndị nke m efe, kẹni m pụnị wẹ; makẹni wẹ wụ ndị ẹnya rịlẹni ụzọ ohu, igunrun ndị-ntụ!

³ Osolobuẹ sị, “Wẹ e bu ire wẹ e zinmẹ lekẹ ụta — ntụ hụ a tụpụha lekẹ ọbara-ụta; arị wẹ e gi ezioku a wụrụ okẹn-ịhịan wẹ rị a wụ imẹ alịnị. Wẹ hụ e mẹsọnmẹ njọ; amarịn wẹ m.

⁴ “Kpachanpụkwọnị ndị ọwụ ẹnya; egidẹlẹ umunẹ i dọn ẹnya. Makẹni nwẹnẹ hụ e mẹgbu nwẹnẹ ẹ, ọwụ hụ e kuja oku ọwụ a.

⁵ Ọwụ hụ e dufie ọwụ, onwọnni onyẹ e ku ezioku. E zingụọ wẹ ire wẹ ntụ; e mẹ wẹ njọ amazị wẹ hụn wẹ mẹkọ.

⁶ Ndị yụ lẹ wẹ bi ẹlẹkwọ ndị w'e gi dọn ẹnya; obibi wẹ anịnị wẹ marịn m.” Ya kẹ Osolobuẹ ku.

⁷ Osolobuẹ ihiẹn ile rị okpuru ẹ sị nwan, “Lee ẹ, m k'e gi ọkụn chanchan wẹ, lele wẹ. Kị m'e mẹzi nwan banyeni ndị nke m?

⁸ Ire wẹ wụ eje ọbara-ụta e gbuni — ntụ-ntụ k'ọ tụsọnmẹ. Onyẹ-onyẹ hụ e gi ọnụ-ọma a gwa ibe ẹ oku, kanị imẹ obi ẹ, ọ hụ e shitọn'a ọnyan.

⁹ Kị k'e mẹ m eyelẹ wẹ afụnfụn ihiẹnni?” Ya kẹ Osolobuẹ ku — “Kị k'e mẹ m emẹgwarịlẹ alị nọ ẹnịna?”

¹⁰ Mmẹ wụ Jerimaya sị, “M k'a kwan ẹkwan elu ugu, e goo m; a bụ m ẹbụ, a kwan ọfịa wiwisọnmẹni hụn anụ te nọsọnmẹ a kpa nni imẹ atụ — makẹni wẹ ile a gbagụọ okpokoro, onwọnzini onyẹ a gha ebẹhụ; w'a ra nụzị olu anụ imẹ wẹ; kẹ nnụnụ kẹ anụ-ọfịa a gbachanrịngụọ a tọ.”

¹¹ Osolobuẹ sị, “M k'e mẹ Jerusalẹm wụrụ mkpọkọ-ụlọ, mkpọkọ-ụlọ, nkitẹ-ọfịa e bi atụ e biri ẹ; m k'e tikpọchanrịn obodo ndị rị alị Juda la iwi, onwọnzini onyẹ k'a sa ẹka bi imẹ wẹ.”

¹² Onyẹ marịn ihiẹn ọhụnma n'ọ saẹka ghọta ihiẹnni? Onyẹ kẹ Osolobuẹ gwa oku n'ọ saẹka kọwa ihiẹnni? Kị wẹ tikpọnị nwan alịnị la iwi, hụn o gi nwan nọ kẹ alị ọkpọ-nkụn ịhịan ghalẹni a s'ẹka a gha?

¹³ Osolobuẹ sị, “Makẹni a jụgụọ wẹ iwu m tumẹni wẹ; emẹni wẹ ihiẹn m sị wẹ mẹ, esọnni wẹ Iwu m.

¹⁴ Kanị a gba wẹ isi-akwanran kẹ obi wẹ dọn gwa wẹ, fesọnmẹ Baalụ kẹ ndị nẹdi wẹ dọn kuzi wẹ.

¹⁵ Ya kẹ Osolobuẹ ihiẹn ile rị okpuru ẹ, hụn wụ Chuku Izrẹlụ, gi nwan sị: ‘Ihiẹn m k'e mẹ ndịnị k'e mẹ elu lu wẹ ilu kẹ ihiẹn-oriri e lu ilu, o k'a rị wẹ kẹ ndị wẹ ye mirin wẹ buche nshi ra.

¹⁶ M jẹnkọ d'e feyịya wẹ ye alị ichẹn-ichẹn hụn o mẹ ni kẹ wẹ kẹ ndị nẹdi wẹ amarịn, e gi m ọpịa-agha ndị-iṅẹnrẹn wẹ chụ wẹ d'e ru n'a gụchanrịn wẹ.’ ”

¹⁷ Osolobuẹ ihiẹn ile rị okpuru ẹ sị, “Kẹ ihiẹn nọ nwan, sị nị, ‘Zi ni wẹ kpọha ikpoho ụnụ ma kwan ẹkwan — wẹ kpọdẹ ndị ka ibe wẹ ẹkwan a kwan.

¹⁸ Wẹ bịa ozigbo-ozigbo d'a kwan ẹnyi d'e runi ẹnya-mirin e jun ẹnyi ẹnya, e hutu ẹnyi ẹnya.’

¹⁹ Makẹni, olu ẹkwan rị a pụ obodo Zayọnụ, a sị: ‘Nke ẹnyi a gụ! Ifẹnrẹn e mẹgbu ẹnyi! Ẹnyi jẹnkọ nwan d'a pụrịrị alị ẹnyi, makẹni ụlọ ẹnyi wụ nwan mkpọkọ-mkpọkọ.’ ”

²⁰ Ikpoho, gọn ni nwan ntịn oku Osolobuẹ; gọn ni ntịn oku-ọnụ a. Zin ni mmụ ụnụ ikpoho kẹ wẹ dọn e goo; kuzi ni ibe ụnụ ịkwan-ụya.

²¹ Makẹni ọnwụn a ghagụọ windo ẹnyi nyinbanhan, o nyinbangụọ ebe ile zeni ẹnyi te a gbaban; o werigụọ ụmụ-ẹka rị ogbe e gu egu lẹ ikorọbịa rị ebe wẹ nọ e zu. Osolobuẹ sị:

²² Sị wẹ, “Osolobuẹ sị: ‘Ozun ịhịan jẹnkọ d'e jun ụzọ ile nọkẹ nsịn-efin rịsọnmẹ ogige; wẹ k'e jun alị kẹ ọka wẹ betọsọnmẹ alị hụn wẹ kelẹni kpọnkikomẹ.’ ”

²³ Osolobuẹ sị, “Onyẹ marịn ihiẹn y'e gilẹ amamihiẹn ẹ nyan isi; dikẹn y'e gilẹ ikẹn o nwọn nyan isi; ọdanfịn y'e gilẹ efe ẹ nyan isi,

²⁴ onyẹ k'a nyan isi ya gi ọnwan nyan isi: n'ọ marịnghọ m lẹni ọ ghọtaghọ m — nị m wụ Osolobuẹ, onyẹ hụn e gi ẹfọma lẹ ezioku lẹ ezi-omumẹ e mẹ ihiẹn elu-ụwa, makẹni uwẹ nwọn a sụọ m.” Ya kẹ Osolobuẹ ku.

²⁵ Osolobuẹ sị, “Ogẹn lala hụn m'e gi ye ndị ile kwahụ ugun ẹhụ sụọ afụnfụn —

²⁶ ndị Ijiptu, ndị Juda, ndị Ẹdọm, ndị Amọnụ, ndị Mụabụ, uwẹ lẹ ndị ile bi atụ rịsọnmẹ ebe teni hụn a kọ ẹtu azụụnnị lẹ azụụnnị. Ndị alị ndịnị ile akwanị ugun nke-esi — nọkẹ kẹ ikpụlọ Izrẹlụ ile dọnlẹni kwa ugun imẹ obi wẹ.”