Jerimaya 8 - Ika

Isi Nke Ẹsatọ Afụnfụn Osolobuẹ K'e Gi Sọn Isi-akwanran Wẹ

¹ “Osolobuẹ sị: O ru ogẹn hụ, wẹ k'e kpọnpụsọnmẹ ọkpụkpụ ndị-nze kị alị Juda lẹ ịhaịmẹ wẹ imẹ ili wẹ, lẹ ọkpụkpụ ndị nchụn-ẹjan lẹ ndị-amụma lẹ ọkpụkpụ ndị Jerusalẹm ile.

² Wẹ k'e kpọn wẹ tọnị anwụn lẹ ifọn lẹ kokisẹ ile rị igwere, hụn te a sụọ wẹ, hụn wẹ te a rụa, e sọn, e gọn ntịn, e fe ofufe. Ekpọnkikomẹkọ wẹ wẹ mọbụ li wẹ — wẹ k'a la wẹ tọ alị nọkẹ ẹfịfịa.

³ Ọnwụn k'a ka ndị eje-alịnị m k'e dọnmẹ ndụn mma ebe-lẹ-ebe m k'a chụshi wẹ. Ya kẹ Osolobuẹ ihiẹn ile rị okpuru ẹ ku.”

⁴ “Sị wẹ, ‘Osolobuẹ sị: Ẹlẹ ịhịan dan ẹkpẹn, o lihi ọtọ? Ẹlẹ ịhịan fie ụzọ, o kin azụụn?

⁵ Kị haịn nwan ndịnị gi a kpahusọnmẹ? Kị haịn Jerusalẹm gi a latọsọnmẹ m? E kwọnkẹnmẹ ihiẹn rị e dufieni wẹ, jụ nị ekinhẹnkọ wẹ?

⁶ E gọngụọ m wẹ ntịn ọhụnma-ọhụnma, onwọnni ezioku rị wẹ ọnụ. Onwọnni onyẹ njọ a rị a fụ obi n'ọ sị enwẹn ẹ, “Kẹ m mẹdẹni nwan ihiẹnni?” Onyẹ-onyẹ hụ e mẹ nke ẹ ikẹn-ikẹn nọkẹ ẹshin-agha zụnbankọ ọgbọ-agha.

⁷ Nnụnụ wụ stọkụ a marịnghọ ogẹn wẹ gi e buli ahụa-ahụa; ayoro lẹ nnụnụ ndị ọzọ e jẹn mbịan a marịnghọ ogẹn wẹ gi e jẹn. Kanị ndị nke m amarịn Iwu mmẹ wụ Osolobuẹ.

⁸ Nanị ụnụ e dọn sị, “Ẹnyi a marịnghọ ihiẹn; Iwu Osolobuẹ hụ ebeni.” Bụ ndị-ntụ hụn a kuzini ụnụ ya e bugụọ a isi kpọma alị?

⁹ Ndịnị ụnụ sị marịn ihiẹn jẹnkọ d'a fa! Ndụn k'a gụ wẹ; wẹ k'a danban ọnyan. Ebe o mẹni a jụgụọ wẹ oku Osolobuẹ, elee amamihiẹn kẹ wẹ nwọnzi?

¹⁰ Ufiri ihiẹn wẹ rị e mẹ, m k'e we inyẹnmẹ wẹ ye ndị ọzọ, we ugbo wẹ ye ndị ọzọ weri. Kẹ ndị uku kẹ ndị nta, ẹnya wẹ ile rị ihiẹn k'a ban wẹ ẹkpa; kẹ ndị-amụma kẹ ndị nchụn-ẹjan wụchanrịn ndị ntụ-lẹ-aghịghọ.

¹¹ Wẹ hụ a zụọ ndị nke m rụ eje-ẹhụ nọkẹ sị arụkanị wẹ ẹhụ: a sị, “Nsọngbu arịa! Nsọngbu arịa!” bụ nsọngbu e jun.

¹² Ifẹnrẹn eje-obibi wẹ hụdẹ e mẹ wẹ? Elebedẹ! Ifẹnrẹn arị wẹ ẹnya kaka! Wẹ ghadẹ e mẹ ẹ, e mẹ wẹ isi kan-kan-kan! Wẹ k'a nwụn nwan kẹ ndị ọzọ dọn nwụn; wẹ k'e ru alị ogẹn m'e gi ye wẹ afụnfụn.’ ” Ya kẹ Osolobuẹ ku.

¹³ Osolobuẹ sị, “M k'a napụ wẹ ihiẹn-ugbo wẹ: mkpụrụ arịkọ elu vaịnị wẹ; mkpụrụ arịkọ elu osisi figi wẹ; ẹhụhụọ ile rịn'a k'e shinwụn. Wẹ k'a napụ wẹ ihiẹn m ye wẹ.”

¹⁴ Ndị alịnị k'a sị, “Kị ẹnyi nọdịzịnị nwan ebeni? Kokomẹ ni nị ẹnyi gbashi obodo ẹnyi ndị ẹnyi tụnhunmẹ mgbọn omẹni ọnwụn rọ, ẹnyi a nọ ebẹhụ nwụn — ebe o mẹni Osolobuẹ wụ Chuku ẹnyi a magụọ ẹnyi ikpe-ọnwụn, o yegụọ ẹnyi afụnfụn ra lekẹ mirin wẹ buche nshi, makẹni ẹnyi e mẹgụọ a njọ.

¹⁵ Ẹnyi hụ a tụ ẹnya nị ihiẹn rị mma, kanị ihiẹn rị mma abịanị; ẹnyi hụ a tụ ẹnya nzụọrị, kanị ihiẹn-egun kẹ ẹnyi rị a hụn.

¹⁶ Oro ẹshin-agha ndị-iṅẹnrẹn gi lala rị a han, a hanrukwọrị alị Danị; ẹshin wẹ ndị ahụn nwọn ndụn ọda-ọda hụ e yi oro alịnị ile hụ e mẹhunmẹ. Wẹ lala d'e ripụ alịnị lẹ ihiẹn ile rịn'a, obodoni lẹ ndị ile bin'ẹ.”

¹⁷ Osolobuẹ sị, “Lee n'ẹ, m zilanị ụnụ ndị-iṅẹnrẹn nọkẹ agwọ — nọkẹ eje-agwọ ọgụn ghalẹni a nwụn; wẹ k'a ta ụnụ nọkẹ agwọ.” Jerimaya sị,

Ẹkwan Jerimaya Kwannị Ndị Izrẹlụ

¹⁸ “Okẹn ụya kẹ m rị imẹ ẹ; obi a gbawapụ m!

¹⁹ Lee ihiẹn ndị nke m rị a kwan ẹkwan imẹ alịnị ile: ‘Osolobuẹ arịzịdẹ nwan Zayọnụ ra? Osolobuẹ Eze Zayọnụ arịzị ebahụn?’ ” Osolobuẹ nkẹ sị, “Kị wẹ gini nwan ihiẹn ndịnị wẹ kpụ kpasu m iwe — ya lẹ mmọn alị ndị-ọzọ nwọnlẹni isi wẹ kpụsọnmẹ?”

²⁰ Ndị alị hụ a kwan ẹkwan: “Ogẹn ihiẹn-ugbo a ghafegụọ; ọkọkị a ghafe, kanị nzụọpụha eke bịakwọnị ẹnyi.”

²¹ Jerimaya sị, “Ndụn a gụ m makẹ ihiẹn rị e mẹ ndị nke m; m hụ a kwan a kwangbu enwẹn m.

²² Ọgụn arịzịdẹ nwan obodo Gilẹdị ra? Onyẹ a zụọ emu arịzịdẹ ebẹhụ? Kị haịn nwan nzụọrị gilẹni rị, kị haịn ẹhụ ndị nke m rụ gilẹni a la?”