Jerimaya 7 - Ika

Isi Nke Ẹsa Ofufe Ya Lẹ Eje-Obibi Wị Azụọkọ Ịhịan

¹ Ọnwan wụzị oku Osolobuẹ gwa Jerimaya:

² “Turu ọnụ-mgbọn Ụlọ-nsọ Osolobuẹ, y'a nọ ebẹhụ zi ozini: Ụnụ ndị Juda ile hụn a gha ọnụ-mgbọnni a banye ụlọ-nsọ d'e fe Osolobuẹ, gọn ni ntịn ihiẹn Osolobuẹ ku.

³ Osolobuẹ ihiẹn ile rị okpuru ẹ hụn wụ Chuku Izrẹlụ sị: ‘Bihutọ nị ẹka, kẹni m nị ụnụ bisọnmẹ alịnị.’

⁴ Ebukwọlẹ ni obi ụnụ che ntụ ahụn ụnụ rị a tụ enwẹn ụnụ, nị ‘Ụlọ-NSỌ Osolobuẹ hụ ebeni! Ụlọ-NSỌ Osolobuẹ hụ ebeni! Ụlọ-NSỌ Osolobuẹ hụ ebeni!’

⁵ “Omẹni ụnụ e bihutọghọ ẹka nkesi, mẹmẹ ezigbo omumẹ, onyẹ-onyẹ e gimẹ ẹka rị mma e sọn ibe ẹ,

⁶ ụnụ a bịangbubehi abịamabịa bi alị ụnụ lẹ ụmụ nwọnlẹni nẹdi lẹ ikpoho di nwụnnahịn, gbubehi ndị nwọnlẹni ihiẹn wẹ mẹ ụnụ alịnị, sọnbehi mmọn-lẹ-iyi ndị ahụn ụnụ rị e sọn rị a na ụnụ isi,

⁷ ya kẹ m'a nọ nị ụnụ bisọnmẹ alịnị, alịnị m ye ndị nẹdi ụnụ kanị weri jẹnrin ejẹn.

⁸ Ka lee ẹ nwan, ụnụ hụ e gi ntụ hụn jẹnkọlẹni d'a bannị ụnụ erere e dọn ẹnya.

⁹ “Ụnụ hụ e zun ohin, e gbu ịhịan, a na ibe ụnụ nwunyẹ — a zọ ụkụ e ye ọfịa, e kun ẹfan m bụ ntụ kẹ ụnụ rị a tụ, a mụyeni Baalụ nsẹnsi, e sọn mmọn-lẹ-iyi ụnụ marịnlẹni mbụ.

¹⁰ Ụnụ mẹgụ, ụnụ a bịazị d'e wuzo ihun m imẹ ụlọnị rị a za ẹfan m, a sị, ‘Ihiẹn emẹkọ ẹnyi!’ Ụnụ rịdẹ nwan e ro nị ezioku-ezioku ihiẹn emẹkọ ụnụ ebe ụnụ rị e mẹsọnmẹ arụ ndịnị ile ra?

¹¹ “Ụlọnị rị a za ẹfan m e họnringụọ ebe ndị ohin a hụarị? Lee ni ẹnya, m hụkwọ a hụn ihiẹn ụnụ rị e mẹ! “Ya kẹ Osolobuẹ ku.

¹² “Jẹnkwọ nị nwan obodo Shilo — obodo m bu ụzọ tumẹ nị wẹ a nọ a kpọku ẹfan m, obodo hụ wẹ te nọ e fe m ofufe; jẹn ni d'a hụn ihiẹn m mẹ ẹ makẹ eje-obibi hụn ndị nke m wụ Izrẹlụ bi ogẹn hụ.

¹³ Kẹ ụnụ rị e mẹ ihiẹn ndịnị, m hụ a gwa ụnụ ọgụgwa-ọgụgwa, kanị ụnụ egini dọn; a kpọ m ụnụ, ụnụ azanị. Ya kẹ Osolobuẹ ku.

¹⁴ Ihiẹn m mẹ Shilo kẹ m jẹnkọ nwan d'e mẹ ụlọ hụ rị nwan a za ẹfan m, ụlọ-nsọ ahụn ụnụ gi e dọn ẹnya, ya lẹ alịnị m ye ụnụ lẹ ndị nẹdi ụnụ.

¹⁵ M k'a chụpụ ụnụ ebe m rị kẹ m dọn chụpụ mmunẹ ụnụ ile, ndị Ifrem.

Osolobuẹ Sị Jerimaya Emẹzilẹni Ndị Juda Ekpere

¹⁶ “Jerimaya, emẹlẹni ndịnị ekpere; akwanghọsịlẹ m banyeni wẹ; arịọlẹni wẹ — arịọlẹ m, nị ẹlẹ m k'e gọnkwọ ị ntịn.

¹⁷ Y'a rị a hụn ihiẹn wẹ rị e mẹ imẹ obodo ile rị alị Juda lẹ ọgbara-ogbe ile rị Jerusalẹm?

¹⁸ Ụmụẹka kpashimẹ ọkụn, ndị nẹdi wẹ a mụye ọkụn, ikpoho e shi ihiẹn-oriri wẹ gi a rụa mmọn wẹ w'a kpọ ‘Eze-okpoho Elu-igwee.’ Wẹ hụ a tụ manya e yeni mmọn ichẹn-ichẹn, e gi ẹ a kpasu m iwe.

¹⁹ Mmẹ kẹ wẹ rịdẹ nwan e mẹ ra? Ẹlẹ enwẹn wẹ kẹ wẹ rị nwan e mẹ, e gi ẹ e gbe ifẹnrẹn e ye enwẹn wẹ ihun? Ya kẹ Osolobuẹ ku.

²⁰ Ufiri ẹ, Di-nwọnni-ẹnyi wụ Osolobuẹ sị, ‘M k'e gi okẹn olulu mẹ alịnị ihiẹn — kẹ ịhịan kẹ anụ kẹ osisi rị ọfịa kẹ ihiẹn gha alị pupụha; o k'a dụn kẹ ọkụn, ọ dụbehikọ.’

²¹ “Osolobuẹ hụn ihiẹn ile rị okpuru ẹ, hụn wụ Chuku alị Izrẹlụ, sị: Ọ sụọ ụnụ, chụnma nị ẹjan ile ụnụ gi ọkụn a chụn cheni ẹjan ndị ọzọ ile ụnụ a chụnzịnị m — kanị ụnụ chụngụ, rikwọ nị ihiẹn ụnụ —

²² makẹni, kẹ m gha alị Ijiptu wepụha ndị nẹdi ụnụ kanị, ẹlẹ oku ịchụnnị m ẹjan wẹ dụn ọkụn lẹ oyiye ndị ọzọ kẹ m gwa wẹ,

²³ kanị, ihiẹn m gwa wẹ wụ, ‘E mẹ ni ihiẹn m sị ụnụ e mẹ, nị m hụn ụzọ wụrụ Chuku ụnụ, ụnụ a wụrụ ndị nke m. E bini kẹ m sị ụnụ e bi kẹni ọ rịnị ụnụ mma.

²⁴ Kanị, egọndẹni wẹ ntịn, achọdẹni wẹ nị wẹ nụ; a gbasọnmẹdẹ wẹ isi-akwanran, mẹsọnmẹ ihiẹn eje-obi wẹ ye wẹ. Hụn nkẹ w'e gi e shi ihun, wẹ hụ a la azụụn.

²⁵ Ghakwọrị ogẹn hụ ndị nẹdi ụnụ gi gha alị Ijiptu pụha d'e ru ogẹnni, m hụ e zihẹni ụnụ idibo m ndị-amụma m ụhụọhịn-ụhụọhịn, e zi wẹ e zikwasị.

²⁶ Kanị ndị mụkwasị ụnụ nkẹ egọnzikwọnị m ntịn, efeyeni wẹ oku m ẹnya. E busọnmẹ wẹ isi-ikẹn, mẹkarịdẹ ndị nẹdi wẹ eje-ihiẹn.’

²⁷ “I k'a gwachanrịn wẹ ihiẹnni, kanị ẹlẹ wẹ k'e gọnkwọ tan ntịn; ị hị wẹ, ẹlẹ wẹ k'a za.

²⁸ Sị wẹ nwan: Ọnwan wụ alị hụn jụ n'o mẹkọ ihiẹn Osolobuẹ wụ Chuku wẹ sị wẹ mẹ; ihiẹn ile o mẹ wẹ, egini w'ẹ bihutọ ẹka. Ezioku a lagụọ, ọ rịzịdẹ wẹ ụgb'ọnụ.

²⁹ “Kpụnpụ nwan ntutu i tuhu, Juda, y'a nọdị elu-òke w'a nọ legha ị kwanma ụya, makẹni Osolobuẹ a jụgụọ agbọnị ọ rị e buni ọnụma.

Njọ Lẹ Afụnfụn Ndị Juda Imẹ Ọdanmgbugbu Hinọm

³⁰ “Osolobuẹ: Ndị Juda e mẹgụọ ihiẹn rịlẹni mma ẹnya m. A kọmagụọ wẹ mmọn ndị ahụn rụnị ye imẹ ụlọ hụn a za ẹfan m, mẹrụ a.

³¹ A tụngụọ wẹ ụlọ-mmọn ndị ahụn w'a tụn elu-ugu yesọnmẹ Tofẹtị hụn rị Ọdanmgbugbu Bẹn-Hinọm, a nọ ebahụn a kpọ ụmụ wẹ ikẹnnyẹ lẹ ikpoho ọkụn — ihiẹn m gwatulẹni wẹ mẹ, ihiẹn rịtulẹni m obi!

³² “Ufiri ẹ, ogẹn lala nwan hụn w'e gi kpọbehi ebẹhụ Tofẹtị mọbụ Ọdanmgbugbu Bẹn-Hinọm, kpọma a Ọdanmgbugbu-ogbugbu, makẹni ebẹhụ erukọ wẹ liyechanrịn ndị nke wẹ m k'e ye ndị-iṅẹnrẹn wẹ gbu. Ya kẹ Osolobuẹ ku.

³³ Nnụnụ lẹ anụmanụ e rimẹ ozun ndị alịnị, onyẹ k'a chụnị wẹ arịk'a.

³⁴ M k'e mẹ wẹ anụzịlẹ olu ndị rị e nwọn ịghọghọ lẹ anwịnrịn lẹ ndị rị a gba ẹkụkwọ imẹ obodo ile rị alị Juda lẹ ọgbara-ogbe ile rị obodo Jerusalẹm, makẹni alịnị k'a gba okpokoro.