Jerimaya 6 - Ika

Isi Nke Isin Agha Hụn Lalanịnị Jerusalẹm Makẹ Njọ

¹ “Zụọrịkwọ nị isi ụnụ, ụnụ ndị Bẹnjamini! Ghakwọ nị Jerusalẹm gbapụ! Gbu ni ni wẹ (opi) ọdụ imẹ obodo Tẹkụa nị wẹ gbapụ! Weshini ni wẹ ihiẹn-ahịma elu imẹ Bẹt-Hakẹrẹm kẹni wẹ gbapụ. Makẹni ẹregede nsọngbu gha ẹbamịn-ugu lala, okẹn ntikpọ hụn k'a jọgbu enwẹn ẹ.

² M jẹnkọ d'e tikpọ Nwagbọọ wụ Zayọnụ, hụn magbu enwẹn ẹ mma, mẹ mọkọmọkọ.

³ Ndị-iṅẹnrẹn wẹ k'e duhẹ ndị-agha wẹ lekẹ atụnrụn d'a maye ẹ; wẹ k'e tumẹsọnmẹ ọdụ wẹ ghahunmẹ ẹ, onyẹ-onyẹ lẹ ndị ọ kịha e weri ọnọdị ebe ru ẹ ẹka.”

⁴ Wẹ k'a sị, “Kọnrin ni d'a lụ a agha! Lihi ni nị ẹnyi d'e gi efinnaị maye ẹ! Kanị, ọ jọka njọ nị eki e gimẹgụọlẹ, nị ọhịhị a gbamagụzịghọ.

⁵ Pụha nị nwan nị ẹnyi gwarị (gwẹrụ) gi uhinhin maye ẹ, tikpọchanrịn ebe ile zeni rịn'a hụn w'a gbaban!”

⁶ Lee ihiẹn Osolobuẹ ihiẹn ile rị okpuru ẹ ku, “Gbutusọnmẹ ni osisi ndị rị ụsụọ obodo Jerusalẹm gi rụnrụn mkpọnyin ndị kehunmẹ obodo nwọn mgbọn a nọ a lụ a agha. Wẹ k'e yerịrị obodoni afụnfụn — makẹni mmẹgbu-mmẹgbu jun imẹ ẹ.

⁷ Kẹ isi-mirin dọn e hupụha mirin kẹ obodoni dọn e hupụha eje-ihiẹn rị imẹ ẹ. Egbu-lẹ-egbu lẹ ntikpọ-ntikpọ kẹ w'a nụ imẹ ẹ; emu lẹ ẹhụ wẹ rụsọnmẹ kẹ m'a hụn ogẹn ile.

⁸ Ịyụ wụ Jerusalẹm, nụkwọ nwan, amamgbe m'a la ị tọ, mẹ alị ị họnrin atụ — alị nwọnlẹni onyẹ bin'ẹ.”

⁹ Lee ni ihiẹn Osolobuẹ ihiẹn ile rị okpuru ẹ ku: ọ sị, “Wẹ d'a ghọkwama ndị Izrẹlụ te họdụnị kẹ w'a ghọdọnzi akpụrụ họdụ elu vaịnị wẹ ghọgụ; wẹ k'a ghọ agalaba vaịnị hụ wụ Izrẹlụ, ghọdọnzi kẹ w'a ghọ vaịnị.”

¹⁰ M nọ sị, “Onyẹ kẹ m'a gwa oku, dọ ẹka-ntịn? Onyẹ jẹnkọ d'e gọn m ntịn? Ntịn wẹ kpọkin akpọkin; anụkọ wẹ. Oku Osolobuẹ e we wẹ iwe; ara sụọ wẹ kaka!”

¹¹ Kanị olulu hụn rị e bu Osolobuẹ junzikwọ mmẹ nwẹn obi, nkewụnị asa m ẹka dinzi ẹ. Osolobuẹ nọ sị Jerimaya, “Hu ẹ nwan kẹ mirin kpu mmụ-ẹka rị ọgbara-ogbe, y'e hu ẹ kpu ikorọbịa ebe wẹ rị e zu; huzikwọ a kpu di lẹ nwunyẹ, y'e hudẹ ẹ kpu ndị ẹgẹdi kakpụkpọgụnị.

¹² Ụlọ wẹ jẹnkọ d'a bansọnmẹ ndị ọzọ ẹka, ya lẹ ugbo wẹ lẹ inyẹnmẹ wẹ — makẹni m k'e mẹshi ndị bi alịnị ikẹn.” Ịya kẹ Osolobuẹ ku.

¹³ “Kẹ onyẹ-uku kẹ onyẹ-nta wẹ ile chọkọ ihiẹn a ban wẹ ẹkpa; kẹ ndị-amụma kẹ ndị nchụn-ẹjan, wẹ ile wụ ndị ntụ-lẹ-aghịghọ.

¹⁴ Wẹ hụ a zụọ ndị nke m rụ eje-ẹhụ nọkẹ sị arụkanị wẹ ẹhụ: a sị, ‘Nsọngbu arịa! Nsọngbu arịa!’ bụ nsọngbu e jun.

¹⁵ Ifẹnrẹn eje-obibi wẹ hụdẹ nwan e mẹ wẹ? Elebedẹ! Ifẹnrẹn arị wẹ ẹnya kaka! Wẹ ghadẹ e mẹ ẹ, e mẹ wẹ isi kan-kan-kan! Wẹ k'a nwụn nwan kẹ ndị ọzọ dọn nwụn; wẹ k'e ru alị ogẹn m'e gi ye wẹ afụnfụn.” Ya kẹ Osolobuẹ ku.

¹⁶ Osolobuẹ sị, “Turu ni nwan ẹbụ-ẹnọ lehunmẹ ẹnya; jụ nị kẹ elee hụn wụ ụzọ ahụn rị ẹdẹi — jụ nị ukwere ụzọ hụ rị mma, ụnụ a gha a, kẹn'ọ rịnị ụnụ mma. Kanị ụnụ sị, ‘Ẹnyi aghakọ a.’

¹⁷ Mmẹ tumẹni ụnụ ndị nche — ndị amụma, sị ụnụ, ‘Wẹ gbu (opi) ọdụ, ụnụ e gọn ntịn!’ Kanị ụnụ sị, ‘Ẹnyi egọnkọ ntịn.’

¹⁸ Alị ndị ọzọ rị ichẹn-ichẹn, nụ n'a; ụnụ wụ ọshẹri; lemẹ ni nwan ihiẹn jẹnkọ d'e kunrun Izrẹlụ.

¹⁹ Elu-ụwa ile, gọnkwọ ntịn: m welanị ndịnị ntikpọ — ịya wụ erere eje-ihiẹn wẹ mama, makẹni egini wẹ oku m dọn, makẹni edọnmẹni wẹ iwu m.

²⁰ Kịnị kẹ m gi nsẹnsi ụnụ e mẹ — ọsụọn'a alị Shẹba kẹ ụnụ gha wẹhẹ? Kịnị kẹ m gi udẹn-ọma kalamusu ụnụ e mẹ — ọsụọn'a alị tegbu enwẹn ẹ kẹ ụnụ gha wẹhẹ ẹ? Ewekọ m anụ ụnụ gi a chụnnị m ẹjan w'a dụn ọkụn; ẹjan ụnụ ara sụọ m.”

²¹ Lee nwan ihiẹn Osolobuẹ ku: “M k'e butọnị ndịnị uke; kẹ ndị nẹdi kẹ ụmụ k'a kpọgburusọnmẹ; kẹ ndị idumu ịhịan kẹ ndị ọwụ a k'a la iwi.”

²² Osolobuẹ sị, “O nwọn okẹn alị lalanị: okẹn alị hụn rị ẹbamịn-ugu; okẹn alị ohu rị a kwademẹ, alị hụn rị ebe ụwa ru.

²³ Wẹ busọnmẹ ụta lẹ obo; ẹfọ jọ wẹ, w'a ra mẹ omikẹn ịhịan; ụzụn wẹ nọ kẹ okẹn-ohimin rị a kpọ ẹbi kẹ wẹ nyinla ẹshin wẹ; wẹ dọn ọtụtụ kẹ ndị-agha shikọ ọgbọ-agha; wẹ lala d'a maye i ọgụn, nwagbọọ wụ obodo Zayọnụ.”

²⁴ Ẹnyi a nụgụọ ukwere wẹ, ndụn a gụ ẹnyi. Uhue e d'e gbu ẹnyi, ẹnyi hụ a fịkọ kẹ okpoho imẹ rị e mẹ.

²⁵ Apụkwọlẹ ni nị ụnụ jẹnkọ ugbo, aghakwọlẹni ụwaya — makẹni eṅẹnrẹn ahụn bịanị bukwọ ọpịa-agha; ihiẹn-egun fihunmẹ ẹnyi azụụn ile.

²⁶ “Heuu, ndị nke m, yiri ni ẹkwa-achọ, ụnụ e kperemẹ imẹ ntụn; kwan nị ụya kẹ onyẹ akpụ nwa-okẹnnyẹ ohu nwụnnahịn, makẹni onyẹ e tikpọnị lala idẹnmizi d'e tikpọ ẹnyi!”

²⁷ Osolobuẹ sị m, “E tumẹgụọ m'ị onyẹ e gi ọkụn e lele kẹ igwe nọ; ndị nke m wụ nwan igwe wẹ kelẹni kpụ; i k'e lele wẹ nwan kẹ w'e lele igwe; i k'e lele kẹ w'e bi.

²⁸ Wẹ ile wụ ndị nnupụ-isi hụn obi wẹ ze, hụn a ghahunmẹ e kuja oku ịhịan. Igwe-bronzu lẹ ọmụma kẹ wẹ wụ; onwọnni onyẹ gi ezioku e bi.

²⁹ Ekọn ọkpụ-ụzụn gi a fụ ọkụn hụ a fụ ọkụn ikẹn-ikẹn wẹ gi rị a chanchanpụ unyin rị igwe; kanị wẹ rịhụ a chanchan mmakalaka — wẹ eke chanchanpụkwọ ndị njọ.

³⁰ Siliva wẹ jụ kẹ w'a kpọ wẹ, makẹni Osolobuẹ a jụgụọ wẹ.”