Jerimaya 52 - Ika

Isi Nke Mmẹbụọ Kwasị Ọgụnnaị Kẹ Jerusalẹm Dọn Dan

¹ Zẹdikaya rị nwa ahụa ohu kwasị ọgụn k'o họnrin eze. Imẹ Jerusalẹm k'ọ nọ kị; ahụa mmanaị k'ọ kị, Nnẹ ẹ wụ Hamutalụ nwa Jerimaya onyẹ Libna.

² Zẹdikaya mẹ ihiẹn rịlẹni mma ẹnya Osolobuẹ kẹ Jehoyakim dọn mẹ ogẹn nke ẹ.

³ Ya haịn Osolobuẹ gi gi olulu mẹ obodo Jerusalẹm lẹ alị Juda ile ihiẹnni ile d'e ru ebe Osolobuẹ nọ wepụ wẹ ihun ẹ. Zẹdikaya feni Nebukadineza eze Babilọnụ wẹ rị okpuru ẹ isi.

⁴ Nke akpọhịn iri imẹ ifọn nke iri imẹ ahụa nke itenẹi Zẹdikaya kịma, Nebukadineza wụ eze Babilọnụ nọ kịha ndị-agha a ile d'a maye Jerusalẹm ọgụn. Nebukadineza wẹ nọ kehunmẹ obodo hụ, tụn ihiẹn wẹ gi e kehunmẹ obodo yesọnmẹ mgbọn ẹ.

⁵ Ẹrịra kẹ wẹ kehunmẹ obodo ahụn d'e ru hụn mẹ ẹ ahụa mmanaị Zẹdikaya kịma.

⁶ Ogẹn o gi ru nke akpọhịn itenẹi imẹ ifọn nke ẹnọ imẹ ahụa hụ, ụkọ ihiẹn-oriri rị obodo ahụn a karịgụọ ẹka, nke wụnị ndị rị imẹ ẹ ahụnzịnị ihiẹn w'e ri.

⁷ Ya wẹ nọ tipu mgbọn obodo ahụn azụụn ohu, ndị-agha Izrẹlụ ile nọ gi imẹ abalị gha ọnụ-mgbọn hụ rị ẹgbata mgbọn ẹbụọ gbapụ, ọnụ-mgbọn hụn rị ẹhụ ugbo-obobo hụ eze a nọdị e zu ikẹn. Wẹ nọ dọn ihun ibẹka Araba, Ọdanmgbugbu Iyi-Jọdanị. Ndị-agha Babilọnụ kehunmẹchanrịn obodo ahụn.

⁸ Ndị-agha Babilọnụ nọ chụrụ eze, kunrun ẹ imẹ alị aradan ndị rị ẹhụ Jẹriko. Ndị-agha a ile nọ gba a tọ, gbayịya,

⁹ ndị-agha Babilọnụ nọ nwụn a, w'ẹ jẹnni eze Babilọnụ imẹ Ribla rị alị Hamatị, ọ nọ nọ ebẹhụ hangbu ẹ eṅẹn.

¹⁰ Eze Babilọnụ nọzị nọ idẹnya Zẹdikaya, imẹ Ribla ebahụn, gbu ụmụ-ikẹnnyẹ Zẹdikaya, gbuzikwọ ndị-isi alị Juda ile.

¹¹ Ya ọ nọ gụpụ Zẹdikaya ẹnya ẹbụbụọ, kpọma a ẹgan igwe-bronzu, we ẹ shi Babilọnụ; ọ kpọkin ẹ ye d'e ru ụhụọhịn Zẹdikaya nwụnhụn.

¹² O ru nke akpọhịn iri imẹ ifọn nke isẹn imẹ ahụa nke mmitenẹi Nebukadineza eze Babilọnụ kịma, Nebuzaradanị hụn wụ onyẹ-isi ndị-nche eze Babilọnụ nọ bịa Jerusalẹm.

¹³ Ọ dụn ụlọ-nsọ Osolobuẹ lẹ obi-eze lẹ ụlọ ile rị Jerusalẹm ọkụn — dụnkwama ụlọ ile rị mkpa ọkụn.

¹⁴ Ya ndị-agha Babilọnụ ile hụn Nebuzaradanị onyẹ-isi ndị nche Nebukadineza kịha nọ kụtusọnmẹ mgbọn hụ fihunmẹ Jerusalẹm.

¹⁵ Nebuzaradanị nọ kpụnrụn ụfọdụ ndị kachanrịn ogbẹnnyẹ e mẹ lẹ ndị ọzọ họdụ imẹ obodo ahụn, lẹ ndị hụn gi ẹka wẹ pụha, we enwẹn wẹ ye eze Babilọnụ, ogẹn ndị Babilọnụ gi kehunmẹ obodo hụ.

¹⁶ Kanị, o nwọnghọ ndị ọ latọ imẹ ndị kachanrịn ogbẹnnyẹ e mẹ, nị wẹ rụnma alị vaịnị lẹ ugbo ndị-ọzọ.

¹⁷ Ndị Babilọnụ hụ nọ gbukpọ adansụn igwe-bronzu ẹbụbụọ ahụn rị ihun Ụlọ-nsọ Osolobuẹ, trọkụ igwe-bronzu ndị ahụn afẹrẹ rịsọnmẹ lẹ tankị mirin uku igwe-bronzu hụ; wẹ nọ bu igwe-bronzu ndịnị ile la Babilọnụ.

¹⁸ A kwarịzịghọ wẹ ite lẹ ọsẹkẹ lẹ nwa-mbu wẹ gi a fị ukpẹ lẹ afẹrẹ ichẹn-ichẹn lẹ ihiẹn ndị ọzọ ile wẹ gi igwe-bronzu mẹmẹ wẹ gi a rụn ọrụn imẹ Ụnọ-nsọ.

¹⁹ Onyẹ-isi ndị-nche Nebukadineza a kwarịzịghọ ihiẹn w'e kpọnye nsẹnsi mụye lẹ afẹrẹ ndị w'e huye ihiẹn w'e fekpu lẹ obu-ukpẹ — ihiẹn ile wẹ gichanrịn goru mọbụ siliva mẹmẹ.

²⁰ O buruzighọ adansụn ẹbụbụọ hụ lẹ tankị mirin uku ahụn lẹ okẹn-efin mmẹbụọ hụ wẹ kpụ hụn rị okpuru tankị hụ, buruzi trọkụ ndị ahụn. Solomọnụ mẹmẹ ihiẹn ndịnị makẹ ọrụn Ụlọ-nsọ Osolobuẹ. Bronzu wẹ gi kpụ ihiẹn ndịnị karị hụn w'a ma.

²¹ Ojijẹn-elu adansụn ẹbụbụọ hụ wụsọnmẹ ụbụkụ ẹsa kwasị ọgụn; ohi-ohi wẹ wụsọnmẹ ụbụkụ mmẹsatọ; ulu ẹ wụ mkpịnsịn-ẹka ẹnọ.

²² Ojijẹn-elu isi-adansụn ẹbụbụọ hụ wẹ gi igwe-bronzu mẹmẹ hụn a rịsọnmẹ elu adansụn ndị ahụn wụsọnmẹ ụbụkụ ẹsa lẹ nkirishi; igwe-bronzu kẹ wẹ gizi mẹmẹ ẹgan lẹ mkpụrụ osisi pomegraneti wẹ gi ghahunmẹ elu isi-adansụn ahụn. Ẹrịra kẹ wẹ kpụzị adansụn hụn ẹbọ lẹ mkpụrụ osisi pomegraneti ẹ.

²³ Akpụrụ pomegraneti mmisin kwasị ọgụn-ẹnọ rịsọnmẹ ẹhụ wẹ; hụn rị elu ẹgan ndị ahụn rị ọgụn-isẹn.

²⁴ Onyẹ-isi ndị-nche Nebukadineza a kpụnrụnzịghọ Sẹraya onyẹ-isi nchụn-ẹjan, Zẹfanaya onyẹ nchụn-ẹjan a hansọnn'ẹ lẹzi mmadụ ẹtọ kị ndị Livaị e che ọnụmụzọ Ụlọ-nsọ.

²⁵ Ọ nọ gha imẹ ndị họdụ imẹ obodo hụ weri onyẹ kị ndị-agha lẹ mmadụ ẹsa imẹ ndị e te dụn eze ọdụn. O werizighọ akanwe hụn kị ndị e we ndị k'e jẹn agha — ya lẹ mmadụ ọgụn-ẹtọ rị itu ẹ hụn wẹ hụn imẹ obodo hụ.

²⁶ Ọ nọ kpụn wẹ jẹnni eze Babilọnụ ebahụn ọ rị Ribla.

²⁷ Eze Babilọnụ nọ gbu wẹ ebẹhụ, imẹ Ribla rị alị Hamatị. Ẹrịra kẹ wẹ dọn wepụ ndị azụụn Juda alị wẹ, kpụn wẹ shi alị ọzọ.

Ndị Juda Ole Nebukadineza Kpụnrụn

²⁸ Ọnwan wụ ndị Juda ole Nebukadineza kpụnpụ alị wẹ: Nke ahụa ẹsa ọ kịma, ọ kpụnrụn ndị Juda ẹtọ kwasị ọgụn-kwasị nnụ-uku-ẹtọ (3,023).

²⁹ Nke ahụa mmẹsatọ ọ kịma, ọ gha Jerusalẹm kpụnrụn mmadụ mmẹbụọ-kwasị-ọgụn kwasị nnụnaị (832).

³⁰ Nke ahụa ẹtọ kwasị ọgụn Nebukadineza kịma, ndị Juda isẹn kwasị ọgụn-mmẹsa kwasị nnụ (745) kẹ Nebuzaradanị wụ onyẹ-isi ndị nche ẹ kpụnrụn. Wẹ ile wụ mmadụ ọgụn-iri kwasị nnụ-mmanaị (4,600).

E Ye Wẹ Eze Juda Te Rị Ngan Imẹ Babilọnụ Ọghọ

³¹ O ru ahụa nke mmẹsa kwasị ọgụn wẹ kpụnrụn Jehoyakini wụ eze Juda, hụn wụ ahụa ibuzọ Ẹvili-Mẹrọdakị kịma Babilọnụ, Ẹvili-Mẹrọdakị nọ mẹni Jehoyakini omikẹn, gha ụlọ-ngan wepụha a. Nke akpọhịn isẹn-kwasị-ọgụn imẹ ifọn nke mmẹbụọ k'o wepụha a.

³² Ọ nọ gwa Jehoyakini oku rị mma, ye ẹ ocho ka ọghọ e nwọn karị nke ndị-nze ile ya lẹ wẹ rị Babilọnụ.

³³ Jehoyakini nọ gbupụkwama ẹkwa-ngan a; ọ nọ sọn eze Babilọnụ ri ihiẹn-oriri o we nwụn.

³⁴ Eze Babilọnụ hụ e ye Jehoyakini ihiẹn o gi e bi ụhụọhịn-ụhụọhịn d'e ru ụhụọhịn Jehoyakini nwụnhụn.