Jerimaya 51 - Ika

Isi Nke Mmanaị Kwasị Ọgụnnaị

¹ Osolobuẹ sị, “Lee ẹ, m zila ufere e tikpọnị d'e tikpọ alị Babilọnụ, n'o tikpọ ndị bi alị ndị iṅẹnrẹn m hụ.

² M k'e zijẹn ndị alị ọzọ Babilọnụ d'a fụpụ a kẹ ẹfịfịa ọka, d'e mẹ ẹ gba a okpokoro. Wẹ k'a gha azụụn ile maye ẹ ọgụn, o ru ogẹn w'e gi tikpọ a.

³ Eyelẹ ni ndị ụta efe gba ụta; eyelẹ ni ndị-agha a efe yiri ẹwuru-igwe agha! Edọnmẹlẹ ni ikorọbịa a ndụn; gbuchanrịn nị ndị-agha a.

⁴ Wẹ k'e gbu wẹ tọ alị Babilọnụ, wẹ k'e zugbu wẹ tọ ọgbara-ogbe Babilọnụ.

⁵ Makẹni Chuku ndị Izrẹlụ lẹ ndị Juda, hụn wụ Osolobuẹ ihiẹn ile rị okpuru ẹ alanị wẹ tọ, ọsụọn'a njọ jun alị wẹ, njọ wẹ rị e mẹ Onyẹ-Nsọ Izrẹlụ.

⁶ “Ghakwọ nị Babilọnụ gbapụha! Zụọrịkwọ nị isi ọnụ! Anịkwọlẹ ni njọ a na ụnụ isi! Ogẹn Osolobuẹ e gi mẹgwarị a e rugụọ, ogẹn o gi kụ a ụgwọ ihiẹn o mẹ.

⁷ “Babilọnụ te wụ mkpu goru ẹka Osolobuẹ hụn wẹ mẹjun afụnfụn; Babilọnụ e mẹgụọ ụwa ile rarị afụnfụn hụ. Alị ile a rarịgụọ a, mẹmẹ kẹ ndị ẹra.

⁸ Kanị Babilọnụ jẹnkọ nwan d'a dan idẹnmizi, wahị. Goo n'ẹ! Wẹhẹ ni n'ẹ ọgụn; ikẹnkwọ ọ dịnhịn!

⁹ “Ịhịan k'a gha a sị, ‘Ẹnyi a zụọghọ Babilọnụ, kanị ọ nịnị zụọ; nị ẹnyi lan'a tọ; onyẹ-onyẹ ya la alị a. Makẹni afụnfụn Osolobuẹ rị e ye ẹ jẹnhan elu kẹ igwere, elumelu ẹ e jẹnhanghọ elu kẹ orukpu.’

¹⁰ “Ndị nke m k'a sị, ‘Osolobuẹ a ghọsịgụọ nị ẹnyi wụ nke ẹ! Bịa nị, nị ẹnyi gwa wẹ imẹ Zayọnụ ihiẹn Osolobuẹ wụ Chuku ẹnyi mẹ!’ ”

¹¹ Osolobuẹ sị, “Pịn nị ọbara-ụta! Buru ni akpaịn ụnụ! Osolobuẹ a kpọligụọ ndị-nze alị Mẹdịa, makẹni Osolobuẹ chọ n'o tikpọ alị Babilọnụ. Osolobuẹ k'e mẹgwarị — o k'e mẹgwarị wẹ ihiẹn wẹ mẹ Ụnọ-NSỌ a.

¹² Weshi ni ni wẹ ihiẹn-ahịma elu nị wẹ tikpọ mgbọn Babilọnụ! We ni ndị-agha cheni ndị hụn chekin wẹ ụzọ! Bu ni wẹ che ọnọdị! D'a warịsọnmẹ ni imẹ ọfịa cheri wẹ! Makẹni Osolobuẹ jẹnkọ d'e mẹ ihiẹn o romẹ, ihiẹn ọ sị o k'e mẹ ndị Babilọnụ.

¹³ Ịyụ wụ Babilọnụ, hụn rị ebe iyi bu ọda rị; hụn nwọn akụ-lẹ-ụba ọda-ọda, ogẹn i a gụgụọ; ogẹn w'e gi tikpọ ị e rugụọ.

¹⁴ Osolobuẹ ihiẹn ile rị okpuru ẹ e kungụọ enwẹn ẹ, sị: M k'e mẹrịrị ndị-agha kpụ ị kẹ igurube; wẹ k'e mẹri i, yi oro mmẹri.

¹⁵ “Kanị, Chuku gi ikẹn ẹ ke ụwa; ịya gi akọ-lẹ-uche ẹ mẹmẹ ụwa, gi nghọta a shịshịapụ igwere.

¹⁶ Olu ẹ han, mirin ile rị igwere e dẹn; o mẹ mirin rugbarị elu-ụwa ile. O mẹ amụma e be mirin gha e zue, ọ gha ebe o butọ ihiẹn e wepụha ufere.

¹⁷ Kanị ịhịan ile wụ nzuzu, onwọnni ihiẹn wẹ marịn; mmọn wụ ihiẹn-ifẹnrẹn onyẹ kpụn'a. Ihiẹn ndị ahụn ọ kpụ ẹlẹ ezigbo ẹ — w'a ara kwọn.

¹⁸ Abannị wẹ erere, wẹ wụhụ ihiẹn wẹ gi a kpa ẹmụ; wẹ jẹnkọ d'a la iwi ogẹn m'e gi mẹ wẹ ihiẹn furuni wẹ.

¹⁹ “Kanị Osolobuẹ, Onyẹ ahụn wụ nke Jekọpụ anọnị kẹ uwẹ — makẹni ịya ke ihiẹn ile — kẹ Izrẹlụ, ebọn hụn o gi họnrin nke ẹ; ẹfan a wụ Onyẹ Ihiẹn Ile Rị Okpuru ẹ. “Ọ sị:

²⁰ Ịyụ wụ ẹgbe m gi a lụ agha lẹ ihiẹn-ọgụn m: Ịyụ kẹ m gi a kụkpọ alị ichẹn-ichẹn; ịyụ kẹ m gi e tikpọ alị-eze ichẹn-ichẹn;

²¹ ịyụ kẹ m gi e gbu ẹshin lẹ ndị-agha rị e nyinni wẹ; ịyụ kẹ m gi e tikpọ ụgbọ-ẹshin lẹ ndị-agha rị a nyannị wẹ;

²² ịyụ kẹ m gi e gbu ikẹnnyẹ lẹ ikpoho; ịyụ kẹ m gi e gbu ẹgẹdi lẹ nwata; ịyụ kẹ m gi e gbu ikorọbịa lẹ ịgbagba;

²³ ịyụ kẹ m gi e gbu onyẹ e du anụ lẹ igunrun-anụ; ịyụ kẹ m gi e gbu onyẹ-ugbo lẹ okẹn-efin o gi a rụn ugbo; ịyụ kẹ m gi e gbu ndị ọkịkị lẹ ndị-isi.

²⁴ “M jẹnkọ nwan d'a nọ idẹnya ụnụ mẹgwarị Babilọnụ lẹ ndị ile bi alị wẹ wụ Kal'di eje-ihiẹn ile wẹ mẹ imẹ Zayọnụ. Mmẹ wụ Osolobuẹ rị e ku.

²⁵ Mmẹ lẹ ịyụ rọ, okẹn-ugu e tikpọ ihiẹn! Ịyụ hụn rị e tikpọ ụwa ile, ẹka m jẹnkọ d'e bitụ ị, nutu i, mẹ i wụrụ ugu la iwi. Mmẹ wụ Osolobuẹ ku ẹ.

²⁶ Ahụnkọdẹ wẹ ọmụma ọwụlẹ imẹ i weri, kẹ hụn w'e gidẹ gbe iyetọ mọbụ dadọn ụlọ, makẹni ị k'a gbachanrịn okpokoro jẹnrin ejẹn. Mmẹ wụ Osolobuẹ ku ẹ.

²⁷ “Weshi ni ihiẹn-ahịma elu nị ndị alị kọnrin agha! Gbu nị opi imẹ alị ichẹn-ichẹn! Kwademẹ ni alị ichẹn-ichẹn nị wẹ d'a lụsọn ẹ agha; kpọhanị alị-eze ndịnị d'a lụsọn ẹ agha: ndị Araratị lẹ ndị Mini lẹ ndị Ash'kẹnazị. Tumẹ ni ọkị-agha; wẹhẹ ni ndị-agha gi ẹshin a lụ hụn bu ọda kẹ igurube.

²⁸ Kwademẹ ni ndị alị ichẹn-ichẹn nị wẹ d'a lụsọn ẹ agha: kẹ ndị-nze Mẹdịa, kẹ ndị gọvanọ wẹ kẹ ndị-isi wẹ ile kẹ alị ile rị okpuru wẹ.

²⁹ Elu ụwa jẹnkọ d'e mẹhunmẹ, a fịkọ, makẹni Osolobuẹ k'e mẹrịrị ihiẹn ọ mamanị Babilọnụ — ntikpọ hụ ọ sị o k'e tikpọ alị Babilọnụ, nkewụnị ịhịan ebikọzị a.

³⁰ “O ru ogẹn ahụn, ndị odogun-agha Babilọnụ k'a lụbehi agha, aghakọ wẹ ebe w'a warị pụha. Ndụn k'a gụchanrịn wẹ; wẹ k'a nọ kẹ ikpoho. Ndị lalanị k'a mụ ọkụn ye ụlọ wẹ ile, tigipụ ihiẹn ile wẹ gi kpọkin ọnụ-mgbọn wẹ.

³¹ Ndị ọgba-ọsọ e jẹnni wẹ ozi k'e wẹhẹ ozi ẹ d'a gwa eze Babilọnụ n'e mẹrigụọ wẹ obodo ẹ: onyẹ-ọsọ gbaru ebe ibe ẹ rị, o zi ẹ; onyẹ-ozi nụ, ọ gwa ibe ẹ.

³² E chekingụọ wẹ ebe ile w'a gha e fetu iyi, mụ ọkụn ye ẹfịfịa-mirin ile w'a hụarị imẹ ẹ, egun a tụgbu ndị agha Babilọnụ.

³³ “Makẹni Osolobuẹ ihiẹn ile rị okpuru ẹ, hụn wụ Chuku Izrẹlụ, sị, ‘Nwagbọọ wụ Babilọnụ jẹnkọ d'a nọ kẹ alị wẹ nọ a kụkpọ ọka, hụn wẹ rị a kwademẹ; ọ họdụ ẹkẹrẹ, e betu wẹ ọka kụkpọ.’

³⁴ “Ndị Jerusalẹm sị, ‘Eze Babilọnụ e bugụọ ẹnyi ri; o bugụọ isusu tọnị ẹnyi, bu ẹnyi tọ nọkẹ okpokoro mkpu; o luepụgụọ ẹnyi lekẹ eje-anụ ohimin, o rigụọ ihiẹn ile wẹ a chọ rị ẹnyi ẹhụ rijun ẹfọ; ọ jụpụgụọ ẹnyi.’

³⁵ Ndị rị Zayọnụ k'a sị, ‘Wẹ mẹ Babilọnụ eje-ihiẹn o mẹ ẹnyi, wẹ jụ a ukwere uru-ẹhụ ẹnyi;’ ndị Jerusalẹm k'a sị, ‘Wẹ chọ ẹdeke ẹnyi ẹka ndị alị Kal'di hụ.’ ”

³⁶ Osolobuẹ rị nwan a sị Jerusalẹm, “M jẹnkọ d'e kun'i ọnụ ị, mẹgwarịn'ị; m k'e mẹ ohimin ẹ tahị, mẹ isi-mirin ẹ tahị.

³⁷ Babilọnụ k'e họnrin mkpọkọ-mkpọkọ, anụ-ọfịa e bikin ẹ; ọ wụrụ ihiẹn egun w'e gi a kpa ẹmụ, ebe ịhịan bilẹni.

³⁸ Wẹ ile hụ e dẹn kẹ ikoro-ẹwọrọ, e dẹn kẹ mmụ ẹwọrọ.

³⁹ Ẹkpịrị ghọrị wẹ ụkọ, e mẹmẹni m wẹ oriri, mẹ wẹ ra, tụ, ẹhụ a tụma wẹ ọda-ọda, a ranhịn wẹ ranhịnchanrịn, etẹnhinkọzị wẹ.” Mmẹ wụ Osolobuẹ ku ẹ.

⁴⁰ “M k'e dupụ wẹ d'e gbu nọkẹ mmụ-atụnrụn, nọkẹ ebulu lẹ mkpịn.

⁴¹ “Ẹka m k'e bitụ Shẹshakị; wẹ k'a nwụndọn onyẹ nwẹn ụwa ile e ku oku ẹ! Babilọnụ k'a wụ ihiẹn a tụ egun ẹnya alị ndị ọzọ.

⁴² Ohimin k'e rukpumẹ Babilọnụ; okẹn ẹbiri mirin ohimin k'e rukpumẹ ẹ.

⁴³ Obodo ndị rịn'a k'a gba okpokoro, họnrinsọnmẹ alị ọkpọ-nkụn lẹ atụ; alị ịhịan bilẹni alị wẹ ghalẹni a gha.

⁴⁴ M jẹnkọ d'e ye Bẹlụ mmọn Babilọnụ afụnfụn, mẹ ẹ gbọpụ ihiẹn o lue. Alị ile erujẹnkọzị ebe ọ rị. Mgbọn Babilọnụ k'a dan!

⁴⁵ “Ndị nke m, gha nị imẹ ẹ pụha! Onyẹ ọwụlẹ zụọrịkwọ isi ẹ! Gbapụkwọ nị makẹ okẹn olulu Osolobuẹ,

⁴⁶ amamgbe obi a nahịn ụnụ, egun a tụma ụnụ yeni nsọngbu rị a kpọ imẹ alị hụ; makẹni wẹ k'a nụsọnmẹ ozi ahụa-ahụa; ozi ogbugbu-ogbugbu hụn k'a rị alị hụ, ozi ndị-ọkịkị rị a lụsọn ndị-ọkịkị.

⁴⁷ Makẹni, ogẹn k'a bịarịrị hụn m'e gi ye ihiẹn ndị ahụn wẹ e fe imẹ Babilọnụ ihiẹn wẹ chọ; alị hụ ile k'a fa, ozun ndị alị hụ wẹ k'e gbu k'e jun imẹ ẹ.

⁴⁸ Elu-igwee lẹ ụwa lẹ ihiẹn ile rị imẹ wẹ k'e yi oro ịghọghọ nị Babilọnụ a dan, makẹni ndị gha alị rị ẹbamịn ugu lala sikọ d'e tikpọ a.” Mmẹ wụ Osolobuẹ ku ẹ.

⁴⁹ “Babilọnụ nkẹ k'a danzịkwọ makẹ ogbugbu hụn o gbu ndị Izrẹlụ, o k'a dan kẹ ndị ile o gbu dọn dan makẹ ihiẹn o mẹ wẹ.

⁵⁰ Ụnụ ndị wanahịn ọpịa-agha, a la nị, emẹkwọlẹ ni ẹlẹẹ! Nyanhan nị Osolobuẹ ebẹhụ teni ụnụ rị, nyanhan nị Jerusalẹm ebẹhụ.

⁵¹ “ ‘Ifẹnrẹn e mẹgbu ẹnyi ndị Izrẹlụ makẹni a mụgbugụọ wẹ ẹnyi ẹmụ; ụya e rigụọ ẹnyi, makẹni itumunyẹ a banyegụọ ebe rị nsọ rịsọnmẹ imẹ Ụlọ Osolobuẹ.’

⁵² “Ufiri ẹ, Osolobuẹ sị, ‘Ogẹn lala m'e gi mẹ ihiẹn ile ndị Babilọnụ kpụ w'e fe ihiẹn wẹ chọ, wẹ k'a gha a nụ udẹn ndị m k'a rụ eje-ẹhụ rị a sụn, imẹ alị hụ ile.

⁵³ Ọsụọn'a nị Babilọnụ shi imẹ igwere, mẹdẹ ebẹhụ zegbu enwẹn ọ rị jẹncheni elu, m k'e zihẹn'ẹ ndị k'e tikpọn'a. Mmẹ wụ Osolobuẹ ku ẹ.

⁵⁴ “ ‘Oro ndị rị imẹ nsọngbu rị a gha Babilọnụ a pụha; ụzụn okẹn ntikpọ rị a kpọ imẹ alị ndị Kal'di ahụn.

⁵⁵ Osolobuẹ e d'e tikpọ Babilọnụ; o d'a kụsị okẹn-ụzụn Babilọnụ rị a zụn. Ụzụn ndị k'e tikpọn'a k'a nọ kẹ nke okẹn mirin; olu wẹ k'a han ọda-ọda.

⁵⁶ Onyẹ e tikpọnị lala d'a maye Babilọnụ; wẹ k'a nwụndọn ndị odogun-agha a, tigipụ ụta wẹ, makẹni Chuku hụn e mẹgwarịnị kẹ Osolobuẹ wụ: o sikọ d'e mẹgwarịrịrị.

⁵⁷ M k'e mẹ ndị-isi Babilọnụ lẹ ndị marịn ihiẹn rịn'a ra, tụ, mẹzikwọ ndị-ọkịkị a lẹ ndị ndị-odogun agha a ra, tụ. Wẹ k'a ranhịn, ranhịnchanrịn, etẹnhinkọ wẹ.’ Ya kẹ Eze ku, Onyẹ hụn ẹfan a wụ Osolobuẹ ihiẹn ile rị okpuru ẹ.

⁵⁸ “Osolobuẹ ihiẹn ile rị okpuru ẹ sị, ‘Wẹ k'a kụtuchanrịn mgbọn Babilọnụ hụ nwọngbu enwẹn ẹ ulu, dụn ọnụ-mgbọn ẹ ahụn jẹngbu enwẹn ẹ elu ọkụn; alị ile rị a rụngbuhụ enwẹn wẹ mmaka, alị ile rịhụ a rụntọnị ọkụn.’ ”

⁵⁹ Ọnwan wụ ozi Jerimaya onyẹ-amụma zi onyẹ-isi wụ Sẹraya nwa Nẹria nwa Masẹya. Ogẹn Sẹraya gi sọn Zẹdikaya eze Juda jẹn Babilọnụ; imẹ ahụa nke ẹnọ Zẹdikaya kịma alị Juda kẹ Jerimaya zi Sẹraya ozi hụ.

⁶⁰ Jerimaya detu ihiẹn ile jẹnkọ d'e mẹ Babilọnụ ye imẹ akpụ ẹkụkwọ ohu — ihiẹn ndịnị ile o de ebeni banyeni alị Babilọnụ.

⁶¹ Ọ nọ sị Sẹraya, “I ruhụ Babilọnụ, hụn a n'ị gụn ihiẹnni nị ịhịan ile nụ a.

⁶² Ị gụngụ a, sị, ‘Osolobuẹ, y'e kugụọ n'i jẹnkọ d'e tikpọ ebeni, nke wụnị kẹ ịhịan kẹ anụmanụ ebikọzị a, o gba okpokoro jẹnrin ejẹn.’

⁶³ I weshigụ olu elu gụnnị wẹ ẹkụkwọnị, y'e kẹn ọmụma ye ẹ, tụ a ye imẹ Iyi Yufretisi.

⁶⁴ I mẹgụ a, sị, ‘Ẹnịna kẹ Babilọnụ k'a dọn zụnban alị, ọ pụhakọzị, yeni otikpọ m jẹnkọ d'e tikpọ a. Ẹhụ jẹnkọ d'a rọ wẹ.’ ” Ebeni kẹ ihiẹn Jerimaya ku ru.