Jerimaya 50 - Ika

Isi Nke Iri Kwasị Ọgụnnaị Ihiẹn Chuku K'e Mẹ Alị Babilọnụ Ile

¹ Ọnwan wụ ihiẹn Osolobuẹ gwa Jerimaya onyẹ-amụma banyeni Babilọnụ isi-alị ndị Kal'di lẹzi banyeni alị ndị Kal'di ile.

² Osolobuẹ sị, “Gi ẹ yi oro; gwa wẹ ya imẹ alị ichẹn-ichẹn. Weshi ihiẹn-ahịma elu hị a! Ekuhọdụkwọlẹ! Sị wẹ, ‘Wẹ k'e mẹri Babilọnụ weri; ifẹnrẹn k'e mẹ mmọn wẹ wụ Bẹlụ! Wẹ jẹnkọ d'e tikpọchanrịn mmọn wẹ wụ Maduku; ifẹnrẹn k'e mẹ ihiẹn ndị ahụn wẹ kpụ wẹ e fe; wẹ k'e tikpọchanrịn ihiẹn ndị ahụn ile wẹ a rụa.’

³ Makẹni alị ohu rị ẹbamịn-ugu lala d'a lụsọn Babilọnụ agha, tikpọ alị a la iwi. Onwọnni onyẹ k'e bizi imẹ ẹ; kẹ ịhịan kẹ anụmanụ jẹnkọ d'a gbapụ.

⁴ “Osolobuẹ sị, ‘O ru ogẹn ahụn, ndị Izrẹlụ Ẹbamịn-ugu lẹ ndị Juda k'e gi ẹnya-mirin chọma Osolobuẹ wụ Chuku wẹ.

⁵ Wẹ k'a jụma kẹ elebe kẹ ụzọ Zayọnụ rị, e dọn wẹ ihun ebẹhụ. Wẹ k'a bịa d'e we enwẹn wẹ kwachanrịnnị Osolobuẹ, kwe ẹ nkwa nị wẹ k'e fe ẹ jẹnrin ejẹn, nkwa wẹ jẹnkọlẹni d'a zọ.’

⁶ “Ndị nke m a wụrụgụọ atụnrụn tuhuni; ndị-ndu wẹ e duhuhugụọ wẹ, mẹ wẹ wahunmẹmẹ elu ugu rị ichẹn-ichẹn. Wẹ hụ a wahunmẹ elu ugu lẹ òke, zọ ebe wẹ nọ e zu ikẹn.

⁷ Ndị ile hụnnị wẹ hụ e bu wẹ e ri. Ndị iṅẹnrẹn wẹ hụ a sị, ‘Uwẹ sị ẹnyi mẹ wẹ ihiẹn ẹnyi mẹ wẹ, uwẹ mẹ Osolobuẹ njọ — Osolobuẹ hụn wẹ nọ ẹka a e rijun ẹfọ, Osolobuẹ ndị nẹdi wẹ gi dọn ẹnya.’ Osolobuẹ sị nwan,

⁸ Gha nị Babilọnụ gbapụ! Gha nị alị Babilọnụ pụ. Budẹni ni ndị ọzọ ile ụzọ gbapụ — kẹ mkpịn dọn e bu ụzọ imẹ igunrun anụ.

⁹ Lee ẹ, m sikọ d'a kpọli alị ichẹn-ichẹn wẹhẹ wẹ d'a lụsọn Babilọnụ agha, alị ichẹn-ichẹn hụn k'e bugbu enwẹn wẹ ọda, hụn ghasọnmẹ ẹbamịn-ugu bịa. Wẹ k'e werisọnmẹ ọnọdị lụsọn ẹ agha, gha ebẹhụ weri ẹ. Ụta wẹ jẹnkọ d'a nọ kẹ nke odogun-agha, hụn ghalẹni agbafie.

¹⁰ Wẹ k'e kpọnrinchanrịn ihiẹn ile rị Babilọnụ; ndị ile k'a kwarị ihiẹn ẹ k'a kwajun ẹfọ. Mmẹ wụ Osolobuẹ ku ẹ.

¹¹ “Makẹni, elu hụ a sụọ ụnụ ụsụọ, ụnụ hụ a ghọghọ ụnụ hụn rị a kwanarịn ndị nke m ihiẹn wẹ. Makẹni ụnụ hụ a tụhunmẹ kẹ nwa-efin rị a zọkpọ ọka, e yi oro a zụnhunmẹ kẹ okẹn-ẹshin ndị kin akwanran.

¹² Ifẹnrẹn jẹnkọ d'e mẹgbu nnẹ ụnụ alị Babilọnụ ahụn mụnị ụnụ k'a fa. O jẹnkọ d'a kachanrịn alị ile ntịn. O jẹnkọ d'e họnrin atụ, alị ọkpọ-nkụn, atụ rị alị-aradan ịhịan rịlẹni.

¹³ M gi ọnụma mẹgụ Babilọnụ ihiẹn m k'e mẹ ẹ, ịhịan ebikọzị a; o k'a gbachanrịn okpokoro. Onyẹ ghafe Babilọnụ, egun a tụ a, ọ jụsọhị makẹ ihiẹn mẹn'ẹ.

¹⁴ “Kehunmẹ ni Babilọnụ, ụnụ ile a gba ụta. Gba n'a ụta! Agbahọdụkwọlẹ ni akpụ ọbara-ụta ohu, n'o mẹgụọ Osolobuẹ njọ.

¹⁵ Yi ni n'ẹ oro-agha azụụn ile! Ọ rịọmagụọ dodo! Ụlọ-agha a ile a dangụọ! E tikpọchanrịn wẹ mgbọn ẹ! makẹni mmẹ wụ Osolobuẹ rị e mẹgwarị a. Mẹgwarị n'a! Mẹ n'ẹ ihiẹn o mẹ ndị ọzọ!

¹⁶ Gbunarịn nị Babilọnụ ndị a kụn ihiẹn ugbo lẹ ndị a ghọ ihiẹn ugbo. Egun ọpịa-agha eṅẹnrẹn k'a chụdẹ abịamabịa ile. Onyẹ-onyẹ a gbaburu ndị nke ẹ; onyẹ-onyẹ a gbashi alị a.

¹⁷ “Izrẹlụ a wụrụgụọ atụnrụn gbayịyanị, atụnrụn ẹwọrọ chụzịza. Eze ndị Asiria bu ụzọ nwụnri ẹ, Nebukadineza eze Babilọnụ nọ nwan tachan ọkpụkpụ a.”

¹⁸ Ufiri ẹ, mmẹ, Osolobuẹ ihiẹn ile rị okpuru ẹ, hụn wụ Chuku Izrẹlụ, sị: M jẹnkọ d'e ye eze Babilọnụ lẹ alị a afụnfụn kẹ m dọn ye eze Asiria afụnfụn.

¹⁹ Kanị m k'e welụa Izrẹlụ alị wẹ wẹ nọ a kpa nni. Wẹ k'a nọzị ugu Kamẹlụ lẹ alị-aradan Bashanị e ri, ebẹhụ ihiẹn-oriri jun, nọzị elu-òke Ifrem lẹ ẹgbẹrẹ Gilẹdị e ri ihiẹn gụnị wẹ.

²⁰ O ru ogẹn ahụn, o ru ogẹn m k'e gi mẹ ẹ, wẹ k'a chọ njọ hụ m gi ma Izrẹlụ ikpe, ọ rịkọ a; wẹ k'a chọ njọ hụn Juda mẹ, ahụnkọ w'a — makẹni m k'a gbagharị ndị ahụn m k'e dọnmẹ ndụn imẹ wẹ. Mmẹ wụ Osolobuẹ ku ẹ.

²¹ “D'a maye ni ndị bi alị Mẹrataim rị Babilọnụ! D'a maye ni ndị bi alị Pẹkọdụ rị Babilọnụ! Chụ nị wẹ! Gbuchanrịn nị wẹ! Mẹchanrịn nị wẹ ihiẹn ile m sị ụnụ mẹ wẹ!

²² Ụzụn-agha rị alị hụ — ya lẹ okẹn ntikpọ!

²³ Okẹn ntikpọ kẹ wẹ k'e tikpọ Babilọnụ, igwe nwẹn wẹ te gi dụkpọ ụwa ile, nke Babilọnụ a gụ. Babilọnụ k'e họnrin ihiẹn hụn a tụ ndị alị ichẹn-ichẹn egun.

²⁴ M k'e shini i ọnyan, Babilọnụ, y'a marịnkọ ogẹn y'e gi dan a, a hụn wẹ i, nwụndọn i, makẹni ị sọn Osolobuẹ dọ.

²⁵ Osolobuẹ a kpọpụgụọ ụlọ ihiẹn-ọgụn a, o wepụhagụọ hụn o gi a ghọsị ọnụma a — makẹni Osolobuẹ ihiẹn ile rị okpuru ẹ, Onyẹ hụn nwọn ihiẹn ile, nwọn ihiẹn o jẹnkọ d'a rụn imẹ Babilọnụ.

²⁶ Gha nị alị hụ teni bịa d'a maye ẹ ọgụn. Gbukpọchanrịn nị ebe wẹ e dọnmẹ ihiẹn w'e ri; kpọnkikomẹ ni Babilọnụ kẹ ikpọn-ọka! Tikpọchanrịn n'a! Egbuhọdụkwọlẹ ni onyẹ ọwụlẹ!

²⁷ Gbuchanrịn nị okoro efin wẹ; kpụnrụn nị wẹ d'e gbu! Nsọngbu k'a rịnị wẹ makẹni ogẹn wẹ e rugụọ — o ruọlẹ ogẹn w'e gi narịn afụnfụn ihiẹn wẹ mẹ.

²⁸ Gọn ni ntịn, ihiẹn ndị hụn isi gha Babilọnụ gbapụha rị e ku imẹ Zayọnụ: wẹ rị e ku kẹ Osolobuẹ wụ Chuku ẹnyi dọn mẹgwarị ndị Babilọnụ, mẹgwarị wẹ ihiẹn wẹ mẹ Ụlọ-NSỌ a.

²⁹ Kpọ nị ndị-ụta, ndị ile a gba ụta, nị wẹ kehunmẹ Babilọnụ; anịkwọlẹ ni onyẹ ọwụlẹ la! Mẹgwarị n'a ihiẹn o mẹ; mẹgwarị n'a ihiẹn ile o mẹ, makẹni ọ kpọgụọ Osolobuẹ mgba, Osolobuẹ, Onyẹ-nsọ Izrẹlụ.

³⁰ Ufiri ẹ, agha hụ k'e gbu ikorọbịa a tọ ogbe ẹ; nke ndị-agha a k'a gụ ụhụọhịn ahụn. Mmẹ wụ Osolobuẹ ku ẹ.”

³¹ Osolobuẹ ihiẹn ile rị okpuru ẹ sị, “Lee ẹ, m k'e mẹshi i ikẹn, onyẹ mpache, makẹni ogẹn i e rugụọ — ogẹn m'e gi ye i afụnfụn ihiẹn i mẹ.

³² Onyẹ mpache jẹnkọ d'a kpọgburu, o k'a dan; onwọnni onyẹ k'e yen'ẹ ẹka lihi. M k'a mụ ọkụn ye alị ile rịn'a, ọ dụnpụ ihiẹn ile nọkunmẹn'ẹ.”

³³ Osolobuẹ ihiẹn ile rị okpuru ẹ sị, “Wẹ rị a bịangbu ndị Izrẹlụ, a bịangbuzịkwọ ndị Juda; ndị ile gini wẹ kwọnkẹnmẹ wẹ e kwọnkẹnmẹ, ekweni wẹ hatu wẹ nị wẹ la.

³⁴ Kanị onyẹ a gbapụhanị wẹ ze e ze; Osolobuẹ ihiẹn ile rị okpuru ẹ wụ ẹfan a. O k'e kinni wẹ ọnụ wẹ ru isi ẹ, kẹn'o ye alị wẹ udọn, bu nsọngbu tọnị ndị bi Babilọnụ. “Osolobuẹ sị:

³⁵ Ọpịa-agha ya bunụmanị Babilọnụ! Ya bunụmanị ndị bi imẹ Babilọnụ; kẹ ịhaịmẹ wẹ kẹ ndị ọzọ ile alị gi oku wẹ e dọn.

³⁶ Ọpịa-agha ya d'e gbu ndị amụma-ụgha rị Babilọnụ! Wẹ k'e họnrin ndị-nzuzu. Ọpịa-agha ya d'e gbu ndị odogun-agha a! Egun k'a tụ wẹ, tụgbu wẹ.

³⁷ “Ọpịa-agha ya bunụmanị ẹshin lẹ ụgbọ-ẹshin Babilọnụ; ya d'e gbu itumunyẹ ile rị ndị-agha a! Obi k'e dẹnhin wẹ kẹ ikpoho. Ọpịa-agha ya weri akụ-lẹ-ụba Babilọnụ! Wẹ sikọ d'e kpọnrin wẹ ile.

³⁸ Mirin ile rịn'a ya tahị! Wẹ k'a kọrọhị! Makẹni, alị wẹ wụ mmọn-mmọn, mmọn ndị jọgbu enwẹn wẹ hụn rị nwan a pụ wẹ ẹra.

³⁹ “Anụ e bi imẹ atụ k'e bikin ẹ nwan, kẹ ozuzu k'e bizidẹ ẹ. Ịhịan ebikọzị a, onwọnni ogẹn ịhịan e gi bizi ẹ jẹnrin ejẹn.

⁴⁰ Okẹn ntikpọ hụn m tikpọ Sodọm lẹ Gomora lẹ alị ndị ahụn nọkunmẹni wẹ kẹ m k'e tikpọzịkwọ Babilọnụ. Onwọnni onyẹ k'e bi ebẹhụ; ịhịan a kwahakọzị ebẹhụ. Mmẹ wụ Osolobuẹ ku ẹ.

⁴¹ Lee ẹ! Ndị-agha alị rị ẹbamịn-ugu lala; m rị a kpọli okẹn alị lẹ ndị-nze bu ọda; wẹ k'a ghasọnmẹdẹ ebe ụwa ru bịa.

⁴² Wẹ bu ụta lẹ obo; ẹfọ jọ wẹ, w'a ra mẹ omikẹn. Ụzụn wẹ nọ kẹ nke ohimin ẹbi rị a kpọ wẹ nyinlanị ẹshin wẹ; wẹ dọnye wẹ kẹ ndị shikọ ọgbọ-agha, wẹ lala d'a lụsọn yụ wụ Babilọnụ agha!

⁴³ Eze Babilọnụ k'a nụ nị wẹ lala d'a maye ẹ, ndụn a gụ a. Uhue e huegbu ẹ lekẹ okpoho imẹ rị e mẹ.

⁴⁴ “Lee ẹ! Kẹ ẹwọrọ dọn a gha ọfịa mkpẹnrẹn iyi-Jọdanị a pụha ebe atụnrụn nọ a kpa nni mkpẹnrẹn mirin hụ ghalẹni a tahị, ẹrịra kẹ m k'a dọn maye ndị Babilọnụ idẹnmizi, mẹ wẹ gba alị wẹ tọ. Onyẹ m chọ kẹ m'e gi mẹ ẹ. Onyẹ nọ kẹ mmẹ? Onyẹ k'a jụ m ihiẹn ọwụlẹ? Elee eze k'a s'ẹka che m ọgụn?”

⁴⁵ Gọn ni nwan ntịn ihiẹn Osolobuẹ chọ n'o mẹ Babilọnụ, ihiẹn ọ chọ n'o mẹ alị ndị Kal'di: Ndị k'a mayeni wẹ k'a kpụnrụnrịrị ụmụ wẹ, tikpọpụ alị wẹ hụn wẹ nọ e ri.

⁴⁶ Ọdịdan wẹ k'e mẹhunmẹ ụwa; ẹkwan wẹ k'e rudẹ alị ichẹn-ichẹn.