Jerimaya 5 - Ika

Isi Nke Isẹn Osolobuẹ Ahụnnị Onyẹ O K'e Gi Ufiri Ẹ Gbagharị

¹ Osolobuẹ sị, “Ghasọnmẹ ọgbara-ogbe ile rị imẹ Jerusalẹm; lehunmẹdẹlẹ ẹnya, n'ị hụn; jẹn ẹbụ ile d'e lelehunmẹ; omẹni y'a hụn akpụ onyẹ ohu hụn gi ezioku e mẹ ihiẹn ẹ, e kwọnkẹnmẹ ezioku: e gi m ufiri ẹ gbagharị obodoni.

² Ọsụọn'a wẹ kun ẹfan m, ntụ kẹ wẹ rịkwọ a tụ!”

³ Euu, Osolobuẹ, ẹlẹ ezioku kẹ y'a chọ? Y'a fịan wẹ ihiẹn, anụnị wẹ ụfụ a; y'a sụdẹ wẹ kẹ nni, amụnrụnnị wẹ ihiẹn. A tọ wẹ a gba isi-akwanran, jụ n'e bihutọkọ wẹ ẹka.

⁴ M te sị, “Ndịnị rị ebeni wụhụ ndị mmaka; onwọnni hụn wẹ marịn, makẹni amarịn wẹ kẹ Osolobuẹ e mẹ, amarịn wẹ ihiẹn Chuku wẹ chọ.

⁵ M k'e jẹnburu nwan ndị-isi, d'a gwa wẹ oku; makẹni a marịnghọ wẹ kẹ Osolobuẹ e mẹ, a marịnghọ wẹ ihiẹn Chuku wẹ chọ.” Kanị ndị-isi ile gbegbegbe a jụgụọ nị Osolobuẹ akịkọ wẹ, a jụgụọ wẹ iwu ẹ.

⁶ Ufiri ẹ, ẹwọrọ k'a gha ọfịa bịa d'a maye wẹ, eje-anụ wụ wofu k'a gha imẹ atụ bịa d'a dọririẹn wẹ, liopadị k'a warị ẹhụ obodo wẹ, dọkịka onyẹ ọwụlẹ k'a ma-ama pụha, makẹni nnupụ-isi ndịnị a karịgụọ ẹka; ọkpahu ọkpahu kẹ wẹ rị a kpahu.

⁷ Osolobuẹ sị, “Nanị m'a dọn gbagharị ị? Mmụ ị a lagụọ m tọ, hịma mmọn ichẹn-ichẹn furulẹni wẹ fe. Ọsụọn'a nị m yesọnmẹ wẹ ihiẹn ile rị wẹ mkpa, wẹ hụzịkwọ a ghẹrẹ, e rujẹn nke ndị ịgbaraja.

⁸ Wẹ nọ kẹ okẹn-ẹshin rijun ẹfọ hụn a gba ọgbụgba-ọgbụgba: ẹnya onyẹ-onyẹ rị nwunyẹ ibe ẹ.

⁹ Osolobuẹ sị, Kị k'e mẹ m eyelẹ wẹ afụnfụn a? Kị k'e mẹ m emẹgwarịlẹ alị nọ ẹnịna?

¹⁰ D'e wiwisọnmẹ ugbo vaịnị a — ka ewiwichanrịnlẹ wẹ. Kwapụchanrịn a agala, nị ndịnị ẹlẹ nke Osolobuẹ.

¹¹ Ikpụnọ Izrẹlụ lẹ ikpụnọ Juda e giọlẹ ẹkanaị sọn m.” Ya kẹ Osolobuẹ ku.

¹² A tụgụọ wẹ ntụ banyeni Osolobuẹ, wẹ sị, “Onwọnni ihiẹn o k'e mẹ! Onwọnni ihiẹn k'e mẹni ẹnyi; ẹnyi ahụnkọ agha mọbụ ụnwụn.”

¹³ Wẹ sị, “Ufere mmaka kẹ ndị-amụma wụ, ẹlẹ Osolobuẹ zi wẹ; ihiẹn wẹ rị e ku ya nọ isi wẹ bụn.”

¹⁴ Lee nwan ihiẹn Osolobuẹ, Chuku ihiẹn ile rị okpuru ẹ, ku: “Ufiri ihiẹnni wẹ ku, m jẹnkọ d'e mẹ oku m wụrụ ọkụn ọnụ ị, e mẹ m ndịnị wụrụ nkụn ọkụn hụ k'a dụn.”

¹⁵ Osolobuẹ sị, “Yụ wụ ikpụlọ Izrẹlụ, m wela alị rị ebe teni d'a maye i, alị rị ẹdẹi, alị hụn rị kete-kete; ndị ụnụ marịnlẹni asụsụ wẹ, ndị ụnụ jẹnkọlẹni d'a ghọta asụsụ wẹ.

¹⁶ Ihiẹn-ọgụn wẹ e bu ịhịan e ri nọkẹ ili, wẹ ile wụchanrịn okẹn odogun-agha.

¹⁷ Wẹ k'e ripụ ihiẹn-ugbo lẹ ihiẹn-oriri ụnụ, gbupụ ụmụ ikẹnnyẹ lẹ ikpoho ụnụ; wẹ k'e ripụ atụnrụn lẹ ewu lẹ efin ụnụ, ripụ alị vaịnị lẹ alị figi ụnụ. Wẹ k'e gi ọpịa-agha tikpọchanrịn obodo ụnụ ile zegbu enwẹn ẹ ụnụ gi e dọn ẹnya.

¹⁸ “Kanị, kẹ ogẹn hụ, etikpọchanrịnkọkwọ m ụnụ. Ya kẹ Osolobuẹ ku.

¹⁹ Wẹ jụma, ‘Kị haịn Osolobuẹ wụ Chuku ẹnyi gi mẹ ẹnyi ihiẹnni ile?’ Ị k'a sị wẹ, ‘Kẹ ụnụ dọn latọ m d'e femẹ mmọn ndị alị ọzọ imẹ alị ụnụ, ẹrịra kẹ ụnụ k'a ta nwan afụnfụn fe ndị alị ọzọ imẹ alị wụlẹni nke ụnụ.’

²⁰ D'a hịnị ebọn Jekọpụ ihiẹnni, y'e ku ẹ ghagbama Juda:

²¹ Sị wẹ: Ndị nzuzu marịnlẹni ihiẹn, gọn nị ntịn, ndị nwọn ẹnya bụ w'a ra legha ụzọ, ndị nwọn ntịn bụ w'a ra nụ ihiẹn:

²² Osolobuẹ sị: Ụnụ atụkọ egun m? Egun m ara tu ụnụ? Mmẹ gi ẹjan gbọndọn ohimin, mgbọn itẹbitẹ o jẹnkọlẹni d'a saẹka fetu, ẹbi-mirin nwọn ikẹn kpọ-ntan kpọ-imọn, ọ sakọ ẹka ghafe ẹ; ya zụndẹ ụzụn ile o k'a zụn, ọ sakọ ẹka hughafe ẹ.

²³ Kanị, ndịnị wụ ndị isi-ikẹn, obi wẹ zegbu enwẹn ẹ; a kpahugụọ wẹ, jẹnmẹ nke wẹ.

²⁴ W'a ra sịdẹ enwẹn wẹ, ‘Nị ẹnyi gbaye ni Osolobuẹ wụ Chuku ẹnyi, hụn e zihẹ mirin ogẹn ẹ: kẹ mirin ẹnyi gi a kụn ihiẹn-ugbo kẹ hụn ihiẹn-ugbo gi e mẹ ọhụnma; hụn e mẹ ẹnyi a hụnsọnmẹ mkpụrụ a ghọrị ogẹn ịghọ-mkpụrụ.’

²⁵ Eje-ihiẹn ndị ụnụ rị e mẹ a napụgụọ ụnụ ihiẹn ndịnị; njọ ụnụ a napụgụọ ụnụ ihiẹn rị mma.

²⁶ Ndị eje-ịhịan hụ imẹ ndị nke m, ndị a warị e che ịhịan nọkẹ onyẹ a kpọtọnị nnụnụ ọnyan; wẹ hụ a kpọtọ ọnyan a nwụn ịhịan.

²⁷ Kẹ nnụnụ wẹ nwụn dọn e jun ọga-nnụnụ, ẹrịra kẹ ihiẹn wẹ tụnarịn ịhịan dọn jun iwe wẹ; ya kẹ wẹ gi hi ọdanfịn, wụrụ okẹn-ịhịan,

²⁸ tutu, e dẹn. Ẹfọ eje-ihiẹn ara jun wẹ; w'a ra kuni ndị nwọnlẹni nẹdi ọnụ wẹ ru isi ẹ. W'a ra shi ọnwụn nị ihiẹn ogbẹnnyẹ ru ẹ ẹka.

²⁹ Kị wụ nị eyekọ m wẹ afụnfụn ihiẹnni?” Ya kẹ Osolobuẹ ku; “Kị wụ n'e mẹgwarịkọ m alị nọ ẹnịna?

³⁰ Okẹn eje-ihiẹn a tụ egun e mẹgụọ imẹ alịnị:

³¹ Ndị-amụma rị e bu amụma-ntụ, ndị nchụn-ẹjan hụ e gi ọrụn wẹ a kpa ikẹn — bụ ọ hụdẹ a sụọ ndị nke m ẹrịra! Kị ụnụ k'e mẹ nwan ogẹn ikpanzụụn?