Jerimaya 49 - Ika

Isi Nke Itenẹi Kwasị Ọgụnnaị Ihiẹn Chuku K'e Mẹ Alị Amọnụ

¹ Lee ihiẹn Osolobuẹ ku banyeni ndị alị Amọnụ: “Izrẹlụ amụdẹni ụmụ ra? Onwọn ndị k'e bikin alị a ra? Kị Molẹkị werini ẹgbẹrẹ Gadị? Kị ndị a rụa Molẹkị birini alị ndị Izrẹlụ?

² Lee nwan ihiẹn m k'e mẹ Amọnụ: Ogẹn lala hụn m'e gi yi oro agha, agha a bịa Raba wụ isi-alị ndị Amọnụ; wẹ k'e tikpọ Raba, o họnrin elumelu ẹjan; wẹ k'a dụn ụmụ-alị ile nọkunmẹn'ẹ ọkụn, Izrẹlụ a napụ ndị narịn a ihiẹn ẹ ihiẹn wẹ narịn a. “Mmẹ wụ Osolobuẹ ku ẹ.

³ Alị Hẹsh'bọnụ, gomẹ, nị e tikpọ wẹ alị Aị ndị Amọnụ! Ụmụ alị Raba, kwanma nị ụya! Yiri ni ẹkwa-achọ wẹ gi a kwan ụya; a gbahunmẹ ni, e yi kẹ ụnụ e mẹ imẹ obodo ụnụ. Makẹni wẹ jẹnkọ d'e weridẹ mmọn ụnụ wụ Molẹkị shi alị ọzọ, ya lẹ ndị a ghọn'a lẹ ndị ọzọ a rụnn'a ọrụn.

⁴ “Kị ị rị e gini ọdanmgbugbu ndị rị alị ị a nyan isi? Nị ihiẹn e junkẹ ọdanmgbugbu i, e hu kẹ mirin? Kịnị k'ị rị a nyannị isi — nwagbọọ kpahuni, hụn gi ihiẹn bu ọda o nwọn e dọn ẹnya, a sị, ‘Onyẹ k'a maye m ọgụn?’

⁵ “M sikọ nwan d'e wẹhẹn'i ihiẹn-egun; o sikọ d'e fihunmẹ i azụụn ile. Mmẹ, Onyẹ hụn nwọn ihiẹn ile, Osolobuẹ ihiẹn ile rị okpuru ẹ, ku ẹ. Ihiẹn egun hụ sikọ d'a chụpụ ụnụ ile onwọnni onyẹ k'e wegbama ndị gbayịyanị.

⁶ Kanị, o mẹgụ, m k'e mẹzi n'ọ rịnị ndị Amọnụ mma.” Mmẹ wụ Osolobuẹ ku ẹ.

Ihiẹn Chuku K'e Mẹ Alị Ẹdọm

⁷ Nke alị Ẹdọm, lee ihiẹn Osolobuẹ ihiẹn ile rị okpuru ẹ ku: “Ndị marịn ihiẹn arịzịdẹ nwan imẹ Tẹmanị rị alị Ẹdọm ra? Ndị marịn ihiẹn rịn'a amazị ye ezigbo ndụnmọdụn ra? Amamihiẹn wẹ ile e wiwigụọ?

⁸ Ndị bi Dedanị, gbapụhakwọ nị, d'a warị imẹ okporo, nị m k'e tikpọ ebọn Isọ wụ Ẹdọm ogẹn m'e gi ye ẹ afụnfụn.

⁹ Omẹni ndị a ghọ vaịnị bịa d'e kunrun i, ẹlẹ wẹ ghọ a ghọhọdụdẹ wẹ ẹkẹrẹ? Omẹni ndị ohin bịa imẹ abalị d'e zun, ẹlẹ wẹ zunrun hụn wẹ k'a s'ẹka zun a la wẹ ndị họdụnị tọ?

¹⁰ Kanị, mmẹ nwẹn jẹnkọ d'a gba ebọn Isọ wụ Ẹdọm ẹka, m k'e kpu ebe ile ọ warị oghe, ọ sakọzị ẹka zueri. M k'e tikpọ kẹ mmụ a kẹ ndị ebọn ẹ kẹ ndị nọkunmẹn'ẹ, ọ rịkọzị a.

¹¹ Latọ nị oku ụmụ ụnụ ụnụ k'a nwụnnahịn, m k'e dọnmẹ wẹ; inyẹnmẹ ụnụ ụnụ jẹnkọ d'a nwụnnahịn, wẹ gimẹ m nwan dọn ẹnya.”

¹² Ẹghẹẹ, Osolobuẹ sị, “Ebe o mẹni ndị furulẹni nị wẹ rarị afụnfụn rị imẹ mkpuni sikọ d'a rarịrị a, nị ụnụ la ọfẹ? Mba, ụnụ k'a tarịrị afụnfụn hụ.

¹³ Mmẹ wụ Osolobuẹ rị nwan e kun enwẹn m, e ku ẹ nị m k'e tikpọchanrịn Bozra wụ isi-alị Ẹdọm, o họnrin ihiẹn-ifẹnrẹn lẹ ebe nwọnlẹni ihiẹn rịn'a lẹ ihiẹn wẹ gi a bụ ọnụ; ụmụ-alị ile nọkunmẹn'ẹ k'a tọ mkpọkọ-mkpọkọ. Mmẹ wụ Osolobuẹ ku ẹ.”

¹⁴ Mmẹ wụ Jerimaya a nụgụọ ozi gha ẹka Osolobuẹ bịa: o zijẹngụọ onyẹ-ozi alị ichẹn-ichẹn d'a sị wẹ, “Kịgbama nị d'a lụsọn Ẹdọm agha! Lihi ni d'a lụ a agha ahụn!”

¹⁵ Lee ẹ, m k'e mẹ i wụrụ alị nwọnlẹni ihiẹn ọ wụ ebe ibe ẹ rị, mẹ ịhịan ile rị ụwa legberi i.

¹⁶ Egun i wẹ rị a tụ lẹ ihiẹn i rị e ro nị ya k'ị wụ e dufiegụọ ị, onyẹ nwẹn bi ẹgbata ọmụma eje-ihiẹn ghalẹni e ru ẹhụ, onyẹ nwẹn bi ebe kachanrịn elu e jẹn elu òke! Ọsụọn'a ị tụn ụlọ ị ye imẹ elu kẹ ugọn, m jẹnkọ d'a gha ebẹhụ nutu i. Mmẹ wụ Osolobuẹ ku ẹ.

¹⁷ Ẹdọm k'a wụrụ ihiẹn egun, hụn onyẹ ọwụlẹ ghafen'ẹ k'e gi jụsọhị; wẹ k'a gha a ben'ẹ ọrịọ yeni ihiẹn hụn mẹn'ẹ.

¹⁸ Mmẹ wụ Osolobuẹ sị, “Kẹ m dọn tikpọ Sodọm lẹ Gomora lẹ alị ndị nọkunmẹni wẹ, nke wụnị onwọnzini onyẹ bin'ẹ, ẹrịra kẹ m k'e tikpọ Ẹdọm ịhịan ebikọzị a.

¹⁹ “Lee ẹ! Kẹ ẹwọrọ dọn a gha ọfịa mkpẹnrẹn Iyi-Jọdanị a pụha ebe atụnrụn nọ a kpa nni mkpẹnrẹn mirin hụ ghalẹni a tahị: ẹrịra kẹ m k'a maye Ẹdọm idẹnmuzi, mẹ wẹ gba alị wẹ tọ. Onyẹ m chọ kẹ m e gi mẹ ẹ. Onyẹ nọ kẹ mmẹ? Onyẹ k'a jụ m ihiẹn ọwụlẹ? Elee eze k'a s'ẹka che m ọgụn?”

²⁰ Gọn ni nwan ntịn ihiẹn Osolobuẹ chọ n'o mẹ alị Ẹdọm, ihiẹn ọ chọ n'o mẹ ndị bi obodo Tẹmanị rị Ẹdọm: Ndị k'a mayeni wẹ k'a kpụnrụnrịrị ụmụ wẹ, tikpọpụ alị wẹ hụn wẹ nọ e ri.

²¹ Ọdịdan wẹ k'e mẹhunmẹ ụwa; ẹkwan wẹ k'e rudẹ Ohimin-ufie.

²² Lee ẹ, wẹ k'e fekwasị alị Bozra rị Ẹdọm kẹ ugọn dọn e feshi elu, a shịapụ nku e fetu d'e buru ihiẹn. Ogẹn ahụn, obi k'a nọ ndị odogun-agha Ẹdọm kẹ obi okpoho imẹ rị e mẹ.

Ihiẹn Chuku K'e Mẹ Obodo Damaskọsụ

²³ Nke obodo Damaskọsụ, “Ndụn a gụgụọ alị Hamatị lẹ alị Apadị — makẹni wẹ nụ eje-ozi; obi e dẹnhingụọ wẹ yeni uhue, obi a nọ wẹ kẹ ohimin ẹbi rị a kpọ, obi eruzini wẹ alị.

²⁴ Ndụn a gụchanrịn ndị Damaskọsụ, a gbakin wẹ azụụn. Egun, uhue lẹ ụfụ k'e kwọndọn wẹ kẹ okpoho imẹ ri e mẹ.

²⁵ Obodo nwẹn a gbagụọ okpokoro! Obodo nwẹn te a kpọnị; obodo ịghọghọ nwẹn!

²⁶ Ẹghẹẹ, agha k'e gbu ikorọbịa a tọ ọgbara-ogbe ndị rịn'a; nke ndị-agha a k'a gụ ụhụọhịn hụ.” Ya kẹ Osolobuẹ ihiẹn ile rị okpuru ẹ ku.

²⁷ “M k'a mụ ọkụn ye mgbọn Damaskọsụ, o k'a dụnpụ ebe ile eze wụ Bẹn-Hadadị rụn wẹ gi e dọn ẹnya.”

Ihiẹn Chuku Gi Nebukadineza Mẹ Alị Kẹda Lẹ Hazọ

²⁸ Lee ihiẹn Osolobuẹ ku banyeni alị Kẹda lẹ alị-eze ndị rị alị Hazọ nị Nebukadineza wụ eze Babilọnụ d'e mẹri wẹ, “D'a lụsọn nị Kẹda agha! Gbu ni ndị ahụn bi ẹbamịn ọwụwa-ẹnyanwụn.

²⁹ Wẹ k'a kpụnnarịn wẹ ewu lẹ atụnrụn wẹ, kpọnnarịn wẹ ẹkwa lẹ ihiẹn ile wẹ gi e tumẹ ọdụ, kpụnrụn anyịnyan-mkpukpuke wẹ. Wẹ k'a gha e yi wẹ oro, a sị, ‘Ihiẹn-egun e fihunmẹ ụnụ ụzọ ile!’ ”

³⁰ Osolobuẹ sị, “Ndị Hazọ, gbakwọ nị ọsọ; kwarịkwọ nị d'a warị, nị Nebukadineza eze Babilọnụ e zugụọnị ụnụ umẹ; o rotọgụọ ihiẹn o k'e mẹ ụnụ.”

³¹ Osolobuẹ sị a, “D'a lụsọn nị alị hụ agha; alị hụ ẹhụ fu nwọnlẹni nsọngbu, enwọn wẹ mgbọn; w'a ra kpọkin ọnụ-mgbọn; uwẹ sụọ bi.

³² Wẹ k'a narịn wẹ anyịnyan-mkpukpuke wẹ lẹ anụ wẹ ndị ọzọ. M k'e fe ndịnị ye azụụn ile, ndịnị bi atụ hụn a kọ ntutu azụụnnị lẹ azụụnnị. M k'e zihẹni wẹ nsọngbu azụụn ile. Mmẹ wụ Osolobuẹ ku ẹ.

³³ “Anụ-ọfịa jẹnkọ d'e bikin Hazọ; o k'a gba okpokoro jẹnrin ejẹn. Ịhịan ebikọzị a, ịhịan a kwahakọzị a.”

Ihiẹn Chuku K'e mẹ Alị Ẹlam

³⁴ Ọnwan wụ ozi Osolobuẹ zi Jerimaya onyẹ-amụma banyeni alị Ẹlam. Ogẹn Zẹdikaya gi kịma alị Juda nke ọhụn k'o gi zi ẹ ozini:

³⁵ “Osolobuẹ ihiẹn ile rị okpuru ẹ sị: Lee ẹ, m k'a kpagipụ ụta Ẹlam — ụta hụn wụ ikẹn alị Ẹlam.

³⁶ M k'a gha ẹbamịn ẹnọ rị okpuru igwere zihẹni Ẹlam nsọngbu; e mẹ m wẹ bupụ wẹ shi ẹbamịn ẹnịnọ ahụn. Onwọnni alị wẹ jẹnkọlẹni d'a kpụnshi wẹ.

³⁷ M k'e mẹ ndị-iṅẹnrẹn alị Ẹlam mẹri ẹ, mẹ ndị chọkọ wẹ ogbugbu gbu wẹ; m k'e gi olulu sọn wẹ, tikpọ wẹ eje-ntikpọ. M k'e gi ọpịa-agha chụ wẹ d'e ru n'a gụchanrịn wẹ. Mmẹ wụ Osolobuẹ ku ẹ.

³⁸ “M k'e bu ukpo-eze m che Ẹlam, gbu eze ẹ lẹ ndị-isi ẹ.

³⁹ “Kanị omẹgụ, m k'e mẹzi ihiẹn masịnị Ẹlam. Mmẹ wụ Osolobuẹ ku ẹ.”