Jerimaya 47 - Ika

Isi Nke Ẹsa Kwasị Ọgụnnaị Ihiẹn K'e Mẹ Alị Filistia

¹ Ọnwan wụ ihiẹn Osolobuẹ gwa Jerimaya onyẹ-amụma banyeni ndị alị Filistia kẹ Fẹro kelẹni lụsọn obodo Gaza agha.

² Osolobuẹ sị: “Lee kẹ iyi rị alị rị ẹbamịn-ugu dọn rị e ru — Wẹ jẹnkọ d'e jun pụ ọnụ, huru — huru alị lẹ ihiẹn ile rịn'a huru obodo ndị rị alị hụ lẹ ndị bi imẹ wẹ. Ịhịan ile k'a rị e yi oro; ndị bi alị hụ k'a rị e goo,

³ ogẹn wẹ e gi nụ nkiti-ụkụ ẹshin-agha lẹ ụzụn ụgbọ-anyịnyan agha lẹ ụkụ ụgbọ-ẹshin ndị-iṅẹnrẹn wẹ gi lala. Ndị nẹdi elekọdẹ ẹnya azụụn nị wẹ yeni ụmụ wẹ ẹka makẹni ẹka a lịlọpụgụọ wẹ yeni egun.

⁴ Makẹni ogẹn e rugụọ w'e gi tikpọ ndị alị Filistia ile, napụchanrịn ndị Taya-lẹ-Sidọnụ ndị ile te họdụnị nkẹ e yeni wẹ ẹka. Osolobuẹ e d'e tikpọ ndị Filistia, ndị ahụn gha alị Kaftọ wụ Kriti ohimin fihunmẹ bịa d'e biri alị Filistia.

⁵ Ndị obodo Gaza rị alị Filistia k'a kpụnpụ ntutu wẹ, nị ụya e ru wẹ isi. Ndị obodo Ash'kẹlọnụ rị alị Filistia ahụnkọ ọnụ ku oku. Ndị họdụ alị-aradan Filistia, elee mgbe kẹ ụnụ e bekikabehi enwẹn ụnụ ẹhụ — ebe ụnụ rị a kwan ụya?!

⁶ “ ‘Euu ọpịa-agha Osolobuẹ! ele mgbe y'e gbubehi? Kin azụụn imẹ ọbụọ ị; gbubehi, zu ikẹn!’

⁷ Nanị k'o dọn nwan zu ikẹn, bụ Osolobuẹ a sịgụọ a d'a maye ndị Ash'kẹlọnụ rị alị Filistia; o tumẹgụọ a n'o gbupụ alị ndị ahụn rị mkpẹnrẹn Ohimin?”