Jerimaya 46 - Ika

Isi Nke Isin Kwasị Ọgụnnaị Ihiẹn Osolobuẹ Sị O K'e Mẹ Alị Ichẹn-ichẹn

¹ Ọnwan wụ ihiẹn Osolobuẹ gwa Jerimaya wụ onyẹ-amụma banyeni alị ichẹn-ichẹn:

Ihiẹn Osolobuẹ K'e Mẹ Alị Ijiptu

² Nke Ijiptu: ihiẹnni kẹ Osolobuẹ ku banyeni ndị-agha Fẹro Nẹko, eze Ijiptu — ndị-agha a hụn Nebukadineza wụ eze Babilọnụ mẹri imẹ alị Kakẹmishi, mkpẹnrẹn Iyi-Yufretisi ahụa nke ẹnọ eze wụ Jehoyakim nwa Josaya kịma Juda:

³ “Buruni ihiẹn-ọgụn ụnụ — kẹ akpaịn uku kẹ akpaịn nta — nị ọnụ shi agha!

⁴ Kwademẹ ni ẹshin lẹ ụgbọ-anyịnyan agha! Nyinrin ni ẹshin-agha ụnụ! Werisọnmẹ ni ọnọdị agha! Kpuru ni okpu-agha! Sụọnchanpụ nị obo ụnụ! Yiri ni ẹwuru-igwe!

⁵ “Kanị ihiẹn m rị a hụn wụ ọnwan: ‘Egun sikọ d'a tụgbu wẹ! A gbama wẹ ọsọ! Wẹ k'e mẹri wẹ, a gba wẹ ụkụ-akpalẹ-alị — elekọdẹ wẹ ẹnya azụụn! Egun sikọ e jun ụzọ ile!’ Ya kẹ Osolobuẹ ku.

⁶ “Kanị onyẹ-ọsọ as'ẹka gbanahịn ọnwan; odogun-agha as'ẹka wanahịn ọnwan! Imẹ alị rị ẹbamịn-ugu, mkpẹnrẹn Iyi Yufretisi kẹ wẹ k'a nọ a kpọgburu a dan, a dangungwọn. Ya kẹ Osolobuẹ ku.

⁷ “Onyẹ wụ hụnnị rị a fụli elu kẹ Iyi Naịlị — nọkẹ iyi jun pụ ọnụ?

⁸ Ijiptu rị a fụli kẹ Iyi Naịlị, kẹ Iyi dọn e jun pụ ọnụ. Ijiptu hụ a sị, ‘M k'e jun pụ ọnụ, rukpumẹ ụwa ile; m k'e tikpọ obodo ichẹn-ichẹn lẹ ndị bi imẹ wẹ.’

⁹ “Ẹshin-agha, zụnban nị ọgbọ-agha! Ndị ụgbọ-anyịnyan, nyin ni ọnwụn-ọnwụn! Ndị odogun-agha, wẹ shi ihun — ndị Kushi lẹ Putu rịn'a hụn e bu akpaịn lẹ ndị Ludu hụn a gba ụta!

¹⁰ “Kanị Di-nwọnni-ẹnyi, Osolobuẹ ihiẹn ile rị okpuru ẹ, nwọn ụhụọhịn hụ — ụhụọhịn mmẹgwarị rọ, ụhụọhịn o gi e mẹgwarị ndị-iṅẹnrẹn ẹ. Ọpịa-agha k'e gburi, rijun ẹfọ, ra ẹdeke rajun ẹfọ. Makẹni Di-nwọnni-ẹnyi, Osolobuẹ ihiẹn ile rị okpuru ẹ, k'e gbu wẹ, lekẹ sị wẹ wụ anụ o gi chụn ẹjan imẹ alị hụ rị ẹbamịn-ugu, mkpẹnrẹn Iyi-Yufretisi.

¹¹ Ọ sụọkwọ ị jẹnmẹ Gilẹdị d'a chọrị ọgụn, ịyụ Ijiptu hụn kelẹni hụn ihiẹn, y'a dịnhịnkọ.

¹² Alị ile k'a nụ oku ihiẹn ifẹnrẹn ụnụ; ụwa ile sikọ d'a nụ kẹ ụnụ rị a kwan ụya: ebe odogun nọ a kpọgburu odogun, wẹ ẹbụbụọ hụ a dan!”

¹³ Ọnwan wụ ihiẹn Osolobuẹ gwa onyẹ-amụma wụ Jerimaya banyeni ọbịbịa Nebukadineza wụ eze Babilọnụ k'a bịa d'a lụsọn alị Ijiptu agha:

¹⁴ “D'a gwa alị Ijiptu ile — kẹ ndị rị Mig'dọlụ kẹ ndị rị Mẹmfisi lẹ Tapanhẹsị: ‘Kwademẹ ni agha, makẹni agha rị e gburi alị ndị nọkunmẹni ụnụ!’

¹⁵ Kị haịn ndị odogun-agha ụnụ gi fiẹnrin mọmọmọ? Ẹghẹẹ, asakọ wẹ ẹka turu, makẹni mmẹ wụ Osolobuẹ nutu wẹ.

¹⁶ M k'e mẹ ndị bugbu enwẹn wẹ ọda a kpọgburu a dan; wẹ k'a rị a dankwasị ibe wẹ gbakọnị. Wẹ k'a rị a sị ibe wẹ, ‘Lihi ni, nị ẹnyi laburu ndị nke ẹnyi, nị ẹnyi lakin alị ẹnyi, wanahịn ọpịa-agha ndị-iṅẹnrẹn ẹnyi.’

¹⁷ Wẹ k'a nọ ebẹhụ e yi, ‘Fẹro eze Ijiptu wụhụ onyẹ-ọnụ! Ogẹn nkẹ o gi mẹ ihiẹn rị mma a nahịn a.’

¹⁸ Mmẹ, Eze hụn ẹfan a wụ Osolobuẹ ihiẹn ile ri okpuru ẹ, rị e ku ẹ nị: Nebukadineza k'a bịarịrị d'e mẹ ụnụ ihiẹn, mmanị m nwụnhụn anwụnhụn! O k'a ka ibe ẹ nọkẹ ugu Tabọ; O k'a ka ibe ẹ nọkẹ Ugu Kamẹlụ hụn kachanrịn elu e jẹn mkpẹnrẹn ohimin.

¹⁹ “Ndị bi Ijiptu, buru ni ẹkpa, nị wẹ sikọ d'a kpụnrụn ụnụ, Makẹni obodo Mẹmfisi k'a gba okoro, onwọnni onyẹ k'a họdụ imẹ ẹ.

²⁰ “Ijiptu nọ kẹ nwa-efin ma mma ọda-ọda; kanị ẹnwụn lala d'a gba a — ẹnwụn gha ẹbamịn-ugu lala.

²¹ Ndị alị ọzọ ahụn wẹ we d'a lụnị wẹ agha du kẹ nwa-efin, kanị wẹ nwẹn k'e sọn wẹ gbala — asakọ wẹ ẹka turu, makẹni ụhụọhịn w'e gi tikpọ wẹ rọ — ogẹn wẹ e gi ye wẹ afụnfụn rọ.

²² Ijiptu k'a ma ọsụa (ọsụọ) kẹ agwọ gbapụkọnị, makẹni wẹ sikọ d'e gi ikẹn hi-ogbe maye ẹ; wẹ k'e bu anyụn bịa d'a maye wẹ kẹ ndị e gbu osisi.

²³ Wẹ k'e gbukpọ ndị Ijiptu lekẹ ebe wẹ n'e gbukpọ ẹgboko, ọsụọn'a nị e bukẹ wẹ ọda, karịdẹ igurube, nị w'a ra s'ẹka gụnmarịn wẹ. Ya kẹ mmẹ wụ Osolobuẹ ku.

²⁴ Ifẹnrẹn k'e mẹ nwa-agbọnị wụ alị Ijiptu; o k'a ban ẹka ndị ahụn gha ẹbamịn-ugu lala.”

²⁵ Osolobuẹ ihiẹn ile rị okpuru ẹ hụn wụ Chuku Izrẹlụ, sị, “M'e d'e ye Amonu, mmọn alị Tẹbẹsi rị Ijiptu, afụnfụn; ya lẹ Fẹro eze Ijiptu lẹ Ijiptu lẹ mmọn a rị ichẹn-ichẹn lẹ ndị-nze ẹ — Fẹro lẹ ndị gi Fẹro dọn ẹnya.

²⁶ M k'e we wẹ che ẹka ndị chọkọ wẹ ogbugbu, ẹka Nebukadineza eze Babilọnụ lẹ ndị isi-agha a. “Kanị, o mẹgụ, ịhịan jẹnkọ d'e bizi alị Ijiptu k'o dọn rị mbụ. Mmẹ wụ Osolobuẹ ku ẹ.

Chuku E Kuzi Ẹ N'o K'a Rịzịnị Izrẹlụ Mma

²⁷ “Odibo m, Jekọpụ, atụkwọlẹ egun; Izrẹlụ, anịkwọlẹ ndụn gụ ị. M jẹnkọ d'a gha alị ahụn tegbu enwẹn ẹ ị rị zụọpụha ị, m k'a gbapụha ẹbozo i imẹ alị hụ wẹ kpụnjẹn wẹ. Jekọpụ jẹnkọ d'e bizi udọn lẹ ndọnkwa, onwọnzini onyẹ k'e rọn ẹ egun.

²⁸ “Mmẹ wụ Osolobuẹ rị a sị yụ wụ odibo m Jekọpụ atụlẹ egun. Ọsụọn'a m tikpọchanrịn ndị alị ichẹn-ichẹn m feyịya ụnụ ye, etikpọchanrịnkọ m ụnụ. M k'e ye i hụ afụnfụn nị ụnụ marịn ihiẹn, kanị afụnfụn furuni sụọ; agbachanrịnkọ m ụnụ nkịtịn.”