Jerimaya 44 - Ika

Isi Nke Ẹnọ Kwasị Ọgụnnaị Ihiẹn Gbu Ndị Juda Wụ Ịrụa-mmọn

¹ Ọnwan wụ oku Osolobuẹ gwa Jerimaya banyeni ndị Juda ile bi alị ichẹn-ichẹn imẹ Ijiptu. Alị ichẹn-ichẹn ndị ahụn wụ Mig'dọlụ, Tapanhẹsị, Mẹmfisi lẹ Patrọsị:

² Osolobuẹ ihiẹn ile ri okpuru ẹ, hụn wụ Chuku Izrẹlụ, sị, “Ụnụ e gigụọ ẹnya ụnụ hụn eje-ihiẹn ile m mẹ obodo Jerusalẹm lẹ obodo ọzọ ile rị alị Juda, nke wụnị wẹ ile gba nwan okpokoro tannị, mẹ mkpọkọ-mkpọkọ;

³ eje-ihiẹn ndị bi imẹ wẹ mẹ haịn wẹ gi rị ẹrịra. Njọ wẹ kẹ wẹ gi kpasu m iwe — nsẹnsi w'a mụyeni mmọn lẹ mmọn wẹ rị a rụa, mmọn ndị ụnụ lẹ wẹ lẹ ndị nẹdi ụnụ kanị marịnlẹni.

⁴ E zisọnmẹ m idibo m wụ ndị-amụma d'a gwa ụnụ oku. Wẹ nọ gbasọnmẹ ụnụ mkpịnsịn-ẹka ẹnya, a sị ụnụ, ‘Emẹzilẹ ni arụnị e ze m ize!’

⁵ Kanị ndị Jerusalẹm lẹ ndị Juda egọnni ntịn, egini wẹ dọn; akụsịnị wẹ eje-ihiẹn wẹ rị e mẹ; achụnbehini wẹ ẹjan wẹ rị a chụnnị mmọn-lẹ-iyi.

⁶ Ya m nọ gi olulu sọn wẹ nọkẹ ọkụn. Ọ dụn alị ichẹn-ichẹn rị Juda lẹ ọgbara-ogbe rị obodo Jerusalẹm, wẹ gi nwan gba okpokoro, họnrin mkpọkọ-mkpọkọ k'o rị nwan tannị.

⁷ “Osolobuẹ ihiẹn ile rị okpuru ẹ, hụn wụ Chuku Izrẹlụ rị nwan a sị: Kị ụnụ rị e mẹni enwẹn ụnụ okẹn eje-ihiẹnni, e gi ẹ e gbupụchanrịn ikẹnnyẹ lẹ ikpoho lẹ ụmụ-ẹka lẹ ndị rị a ra ẹran imẹ Juda, ịhịan gizilẹni họdụnị ụnụ?

⁸ Kị ụnụ rịzị nwan e gini ihiẹn ụnụ gi ẹka ụnụ mẹmẹ a kpasu m iwe? A mụye nsẹnsi e gi a rụa mmọn-lẹ-iyi rị alị Ijiptu ụnụ bịa d'e biri. Ụnụ jẹnkọ tan d'e gi ẹ tikpọ enwẹn ụnụ. Ogẹn ahụn, ụnụ e họnrin ihiẹn wẹ gi a bụ ọnụ lẹ ihiẹn-ifẹnrẹn ẹnya ndị alị ndị ọzọ ile rị elu-ụwa.

⁹ Ụnụ a zọgụọdẹ eje-ihiẹn ile ndị nẹdi ụnụ lẹ ndị-nze Juda lẹ inyẹnmẹ wẹ mẹsọnmẹ? Ra ụnụ a zọgụọ eje-ihiẹn ụnụ lẹ inyẹnmẹ ụnụ mẹsọnmẹ imẹ alị Juda lẹ ọgbara-ogbe Jerusalẹm?

¹⁰ “Ụnụ ewelụakwọnị nwan enwẹn ụnụ alị mọbụ ye mmẹ wụ Osolobuẹ ọghọ d'e ru tannị; ụnụ edọnmẹkwọnị iwu lẹ uhi m tumẹni ụnụ lẹ ndị nẹdi ụnụ.

¹¹ “Osolobuẹ ihiẹn ile rị okpuru ẹ, hụn wụ Chuku Izrẹlụ, sị nwan: A kwademẹgụọ m nị m jẹnkọ d'e mẹshi ụnụ ikẹn, tikpọzịkwọ ndị Juda ile.

¹² M jẹnkọ d'e gbupụ ndị Juda hụ ile họdụnị hụn bu isi-ikẹn bịa alị Ijiptu d'e biri. Wẹ k'a nwụntọ Ijiptu ebeni, ọpịa-agha lẹ ẹgụn k'e gbu wẹ — kẹ onyẹ-uku kẹ onyẹ-nta. Ọpịa-agha lẹ ẹgụn k'e gbu wẹ. Wẹ k'a wụrụ ihiẹn wẹ gi a bụ ọnụ lẹ ihiẹn a tụ ịhịan egun lẹ ihiẹn wẹ gi a kpọ iyi lẹ ihiẹn ifẹnrẹn.

¹³ M k'e gi agha, ẹgụn lẹ eje-emu ye ndị bi alị Ijiptu afụnfụn kẹ m dọn ye ndị rị obodo Jerusalẹm.

¹⁴ Onwọnni akpụ onyẹ ohu imẹ ndị Juda họdụnị hụn lashi Ijiptu d'e biri hụn jẹnkọ d'a wanahịnnị mọbụ hụn isi lakin alị Juda, ọsụọn'a n'ọ rị nwan a dụ wẹ nị wẹ lakin alị Juda d'e biri; onwọnni akpụ onyẹ ohu imẹ wẹ k'a lakinni mmanị akpụ madụ ole.”

¹⁵ Ya kẹ ikẹnnyẹ ile hụn marịn nị inyẹnmẹ wẹ chụnyeni mmọn-lẹ-iyi ẹjan lẹ ikpoho ile rị igunrun hụ hi-ogbe lẹ ndị Juda ile hụn bi imẹ Patrọsị imẹ alị Ijiptu nọ sị Jerimaya,

¹⁶ “Ẹnyi e gọnkọdẹ ntịn ihiẹn ahụn ị sị nị ya kẹ Osolobuẹ sị ẹnyi mẹ!

¹⁷ Ẹnyi jẹnkọ d'e mẹrịrị ihiẹn ile ẹnyi kwe mmọn nkwa: Ẹnyi k'a chụnyeni mmọn hụ wụ Eze-okpoho Elu-igwee ẹjan — mụyen'ẹ nsẹnsi, tụyen'ẹ manya, kẹ ẹnyi lẹ ndị nẹdi ẹnyi lẹ ndị-nze ẹnyi lẹ ndị-isi ẹnyi dọn mẹ imẹ obodo ndị rị alị Juda lẹ ọgbara-ogbe Jerusalẹm. Ogẹn ahụn kẹ ẹnyi gidẹ nwọn ihiẹn-oriri, ihiẹn hụ a ghanị ẹnyi, onwọnni eje-ihiẹn mẹni ẹnyi.

¹⁸ Kete ẹnyi chụnbehini Eze-okpoho Elu-igwee ẹjan, tụyebehin'ẹ manya, onwọnzini ihiẹn ẹnyi nwọn, ọpịa-agha lẹ ụnwụn hụ e gbu ẹnyi.”

¹⁹ Ikpoho ndị ahụn nọzị sị, “Kẹ ẹnyi rị a chụnyeni Eze-okpoho Elu-igwee ẹjan w'a dụn ọkụn, a tụyen'ẹ manya, a kpụ donọtụ yin'ẹ, onwọnni hụn ndị di ẹnyi kwadọnlẹni.”

²⁰ Ya kẹ Jerimaya nọ sị ndị Juda hụ ile shịarị a oku, kẹ ikẹnnyẹ kẹ ikpoho, ndị Juda ile rị ebẹhụ,

²¹ “Ụnụ amarịn nị ịya kẹ Osolobuẹ nyanhan mẹ ụnụ ihiẹn? Nị nsẹnsi ile ụnụ lẹ ndị nẹdi ụnụ mụye lẹ hụn ndị-nze ụnụ lẹ ndị-isi ụnụ lẹ ndị alị Juda ile mụye imẹ obodo ndị rị alị Juda lẹ ọgbara-ogbe Jerusalẹm k'ọ nyanhan mẹ ụnụ ya?

²² Makẹni Osolobuẹ asazịnị ẹka din eje-ihiẹn lẹ arụ ile ụnụ rị e mẹ haịn alị ụnụ gi nwan wụrụ ihiẹn wẹ gi a bụ ọnụ lẹ ebe gba okpokoro la iwi, alị ịhịan bizilẹni, k'o dọn rị tannị.

²³ Nsẹnsi ụnụ mụyeni mmọn lẹ njọ ụnụ mẹ Osolobuẹ lẹ oku Osolobuẹ lẹ iwu ẹ, uhi ẹ lẹ nkuzi ẹ ụnụ gilẹni bi, uwẹ haịn okẹn ihiẹnni gi kunrun ụnụ kẹ ụnụ dọn nwan rị a hụn a.”

²⁴ Jerimaya nọzị sị wẹ ile, tụmadụ ikpoho, “Ndị Juda ile rị Ijiptu, gọn ni ntịn ihiẹn Osolobuẹ ku!

²⁵ Osolobuẹ ihiẹn ile rị okpuru ẹ hụn wụ Chuku Izrẹlụ, sị: ụnụ lẹ inyẹnmẹ ụnụ e kugụọ a ọnụ, mẹ ẹ ẹka, ebe ụnụ nọ sị, ‘Ẹnyi sikọ d'e mẹrịrị nkwa ẹnyi kwe Eze-okpoho Elu-igwee: ẹnyi k'a mụyen'ẹ nsẹnsi, tụyen'ẹ manya.’ Dikẹnmẹ ni nwan! Mẹmẹ ni nwan nkwa ụnụ kwe! Mẹsọnmẹ ni ihiẹn hụ ụnụ kwe nkwa a!

²⁶ Ka gọnkwọ nị nwan ntịn, ndị Juda ile bi alị Ijiptu: Osolobuẹ sị, ‘Mmẹ wụ Osolobuẹ rị e kun Okẹn Ẹfan m, nị onwọnzini onyẹ Juda ọwụlẹ bi alị Ijiptu k'e kun ẹfan m — onwọnni onyẹ k'a sị, “Ma Osolobuẹ ihiẹn ile rị okpuru ẹ!”

²⁷ M k'a nị eje-ihiẹn mẹ wẹ, ẹlẹ ihiẹn rị mma; onyẹ ọwụlẹ imẹ ndị Juda bi Ijiptu jẹnkọ d'a gha ọpịa-agha mọbụ ẹgụn la — d'e runi wẹ ile a nwụnchanrịn.

²⁸ Ndị k'a hụn isi wanahịn ọpịa-agha, gha Ijiptu lụaha Juda ebukọ ọda kaka! Ogẹn ahụn kẹ ndị Juda k'a họdụ imẹ alị Ijiptu e gi marịn oku onyẹ k'a bụnnị, oku m ra nke wẹ.’

²⁹ Osolobuẹ sịzị, ‘M jẹnkọ d'e mẹ ihiẹn ụnụ e gi marịn nị m k'e ye ụnụ afụnfụn ebeni, kẹni ụnụ marịn nị ẹlẹ m rị e ku ẹ mmaka nị m k'e mẹ ụnụ ihiẹn.

³⁰ Mmẹ wụ Osolobuẹ rị nwan e ku ẹ nị m jẹnkọ d'e we Hofra wụ Fẹro eze Ijiptu che ẹka ndị-iṅẹnrẹn ẹ rị a chọ nị wẹ gbu ẹ — kẹ m dọn we Zẹdikaya wụ eze ụnụ ndị Juda che ẹka eṅẹnrẹn ẹ wụ Nebukadineza eze Babilọnụ hụn chọkọ a ogbugbu.’ ”