Jerimaya 43 - Ika

Isi Nke Ẹtọ Kwasị Ọgụnnaị Ndị Juda Họdụnị A Jụ Oku Osolobuẹ

¹ Mgbe Jerimaya gi gwachanrịngụ ndị ahụn oku ile Osolobuẹ wụ Chuku wẹ ku — hụn Osolobuẹ zi ẹ zi wẹ,

² ya kẹ Azaria nwa Hoshaya lẹ Johananị nwa Karia lẹzi ikẹnnyẹ ndị-ọzọ e mẹkarị enwẹn wẹ nọ sị Jerimaya, “Ntụ k'ị rị a tụ! Ẹlẹ Osolobuẹ wụ Chuku ẹnyi zi i d'a sị ẹnyi, ‘Ejẹnkwọlẹ ni Ijiptu d'e biri.’

³ Baruku nwa Nẹria rị e nu i, nị ị we ẹnyi ye ndị Babilọnụ, kẹni wẹ gbu ẹnyi mọbụ kpụn ẹnyi shi alị Babilọnụ.”

⁴ Ya Johananị nwa Karia lẹ ndị ndị-isi agha hụ ile lẹ ndị ahụn ile nọ pa oku Osolobuẹ hụn sị wẹ nọdị imẹ Juda.

⁵ Johananị nwa Karia lẹ ndị-isi agha hụ ile nọ kịrị ndị Juda hụ ile họdụnị, hụn ghasọnmẹ alị ichẹn-ichẹn wẹ te gbashi kinhẹn d'e biri alị Juda,

⁶ kịrị uwẹ lẹ ndị ahụn ile Nebuzaradanị hụn a kị ndị-agha e che eze ndị Babilọnụ nche latọnị Gẹdalia nwa Ahikam nwa Shafanị, kẹ ikẹnnyẹ kẹ ikpoho kẹ ụmụ-ẹka kẹ ikpoho ile wụ mmụ eze kẹ onyẹ-amụma wụ Jerimaya kẹ Baruku nwa Nẹria.

⁷ Ya wẹ nọ shi alị Ijiptu. Emẹni wẹ ihiẹn Osolobuẹ gwa wẹ. Wẹ nọ rukwọrị Tapanhẹsị imẹ alị Ijiptu.

⁸ Imẹ obodo hụ wụ Tapanhẹsị kẹ Osolobuẹ nọ sị Jerimaya,

⁹ “Buru ọmụma ndị hi ogbe, y'e li wẹ ye imẹ ụrụa rị ẹhụ mkpọnyin wẹ gha a banye obi-eze Fẹro eze Ijiptu, obi-eze ẹ hụn rị imẹ Tapanhẹsị ebẹhụ. Nọ idẹnya ndị Juda rị ebẹhụ li ọmụma ndị ahụn.

¹⁰ “Y'a sị wẹ, ‘Osolobuẹ ihiẹn ile rị okpuru ẹ, hụn wụ Chuku Izrẹlụ sị: M jẹnkọ d'e zihẹ odibo m wụ Nebukadineza eze Babilọnụ. M k'e tumẹ ukpo-eze ẹ ye elu ebeni m liye ọmụma ndịnị; o k'a nọ elu ebeni shịapụ ịhara-eze ẹ.

¹¹ O k'a bịa d'a lụsọn alị Ijiptu agha, ọnwụn e gbu ndị m sị nị ọnwụn k'e gbu, ọ kpụnrụn ndị m sị nị wẹ k'a kpụnrụn, ọpịa-agha e gbu ndị m sị nị ọpịa-agha k'e gbu.

¹² O k'a mụ ọkụn ye ụlọ-mmọn rịsọnmẹ Ijiptu, dụnpụ ụlọ-mmọn wẹ ọkụn, kpọnrin mmọn wẹ. O k'a tụtụkwama ihiẹn ile rị mma rị alị Ijiptu, kẹ onyẹ e du anụ dọn a tụtụpụchanrịn izun ẹkwa a; o k'e bu wẹ ile la, onwọnni ihiẹn k'e mẹn'ẹ.

¹³ O k'a kụkpọ ihiẹn ndị wẹ zumẹ imẹ ụlọ wẹ nọ a rụa ẹnyanwụn imẹ Ijiptu, dụnpụchanrịn ụlọ-mmọn ichẹn-ichẹn rị Ijiptu ọkụn.’ ”