Jerimaya 41 - Ika

Isi Nke Ohu Kwasị Ọgụnnaị E Gbu Wẹ Gẹdalia

¹ Kanị, o ru nwan ifọn nke ẹsa, Ishmẹlụ nwẹn nọ bịa. Ishmẹlụ wụ nwa Nẹtanịa nwa Ẹlishama. Onyẹ ebọn eze k'ọ wụ. O te wụ onyẹ-isi okpuru eze. Ya lẹ ikẹnnyẹ iri ọ kị wị bịa Mizpa d'e kunrun Gẹdalia nwa Ahikam. Ebe wẹ lẹ Gẹdalia rị e ri ihiẹn-oriri imẹ Mizpa ebẹhụ,

² Ishmẹlụ nwa Nẹtanịa lẹ ikẹnnyẹ iri hụ ya lẹ wẹ wị nọ lihi, sepụha ọpịa-agha wẹ, gbu Gẹdalia nwa Ahikam nwa Shafanị. Ẹrịra kẹ Ishmẹlụ dọn gbu onyẹ nwẹn eze Babilọnụ tumẹ n'ọ kịma alị Juda.

³ Ishmẹlụ nọzị gbu ndị Ju ile wẹ lẹ Gẹdalia gba rị Mizpa ebẹhụ; o gbuzi ndị-agha Babilọnụ rị ebẹhụ.

⁴ W'a kpọ a ụnyanhụn wẹ gbu Gẹdalia, nị ịhịan d'a marịndẹ nị e gbugụọ w'a,

⁵ ikẹnnyẹ ọgụn-ẹnọ kọ ẹtu, dọka ẹwuru wẹ, bekika enwẹn wẹ ẹhụ, nọ gha Shẹkẹm, Shilo lẹ Sameria bịa Mizpa. Wẹ ile busọnmẹ ọka lẹ nsẹnsi wẹ jẹnkọ d'e gi chụnyeni Osolobuẹ ẹjan imẹ Ụlọ-nsọ rị Jerusalẹm.

⁶ Ya Ishmẹlụ nwa Nẹtanịa nọ gha Mizpa pụha d'e kunrun wẹ, a kwan. O kunrun wẹ, ọ nọ sị wẹ, “D'e lee ni Gẹdalia nwa Ahikam.”

⁷ Kanị, hụn wẹ gihụ banye imẹ obodo hụ, Ishmẹlụ nwa Nẹtanịa lẹ ikẹnnyẹ ndị ahụn ya lẹ wẹ wị nọ gbu wẹ, tụ ozun wẹ ye ọmị.

⁸ Kanị, madụ iri imẹ wẹ nọ sị Ishmẹlụ, “Egbulẹ ẹnyi, dodo! Ẹnyi e nwọnghọ ọka-witi lẹ ọka-bali lẹ ofugbọn-olivu lẹ mirin-ẹnwụn ẹnyi zuemẹ ọfịa kẹ ẹnyi lala.” Ya ọ nọ la wẹ tọ; o gbuzini wẹ cheni ibe wẹ.

⁹ Ọmị hụ Ishmẹlụ tụye ozun ndị o gbu shịa ọda-ọda. Asa hụn te kị Juda gu ẹ nị w'a hụn mirin a ra ogẹn o gi rị a tụn ihiẹn ndị o gi gbọnkin Baasha wụ eze Izrẹlụ Ẹbamịn ugu hụn ya lẹ ịya rị a lụ agha. Ọmị ndị ahụn kẹ Ishmẹlụ nwa Nẹtanịa kpọn ozun kpọnjun.

¹⁰ Ishmẹlụ nọ nwan nwụndọn ndị ile họdụ imẹ Mizpa, kẹ ikpoho ebọn eze kẹ ndị ọzọ ile họdụ imẹ Mizpa hụn Nebuzaradanị onyẹ-isi ndị-agha e che eze Babilọnụ nche sị Gẹdalia nwa Ahikam kịma. Ishmẹlụ nwa Nẹtanịa nọ kpụnrụn wẹ ile, n'o we wẹ fetu d'e kunrun ndị alị Amọnụ.

Johananị E Wekin Ndị Ishmẹlụ Kpụnrụn

¹¹ Ogẹn Johananị nwa Karia lẹ ndị isi-agha ile ya lẹ wẹ wị gi nụ eje-ihiẹn ile Ishmẹlụ nwa Nẹtanịa mẹ,

¹² wẹ nọ kịrị ndị-agha ile rị okpuru wẹ d'a lụsọn Ishmẹlụ nwa Nẹtanịa agha. Wẹ nọ kunrun ẹ ẹhụ ọgọdọ-mirin uku rị Gibiọnụ.

¹³ Ogẹn ndị ahụn ile Ishmẹlụ kpụnrụn gi hụn Johananị nwa Karia lẹ ndị-isi agha ya lẹ wẹ wị, ẹfọ nọ sụọ wẹ ụsụọ.

¹⁴ Ya kẹ ndị ahụn ile Ishmẹlụ kpụnrụn imẹ Mizpa nọ buru Johananị nwa Karia.

¹⁵ Kanị, Ishmẹlụ lẹ enwẹn ẹ lẹ madụ ẹsatọ imẹ madụ iri hụ ya lẹ wẹ wị nọ s'ẹka gbanahịn Johananị, gbashi alị ndị Amọnụ.

¹⁶ Ya kẹ Johananị nwa Karia lẹ ndị-isi agha ya lẹ wẹ wị nọ kịrị ndị ahụn ile ọ gha Gibiọnụ kịlụa. Wẹ wụ ndị họdụ imẹ ndị te rị okpuru Gẹdalia nwa Ahikam imẹ Mizpa. Johananị zụọpụha wẹ ẹka Ishmẹlụ nwa Nẹtanịa hụn gbu Gẹdalia kpụnrụn wẹ. Kẹ ndị-agha kẹ ikpoho kẹ ụmụẹka kẹ ndị e te rụn ọrụn imẹ obi-eze Juda rị imẹ wẹ.

¹⁷ Wẹ nọ buli shikọ alị Ijiptu. E ru wẹ Gẹrutu-Kimham hụn nọkunmẹ Bẹt'lẹhẹm, wẹ nọ kụsị.

¹⁸ Egun ndị Babilọnụ kẹ wẹ gi gbapụkọ hụn ahụn Ishmẹlụ nwa Nẹtanịa gbugụ Gẹdalia nwa Ahikam, onyẹ hụn eze ndị Babilọnụ tumẹ n'ọ kị alị Juda.