Jerimaya 40 - Ika

Isi Nke Ọgụnnaị A Hatuzi Wẹ Jerimaya

¹ Ọnwan wụ oku Osolobuẹ gwa Jerimaya ogẹn Nebuzaradanị, hụn wụ onyẹ-isi ndị-agha e che eze ndị Babilọnụ nche gi hatu Jerimaya imẹ obodo Rama. Ogẹn hụ, wẹ kpọma Jerimaya ẹgan, ya lẹ ndị ọzọ wẹ kpụnkọ Babilọnụ, ndị wẹ gha Jerusalẹm lẹ obodo ichẹn-ichẹn rị Juda kpụnrụn.

² Ogẹn onyẹ hụ kị ndị-agha e che eze Babilọnụ nche gi hụn Jerimaya, ọ nọ weri ẹ shi ụsụọ, sị a, “Osolobuẹ wụ Chuku i ku ẹ n'o k'e wẹhẹni alịnị eje-ihiẹn.

³ Osolobuẹ e mẹgụọ a nwan; o mẹgụọ ihiẹn ọ sị n'o k'e mẹ. Njọ ụnụ mẹ Osolobuẹ haịn ihiẹnni ile gi mẹ ụnụ; ụnụ emẹni ihiẹn ọ gwa ụnụ mẹ.

⁴ Kanị, a kpọpụgụọ m'ị nwan ẹgan rị ị ẹka ẹbụbụọ. Omẹni ị chọ n'ị sọn m la Babilọnụ y'e sọn m nwan, m k'e lepụ ị ẹnya; kanị omẹni y'a chọnị, y'a nọdị. Lee alịnị ile, ebe ọwụlẹ ị chọ n'ị jẹn y'e jẹn.”

⁵ Nị Jerimaya d'a la, Nebuzaradanị nọzị sị a, “Kin azụụn d'e kunrun Gẹdalia nwa Ahikam nwa Shafanị hụn Eze ndị Babilọnụ tumẹ n'ọ kịma alị ile rị Juda, n'ị sọn ya lẹ ndị alịnị biri mọbụ y'a họrị ebe ọzọ sụọnị ị.” Ya onyẹ-isi ndị-agha hụ e che eze Babilọnụ nche nọ ye Jerimaya ihiẹn-oriri lẹ ihiẹn ndị ọzọ, nị a la.

⁶ Ya Jerimaya nọ laburu Gẹdalia nwa Ahikam imẹ Mizpa, sọn ya lẹ ndị alị Juda họdụnị biri.

⁷ Ndị te kị ndị-agha alị Juda hụn hụarịsọnmẹ ọfịa nọ nụ nị eze Babilọnụ e tumẹgụọ Gẹdalia nwa Ahikam n'ọ kịma alị Juda, lẹni o butọn'a ikẹnnyẹ-ọba lẹ ikpoho-ọba lẹ ụmụ-ẹka ndị hụn kachanrịn ogbẹnnyẹ imẹ alị Juda, ndị ile wẹ kpụnjẹnlẹni Babilọnụ,

⁸ ya wẹ nọ bịa Mizpa d'e kunrun Gẹdalia. Ndị bịa ijẹnni wụ: Ishmẹlụ nwa Nẹtanịa, Johananị lẹ Jonatanị — ụmụ Karia, Sẹraya nwa Tanhumẹtị, ụmụ Ẹfaị onyẹ Netofa lẹ Ja-azanịa nwa onyẹ Maaka. Uwẹ lẹ ndị itu wẹ gba bịa.

⁹ Gẹdalia nwa Ahikam nwa Shafanị nọ kun ẹfan Osolobuẹ kwe wẹ lẹ ndị-agha wẹ nkwa n'o nwọnni ihiẹn k'e mẹni wẹ. Ọ sị wẹ, “Atụlẹ ni egun. Biri ni alịnị, ụnụ e we enwẹn ụnụ che okpuru eze Babilọnụ, kẹn'ọ rịnị ụnụ mma.

¹⁰ Mmẹ lẹ enwẹn m k'a rị Mizpa ebeni a nọkin ẹnya ụnụ ihun ndị Babilọnụ rị a bịa d'e kunrun ẹnyi. Ụnụ nwẹn, d'a ghọlụama nị akpụrụ-osisi ụnụ gi e mẹmẹ manya lẹ akpụrụ-osisi ọkọkị ụnụ lẹ olivu — ụnụ a gba manya lẹ olivu ụnụ ye ẹkpoko dọnmẹrin. Biri ni obodo ẹnyi ndị ahụn ụnụ werigụ.”

¹¹ Ndị Juda ile rị Mụabụ lẹ ndị bi alị ndị Amọnụ lẹ alị Ẹdọm lẹ alị ndị ọzọ ile nụzịkwọ n'o nwọn ndị eze Babilọnụ latọ imẹ ndị Juda, lẹni o tumẹ Gẹdalia nwa Ahikam nwa Shafanị n'ọ kịma wẹ,

¹² wẹ ile nọ nwan gha alị ichẹn-ichẹn wẹ gbashi lụakinhẹn Juda, lụakunrun Gẹdalia imẹ alị Mizpa. Wẹ nọ hụn akpụrụ-osisi ọkọkị ghọrị ọda-ọda, kẹ vaịnị wẹ gi e mẹmẹ manya.

¹³ Johananị nwa Karia lẹ ndị-isi agha ile te warị ọfịa nọ bịa Mizpa d'e kunrun Gẹdalia,

¹⁴ sị a, “Y'a marịnghọdẹ nị Baalisi wụ eze ndị Amọnụ e zigụọ Ishmẹlụ nwa Nẹtanịa d'e gbu i?” Kanị Gẹdalia nwa Ahikam e gini oku wẹ dọn.

¹⁵ Ya kẹ Johananị nwa Karia nọ we Gẹdalia shi ụsụọ, sị a, “Nị m jẹn d'e gbu Ishmẹlụ nwa Nẹtanịa, onwọnni onyẹ k'a marịnnị. K'o k'e gbuni i, mẹ ndị Judanị ile gi ufiri i rị ebeni gbayịya, ndị Juda họdụnị a la iwi.”

¹⁶ Kanị Gẹdalia nwa Ahikam nọ sị Johananị, “Emẹkwọl'a! Ị rịhụ e buokin Ishmẹlụ ọnụ.”