Jerimaya 4 - Ika

Isi Nke Ẹnọ

¹ Osolobuẹ sị, “Ụnụ ndị Izrẹlụ, omẹni ụnụ kinla d'e kunrun m, kinhẹn ni nwan. Omẹni ụnụ e wepụghọ ihiẹn ndị ahụn rụnị ụnụ kọma ihun m, nị ụnụ akpahuzịnị;

² omẹni ụnụ hụ e gi ezioku lẹ ẹka rị mma lẹ ezi-omumẹ a sị, ‘Ma Osolobuẹ’ ụnụ gi e kun ẹfan m ogẹn ahụn alị ndị ọzọ e gi ẹfan Osolobuẹ gọzimẹ ibe wẹ, gi Osolobuẹ nyanma isi.”

³ Lee ni ihiẹn Osolobuẹ rị a gwa ndị alị Juda lẹ obodo Jerusalẹm: “Dụkpọ nị alị ụnụ kelẹni dụkpọ, ụnụ e wepụchanrịn ogun ụnụ kebe kụn ihiẹn.

⁴ Kwanị nị Osolobuẹ ugun; kwapụ nị eje-ihiẹn rị ụnụ obi, ụnụ ndị alị Juda lẹ ndị bi obodo Jerusalẹm, amamgbe ọnụma m e kunrun ụnụ, dụn ụnụ kẹ ọkụn wẹ ghalẹni e tinyụn, yeni eje-ihiẹn ụnụ mẹ.

Ntikpọ Hụn Gha Ẹbamịn-ugu Lala

⁵ “Hị ihiẹnni alị Juda, ku ẹ imẹ obodo Jerusalẹm, sị wẹ, Gbu ni (opi) ọdụ ghagbama alịnị ile! Weshi ni olu elu, sị: ‘Zugbama nị! Nị ẹnyi gbashi ni obodo ẹnyi ndị zeni d'a hụarị!’

⁶ Weshi ahịma elu nị ịhịan ile jẹnmẹ Zayọnụ! Gbakwọ nị ọsọ ndụn, egbukwọlẹ ni ogẹn! Makẹni m gha ẹbamịn-ugu wela ntikpọ, eje-ntikpọ k'o k'a wụkwọ!”

⁷ Ẹwọrọ a ghagụọ ebe o bi pụha; onyẹ rị e tikpọ alị ichẹn-ichẹn e buligụọ. Ọ ghaọlẹ ebe ọ rị pụha d'e tikpọ alị ụnụ la iwi. Obodo ile rị alị ụnụ jẹnkọ d'e họnrin mkpọkọ-mkpọkọ, obodo ịhịan bilẹni.

⁸ Yiri ni nwan ẹkwa-achọ kwanma ụya, a kwan nị, e goo ni, makẹni okẹn olulu Osolobuẹ gi e sọn ẹnyi eke rọ.

⁹ Osolobuẹ sị, “Ogẹn ahụn, ndụn k'a gụ eze lẹ ịhaịmẹ ẹ; egun k'a tụgbu ndị nchụn-ẹjan; o k'a gba ndị-amụma ngharị-ẹnya.”

¹⁰ M nọ sị, “Heuu, Di-nwọnni-ẹnyi wụ Osolobuẹ, y'e dufiechanrịngụọ ndịnị lẹ Jerusalẹm, ebe ị nọ sị wẹ, ‘Ihiẹn emẹkọ ụnụ,’ bụ ọpịa rị nwan ẹnyi ẹkpịrị!”

¹¹ O ru ogẹn ahụn, wẹ k'a sị ndịnị lẹ Jerusalẹm: “Ufere rị a nụ ọkụn k'a ghasọnmẹ ebe jẹn elu imẹ atụ fehẹ ebe ndị nke m rị, kanị ẹlẹkwọ hụn k'a fụchannị wẹ ọka mọbụ mẹ wẹ nwunchan,

¹² kama, ufere hụn ka ọhụn ikẹn, hụn k'a gha ẹka m bịa rọ. M rị nwan a ma wẹ ikpe.”

¹³ Ledẹ k'ọ lala kẹ orukpu igwere, ụgbọ-anyịnyan a ile zụnla kẹ okẹn ufere. Ẹshin ẹ ile benahịn ugọn nkanran. Ijẹn e gbuẹ ẹnyi! Ẹnyi a laọlẹ iwi!

¹⁴ Heuu ndị Jerusalẹm, chanchanpụ nị eje-ihiẹn rị ụnụ obi, kẹni Osolobuẹ zụọpụha ụnụ. Ele mgbe kẹ ụnụ k'e robehi eje-ihiẹn imẹ obi ụnụ?

¹⁵ O nwọn olu rị imẹ Danị rị ẹbamịn-ugu a hị: ọ hụ elu òke Ifrem e yi ni ntikpọ lala.

¹⁶ “D'a gwa nị ndị alị ichẹn-ichẹn, ụnụ a gwazịkwọ Jerusalẹm ya: ‘Ndị-agha hụn e kehunmẹ alị gha alị teni lala, e yini obodo ile rị Juda oro-agha.

¹⁷ E fihunmẹ w'ẹ kẹ ndị e che ugbo nche, makẹni o nupụgụọ isi okpuru m.’ ” Ya kẹ Osolobuẹ ku.

¹⁸ “Obibi i lẹ omumẹ i buhẹn'i ihiẹnni. Ọnwan wụ afụnfụn m ye i. Ọ hụ e lu i ilu; ọ fụrugụọ ị akpobi!”

Jerimaya A Kwannị Ndị Izrẹlụ Ẹkwan

¹⁹ Heuu, ụya e gbuẹ m! Ụya e gbuẹ m!! Lee ihiẹn m rị e fie-o. Heuu, ọ fụru m akpobi! Akpobi hụ a dụ m kpum-kpum. Asa m ẹka gba nkịtịn, makẹni a nụgụọ m opi agha; a nụgụọ m oro-agha.

²⁰ Ntikpọ hụ a bịa, ọbịbịa-ọbịbịa; alịnị ile e mẹ mkpọkọ-mkpọkọ. Imẹ njube-ẹnya ohu e tikpọchanrịn wẹ ụlọ m ile, imẹ njube-ẹnya ohu e tikpọ wẹ ebe m'e butọ isi.

²¹ Elee mgbe m'a hụnbehi ẹkwa-ahịma ndị-agha? Elee mgbe m'a nụbehi opi agha?

²² “Ndị nke m e zuzu ezuzu; amarịn wẹ m. Ụmụ nwọnlẹni uche kẹ wẹ wụ; enwọn wẹ nghọta. Eje-ihiẹn kẹ wẹ marịn ẹnya a; ama wẹ mẹ ihiẹn rị mma.”

²³ E lee m ẹnya ụwa, onwọnni k'ọ nọ, ọ gbachanrịn okpokoro; E lee m ẹnya igwere, onwọnzini ukpẹ rịn'a.

²⁴ E lee m ugu ile, wẹ hụ e zinzin, òke ile hụ e rue.

²⁵ E lee m ẹnya, ịhịan arịzị a kaka; nnụnụ ile rị imẹ elu e fepụgụọ.

²⁶ E lee m ẹnya, alị nwẹn te e mẹ ihiẹn e họnringụọ atụ; obodo ile ịhịan te bi e mẹ mkpọkọ-mkpọkọ, makẹ ihiẹn Osolobuẹ mẹ; makẹ okẹn-olulu ọ rị e bu.

²⁷ Osolobuẹ sị, “Alịnị ile jẹnkọ d'a gba okpokoro, kanị etikpọchanrịnkọ m'a.

²⁸ Ya wụ, ụwa jẹnkọ d'a kwan nwan ẹkwan, igwere a gba ishi, makẹni e kuọlẹ m'a, e rotọgụọ m'a; ekuhutọkọ m ọnụ, erohutọkọ m.”

²⁹ Hụn wẹ gihụ nụ ukwere ndị-agha gi ẹshin a lụ agha lẹ ndị hụn a gba ụta, ndị rị obodo ọwụlẹ a gbapụ: ndịnị rụban imẹ ọfịa d'a hụarị, ndị ọzọ a gbashi ọmụma rị elu ugu d'a warị; obodo ile a gba okpokoro, onwọnzini onyẹ bi imẹ wẹ.

³⁰ Ịyụ hụn wẹ tikpọchanrịngụ, k'ị rịzị nwan e mẹ? K'ị yirini okẹn ẹwuru ufie lẹ goru? K'i tesọnmẹni ihiẹn ẹnya? Ị rịhụ a chọ mma mmaka. Ndị yụ lẹ wẹ gba a sụọ e lelịagụọ ị; wẹ chọkọdẹ nwan isi i.

³¹ M rị a nụ olu rị a kwan lekẹ okpoho imẹ rị e mẹ, lekẹ okpoho rị a mụ nwa ibuzọ! M rị a nụ kẹ Nwagbọọ wụ Zayọnụ rị e kwọn elu-elu, a tịnpụ ẹka, e yi, “Heuu, m'e d'a nwụnhụn; e we wẹ ndụn m ye ndị-izighẹ!”