Jerimaya 35 - Ika

Isi Nke Mmisẹn Kwasị Ọgụn Osolobuẹ Sị Wẹ Leri Ụmụ Rekabụ

¹ Ọnwan wụ ihiẹn Osolobuẹ gwa Jerimaya ogẹn Jehoyakim nwa Josaya gi wụ eze alị Juda. Osolobuẹ sị Jerimaya:

² “Jẹn d'e kunrun ndị ebọn Rekabụ. Sị wẹ bịa Ụlọ-nsọ Osolobuẹ d'a hụn ị. Gwa wẹ mmughẹ wẹ k'a nọ hụn ị imẹ ndị wẹ rụn nyanmanị Ụlọ-nsọ. Wẹ bịa, y'e buye wẹ manya ra.”

³ Ya m nọ jẹn d'e kunrun Ja-azanịa nwa Jerimaya nwa Habazinia, ya lẹ umunẹ ẹ ikẹnnyẹ lẹ ụmụ a ikẹnnyẹ ile lẹ ndị ọzọ ile rị ebọn Rekabụ.

⁴ M nọ wẹhẹ wẹ Ụlọ-nsọ Osolobuẹ, weban wẹ mmughẹ ụmụ-azụụn onyẹ-amụma wụ Hanan nwa Igidalịa. Mmughẹ hụ e sọn nke ndị a rụn ọrụn imẹ ụlọ-nsọ, ịya rịzịkwọ elu nke Maaseya nwa Shalum. Maaseya wụ onyẹ ohu imẹ ndị e che ọnụ-mgbọn ụlọ-nsọ.

⁵ Ya m nọ gi ihiẹn bupụhanị ndị ebọn Rekabụ manya ọhụnma-ọhụnma, kịpụhanị wẹ mkpu, sị wẹ, “Ra nị manya!”

⁶ Kanị, wẹ nọ sị, “Ẹnyi ara ra manya. Nẹdi ẹnyi kanị wụ Jonadabụ nwa Rekabụ sị ẹnyi, ‘Arakwọlẹ ni manya — kẹ ụnụ kẹ agbọ ụnụ ndị lalanị;

⁷ atụnlẹ ni ụlọ; arụnlẹ ni ugbo; akụnlẹ ni vaịnị, enwọnlẹ ni alị vaịnị. Ọdụ w'a kwahunmẹ kẹ ụnụ sikọ d'e bisọnmẹ, kẹni ụnụ tọ elu ụwa ụnụ nọ e bi kẹ itumunyẹ.’

⁸ Ẹnyi hụ e mẹchanrịn ihiẹn ile nẹdi ẹnyi kanị wụ Jonadabụ nwa Rekabụ sị ẹnyi mẹ: kẹ hụn ọ sị ẹnyi lẹ inyẹnmẹ ẹnyi lẹ ụmụ ẹnyi ikẹnnyẹ lẹ ikpoho aralẹ manya ẹnyi e we nwụn

⁹ kẹ hụn ọ sị ẹnyi atụnlẹ ụlọ; ẹnyi enwọnlẹ alị vaịnị mọbụ ugbo mọbụ ihiẹn ọwụlẹ w'a kụn;

¹⁰ ọdụ w'a kpụkpọrị kẹ ẹnyi e bi, e humẹ isi, e mẹchanrịn ihiẹn ile nẹdi ẹnyi kanị wụ Jonadabụ sị ẹnyi mẹ.

¹¹ Kanị, hụnnị eze Babilọnụ wụ Nebukadineza bịa nwan d'a lụsọn alị Juda agha, ẹnyi nọ sị, ‘Nị ẹnyi gwẹrụ (gwarị) kwashi Jerusalẹm d'a nọdị, kẹni ẹnyi hụn isi wanahịn ndị Babilọnụ lẹ ndị-agha alị Aram.’ Ya haịn ẹnyi gi nwan rị Jerusalẹm.”

¹² Ya kẹ Osolobuẹ nọ sị Jerimaya,

¹³ “Osolobuẹ ihiẹn ile rị okpuru ẹ, hụn wụ Chuku Izrẹlụ sị: Jẹn d'a gwa ndị Juda lẹ ndị obodo Jerusalẹm oku. Sị wẹ nị mmẹ wụ Osolobuẹ sị, ‘Ụnụ a mụrụnkọ ihiẹn, mẹmẹ ihiẹn m sị ụnụ e mẹ?!

¹⁴ Jonadabụ nwa Rekabụ sị ebọn ẹ aralẹ manya, wẹ nọ gi ihiẹn hụ ọ gwa wẹ dọn: d'e rukwọ nwan tannị w'a ra ra manya, makẹni wẹ rị e mẹ ihiẹn nẹdi wẹ kanị sị wẹ mẹ. Kanị, mmẹ nwẹn wụ Osolobuẹ hụ nwan a gwa ụnụ oku ọgụgwa-ọgụgwa, ụnụ arị e gi oku m e dọn.

¹⁵ M hụ e zihẹni ụnụ idibo m ndị amụmanị ile ozihẹ-ozihẹ. Wẹ hụ a sị ụnụ, “Onyẹ ọwụlẹ ya mẹbehikwọ eje-ihiẹn ọ rị e mẹ, mẹmẹ ihiẹn rị mma; arụazịlẹ ni mmọn — kẹni ụnụ bisọnmẹ alịnị m ye ụnụ lẹ ndị nẹdi ụnụ.” Kanị, ụnụ achọnị nị ụnụ nụ, ụnụ egọnni m ntịn.

¹⁶ Ebọn Jonadabụ nwa Rekabụ hụ e mẹ ihiẹn nẹdi wẹ kanị sị wẹ mẹ, kanị ndịnị ara mẹ ihiẹn m sị wẹ mẹ.’

¹⁷ “Ufiri ẹ, Osolobuẹ ihiẹn ile rị okpuru ẹ, hụn wụ Chuku Izrẹlụ, rị nwan a sị, ‘Gọn nị ntịn! M jẹnkọ d'e mẹ alị Juda lẹ ndị ile bi imẹ Jerusalẹm eje-ihiẹn ile m sị nị m jẹnkọ d'e mẹ wẹ. Makẹni kẹ m gwa wẹ oku, egọnni wẹ ntịn; a kpọ m wẹ oku, azanị wẹ.’ ”

¹⁸ Ya Jerimaya nọ sị ndị ebọn Rekabụ, “Osolobuẹ ihiẹn ile rị okpuru ẹ, hụn wụ Chuku Izrẹlụ, sị, ‘Ụnụ hụ a gbaye oku nẹdi ụnụ kanị wụ Jonadabụ, e mẹchanrịn ihiẹn ile ọ sị ụnụ mẹ, e dọnmẹ iwu o tini ụnụ.’

¹⁹ Mmẹ wụ Osolobuẹ ihiẹn ile rị okpuru ẹ hụn wụ Chuku Izrẹlụ rị nwan a sị, ‘Ebọn Jonadabụ nwa Rekabụ agụkọ imẹ ndị a rụnnị m ọrụn.’ ”