Jerimaya 34 - Ika

Isi Nke Mmẹnọ Kwasị Ọgụn Ihiẹn Osolobuẹ Jẹnkọ D'e Mẹ Zẹdikaya Eze Juda

¹ Ọnwan wụ ihiẹn Osolobuẹ gwa Jerimaya ogẹn ahụn Nebukadineza wụ eze ndị Babilọnụ lẹ ndị agha a ile lẹ ndị alị-eze ile rị okpuru ẹ gi rị a lụsọn obodo Jerusalẹm lẹ obodo ndị nọkunmẹn'ẹ agha: ọ sị a,

² “Osolobuẹ hụn wụ Chuku Izrẹlụ sị: Jẹnburu Zẹdikaya wụ eze alịnị wụ Juda, sị a, ‘Osolobuẹ sị: M'e d'e bu obodoni wụ Jerusalẹm che eze ndị Babilọnụ ẹka, o k'a kpọ a ọkụn.

³ Yụ lẹ enwẹn i wụ Zẹdikaya awanahịnkọ eze Babilọnụ hụ, kaka. Wẹ k'a nwụndọnrịrị ị, bu i che ẹ ẹka. Yụ lẹ ịya k'a hụn elee-m elee-i, ụnụ e kutarị elee-m, elee-i. Wẹ k'a kpụn ị shi Babilọnụ.

⁴ “ ‘Ka gọnkwọ nwan ntịn ihiẹn Osolobuẹ ku, Zẹdikaya eze Juda: Osolobuẹ sị nị y'a nwụnkọ imẹ agha,

⁵ ọnwụn-ẹhi k'i jẹnkọ d'a nwụn. Kẹ wẹ dọn li ndị nẹdi i ọhụnma — ndị-nze hụn bu i ụzọ kị — fiyeni wẹ ọkụn, ẹrịra kẹ wẹ k'a dọn li i ọhụnma, fiyen'i ọkụn. Wẹ k'a kwan ị, a sị, “Eze ẹnyi-o! Eze ẹnyi-o!” Mmẹ lẹ enwẹn m wụ Osolobuẹ rị e kwe i nkwanị.’ ”

⁶ Ya onyẹ-amụma wụ Jerimaya nọ gwachanrịn Zẹdikaya wụ eze alị Juda ihiẹn ndịnị ile imẹ Jerusalẹm,

⁷ ogẹn hụ ndị-agha eze Babilọnụ gi rị a lụsọn Jerusalẹm lẹ obodo ndị ọzọ ile họdụ imẹ alị Juda agha kẹ obodo Lakishi kẹ obodo Azẹka. Obodo ẹbụọnị sụọ kẹ wẹ kelẹni weri ogẹn hụ imẹ obodo ile wẹ tụnhunmẹ mgbọn rị alị Juda.

Ihiẹn Osolobuẹ K'e Mẹ Ndị Dan Iwu Ịhatu-igbọn

⁸ Ọnwan wụ ihiẹn Osolobuẹ gwa Jerimaya ogẹn hụ eze wụ Zẹdikaya gi sị ndị ile rị Jerusalẹm kunn'ẹ Osolobuẹ, hịgbarị a nị igbọn ile sikọ d'e werisọnmẹ enwẹn wẹ —

⁹ nị onyẹ ọwụlẹ sikọ d'a hatu onyẹ Hibru ọwụlẹ wụ igbọn ẹ — kẹ ikẹnnyẹ kẹ ikpoho, onyẹ Juda y'a kpazịlẹ onyẹ Juda ibe ẹ igbọn.

¹⁰ Wẹ ile te nọ mẹ ihiẹn eze ku, kẹ ndị-isi wẹ kẹ ndị alị, kun Osolobuẹ nị wẹ k'a hatu igbọn wẹ ikẹnnyẹ lẹ ikpoho, kpabehi wẹ igbọn. Ya wẹ te nọ mẹ ihiẹnni wẹ ku, hatusọnmẹ igbọn wẹ.

¹¹ Kanị, o mẹgụ, wẹ nọ rohutọ, werizi igbọn ndị nwẹn wẹ te hatugụ, kpamazị wẹ igbọn.

¹² Ya kẹ Osolobuẹ nọ nwan gwa Jerimaya oku, sị,

¹³ “Osolobuẹ wụ Chuku Izrẹlụ sị: Mmẹ lẹ enwẹn m tini ndị nẹdi ụnụ kanị iwu ogẹn m gi gha alị Ijiptu wepụha wẹ, alị wẹ nọ wụ igbọn, sị wẹ,

¹⁴ ‘Ahụa nke ẹsa ọwụlẹ, ụnụ jẹnkọ d'a haturịrị onyẹ Hibru ibe ụnụ ọwụlẹ te re enwẹn ẹ ye ụnụ. Ahụa isin k'o k'e fe i, y'a hatu ẹ n'o weri enwẹn ẹ.’ Kanị, ndị nẹdi ụnụ egọnni m ntịn, efeyedẹni wẹ ẹ ẹnya.

¹⁵ “O ru nwan ẹgbatanị, ụnụ nọ bihutọ ẹka, mẹ ihiẹn rị mma ẹnya m. Onyẹ-onyẹ imẹ ụnụ nọ sị igbọn ẹ weri enwẹn ẹ lẹ ihiẹn ẹ. Ụnụ nọdẹ nọ ihun m, imẹ ụlọ-nsọ m hụn rị a za Ẹfan m, kun Ẹfan m nị ụnụ jẹnkọ d'e mẹ ẹ.

¹⁶ Omẹgụzị nwan, ụnụ nọ gbehutọ, budan ẹfan m, werizi ikẹnnyẹ lẹ ikpoho ndị nwẹn ụnụ te hatugụ nị wẹ jẹnmẹ ebe sụọnị wẹ, kpamazị wẹ igbọn.

¹⁷ “Ufiri ẹ, mmẹ wụ Osolobuẹ sị, ‘Ụnụ egọnni m ntịn hatu umunẹ ụnụ, ndị alị Juda ibe ụnụ. M jẹnkọ nwan d'a hatu ụnụ nwẹn, ha ụnụ yeni ọpịa-agha, eje-emu lẹ ẹgụn nị wẹ gbu ụnụ. Ya kẹ Osolobuẹ ku. M mẹgụ ụnụ ihiẹn m k'e mẹ ụnụ, egun k'a tụma ndị alị-eze ile rị ụwa.

¹⁸ M k'e mẹ ndị ahụn dan iwu m ihiẹn, ndị hụn nọ idẹnya m kun ẹfan m bụ emẹni wẹ ihiẹn wẹ ku; m k'e mẹ wẹ ihiẹn wẹ mẹ nwa efin hụ wẹ gbu, kpọwa, gha ẹgbata a, nwa-efin ahụn wẹ gi ẹdeke ẹ kwe nkwa hụ.

¹⁹ Ezioku, m jẹnkọ d'e mẹ ndị-isi ndị Juda lẹ ndị-isi obodo Jerusalẹm ihiẹn, wẹ lẹ ịhaịmẹ rị ọgwa eze lẹ ndị nchụn-ẹjan lẹ ndị alị, ndị ile hụn gha ẹgbata anụ nwa-efin ahụn wẹ gi kwe nkwa,

²⁰ m k'e we wẹ ye ndị iṅẹnrẹn wẹ chọkọ isi wẹ; ozun wẹ a wụrụ ihiẹn-oriri nnụnụ lẹ anụ-ọfịa.

²¹ “ ‘M k'e we Zẹdikaya wụ eze Juda lẹ ịhaịmẹ ẹ ye ndị-iṅẹnrẹn wẹ chọkọ isi wẹ, ndị-agha eze Babilọnụ hụn te yegụnị ụnụ efe.

²² M jẹnkọ nwan d'a kpọkinhẹn wẹ imẹ obodoni. Wẹ k'a lụsọn ẹ agha, weri ẹ, dụn a ọkụn. M k'e tikpọchanrịn obodo ile rị alị Juda, ịhịan ebikọzị a.’ ”