Jerimaya 33 - Ika

Isi Nke Mmẹtọ Kwasị Ọgụn Osolobuẹ K'e Dọnzini Izrẹlụ Ihiẹn

¹ Ebẹhụ Jerimaya rịkwọ ebe wẹ kpọkin ẹ ye imẹ ezi rị ụlọ ndị-nche, Osolobuẹ gwazị a oku, sị a,

² “Osolobuẹ hụn ke ụwa, Osolobuẹ hụn mẹmẹ ụwa tumẹ, Osolobuẹ wụ ẹfan a, ọ sị,

³ ‘Kpọku m, m k'a za ị, gwa ị okẹn-ihiẹn zuerini, hụn ị marịnlẹni.

⁴ Lee ihiẹn Osolobuẹ hụn wụ Chuku Izrẹlụ ku — ihiẹnni k'o ku banyeni ụlọ ndị rị imẹ obodoni lẹ obi-eze ile ndị-nze alị Juda rụn, ụlọ ndị ahụn wẹ kụkpọsọnmẹ gi rụncheni mgbọn obodo makẹ ndị Babilọnụ kehunmẹ obodoni lẹ ọpịa-agha wẹ:

⁵ Ebe wẹ rị a lụsọn ndị Babilọnụ agha, ozun ndị alịnị k'e jun ụlọ ndịnị, ozun ndị m k'e gi iwe lẹ ọnụma m gbu, makẹni a gbakitọgụọ m alịnị azụụn yeni eje-ihiẹn wẹ rị e mẹ.

⁶ “ ‘Kanị, m jẹnkọ d'e dọnzi obodoni; m k'a zụọ wẹ, a dịnhịn wẹ, e mẹ m ihiẹn rịnị wẹ mma ọhụnma-ọhụnma, mẹsọnmẹ wẹ kẹ ndị nke m.

⁷ M k'e welụa ndị Juda lẹ ndị Izrẹlụ Ẹbamịn-ugu wẹ kpụnrụn, dọnzini wẹ ihiẹn k'ọ rị mbụ.

⁸ M k'a chanchanpụchanrịn wẹ njọ ile wẹ mẹ m, gbagharị wẹ njọ ile wẹ mẹ m ghahanị inupụ isi.

⁹ M k'e gi obodoni nwọnrinzi ẹfan, ịghọghọ, ịja-mma lẹ ọghọ ẹnya ndị alị ile rị elu ụwa — ndị ile hụn k'a nụ ihiẹn-ọma ile m k'e mẹni obodoni. Egun k'a tụ ndị alị ile rị elu ụwa wẹ hụn ihiẹn-ọma m k'e mẹni ndị alịnị.’ ”

¹⁰ Mmẹ wụ Osolobuẹ sị, “Ụnụ rị nwan e ku oku ebeni, a sị ‘Ọ gbagụọ okpokoro; kẹ ịhịan kẹ anụmanụ arịzị a.’ Kanị, imẹ obodo ile rị alị Juda lẹ ọgbara-ogbe ile rị Jerusalẹm hụn gbasọnmẹ nwan okpokoro, nke wụ nị ịhịan arịa, anụmanụ arịa, wẹ k'a nụzị

¹¹ olu ndị rị a ghọghọnị lẹ ndị ẹfọ rị a sụọ ụsụọ, olu okẹnnyẹ rị a lụ nwunyẹ lẹ okpoho ọ rị a lụ, olu ndị rị e wẹhẹ oyiye imẹ ụlọ-Osolobuẹ d'a kpanmịn a, a sị, ‘Kpanmịn nị Osolobuẹ ihiẹn ile rị okpuru ẹ, makẹni Osolobuẹ a rịka mma; ara nwọnbehi ihiẹn-ọsụsụọ.’ Makẹni mmẹ wụ Osolobuẹ jẹnkọ d'e dọnzi alịnị, ọ rịzị mma k'ọ rị mbụ. Mmẹ wụ Osolobuẹ ku ẹ.”

¹² “Mmẹ wụ Osolobuẹ, hụn ihiẹn ile rị okpuru ẹ sị: ọsụọn'a nị ebeni a gbagụọ nwan okpokoro, nke wụnị onwọnzini ịhịan mọbụ anụmanụ họdụnị, omẹgụ, ọfịa ndị e du anụ k'e wejẹn anụ wẹ d'a kpa nni k'a rịzị imẹ obodo ile rịn'a, anụ a nọ wẹ rijun ẹfọ, makpuru.

¹³ O k'a rịzị ẹrịra azụụn ile, kẹ obodo ndị rị elu òke kẹ obodo ndị rị ukun ugu ibe ọdịdan-ẹnyanwụn kẹ ndị rị ẹgbẹrẹ Nẹgẹvụ ẹbamịn ndịdan-mirin kẹ ẹgbẹrẹ alị Bẹnjamini kẹ mmụ obodo fihunmẹ Jerusalẹm kẹ imẹ obodo ndị ọzọ ile rị alị Juda. Atụnrụn lẹ ewu jẹnkọ d'a rịzị a pụ, a banhan, ndị e duni wẹ a gụnzị wẹ kẹ w'a gụn wẹ mbụ.” Ya kẹ Osolobuẹ ku.

¹⁴ Osolobuẹ sị, “Ogẹn lala hụn m'e gi mẹzu nkwa ọma hụ m kwe ndị Izrẹlụ lẹ Juda.

¹⁵ O ru ogẹn hụ daị, m k'e wepụhanị Defidi ịhịan lekẹ agala osisi, onyẹ ezi-omumẹ hụn k'a nọ ukpo ẹ kị alịnị, e mẹ ihiẹn furuni, e mẹ ezi-omumẹ,

¹⁶ ihiẹn a rịnị Juda mma, ẹhụ e fu obodo Jerusalẹm. Ẹfan wẹ k'a gha a kpọ Jerusalẹm ogẹn ahụn wụ: ‘Osolobuẹ Mẹ Ẹnyi Gi Rị Mma.’

¹⁷ Makẹni, mmẹ wụ Osolobuẹ sị: ‘Onyẹ ikpụlọ Defidi agụkọ ukpo-eze Izrẹlụ

¹⁸ Ndị nchụn-ẹjan ebọn Livaị, arịbehikọ ihun m, a chụnyeni m ẹjan w'a kpọ ọkụn lẹ oyiye ọka lẹ ẹjan ndị ọzọ.’ ”

¹⁹ Osolobuẹ nọzị sị Jerimaya:

²⁰ “Osolobuẹ sị, ‘Omẹni ịhịan k'a s'ẹka kagbu iwu m tumẹni efinaị lẹ hụn m tumẹni uhinhin — mẹ eki fọnbehi ogẹn ẹ, mẹ ọhịhị gbabehi ogẹn ẹ,

²¹ ya kẹ w'a nọ s'ẹka kagbu nkwa m kwe odibo m wụ Defidi lẹ nkwa m kwe ndị ọrụn m ndị ebọn Livaị — nke wụ nị Defidi enwọnbehi nwa k'a nọ ukpo-eze ẹ a kị, ebọn Livaị arụnbehini m ọrụn ịchụn-ẹjan.

²² M k'e mẹ ebọn odibo m wụ Defidi lẹ ẹbozo Livaị hụn a nọdị ihun m a rụnnị m ọrụn barahị, mẹ wẹ bu ọda kẹ kokisẹ rị igwere lẹ ẹjan rị mkpẹnrẹn ohimin, ihiẹn ẹbụbụọ wẹ ghalẹni as'ẹka a gụnmarịn.’ ”

²³ Osolobuẹ sịzị Jerimaya,

²⁴ “Y'a hụnnị kẹ ndịnị rị a sị, ‘Osolobuẹ a jụgụọ ikpụlọ ẹbụọ ọ họrị, Izrẹlụ Ẹbamịn-ugu lẹ Juda’? Wẹ rị nwan e legberi ndị nke m elegberi; w'ara kpọzịdẹ wẹ alị.

²⁵ Mmẹ wụ Osolobuẹ rị a sị, ‘Sokpan m kagbugụ uhinhin lẹ efinaị, kagbuzi usọnrọn m tumẹni igwere lẹ ụwa,

²⁶ ya wụ a jụ m ụmụ Jekọpụ lẹ odibo m wụ Defidi, ya wụ e mẹ m ụmụ Defidi kịbehi ebọn Jekọpụ wụ Izrẹlụ — ụmụ Ebraham, Aziki lẹ Jekọpụ. Ezioku, m jẹnkọ d'e wepụha wẹ ẹka ndị gini wẹ, e mẹni m wẹ omikẹn.’ ”