Jerimaya 32 - Ika

Isi Nke Mmẹbụọ Kwasị Ọgụn Alị Jerimaya Ṅọntọ

¹ Ọnwan wụ ihiẹn Osolobuẹ gwa Jerimaya. Hụn mẹ ahụa iri Zẹdikaya kịma alị Juda k'o gwa a ya; ahụa hụ mẹzikwọ ahụa mmẹsatọ Nebukadineza kịma alị Babilọnụ.

² Ogẹn ahụn, ndị-agha eze Babilọnụ kehunmẹ obodo Jerusalẹm. Onyẹ-amụma wụ Jerimaya nkẹ rị ebe wẹ kwọndọn ẹ imẹ ezi-ọgwa ndị-nche hụn rị obi-eze alị Juda.

³ Makẹni, eze Juda wụ Zẹdikaya kpọkin ẹ ye ebahụn; eze sị a, “Kị rị e buni ụdị amụmanị? Kị ị rị a sịnị nị, ‘Osolobuẹ sị: m'e d'e bu obodoni che ẹka eze ndị Babilọnụ n'o mẹri ẹ, weri ẹ.’

⁴ Kị ị rị a sị nị Osolobuẹ sị, ‘Eze wụ Zẹdikaya awanahịnkọ ndị Babilọnụ; o k'a danbanrịrị ẹka eze wẹ wụ Nebukadineza, wẹ ẹbụbụọ e ku elee-m elee-i.’

⁵ A sị nị Osolobuẹ sị nị ‘Nebukadineza jẹnkọ d'e we Zẹdikaya shi Babilọnụ, ọ nọdị ebẹhụ d'e ru mgbe m'e gi mẹgụ a ihiẹn.’ Nị Osolobuẹ sị, ‘Ọsụọn'a nị ụnụ lụsọn ndị Babilọnụ ọgụn, ọ ghakọnị ụnụ’?”

⁶ Jerimaya sị, “Osolobuẹ sị m,

⁷ Hanamẹlụ nwa Shalum nwẹnẹ nẹdi i lala d'a hụn ị. O k'a sị ị, ‘Dodo, ṅọnnarịn m alị m rị Anatọtụ, nị ịyụ k'o ru kẹn'ọ rịsọnmẹ ebọn ẹnyi kẹ iwu dọn ku.’ ”

⁸ Ya nwa nwẹnẹ nẹdi m wụ Hanamẹlụ nọ chọha m imẹ ezi-ọgwa ụlọ ndị-nche ebahụn kẹ Osolobuẹ dọnhụ gwa m. Hanamẹlụ nọ sị m, “Dodo, ṅọnnarịn m alị m hụn rị Anatọtụ rị ẹgbẹrẹ Bẹnjamini, nị ịyụ k'o ru kẹn'ọ rịsọnmẹ ebọn ẹnyi. Ṅọnrin ẹ nwan.” Ya m nọ marịn nị Osolobuẹ gwa m oku hụ.

⁹ Ya m nọ ṅọnnarịn Hanamẹlụ nwa nwẹnẹ nẹdi m alị hụ rị Anatọtụ, kụ a akpụrụ siliva mmẹsa.

¹⁰ M deye ihiẹn ile imẹ ẹkụkwọ, biye ẹ ẹka, wẹhẹ ndị ọshẹri, gụn akpụrụ siliva hụ m gi ṅọnrin ẹ, weye ẹ.

¹¹ M nọ weri ẹkụkwọ ẹbụbụọ hụ ẹnyi gi mẹ oku alị hụ hụn wẹ deye nị e ṅọnringụọ w'a lẹ ihiẹn ẹnyi kwerigbama, kẹ hụn w'a fụma kẹ hụn w'a latọ oghe,

¹² we ẹ ye Baruku nwa Nẹria nwa Masẹya, idẹnya Hanamẹlụ nwa nwẹnẹ nẹdi m lẹ ndị ọshẹri hụ biye ẹka lẹ ndị Juda ile rị imẹ ezi-ọgwa ụlọ ndị-nche hụ kẹ m nọ y'ẹ ya.

¹³ A nọ m idẹnya wẹ ebẹhụ sị Baruku,

¹⁴ “Osolobuẹ ihiẹn ile rị okpuru ẹ, hụn wụ Chuku Izrẹlụ, sị, ‘Weri ẹkụkwọ alị hụ, kẹ hụn wẹ fụma, kẹnmẹ, kẹ hụn rị oghe, n'i bu we che ite wẹ gi ụrụa kpụ kẹni wẹ tọ.’

¹⁵ Makẹni, Osolobuẹ ihiẹn ile rị okpuru ẹ, hụn wụ Chuku Izrẹlụ sị, ‘Wẹ k'e ṅọnzi kẹ ụlọ kẹ ugbo kẹ alị vaịnị imẹ alịnị.’ ”

¹⁶ E yegụ m Baruku nwa Nẹria ẹhụhụọ hụ ẹnyi gi mẹ oku alị hụ, m nọ mẹ ekpere, sị Osolobuẹ,

¹⁷ “Euu, Osolobuẹ ihiẹn ile rị okpuru ẹ, yụ gi ikẹn i hi-ogbe lẹ ẹka ị tịnpụ mẹmẹ igwere lẹ ụwa! Onwọnni ihiẹn a karị ị ẹka.

¹⁸ Y'e gi ihiẹn-ọsụsụọ e sọn ndị e sọnn'i d'e rudẹ agbọ nnụ-uku ole-lẹ-ole, e gizikwọ njọ ịhịan e sọn ụmụ a. Ịyụ wụ Chuku hi-ogbe, Chuku hụn nwọn ikẹn ọda-ọda, hụn ẹfan a wụ ‘Osolobuẹ ihiẹn ile rị okpuru ẹ’.

¹⁹ Y'e rokẹkwọ! Y'e mẹkẹ okẹn-ihiẹn!! Y'a hụnchanrịn ihiẹn ile ịhịan rị e mẹ, e gi obibi onyẹ-onyẹ lẹ ihiẹn o mẹ e sọn ẹ, a kụ a ụgwọ-ọrụn.

²⁰ Ịyụ rụnsọnmẹ okẹn ọrụn atụmẹnya imẹ alị Ijiptu, rụnsọnmẹ wẹ d'e ru tannị, kẹ imẹ alị Izrẹlụ kẹ elu ụwa ile — hụn ẹfan ị gikwọ nwan rị a kpọ d'e ru tannị.

²¹ Ị nọ wepụha ndị nke i wụ Izrẹlụ imẹ alị Ijiptu, ghahanị ihiẹn-ahịma lẹ ọrụn atụmẹnya lẹ ẹka ị zeni hụn ị tịnpụ kpasọnmẹ ikẹn lẹzi okẹn egun i rọnsọnmẹ.

²² Ị nọ ye wẹ alị-ọmanị i kun enwẹn i kwe ndị nẹdi wẹ nkwa n'i k'e ye wẹ, alịnị mirin-ẹran lẹ mirin-ẹnwụn jun, e hu.

²³ Wẹ nọ banhan a, weri ẹ. Kanị, egini wẹ oku i dọn, e gini wẹ Iwu i ye wẹ bi: emẹni wẹ ihiẹn ị sị wẹ e mẹ. Ị nọ nwan hu eje-ihiẹnni ile kpu wẹ.

²⁴ “Lee kẹ ndị Babilọnụ tụnsọnmẹ mkpọnyin ye mgbọn obodoni, nọ ebẹhụ a lụsọn ẹ agha kẹni wẹ weri ẹ. Y'e gigụọ ọpịa-agha lẹ ụnwụn lẹ eje-emu mẹ obodoni ban ẹka ndị Babilọnụnị rị a lụsọn ẹ agha. Ihiẹn nwẹn i ku e mẹgụọ kẹ ị dọn nwan rị a hụn a.

²⁵ Kanị, Osolobuẹ ihiẹn ile rị okpuru ẹ, ọsụọn'a nị ndị Babilọnụ e d'e weri alịnị, ị sị m, ‘Ṅọnrin alị hụ idẹnya ndị ọshẹri k'e biye ẹka.’ ”

²⁶ Ya kẹ Osolobuẹ nọ sị Jerimaya:

²⁷ “Mmẹ wụ Osolobuẹ, Chuku ịhịan ile. O nwọn ihiẹn a fụ m ọrụn omumẹ?

²⁸ M'e d'e we alịnị ye ndị Babilọnụ lẹ eze wẹ wụ Nebukadineza; o k'e weri ẹ.

²⁹ Ndị Babilọnụnị rị ụsụọ a maye obodoni ọgụn jẹnkọ nwan d'a banhan imẹ ẹ. Wẹ k'a mụ ọkụn ye ẹ, kpọ a ọkụn — ya lẹ ụlọ ndị rịn'a hụn ndị obodoni nọ elu wẹ mụye ni mmọn wụ Baalụ nsẹnsi, tụyesọnmẹni mmọn ichẹn-ichẹn manya, hụn wẹ gisọnmẹ kpasu m iwe.”

³⁰ “Ihiẹn rịlẹni mma ẹnya m sụọ kẹ ndị Izrẹlụ lẹ ndị Juda e mẹ gha alị lala; iwe-iwe kẹ wẹ gi ihiẹn ẹka wẹ mẹmẹ a kpasu m. Ya kẹ Osolobuẹ ku.

³¹ Ndị obodoni a kpasuọlẹ m iwe lẹ ọnụma ọda-ọda gha ogẹn wẹ gi tụn a d'e ru tannị. M jẹnkọ nwan d'e wepụ a ebe m rị.

³² M k'e mẹ ẹ makẹni Izrẹlụ lẹ ndị Juda e gigụọ eje-ihiẹn ile wẹ mẹ kpasu m iwe — kẹ wẹ kẹ ndị-nze wẹ kẹ ịhaịmẹ wẹ kẹ ndị nchụn-ẹjan wẹ kẹ ndị-amụma kẹ ndị alị Juda lẹ ndị bi imẹ obodo Jerusalẹm.

³³ “E bu wẹ azụụn zinmẹ m, ẹlẹ ihun; m hụ a kuzi wẹ ọkuzi-ọkuzi, w'a ra gọn ntịn, achọdẹni wẹ nị wẹ nụ.

³⁴ “A kọmadẹ wẹ mmọn wẹ ndị ahụn, ihiẹn ndị ahụn m'a sọ, ye imẹ ụlọ ahụn rị a za ẹfan m, gi wẹ mẹrụ a.

³⁵ A tụnsọnmẹ wẹ ukpo wẹ nọ a rụa Baalụ ye imẹ Ọdanmgbugbu Bẹn-Hinọm, a nọ ebẹhụ e gi ụmụ wẹ ikẹnnyẹ lẹ ikpoho a chụnyeni mmọn wụ Molẹkị ẹjan — bụ ezini m wẹ, obi m eshitudẹni izi wẹ d'e mẹ arụ nọ ẹnịna; wẹ nọ gi ẹ dọ Juda ye imẹ njọ.

Osolobuẹ Sịzị Omẹgụ, O Dọnzini Izrẹlụ Ihiẹn

³⁶ “Lee ihiẹn Osolobuẹ hụn wụ Chuku Izrẹlụ ku banyeni obodoni: ụnụ sị nị ‘E gigụọ wẹ ọpịa-agha lẹ ụnwụn lẹ eje-emu mẹ obodoni ban ẹka eze Babilọnụ.’ Kanị, Osolobuẹ sị:

³⁷ ‘M jẹnkọ d'a gha alị ile m gi olulu m rị a dụn kẹ ọkụn lẹ okẹn-ọnụma m chụshi wẹ wepụhazị wẹ, welụa wẹ ebeni, e mẹ m wẹ biri ẹ udọn lẹ ndọnkwa.

³⁸ Wẹ k'a wụ ndị nke m, mmẹ nwẹn a wụrụ Chuku wẹ.

³⁹ M k'e mẹ wẹ e ro ihiẹn ohu sụọ, e mẹ ihiẹn ohu sụọ — hụn wụ ịtụ egun m ogẹn ile kẹni ọ rịnị wẹ mma, rịnị ụmụ wẹ lalanị mma.

⁴⁰ M k'e tumẹ Iwu k'a tọ jẹnrin ejẹn ye ẹgbata mmẹ lẹ wẹ — emẹbehikọ m wẹ mma; m k'e mẹ wẹ tụ egun m, makẹ wẹ gha a gbakitọzị m azụụn.

⁴¹ O k'a gha a sụọ m nị m'e mẹ wẹ mma; m k'e gi obi m ile lẹ ihiẹn ile rị imẹ m kụn wẹ ye alịnị nọkẹ ihiẹn-ugbo.’ ”

⁴² Mmẹ wụ Osolobuẹ sị, “Kẹ m dọn wẹhẹni ndịnị okẹn nsọngbuni, ẹrịra kẹ m jẹnkọ d'e ye wẹ ihiẹn-ọma ile m rị e kwe wẹ nkwa a.

⁴³ “Ịhịan sikọ d'e ṅọnzi alị imẹ alịnị ụnụ rị a sị, ‘Ọ gbagụọ okpokoro — kẹ ịhịan kẹ anụmanụ arịzị a, makẹni Osolobuẹ e wegụọ a ye ndị Babilọnụ.’

⁴⁴ Ịhịan k'e gizi egho ṅọnrin alị; wẹ k'e biyezi ẹka ẹkụkwọ wẹ gi re alị, ndị ọshẹri e biye ẹka. Wẹ k'e mẹ ẹ ẹgbẹrẹ alị Bẹnjamini lẹ ụmụ-alị ndị fihunmẹ Jerusalẹm; wẹ k'e mẹ ẹ imẹ obodo ile rị alị Juda lẹ obodo ndị rịsọnmẹ òke; wẹ k'e mẹ ẹ imẹ obodo ndị rị ukun ugu ndị rị ibe ọdịdan-ẹnyanwụn; wẹ k'e mẹ ẹ ẹbamịn ndịdan-mirin Juda wụ Nẹgẹvụ. O k'a rị ẹrịra makẹni m jẹnkọ d'e mẹ n'ọ rịzịnị wẹ mma. Mmẹ wụ Osolobuẹ ku ẹ.”