Jerimaya 31 - Ika

Isi Nke Mmanaị Kwasị Ọgụn

¹ O ru ogẹn hụ, m jẹnkọ d'a wụrụ Chuku ebọn ile rị Izrẹlụ, wẹ nwẹn a wụrụ ndị nke m. Ya kẹ Osolobuẹ ku.

² Osolobuẹ sị, “M k'e mẹni ndị Izrẹlụ k'a họdụnị ọhụnma — ndị ahụn ọpịa-agha k'e gbuhọdụ hụn k'a rị imẹ atụ; m k'a bịa d'e mẹ ẹhụ fu Izrẹlụ.”

Ọhụn Jerimaya Hụn

³ O nwọn ogẹn Osolobuẹ gi bịa d'e kunrun m, sị m, “Ihiẹn-ọsụsụọ ghalẹni a gụ kẹ m nwọn ebe ụnụ rị. Ya haịn m gilẹni e mẹbehi ụnụ kẹ ndị nke m.

⁴ Nwagbọọ m wụ Izrẹlụ, m jẹnkọ d'a tụndọnzi i nọkẹ ụlọ, y'e turuzi. I jẹnkọ d'a ghọghọmazị, kụma ẹgede, e tẹn egu imẹ ọgbọ-egu.

⁵ Ụnụ jẹnkọ d'a kụnmazị alị vaịnị elu òke ndị rị obodo Sameria, rama manya-vaịnị; ndị kụnnị wẹ k'e ri wẹ.

⁶ Ogẹn lala hụn ndị a kpọ ọgwa k'e gi gha òke rịsọnmẹ ẹgbẹrẹ Ifrem a hị, ‘Pụha nị, nị ẹnyi jẹn Zayọnụ d'e fe Osolobuẹ wụ Chuku ẹnyi.’ ”

⁷ Osolobuẹ sịzị, “Bụnị nị Jekọpụ ẹbụ ịghọghọ; yini ni alịnị ka alị ndị-ọzọ ile oro ịghọghọ. Weshi ni olu elu ye ekele, a sị, ‘Euu, Osolobuẹ, dodo zụọpụha ndị nke i, ndị Izrẹlụ họdụnị.’

⁸ M jẹnkọ d'a gha alị hụ rị ẹbamịn-ugu wekinhẹn wẹ, gha ebe ile wẹ rị imẹ ụwa welụa wẹ. Ndị ẹnya-ishi lẹ ndị ngụrọ k'a rịdẹ imẹ wẹ, kẹ ikpoho rị imẹ lẹ ndị imẹ rị e mẹ, igunrun ahụn k'a lụanị k'e hi-ogbe.

⁹ Wẹ k'e gi ẹkwan lụaha; wẹ k'a rị a rịọ m m welụakọnị wẹ. M k'e wejẹnsọnmẹ wẹ mkpẹnrẹn mirin rị mma, we wẹ ghasọnmẹ ụzọ riẹnni makẹ wẹ gha a kpọgburu, makẹni mmẹ wụ nẹdi Izrẹlụ; Ifrem wụ nwa ibuzọ m.”

¹⁰ Ụnụ ndị alị ile, gọnkwọ nị ntịn ihiẹn Osolobuẹ rị e ku; gwasọnmẹ ni alị ndị rị ebe teni rịdẹ mkpẹnrẹn ohimin nị: “Onyẹ hụn feyịya ndị Izrẹlụ jẹnkọ d'e wegbama wẹ, lepụ wẹ ẹnya nọkẹ onyẹ e du atụnrụn.

¹¹ “Makẹni Osolobuẹ jẹnkọ d'a gbarị ebọn Jekọpụ, gbapụha a ẹka ndị ka a ikẹn.

¹² Wẹ k'a bịa d'a nọ elu Ugu Zayọnụ yi oro ịghọghọ, e nwọn anwịnrịn ọda-ọda nị Osolobuẹ e yekẹ wẹ ihiẹn — kẹ ọka kẹ manya-ọhụn a sụọ ụsụọ kẹ ofugbọn-olivu kẹ mmụ ewu lẹ atụnrụn lẹ efin. Wẹ k'a rị e dẹn kẹ ugbo mirin rị ọhụnma. Akwankọzị wẹ ụya.

¹³ “Ịgbagba k'a rị e tẹn egu, a ghọghọ; ẹrịra kẹ ikorọbịa lẹ ndị-ichẹn k'e mẹzikwọ. M jẹnkọ d'a napụ wẹ ẹkwan, ye wẹ ịghọghọ. M jẹnkọ d'a napụ wẹ ụya wẹ rị e ri, rọkọ wẹ obi, mẹ ẹfọ sụọ wẹ ụsụọ.

¹⁴ M k'e ye ndị nchụn-ẹjan ihiẹn ọda-ọda; ndị nke m k'e rijun ẹfọ ọhụnma-ọhụnma.” Ya kẹ Osolobuẹ ku.

¹⁵ Osolobuẹ sị, “Wẹ rị a nụ olu ịhịan imẹ obodo Rama, ọ hụ a kwan ụya, a kwangbu enwẹn ẹ. Rechẹlụ rị a kwannị ụmụ a; ọ nịnị wẹ hụhụ a ẹkwan hụ, makẹni ụmụ a arịzị.”

¹⁶ Osolobuẹ sị, “Akwanzilẹ; anịzịlẹ ẹnya-mirin gba ị. I k'e ri ihiẹn ị rụn; mmụ ị k'a gha alị ndị-iṅẹnrẹn lụa. Ya kẹ Osolobuẹ ku.

¹⁷ Ihiẹn k'a rịnị ị mma ihun; ụmụ ị jẹnkọ d'a lụaha alị wẹ.” Ya kẹ Osolobuẹ ku.

¹⁸ Eziẹ, a nụghọ m kẹ Ifrem wụ Izrẹlụ rị a kwan ụya, a sị, “Y'e yegụọ m afụnfụn ọda-ọda kẹ w'e mẹ nwa-efin wẹ zụnlẹni. Dodo, wekinhẹn m nwan nị m hụn ụzọ kinhẹn, makẹni yụ wụ Osolobuẹ wụ Chuku m.

¹⁹ Kẹ m kpahugụ, e rohutọ m; kẹ m ghọtagụ, a kwan m, a fịan m ẹka obi; ifẹnrẹn nọ mẹ m, mẹgbuchanrịn m, makẹni njọ m mẹ kẹ m rị okoro kẹ m rị a ta afụnfụn a.”

²⁰ Osolobuẹ sị: ẹlẹ nwa m kẹ Ifrem wụdẹ nwan ra; nwa m hụn rị m obi, nwa m hụn ẹfọ gi a sụọ m ụsụọ? Ọsụọn'a nị m'e ku ẹ ni ihiẹn ọ rị e mẹ arị mma, ọ rị m obi ọda-ọda. Ọ da m ọda-ọda; omikẹn ẹ e mẹ m e mẹ.

²¹ “Tumẹsọnmẹ ni ahịma wẹ gi a kọma ụzọ ẹnya; zuyesọnmẹ ni osisi wẹ gi a marịn ụzọ. Kọma nị ụwaya ẹnya — ụzọ hụn ụnụ gha pụ. Kinhẹn azụụn, nwagbọọ wụ Izrẹlụ; lụaha nị obodo ụnụ ndịnị.

²² Elee mgbe kẹ y'a danshibehidẹ azụụnnị lẹ azụụnnị, ịyụ, nwata-okpoho ẹnya rịlẹni ụzọ ohu? Kanị Osolobuẹ jẹnkọ d'e ke ihiẹn ọhụn imẹ ụwa: ebe okpoho nọ e lepụ okẹnnyẹ ẹnya.”

²³ Osolobuẹ ihiẹn ile rị okpuru ẹ, hụn wụ Chuku Izrẹlụ sị, “Ogẹn m'e gi gha imẹ ẹgbụn igbọn wẹ rị welụa wẹ, ndị bi alị Juda lẹ obodo rịsọnmẹ imẹ ẹ k'e kumẹzi okuni, ‘Osolobuẹ ya gọzi yụ wụ alị ezi-omumẹ, yụ wụ ugu nsọ!’

²⁴ Ogẹn hụ, ịhịan ile k'e bigbama imẹ alị Juda lẹ ụmụ alị rịn'a — kẹ ndị ugbo kẹ ndị e du anụ.

²⁵ M k'e mẹ ndụn banzị ndị ndụn gụ, mẹ obi ruchanrịn ndị rị a kwannị alị.”

²⁶ Ịya kẹ m nọ tẹnhin, lehunmẹ ẹnya. Ụran ahụn a sụọka m ụsụọ.

Izrẹlụ Lẹ Juda K'a Bazị Ụba

²⁷ Osolobuẹ sị, “Ezioku, ogẹn lala hụn m k'e gi kụn mmụ ye imẹ Izrẹlụ Ẹbamịn-ugu lẹ imẹ Juda nọkẹ mkpụrụ wẹ kụnye imẹ ugbo — kẹ ịhịan kẹ anụ-ụlọ jẹnkọ d'a mụba.

²⁸ Ọ wụrụ nị kẹ m dọn buchanrịn ẹnya zinmẹ wẹ kẹni m huepụ wẹ, kụkpọ wẹ, ma wẹ tuhu, wiwi wẹ, gi eje-ihiẹn sọn wẹ, ẹrịra kẹ m k'e dọn buchanrịnzị ẹnya zinmẹ wẹ, kẹni m tụn wẹ kẹ ụlọ, kụn wẹ kẹ ihiẹn-ugbo. Ya kẹ Osolobuẹ ku.

²⁹ O ru ogẹn ahụn, asịkọzị wẹ, ‘Ndị nẹdi ra vaịnị rịlẹni mma, ụmụ wẹ kẹ eze rị e gigihi.’

³⁰ Ọ rịkọzị ẹrịra: onyẹ hụn mẹ njọ kẹ njọ a k'e gbu; onyẹ hụn ra vaịnị rịlẹni mma kẹ eze k'e gigihi.”

Nkwa Lẹ Nkwerigbama Ọhụn

³¹ Osolobuẹ sị, “Ezioku, ogẹn lala hụn m k'e gi mẹmẹ nkwerigbama ọhụn, hụn k'e kwọngbama mmẹ lẹ ndị Izrẹlụ lẹ ndị Juda.

³² Ọ rịkọ kẹ Iwu hụn m tumẹ ẹgbata mmẹ lẹ ndị nẹdi wẹ ogẹn hụ m gi kwọndọn wẹ ẹka, gha alị Ijiptu wepụha wẹ. Ọ nọkọ kẹ nke mbụ hụ, makẹni ndị nẹdi wẹ tikpọ nkwerigbama m, ọsụọn'a nị mmẹ wụ di wẹ.” Ya kẹ Osolobuẹ ku.

³³ Osolobuẹ sị, “Hụnnị wụ nkwerigbama ọhụn hụ m jẹnkọ d'e tumẹ ẹgbata mmẹ lẹ ndị Izrẹlụ, ogẹn hụ: m k'e bu Iwu m che obi wẹ; m k'e de e ye akpobi wẹ; m k'a wụrụ Chuku wẹ, a wụrụ wẹ ndị nke m.

³⁴ Ịhịan akuzikọzị ibe ẹ mọbụ sị nwẹnẹ ẹ, ‘Marịn Osolobuẹ,’ onyẹ-onyẹ jẹnkọ d'a marịn m, gha onyẹ-uku d'e ru onyẹ-nta, makẹni m jẹnkọ d'a gbagharị wẹ eje-ihiẹn wẹ mẹ; anyanhankọzị m njọ wẹ.”

³⁵ Lee ihiẹn Osolobuẹ ku — Osolobuẹ hụn tumẹ anwụn n'ọ hụn ụzọ e ti efinnaị, sị ifọn lẹ kokisẹ ichẹn-ichẹn e ti imẹ uhinhin, Osolobuẹ hụn e mẹhunmẹ ohimin, mirin ẹ a kpọma ẹbiri; Osolobuẹ hụn Ẹfan a wụ “Osolobuẹ ihiẹn ile rị okpuru ẹ,” ọ sị:

³⁶ “Omẹni ihiẹn ndịnị m ke k'a s'ẹka sọnbehi iwu m tumẹni wẹ, ya wụ nị Izrẹlụ k'a s'ẹka wụbehi alị ebe m rị. Ya kẹ Osolobuẹ ku.”

³⁷ Osolobuẹ sịzị: “Omẹni ịhịan s'ẹka ma igwere ile mọbụ chọpụha iyetọ ụwa, ya kẹ m'a nọ jụchanrịn ụmụ Izrẹlụ ile yeni eje-ihiẹn ile wẹ mẹ.” Ya kẹ Osolobuẹ ku.

³⁸ Osolobuẹ sịzị, “Ogẹn lala hụn wẹ k'e gi tụndọnzini m obodoni wụ Jerusalẹm, ghakwọrị Okẹn Ụlọ-nche Hananẹlụ d'e ru Ọnụ-mgbọn rị ntugi mgbọn;

³⁹ a gha wẹ ebẹhụ tụnsọnmẹ ẹ d'e ru Oke Garẹbụ, gha ebahụn tụnsọnmẹ ẹbamịn ọdịdan-ẹnyanwụn, pụha Gụa.

⁴⁰ Ọdanmgbugbu hụ rị ebẹhụ hụn w'a tụye ozun lẹ ntụn anụ ndị nchụn-ẹjan kpọ ọkụn lẹ alị ugbo ile rị mkpẹnrẹn Ọdanmgbugbu hụ k'a rịchanrịn imẹ ẹ, rudẹ Ọdanmgbugbu Kidrọnụ hụn rị ẹbamịn ọwụwa-ẹnyanwụn, pụhazị Ọnụ-mgbọn Ẹshin rị ẹbamịn-ugu. Wẹ ile jẹnkọ d'a wụ ihiẹn rị nsọ ẹnya Osolobuẹ. Ehuepụkọzị wẹ obodoni mọbụ tikpọzị a.”