Jerimaya 30 - Ika

Isi Iri Kwasị Ọgụn Ndị Izrẹlụ Tagụ Afụnfụn Njọ Wẹ, Ọ Rịzịnị Wẹ Mma

¹ Ọnwan wụ ihiẹn Osolobuẹ gwa Jerimaya:

² “Osolobuẹ, Chuku Izrẹlụ, sị, ‘Detu ihiẹn ile m gwa ị ye imẹ ẹkụkwọ.

³ Ogẹn lala hụn m k'e gi wepụha ndị nke m wụ ndị Izrẹlụ lẹ ndị Juda ẹka ndị gini wẹ, mẹzi n'ọ rịnị wẹ mma imẹ alịnị m ye ndị nẹdi wẹ kanị weri.’ Ya kẹ Osolobuẹ ku.”

Osolobuẹ E Kudọnzi Ẹ N'o K'a Rịzịnị Ndị Nke Ẹ Mma

⁴ Ihiẹnni kẹ Osolobuẹ ku banyeni Izrẹlụ lẹ Juda:

⁵ “Osolobuẹ sị: ‘Oro egun kẹ wẹ rị a nụ. Oro okẹn egun; obi eruni ịhịan alị.

⁶ D'a jụkwọ nị omẹni okẹnnyẹ a mụ nwa! Omẹni okẹnnyẹ ara mụ nwa, kị haịn nwan m gi a hụn ikẹnnyẹ ile ndụn rị kẹ wẹ gi ẹka kwọndọn ẹfọ lekẹ okpoho imẹ rị e mẹ? Kị haịn ihun onyẹ ọwụlẹ gi e nwun ṅanhịan kẹ ndị ẹdeke gụ ẹhụ?

⁷ Ogẹn hụ lalanị k'a jọgbu enwẹn ẹ! Onwọnni eje-ogẹn nọ kẹ ya. O jẹnkọ d'a wụnị ebọn Jekọpụ ogẹn okẹn nsọngbu, kanị o k'a hụn isi wanahịn.’ ”

⁸ Osolobuẹ ihiẹn ile rị okpuru ẹ sị, “O ru ogẹn ahụn, m jẹnkọ d'a kpagipụ ihiẹn wẹ gi kpọdọn wẹ, m k'a dọbepụ ẹgbụn rị wẹ olu; ndị alị ọzọ a kpakọzị wẹ igbọn.

⁹ “Osolobuẹ wụ Chuku wẹ kẹ wẹ k'e femẹ, ya lẹ eze wẹ onyẹ ẹbozo Defidi hụn m k'e wepụhanị wẹ.

¹⁰ “Odibo m wụ Jekọpụ, atụkwọlẹ egun; ẹghẹẹ, Izrẹlụ anịlẹ ndụn gụ ị. M jẹnkọ d'a gha alị hụ teni zụọpụha ụnụ; m jẹnkọ d'a zụọpụha ụmụ ị ẹka alị hụ gini wẹ. Ẹghẹẹ, Jekọpụ jẹnkọ d'e bi udọn lẹ ndọnkwa; onwọnzini onyẹ k'e rọn ẹ egun.

¹¹ M k'a nọyen'i, zụọpụha ị. Ọsụọn'a m tikpọchanrịn alị ndị ahụn ile m fe i ye, e tikpọchanrịnkọ m'ị. M k'e ye i afụnfụn nkesi, kanị hụn furuni; anịkọ m'ị lachanrịn ọfẹ. Ya kẹ Osolobuẹ ku.”

Chuku Sị O K'a Changbu Izrẹlụ Ebe Ọ Rụ Ẹhụ

¹² Osolobuẹ sị, “Ẹtẹ i ẹlẹ hụn w'a zụọ, ẹhụ ị rụ a jọka.

¹³ Onwọnni onyẹ e kuni i ọnụ ị; ẹtẹ i enwọn ọgụn. Onwọnni ihiẹn k'e mẹ i dịnhịn.

¹⁴ Alị ile yụ lẹ wẹ te a sụọ, a zọgụọ ị; onwọnzini ihiẹn wẹ gi i e mẹ. E mẹgụọ m'ị ihiẹn eṅẹnrẹn e mẹ ịhịan, ye i afụnfụn kẹ onyẹ ẹfọ jọ dọn e ye ịhịan, makẹni ikpe ma ị ọda-ọda, njọ ị e bukẹ ọda.

¹⁵ Kị ị rị e yini oro yeni ẹhụ ị rụ? Kị ị rị e yini oro makẹ ihiẹn rị a tụrụnị hụn nwọnlẹni ọgụn? Makẹni ikpe ma ị ọda-ọda lẹ makẹni njọ ị e bukẹ ọda haịn m gi mẹ i ihiẹn ndịnị.

¹⁶ “Ufiri ẹ, m jẹnkọ d'e tikpọ ndị ile tikpọn'ị; wẹ k'a kpụnrụn ndị-iṅẹnrẹn i ile; ndị ile gbu i kwarị ihiẹn i, wẹ k'e gbuzikwọ wẹ kwarị ihiẹn wẹ; ndị ile zun i ohin, wẹ jẹnkọ d'e zun wẹ ohin.

¹⁷ “M jẹnkọ d'e mẹ ẹhụ rịzị ị ikẹn; a changbu m'i ẹtẹ, makẹni wẹ rị a kpọ ị ‘onyẹ wẹ jụ’, ‘Zayọnụ nwọnlẹni onyẹ a jụ ukwere ẹ.’ Osolobuẹ e kugụọ a.”

¹⁸ Osolobuẹ sị, “M jẹnkọ d'e dọnzini ebọn Jekọpụ ụlọ wẹ ndị tikpọnị; m k'e mẹ omikẹn rụnkin ebe ile wẹ te bi mbụ; wẹ k'a rụndọnzi obodo ẹ ye ọnọdị a daị, rụndọnzi obi-eze ye ebe ọ rị mbụ.

¹⁹ “Wẹ k'a kwankpọma ẹbụ ekele, zụnma ụzụn ịghọghọ. M k'e mẹ wẹ bawaye, ebelụakọ wẹ; m k'e mẹ wẹ nwọn ọghọ, awụkọ wẹ ndị wẹ e legberi.

²⁰ Ụmụ wẹ k'a rị mma kẹ wẹ rị mbụ; alị wẹ k'e weri ezigbo ọnọdị ihun m. M k'e ye ndị ile bịangbuni wẹ afụnfụn.

²¹ Onyẹ nke wẹ jẹnkọ d'a kị wẹ; imẹ igunrun wẹ kẹ onyẹ k'a kịnị wẹ k'a gha pụha. M k'e wezụnhan a, ọ nọkunmẹ m — makẹni onwọnni onyẹ k'a sa ẹka nọkunmẹ m sokpan mmẹ wezụnhan a. Ya kẹ Osolobuẹ ku.

²² Ụnụ k'a wụrụ ndị nke m nke-esi, mmẹ nwẹn a wụrụ Chuku ụnụ.”

²³ Lee ẹ, ọnụma Osolobuẹ jẹnkọ d'a kpọ kẹ ẹbi! Olulu ẹ k'a nọ isi ndị eje-omumẹ bi.

²⁴ Iwe Osolobuẹ hụn rị a dụn kẹ ọkụn arọkọ d'e ru n'o mẹchanrịngụ ihiẹn rị a obi. Ihun kẹ ụnụ jẹnkọ d'a ghọta ihiẹnni.