Jerimaya 29 - Ika

Isi Nke Itenẹi Kwasị Ọgụn Ẹkụkwọ Jerimaya Dejẹnni Ndị Wẹ Kpụnshi Babilọnụ

¹ Ọnwan wụ ihiẹn onyẹ-amụma wụ Jerimaya de imẹ ẹkụkwọ-ozi. Obodo Jerusalẹm k'ọ nọ de ẹ jẹnni ndị-isi họdụ imẹ ndị wẹ kpụnshi alị Babilọnụ, wẹ lẹ ndị nchụn-ẹjan lẹ ndị-amụma lẹ ndị ọzọ ile Nebukadineza gha Jerusalẹm kpụnshi alị Babilọnụ.

² Ya wụ, o dejẹnni wẹ ya kẹ Nebukadineza ghagụ Jerusalẹm kpụnrụn eze wụ Jekọnaya lẹ nnẹ-eze kpụnshi Babilọnụ, wẹ lẹ ndị ịhaịmẹ eze lẹ ndị-ndu alị Juda lẹ isi-obodo wẹ wụ Jerusalẹm lẹ ndị omẹ-nka lẹ ndị ma kpụ goru lẹ igwe ichẹn-ichẹn.

³ Ẹliasa nwa Shafanị lẹ Gẹmarịa nwa Hil'kia k'o ye ẹkụkwọ-ozi hụ jẹnni wẹ, makẹni wẹ jẹnkọ Babilọnụ d'a hụn Nebukadineza wụ eze ndị Babilọnụ hụn Zẹdikaya eze Juda zi wẹ d'a hụn. Ihiẹn Jerimaya de wụ:

⁴ “Mmẹ wụ Osolobuẹ ihiẹn ile rị okpuru ẹ, hụn wụ Chuku Izrẹlụ, rị a sị ụnụ ile m gha Jerusalẹm chụshi alị Babilọnụ:

⁵ ‘Tụnrụn nị ụlọ biri; rụn nị ugbo ri ihiẹn rịn'a;

⁶ lụrụ ni inyẹnmẹ; mụ nị ikẹnnyẹ lẹ ikpoho; lụye ni ụmụ ụnụ inyẹnmẹ, ụnụ e we ụmụ ụnụ ikpoho ye di, kẹni ụmụ ụnụ nkẹ mụzị ụmụ. Ba nị ụba; ebelụalẹ ni.

⁷ A chọzịkwọ nị aghamihun obodo m kpụnjẹn ụnụ. A rịọnị n'a Osolobuẹ; makẹni, ọ rịnị obodo hụ mma, ọ rịnị ụnụ nwẹn mma.’

⁸ “Ẹghẹẹ! Osolobuẹ ihiẹn ile rị okpuru ẹ, hụn wụ Chuku Izrẹlụ rị a sị: ‘Anịkwọlẹ ni ndị-amụma ụnụ hụn ụnụ lẹ wẹ rị dufie ụnụ, kẹ ndị rị a gbanị ụnụ ẹfa. Egọnkwọlẹ ni ntịn nrọ ndị ahụn ụnụ rị a rọ,

⁹ makẹni amụma-ụgha kẹ wẹ rị e gi ẹfan m e buni ụnụ. Ẹlẹ mmẹ zi wẹ.’ Ya kẹ Osolobuẹ ku.

¹⁰ “Osolobuẹ sị, ‘Ahụa iri kwasị ọgụn-ẹtọ alị Babilọnụ e gi kpa ikẹn zugụ, a chọha m ụnụ d'e mẹzu nkwa ahụn m gi omikẹn kwe nị m jẹnkọ d'e wekinhẹn ụnụ alị ụnụ.

¹¹ Makẹni, a marịnghọ m ihiẹn m bu obi banyeni ụnụ: ihiẹn rị mma rọ, ẹlẹ eje-ihiẹn, k'o dọn rịnị ụnụ mma ihun, kẹ ụnụ a dọn nwọn olilẹnya. Ya kẹ Osolobuẹ ku.

¹² “ ‘Ụnụ jẹnkọ d'a kpọku m, mẹ ekpere, rịọ m, a za m ụnụ.

¹³ Ụnụ sikọ d'a chọ m, ụnụ a hụn m, omẹni ụnụ e gichanrịn obi ụnụ chọ m.

¹⁴ M k'a nị ụnụ hụn m; m k'e wepụha ụnụ ẹka ndị gini ụnụ, wekinhẹn ụnụ. M jẹnkọ d'a gha alị ile lẹ ebe ile m chụye ụnụ wẹhẹzi ụnụ ebeni — e mẹ m n'ọ rịzịnị ụnụ mma, wekinhẹn ụnụ ebe m gha kpụnrụn ụnụ.’ Ya kẹ Osolobuẹ ku.

¹⁵ “Ikẹnkwọ ụnụ hụ a sị enwẹn ụnụ, ‘Osolobuẹ e wepụhagụọnị ẹnyi ndị-amụma imẹ Babilọnụ ebeni ẹnyi rị.’

¹⁶ Lekwọ nị ihiẹn Osolobuẹ ku banyeni eze ụnụ, onyẹ hụn rị nwan ukpo-eze Defidi, lẹ ịhịan ile họdụ imẹ obodoni wụ Jerusalẹm, ndị alị ụnụ wẹ kpụnshilẹni alị ọzọ:

¹⁷ Osolobuẹ ihiẹn ile rị okpuru ẹ sị, ‘M jẹnkọ d'e zihẹni wẹ ọpịa-agha, ụnwụn lẹ eje-emu, a nọ wẹ kẹ ogbe figi jọgbu enwẹn ẹ njọ jẹnkọlẹni d'a nị ri.

¹⁸ Ẹghẹẹ, m k'e gi ọpịa-agha lẹ ụnwụn lẹ eje-emu chụ wẹ. Ndị alị-eze ile rị ụwa hụn ihiẹn m mẹ ndị ahụn, egun a tụ wẹ. Wẹ k'a wụrụ ihiẹn wẹ gi a bụ ọnụ, ihiẹn w'a hụn a jụpụ ẹsọn, ihiẹn w'a mụ ẹmụ lẹ ihiẹn-ifẹnrẹn ẹnya ndị alị ile m k'a chụjẹn wẹ.

¹⁹ Makẹni egini wẹ oku m dọn, oku hụn m gi idibo m wụ ndị-amụma gwa wẹ ọgụgwa-ọgụgwa. Ya kẹ Osolobuẹ ku. Ụnụ nwẹn wẹ kpụnshi alị ndị-ọzọ egizikwọnị oku m dọn. Ya kẹ Osolobuẹ ku.

²⁰ “ ‘Ụnụ ile m gha Jerusalẹm kpụnshi alị Babilọnụ, lee ni nwan ihiẹn Osolobuẹ rị a gwa ụnụ.’

²¹ Lee ni ihiẹn Osolobuẹ ihiẹn ile rị okpuru ẹ hụn wụ Chuku Izrẹlụ ku banyeni Ehabụ nwa Kolaya lẹ Zẹdikaya nwa Maaseya, madụ ẹbụọ hụ gi ẹfan m e buni ụnụ amụma-ntụ: ‘M jẹnkọ d'e bu wẹ che ẹka Nebukadineza wụ eze alị Babilọnụ, o gbu wẹ idẹnya ụnụ.

²² Ihiẹn m jẹnkọ d'e mẹ wẹ k'a wụrụ ihiẹn ndị Juda ile wẹ kpụnjẹn Babilọnụ e gi a bụ ịhịan ọnụ: a sị ịhịan, “Osolobuẹ ya mẹ i ihiẹn o mẹ Zẹdikaya lẹ Ehabụ, ndị hụn eze Babilọnụ dụn ọkụn.”

²³ M k'e mẹ wẹ ẹbụbụọ ẹrịra makẹni e mẹgụọ wẹ arụ imẹ Izrẹlụ; a nagụọ wẹ ibe wẹ inyẹnmẹ, gi ẹfan m tụ ntụ, ku ihiẹn m gwalẹni wẹ kụ. A marịnghọ m ihiẹn wẹ mẹ; m wụ ọshẹri.’ ” Ya kẹ Osolobuẹ ku.

Ozi Osolobuẹ Sị Jerimaya Zi Shẹmaya

²⁴ Nke Shẹmaya onyẹ Nẹhẹlam, sị a,

²⁵ “Osolobuẹ ihiẹn ile rị okpuru ẹ, hụn wụ Chuku Izrẹlụ, sị: Ị nọ gi ẹfan ị de ẹkụkwọ jẹnni ịhịan ile rị Jerusalẹm, kẹ onyẹ nchụn-ẹjan wụ Zẹfanaya nwa Maaseya kẹ ndị nchụn-ẹjan ndị ọzọ họdụnị — ị nọ sị Zẹfanaya,

²⁶ ‘Zẹfanaya, ịyụ wụ onyẹ nchụn-ẹjan hụn Osolobuẹ tumẹ onyẹ nlepụ-ẹnya ụlọ Osolobuẹ, gi i nọkin ẹnya onyẹ nchụn-ẹjan wụ Jehoyada; o furu nwan n'i gi aba lẹ igwe wẹ gi a kpọma ịhịan kpọma onyẹ-ẹra ọwụlẹ kpọ enwẹn ẹ onyẹ-amụma.

²⁷ Kị haịn nwan i gilẹni ke jụgbọ Jerimaya onyẹ obodo Anatọtụ hụn rị imẹ igunrun ụnụ ebẹhụ e bu amụma hụ ọ rị e bu?

²⁸ Jerimaya e dehẹgụọdẹni ẹnyi ẹkụkwọ imẹ Babilọnụ ebeni, sị ẹnyi, “Ụnụ jẹnkọ d'a nọbie ebẹhụ: Tụnrụn nị nwan ụlọ biri; rụn nị ugbo ri ihiẹn rị imẹ ẹ.” ’ ”

²⁹ Kanị ogẹn onyẹ nchụn-ẹjan wụ Zẹfanaya gi nwọnhẹn ẹkụkwọ-ozi Shẹmaya, ọ nọ gụnghọsị onyẹ-amụma wụ Jerimaya ya.

³⁰ Ya kẹ Osolobuẹ nọ sị Jerimaya:

³¹ “Zi ozi jẹnni ndị ahụn ile wẹ kpụnshi alị ọzọ. Sị wẹ nị Osolobuẹ e kuọlẹ ihiẹn jẹnkọ d'e mẹ Shẹmaya onyẹ Nẹhẹlam, sị ‘Ebe o mẹni Shẹmaya e bugụọnị ụnụ amụma hụn m zilẹn'ẹ, mẹ ụnụ gi ntụ dọn ẹnya,

³² mmẹ wụ Osolobuẹ rị nwan e ku ẹ nị m jẹnkọ d'e yerịrị Shẹmaya onyẹ Nẹhẹlam lẹ ẹbozo ẹ afụnfụn. Shẹmaya enwọnkọ akpụ onyẹ nke ẹ ohu jẹnkọ d'a họdụnị mọbụ hụn ihiẹn-ọma m jẹnkọ d'e mẹni ndị nke m, makẹni o kugụọ ihiẹn ụnụ e gi a pa oku m.’ ”