Jerimaya 28 - Ika

Isi Nke Ẹsatọ Kwasị Ọgụn Kẹ Osolobuẹ Dọn Gbu Hanania Onyẹ-Amụma

¹ O ru nwan ifọn nke isẹn imẹ ahụa hụ mẹ ẹ ẹnọ Zẹdikaya kịma alị Juda, onyẹ-amụma wụ Hanania nwa Azuru onyẹ Gibiọnụ nọ gwa mmẹ wụ Jerimaya oku imẹ ụlọ-nsọ Osolobuẹ, idẹnya ndị nchụn-ẹjan lẹ ndị ọzọ ile, sị m:

² “Lee ihiẹn Osolobuẹ ihiẹn ile rị okpuru ẹ, hụn wụ Chuku Izrẹlụ ku: Ọ sị, ‘M k'e tibepụ agbụn eze alị Babilọnụ yimẹ alị ile olu.

³ O gini e zu ahụa ẹbụọ, e wekin m ihiẹn ile eze ndị Babilọnụ wụ Nebukadineza gha imẹ ụlọ-nsọ Osolobuẹ ebeni kwashi alị Babilọnụ.

⁴ M k'e welụazịkwọ eze alị Juda wụ Jehoyakini wụ Jekọnaya nwa Jehoyakim ebeni, ịya lẹ ndị ọzọ ile wẹ gha Jerusalẹm kpụnshi alị Babilọnụ. Makẹni m k'e tibepụ agbụn hụn eze alị Babilọnụ yimẹ alị ile olu.’ Ya kẹ Osolobuẹ ku.”

⁵ Ya kẹ Jerimaya onyẹ-amụma nọ nọ idẹnya ndị nchụn-ẹjan lẹ ndị ọzọ ile rị imẹ ụlọ-nsọ Osolobuẹ ebahụn sị Hanania,

⁶ “Isẹẹ-o! Osolobuẹ ya dodo mẹ amụmanị i bu bụn! Ya gha alị Babilọnụ wekinhẹn ihiẹn ile wẹ kwarị imẹ ụlọ-nsọ Osolobuẹ ebeni, wekinhẹnzi ndị ahụn ile wẹ kpụnrụn ebeni.

⁷ Ka gọn nwan ntịn ihiẹn m jẹnkọ d'e ku idẹnya ịyụ lẹ ndị Juda ile rị ebeni:

⁸ Gha alị lala, amụma agha lẹ ụnwụn lẹ eje-emu kẹ ndị-amụma hụn buni mmẹ lẹ ịyụ ụzọ bumẹ amụma busọnmẹ banyeni alị ichẹn-ichẹn bu ọda lẹ okẹn alị-eze bu ọda.

⁹ Kanị, onyẹ bu amụma nị ihiẹn jẹnkọ d'a rị mma, ihiẹn hụn o ku bụn kẹ wẹ e kweri ni Osolobuẹ zi ẹ nke-esi.”

¹⁰ Ya onyẹ-amụma wụ Hanania nọ gbụpụ onyẹ-amụma wụ Jerimaya agbụn ahụn Jerimaya yimẹ enwẹn ẹ olu, tibepụ a,

¹¹ nọ idẹnya ndị ile rị ebẹhụ sị, “Osolobuẹ sị, ‘Ahụa ẹbụọ gini d'e zu, ẹnịna kẹ m k'a dọn tibepụ agbụn Nebukadineza wụ eze Babilọnụ kpọma ndị alị ile rị ichẹn-ichẹn olu.’ ” O kugụ ihiẹnni, onyẹ-amụma wụ Jerimaya nọ pụ.

¹² O k'e te Hanania dọbepụ agbụn ahụn onyẹ-amụma wụ Jerimaya yi olu, Osolobuẹ nọ sị Jerimaya,

¹³ “D'a gwa Hanania nị Osolobuẹ sị, ‘Y'e tibepụgụọ agbụn wẹ gi osisi mmaka mẹmẹ, kanị y'e gigụọ ihiẹnni i mẹ seri agbụn-igwe ye enwẹn i olu.

¹⁴ Makẹni, Osolobuẹ ihiẹn ile rị okpuru ẹ hụn wụ Chuku Izrẹlụ sị: E bugụọlẹ m agbụn-igwe che alị ichẹn-ichẹn olu kẹni wẹ humẹni eze Babilọnụ wụ Nebukadineza isi: wẹ k'e ferịrị a. E wegụọzịdẹ m anụ rị ọfịa che okpuru ẹ kịma.’ ”

¹⁵ Jerimaya onyẹ-amụma nọzị sị Hanania onyẹ-amụma, “Hanania, gọn nwan ntịn, Osolobuẹ ezini i bu amụmanị, kanị ị nọ mẹ ndịnị gi ntụ dọn.

¹⁶ Lee nwan ihiẹn Osolobuẹ ku: ‘M'e d'e wepụ ị elu-ụwanị. Ahụanị k'i jẹnkọ d'a nwụn, makẹni y'e mẹgụọ ndịnị jụ oku Osolobuẹ.’ ”

¹⁷ O ru ifọn nke ẹsa imẹ ahụa hụ, onyẹ-amụma wụ Hanania nọ nwụnhụn.