Jerimaya 27 - Ika

Isi Nke Ẹsa Kwasị Ọgụn Osolobuẹ Sị Ndị Juda K'e Humẹrịrịnị Nebukadineza Isi

¹ O ke te Zẹdikaya nwa Josaya họnrin eze alị Juda kẹ Osolobuẹ zi Jerimaya ozini.

² Jerimaya sị, “Osolobuẹ sị m: Gi ụdọ lẹ akp'osisi mẹmẹrin yoku w'a kpọye igbọn olu, yiri ẹ olu kẹ igbọn.

³ Y'e zi ndị ụkọ bịa Jerusalẹm d'a hụn eze Juda wụ Zẹdikaya ozi jẹnni ndị-nze wẹ — ndị-nze alị Ẹdọm lẹ alị Mụabụ lẹ alị Amọnụ lẹzi alị Taya lẹ Sidọnụ.

⁴ Sị ndị ụkọ hụ nị Osolobuẹ ihiẹn ile rị okpuru ẹ hụn wụ Chuku Izrẹlụ sị, ‘Zi ni ndị-nwọnni ụnụ nị

⁵ mmẹ gi ẹka m lẹ ikẹn m hi-ogbe ke ụwa lẹ ịhịan lẹ anụmanụ rịn'a; m'e wezikwọ a e ye onyẹ m chọnị m ye ẹ.

⁶ E wegụọ m nwan alị ile ụnụ rị a kị ye odibo m wụ Nebukadineza hụn wụ eze Babilọnụ, buzikwọ anụ rị ọfịa che okpuru ẹ.

⁷ Alị ile jẹnkọ d'e humẹn'ẹ isi, humẹni nwa a isi, humẹzini nwa-nwa a isi d'e ru ogẹn m'e gi tikpọzịkwọ alị ya nwẹn wụ Babilọnụ. O ru ogẹn hụ, alị bu ọda lẹ ndị-nze bu ọda a kpazịkwọ ikẹn jẹnkọ d'e mẹri Babilọnụ, kịma a.

⁸ “ ‘Kanị, alị mọbụ alị-eze ọwụlẹ jụ n'o humẹkọnị ezeni wụ Nebukadineza isi, n'o bukọ olu che agbụn a, m jẹnkọ d'e gi agha lẹ ụnwụn lẹ eje-emu sọn wẹ d'e ru ni e gi m Nebukadineza tikpọchanrịn wẹ.

⁹ Ya wụ, egikwọlẹ ni oku ndị-amụma ụnụ dọn — wẹ lẹ ndị a gbanị ụnụ ẹfa lẹ ndị a rọ nrọ imẹ igunrun ụnụ lẹ ndị a hụnnị ụnụ ụzọ lẹ ndị-ihẹnrẹn ụnụ — ebe o mẹ ni wẹ rị a sị ụnụ nị “Eze Babilọnụ emẹrikọ ụnụ.”

¹⁰ Ntụ kẹ wẹ rịkwọ a tụ ụnụ, ntụ hụn k'e wepụ ụnụ alị ụnụ, we ụnụ shi ebe tegbu enwẹn ẹ; makẹni, m sikọ d'a chụpụ ụnụ, ụnụ a la iwi.

¹¹ “ ‘Kanị, alị ọwụlẹ hụn k'e bu olu che agbụn eze Babilọnụ, fe ẹ, a nị m wẹ nọdịsọnmẹ alị wẹ, a rụnsọnmẹ wẹ ugbo alị wẹ, bisọnmẹ ẹ. Mmẹ wụ Osolobuẹ e kugụọ a.’ ”

¹² E zizighọ m Zẹdikaya eze Juda ozi ohu hụ, sị, “Bu ni enwẹn ụnụ che okpuru eze alị Babilọnụ, femẹ ya lẹ ndị nke ẹ, kẹni ụnụ rị ndụn.

¹³ Kị yụ lẹ ndị nke i k'a nịnị Osolobuẹ gi agha lẹ ụnwụn lẹ eje-emu gbupụ ụnụ, ebe o mẹ ni o kugụọ a n'o k'e gi wẹ gbu ndị alị ọwụlẹ kwerilẹni bu enwẹn wẹ che okpuru eze alị Babilọnụ?

¹⁴ Ekwerikwọlẹ ni oku ndị-amụma ndị ahụn rị a sị ụnụ, ‘Ụnụ arịkọ okpuru eze alị Babilọnụ.’ Ntụ kẹ wẹ rịkwọ a tụ.

¹⁵ Osolobuẹ sị, ‘Ezikwọnị m wẹ. Wẹ rịkwọ e gi ẹfan m e bu amụma ntụ, Ụnụ gikwọ ihiẹn wẹ ku dọn, m jẹnkọ d'a chụpụ ụnụ, ụnụ a la iwi — kẹ ụnụ kẹ ndị-amụma ahụn rị e buni ụnụ amụma ndị ahụn.’ ”

¹⁶ Ya m nọzị sị ndị nchụn-ẹjan lẹ ndị alị, “Osolobuẹ sị: Ekwerikwọlẹ ni oku ndị-amụma hụ rị a sị ụnụ nị ‘Kikẹni-kikẹni kẹ wẹ k'a kwakinhẹn ihiẹn ụlọ-nsọ Osolobuẹ ndị ahụn Nebukadineza kwarị shi Babilọnụ!’ Ntụ kẹ wẹ rị a tụ ụnụ.

¹⁷ Egọnlẹ ni wẹ ntịn. Ka fe ni eze ndị Babilọnụ, kẹni ụnụ rị ndụn. Kị ụnụ k'a nịnị Osolobuẹ tikpọ obodoni?

¹⁸ Omẹni ndị amụma kẹ wẹ wụ nkesi, nị Osolobuẹ hụ a gwa wẹ oku, wẹ rịọma nwan Osolobuẹ onyẹ ihiẹn ile rị okpuru ẹ makẹ wẹ gha a kwarịzị ihiẹn họdụ imẹ ụlọ-nsọ Osolobuẹ lẹ imẹ obi-eze lẹ imẹ Jerusalẹm shi alị Babilọnụ.

¹⁹ Makẹni Osolobuẹ ihiẹn ile rị okpuru ẹ e kugụọ ihiẹn jẹnkọ d'e mẹ adansụn igwe-bronzu ẹbụọ hụ lẹ tankị mirin igwe-bronzu lẹzi trọkụ igwe-bronzu, lẹ ihiẹn ndị ọzọ họdụ imẹ obodoni,

²⁰ ihiẹn ile eze wụ Nebukadineza werilẹni ogẹn hụ o gi gha Jerusalẹm kpụnrụn eze wụ Jehoyakini nwa Jehoyakim lẹ ndị-isi ile rị alị Juda lẹ imẹ Jerusalẹm shi alị Babilọnụ.

²¹ Lee ni ihiẹn Osolobuẹ ihiẹn ile rị okpuru ẹ, hụn wụ Chuku Izrẹlụ ku banyeni ihiẹn ile họdụ imẹ ụlọ-nsọ Osolobuẹ lẹ imẹ obi-eze alị Juda lẹ imẹ Jerusalẹm:

²² ọ sị, ‘Wẹ k'a kwa wẹ ile shi alị Babilọnụ, a nọdị wẹ ebẹhụ d'e ru mgbe m buchezi wẹ ẹnya. O ru ogẹn ahụn, m k'e welụa wẹ, buzi wẹ che ọnọdị wẹ ebeni.’ Ya kẹ Osolobuẹ ku.”