Jerimaya 26 - Ika

Isi Nke Isin Kwasị Ọgụn Ndị Juda E Kwọndọn Jerimaya Nị W'e Gbu Ẹ E Kwọndọn Wẹ Jerimaya

¹ Ogẹn Jehoyakim nwa Josaya gi kịma alị Juda kẹ Osolobuẹ gi gwa Jerimaya okuni:

² “D'e wuzo ezi-ọgwa ụlọ-nsọ Osolobuẹ n'ị gwa ndị gha obodo ile rị alị Juda bịa ụlọ-nsọ m d'e fe ofufe oku. Gwachanrịn wẹ ihiẹn ile m sị ị gwa wẹ, ekuhọdụkwọlẹ kaka akpụ ohu!

³ Ikẹnkwọ e gọn wẹ ntịn, onyẹ-onyẹ a kụsị eje-obibi ọ rị e bi, e gi m ufiri ẹ latọ ihiẹn m rị a chọ nị m mẹ wẹ makẹ eje-obibi wẹ.

⁴ Sị wẹ nị Osolobuẹ sị, ‘Omẹni ụnụ egọnni m ntịn, gi Iwu m tumẹni ụnụ bi,

⁵ omẹni ụnụ egọnni idibo m wụ ndị-amụma ntịn — ndị amụma hụn m rị e zihẹni ụnụ ozihẹni-ozihẹni, hụn ụnụ jụ nị ụnụ egọnkọ ntịn,

⁶ m jẹnkọ d'e mẹ ụlọ-nsọnị ihiẹn m mẹ obodo Shilo, mẹ obodoni wụrụ ihiẹn ndị alị ile rị elu-ụwa gi a bụ ọnụ.’ ”

⁷ Ndị nchụn-ẹjan lẹ ndị-amụma lẹ ndị ọzọ ile rị ebẹhụ a nụghọ kẹ Jerimaya rị e ku ihiẹn ndịnị imẹ ụlọ-nsọ Osolobuẹ.

⁸ Hụn Jerimaya gihụ kugụ ihiẹn ile Osolobuẹ sị a gwa ịhịan ile rị ebahụn, ndị nchụn-ẹjan lẹ ndị-amụma lẹ ndị ọzọ ile rị ebẹhụ nọ kwọndọn ẹ, sị a, “I k'a nwụnrịrị!

⁹ Kị haịn i gi e gi ẹfan Osolobuẹ e bu amụma nị ụlọ-nsọnị jẹnkọ d'a rị kẹ Shilo lẹni obodoni jẹnkọ d'e mẹ mkpọkọ-mkpọkọ, gba okpokoro?” Ndị hụ ile nọ fihunmẹ Jerimaya imẹ ụlọ-nsọ Osolobuẹ ebẹhụ.

¹⁰ Ogẹn ịhaịmẹ alị Juda gi nụ ihiẹn rị e mẹni, wẹ nọ gha ebe wẹ rị imẹ obi-eze shi ụlọ-nsọ ebẹhụ. Wẹ nọ zu Ọnụ-mgbọn Ọhụn hụn rị Ụlọ-nsọ Osolobuẹ.

¹¹ Ya ndị nchụn-ẹjan hụ lẹ ndị-amụma hụ nọ sị ịhaịmẹ eze lẹ ndị ile rị ebẹhụ, “Okẹnnyẹni furu hụn w'a ma ikpe ọnwụn, makẹni o buọlẹ amụma nị eje-ihiẹn jẹnkọ d'e mẹ obodoni. Ụnụ nwẹn e gigụọ ntịn ụnụ nụ a.”

Kẹ Jerimaya Dọn Wanahịn

¹² Ya Jerimaya nọ sị ịhaịmẹ eze lẹ ndị ile rị ebẹhụ, “Osolobuẹ zi m d'e bu amụma nị ihiẹn ndịnị ile ụnụ nụ jẹnkọ d'e mẹ ụlọ-nsọnị lẹ obodoni.

¹³ Ka bihutọ nị nwan ẹka, mẹbehi eje-ihiẹn; gọn ni Osolobuẹ wụ Chuku ụnụ ntịn, kẹni Osolobuẹ rohutọ, latọ ihiẹn ọ sị o k'e mẹ ụnụ.

¹⁴ “O mẹ nke m, e lee m, ẹka ụnụ kẹ m rị nwan. Mẹ ni m ihiẹn ọwụlẹ ụnụ ro n'ọ hụghọ mma lẹ n'o furughọ.

¹⁵ Ka marịnkwọ nị, nị ụnụ gbu m, ikpe a ma ụnụ lẹ obodoni lẹ ndị ile bi imẹ ẹ nị ụnụ gbu onyẹ nwọnlẹni ihiẹn o mẹ, makẹni, ezioku-ezioku, Osolobuẹ ịya zi m d'a gwa ụnụ ihiẹn ndịnị nị ụnụ nụ.”

¹⁶ Ya kẹ ịhaịmẹ lẹ ndị ile rị ebẹhụ nọ sị ndị nchụn-ẹjan lẹ ndị-amụma, “Okẹnnyẹni efuruni w'a ma ikpe-ọnwụn! Makẹni Osolobuẹ wụ Chuku ẹnyi ya zi ẹ ozini o zi ẹnyi.”

¹⁷ Ụfọdụ ndị-ichẹn alị hụ nọ lihi ọtọ, sị ndị Juda hụ ile zu ebẹhụ,

¹⁸ “Kẹ Hezikaya wụ eze alị Juda, Maịka onyẹ obodo Morẹshẹti e bughọ amụma. Ọ sị ndị Juda ile, ‘Osolobuẹ ihiẹn ile rị okpuru ẹ sị: “Obodo Zayọnụ jẹnkọ d'e họnrin ọfịa, a rụndẹ w'a ugbo; Jerusalẹm jẹnkọ d'a wụrụ ikpọn ọmụma lẹ osisi wẹ te gi tụn ụlọ, uguni ụlọ-nsọ rị jẹnkọ d'e họnrin ọfịa ọfịa kin ẹnya.” ’

¹⁹ “Eze wụ Hezikaya lẹ ndị Juda ile e gbughọ a? Hezikaya atụnị egun Osolobuẹ? Ọ nọ rịọ Osolobuẹ n'o mẹ omikẹn wẹ, ẹlẹ ya? Osolobuẹ erohutọnị, latọ ihiẹn ọ sị o k'e mẹ wẹ? Ẹnyi nwẹn e d'e buhẹkwọnị enwẹn ẹnyi nsọngbu!”

²⁰ O nwọnghọ okẹnnyẹ ọzọ gi ẹfan Osolobuẹ bu amụma ogẹnni lekẹ Jerimaya. Okẹnnyẹni wụ Yuria nwa Shẹmaya. Onyẹ obodo Kiriatị-Jiarim k'ọ wụ. Ya nwẹn buzi amụma nị eje-ihiẹn k'e mẹ obodoni lẹ alịnị wụ Juda kẹ Jerimaya dọn bu.

²¹ Ogẹn eze wụ Jehoyakim lẹ ndị-agha a lẹ ịhaịmẹ ẹ gi nụ ihiẹn Yuria ku, eze n'ọ chọ n'o gbu ẹ. Kanị Yuria a nụ ihiẹn eze romẹ, o te nọ gi egun gbashi alị Ijiptu.

²² Ya eze nọ zijẹn Ẹl'natanị nwa Akịbọ lẹ ikẹnnyẹ ya lẹ wẹ wị alị Ijiptu.

²³ Wẹ nọ gha Ijiptu nwụnlụa Yuria, w'ẹ ye eze wụ Jehoyakim. Jehoyakim nọ gi ọpịa-agha gbu ẹ, tụ ozun ẹ ye ikpẹkpẹ ndị mmaka.

²⁴ Kanị, makẹni Ahikam nwa Shafanị nọ Jerimaya ye azụụn, ewezini wẹ nwan Jerimaya nkẹ ye ndị alị gbu.