Jerimaya 24 - Ika

Isi Nke Ẹnọ Kwasị Ọgụn Mkpụrụ-osisi Rị Mma Lẹ Hụn Rịlẹni Mma

¹ Kẹ Nebukadineza eze Babilọnụ kpụnrụngụ eze Juda wụ Jekọnaya nwa Jehoyakim lẹ ịhaịmẹ ẹ lẹ ndị omẹ-nka lẹ ndị Juda ile ma kpụ goru lẹ igwe ichẹn-ichẹn hụn rị Jerusalẹm, we wẹ shi alị Babilọnụ, Osolobuẹ nọ ghọsị m ụkpalị ẹbụọ mkpụrụ osisi figi jun. Ihun Ụlọ-NSỌ Osolobuẹ kẹ ụkpalị ẹbụọ hụ rị.

² Figi rịgbu enwẹn ẹ mma chan nke ọhụn rị imẹ ụkpalị ohu; kanị figi rehigụnị jẹnkọlẹni d'a nị ri rị imẹ ụkpalị hụn-ẹbọ.

³ Osolobuẹ nọ sị m, “Jerimaya, k'ị rị a hụn?” M nọ sị a, “Figi rọ: ndị rị mma a rịka mma kanị ndị rịlẹni mma arị mma kaka, ẹlẹ wẹ hụn w'e ri.”

⁴ Ya kẹ Osolobuẹ nọ sị m,

⁵ “Lee ihiẹn mmẹ Osolobuẹ hụn wụ Chuku Izrẹlụ rị e ku: Ogbe figi ndị ahụn rị mma wụ ndị Juda hụn m zipụ shi alị ndị Kal'di wụ Babilọnụ. M k'e weri wẹ kẹ ndị rị mma.

⁶ M sikọ d'e lepụ wẹ ẹnya ọhụnma ebẹhụ. M k'e wekinhẹnzi wẹ ebeni. M k'a tụnshi wẹ elu, ẹlẹ m k'a kụtu wẹ; m k'a kụn wẹ, ehuepụkọ m wẹ.

⁷ M k'e ye wẹ obi wẹ k'e gi marịn nị mmẹ wụ Osolobuẹ; a wụrụ wẹ ndị nke m, a wụrụ m Chuku wẹ — makẹni wẹ k'e gi obi wẹ ile kinhẹn d'e kunrun m.

⁸ “Kanị, mmẹ Osolobuẹ rị a gwa ị nị m sikọ d'e weri eze alị Juda wụ Zẹdikaya lẹ ịhaịmẹ ẹ nọkẹ akpụrụ figi ndị ahụn rehini rịlẹni mma w'e ri, uwẹ lẹ ndị ile họdụ imẹ Jerusalẹm, kẹ ndị hụn bikwọ alịnị kẹ ndị kwashi alị Ijiptu.

⁹ M k'e gi wẹ họnrin ihiẹn a tụ egun lẹ ihiẹn jọgbu enwẹn ẹ ẹnya ndị alị ile rị elu ụwa. Ebe ọwụlẹ m k'a chụshi wẹ, wẹ k'a wụrụ ihiẹn-ifẹnrẹn lẹ ihiẹn wẹ gi e ku oku, ihiẹn wẹ gi a kpa ẹmụ lẹ ihiẹn wẹ gi a bụ ọnụ.

¹⁰ M k'e gi ọpịa-agha lẹ ụnwụn lẹ eje-emu sọn wẹ d'e ru ni a gụchanrịn wẹ alịnị m ye wẹ lẹ ndị nẹdi wẹ kanị.”