Jerimaya 23 - Ika

Isi Nke Ẹtọ Kwasị Ọgụn Ezigbo Onyẹ-ndu Osolobuẹ Wela

¹ Eje-nsọngbu rị e che ndị-ndu ndị nke m hụn rị e mẹ wẹ a la iwi, a gbayịya. Ya kẹ Osolobuẹ ku.

² Lee nwan ihiẹn Osolobuẹ hụn wụ Chuku Izrẹlụ ku banyeni ndị rị e du ndị nke m: “Makẹni ụnụ a chụzịzagụọ ndị nke m, chụpụ wẹ — hụn nkẹ ụnụ e gi lepụ wẹ ẹnya, m k'e ye ụnụ afụnfụn eje-ihiẹn ụnụ mẹ. Mmẹ wụ Osolobuẹ e kugụọ a!

³ Mmẹ lẹ enwẹn m k'e kpọngbama ndị nke m k'a nwụnhọdụnị imẹ alị ndị ahụn m chụshi wẹ, wekinhẹn wẹ alị wẹ hụn wẹ nọ e rijun ẹfọ, alị w'a nọ mụba, buwaye ọda.

⁴ M k'e ye wẹ ndị-ndu k'e lepụ wẹ ẹnya, a tụbehi wẹ egun, mabehi piripiri. Onwọnni hụn k'e huni imẹ wẹ. Mmẹ wụ Osolobuẹ ku ẹ.”

⁵ Mmẹ wụ Osolobuẹ sị, “Ogẹn lala hụn m k'e gi wepụhanị Defidi Agalaba rị ọchan, eze hụn k'e gi akọ-lẹ-uche kị, e mẹ ihiẹn rị mma lẹ ihiẹn furuni imẹ alịnị.

⁶ Ọ kịma, Juda a hụn isi, ihiẹn emẹkọ Izrẹlụ. Ẹfan wẹ k'e gi marịn a wụ: ‘Osolobuẹ A Tụnị Ẹnyi Ụya’.

⁷ “Mmẹ wụ Osolobuẹ rị nwan e ku ẹ nị ogẹn lala, asịkọzị wẹ, ‘Ma Osolobuẹ hụn gha alị Ijiptu wepụha ndị Izrẹlụ.’

⁸ Wẹ k'a gha a sị, ‘Ma Osolobuẹ hụn gha alị rị ẹbamịn-ugu lẹ alị ile o te chụshi ndị Izrẹlụ wekinhẹn wẹ alị wẹ.’ Makẹni, ogẹn ahụn wẹ k'e birizi alịnị hụn wụ nke wẹ.”

Ndị Amụma-ụgha

⁹ Obi e d'a gbawapụ m makẹ ndị amụmanị rị a tụ ntụ; ọkpụkpụ ile rị m ẹhụ hụ e mẹhunmẹ. M nọ kẹ onyẹ manya rị a tụ, onyẹ manya rị e nuhunmẹ makẹ ụya wẹ rị e ye Osolobuẹ lẹ oku ẹ rị nsọ.

¹⁰ Alịnị ile e mẹ ndị ughẹrẹ ndị ughẹrẹ; abụmọnụ Osolobuẹ e mẹgụọ alị kpọpụ nkụn, ẹfịfịa rị ebe wẹ nọ a zụn anụ e shinwụn — makẹni wẹ rị e bi eje-obibi, e gi ikẹn wẹ e mẹ ihiẹn ile.

¹¹ “Kẹ ndị-amụma kẹ ndị nchụn-ẹjan arịzị a tụ egun Osolobuẹ; m hụzịdẹ a hụn eje-obibi wẹ imẹ ụlọ-nsọ m! Ya kẹ Osolobuẹ ku.

¹² Ufiri ẹ, ụzọ wẹ k'a rị e kpo; wẹ sikọ d'a chụ wẹ ye imẹ ishi, a dantọ wẹ ebẹhụ. M k'e mẹ wẹ okẹn-ihiẹn o ru ogẹn m'e gi ye wẹ afụnfụn. Mmẹ wụ Osolobuẹ e kugụọ a!

¹³ “O nwọn ihiẹn jọgbu enwẹn ẹ m hụn ẹka ndị amụma alị Sameria: wẹ gi ẹfan Baalụ bu amụma, gi ẹ dufie ndị nke m ndị Izrẹlụ.

¹⁴ A hụnzị m nwan ihiẹn a gba ẹnya-mirin ẹka ndị amụma Jerusalẹm: Wẹ rị a ghẹrẹ, e gi ntụ e bi. Wẹ hụ a kwadọn ndị eje-omumẹ, hụn o gi mẹni onwọnzini onyẹ a latọ eje-ihiẹn. Wẹ ile rị nwan kẹ alị Sodọm ẹnya m; ndị Jerusalẹm rị nwan kẹ alị Gomora ẹnya m.”

¹⁵ Lee ni nwan ihiẹn Osolobuẹ ihiẹn ile rị okpuru ẹ ku banyeni ndị-amụma Jerusalẹm: “M k'e mẹ elu lu wẹ ilu kẹ ihiẹn-oriri e lu ilu, ye wẹ nsọngbu ra kẹ mirin wẹ buche nshi, makẹni ndị amụmanị e mẹgụọ eje-obibi ghagbarị alịnị ile.”

¹⁶ Osolobuẹ ihiẹn ile rị okpuru ẹ sị, “Egikwọlẹ ni ihiẹn ndị-amụma hụ rị a gwa ụnụ dọn. Wẹ rị e dufie ụnụ! Ihiẹn wẹ rị e ro kẹ wẹ rị e ku, ẹlẹ ihiẹn wẹ nụ ọnụ Osolobuẹ.

¹⁷ A tọ wẹ a sị ndị rị e lelịa Osolobuẹ, ‘Osolobuẹ sị o k'a rịnị ụnụ mma.’ A sị ndị isi-ikẹn rị e mẹ ihiẹn obi wẹ gwa wẹ, ‘Ihiẹn emẹkọ ụnụ.’

¹⁸ Onyẹ imẹ wẹ nọdịtu ọgwa Osolobuẹ gọn ntịn, hụn w'e gi hụn ihiẹn ọwụlẹ mọbụ nụ ihiẹn Osolobuẹ ku? Onyẹ gọntu ntịn, nụ ihiẹn Osolobuẹ ku imẹ wẹ ile?

¹⁹ E lee nị nwan okẹn ẹbi kpọlanị, ọnụma Osolobuẹ hụn lalanị — o jẹnkọ d'a nọ isi ndị eje-omumẹ hụ bi.

²⁰ Olulu Osolobuẹ arọkọ d'e ru n'o mẹgụ ihiẹn o bu obi. Ihun k'o sikọ d'e wechanrịn ụnụ ẹnya.

²¹ Ezini m ndị-amụma hụ, e jẹnmẹ wẹ d'e zi ozi wẹ; agwanị m wẹ ihiẹn ọwụlẹ, bụ wẹ hụ e bu amụma.

²² Omẹni e te nọdịọlẹ wẹ ọgwa m, nkẹ e zi wẹ ndị nke m ozi m, e mẹ wẹ wẹ bibehi eje-obibi wẹ, mẹ wẹ latọ eje-ihiẹn ndị wẹ rị e mẹ.

²³ Osolobuẹ sị: Ụnụ rodẹ nwan nị ebeni sụọ kẹ m nọ wụ Chuku — nị ẹlẹ m Chuku ebe ile?

²⁴ Nị ịhịan saẹka warị ebe zuerini amamgbe m'a hụn a? Ụnụ amarịn nị m rị ebe ile rị elu-igwee lẹ ụwa?

²⁵ “A nụgụọ m ihiẹn ndị-amụma hụ gi ẹfan m e bu amụma ntụ rị e ku; wẹ rị e mẹ oku nrọ, ‘O nwọn ihiẹn m rọhụn; o nwọn ihiẹn m rọhụn!’

²⁶ Elee mgbe ndị amụma-ụghanị k'a kụsị ihiẹnni — ndị-amụma hụn e ku ihiẹn rị wẹ uche nị wẹ rị e bu amụma?

²⁷ Ndịnị hụn rị a chọ nị wẹ gi nrọ ndị ahụn w'e ziẹnni ibe wẹ mẹ ndị nke m zọ ẹfan m, nọkẹ kẹ ndị nẹdi wẹ dọn zọ ẹfan m ebe wẹ rị a rụa Baalụ.

²⁸ “Onyẹ-amụma rọ nrọ, ya ziẹn nrọ a; kanị onyẹ hụn nwọn oku m ya kuchanrịn a k'ọ nọ — makẹni ẹfịfịa-ọka lẹ akpụrụ-ọka ẹlẹ ihiẹn ohu.

²⁹ Ẹlẹ oku m nọkẹ ọkụn?! Ẹlẹ oku m nọ kẹ igwe wẹ gi a kụgungwọn ọmụma?! Ya kẹ Osolobuẹ ku.

³⁰ “Osolobuẹ sị, ‘M k'e gi ufiri ẹ mẹshi ndị-amụma ikẹn — ndị amụmanị rị e zunarịn ibe wẹ amụma e bu, a sị nị mmẹ gwa wẹ.

³¹ Mmẹ lẹ wẹ rọ — ndị amụmanị hụn e ku ihiẹn rị wẹ ọnụ, a sị nị Osolobuẹ ku.

³² Mmẹ lẹ ndị-amụma gi ihiẹn wẹ rọhụn hụn wụlẹni oku m e bu amụma rọ. Wẹ hụ e ziẹn nrọ ndị ahụn, e gi ihiẹn ile wụlẹni nke m wẹ rị e mẹ e dufie ndị nke m, ihiẹn ile wẹ rịlẹni a jụ m e mẹ; ezini m wẹ, etumẹni m wẹ. Onwọnni ẹka wẹ rị e yeni ndị nke m kaka.’

³³ “Ya Osolobuẹ nọ sị mmẹ wụ Jerimaya: Ọsụọn'a ịhịan-mmaka mọbụ onyẹ-amụma mọbụ onyẹ nchụn-ẹjan jụ ị, ‘Elee ibu ozi kẹ Osolobuẹ bukwasị ị nwan n'i zi?’ Sị hụnyẹ, ‘Elee ibu rọzị mmanị yụ?!’ Osolobuẹ sị, ‘M k'e ziẹn i tuhu.’

³⁴ “Kẹ ndị-amụma kẹ ndị nchụn-ẹjan kẹ ndị-mmaka, hụn ọwụlẹ sị, ‘Osolobuẹ e buyegụọ m ibu amụma’, m sikọ d'e ye hụnyẹ lẹ ikpụlọ a ile afụnfụn.

³⁵ “Ihiẹn ụnụ k'a gha a jụ ibe ụnụ wụ ‘Kịnị kẹ Osolobuẹ shịarị?’ Mọbụ ‘Kịnị kẹ Osolobuẹ ku?’

³⁶ Amakwọlẹ ni ama kpọ ozi Osolobuẹ ibu; ekuzilẹ n'ẹ, makẹni ihiẹn onyẹ-onyẹ ku wụ ibu ẹ. Ụnụ rị e fị oku Chuku — Chuku hụn rị ndụn, Osolobuẹ ihiẹn ile rị okpuru ẹ, hụn wụ Chuku ẹnyi.

³⁷ Ihiẹn ụnụ k'a gha a jụ onyẹ-amụma wụ ‘Kịnị kẹ Osolobuẹ shịarị ị?’ mọbụ ‘Kịnị kẹ Osolobuẹ ku?’

³⁸ Kanị, omẹni ụnụ a tọ a sị, ‘Ibu Osolobuẹ buye m’, Osolobuẹ sị o k'a sị ‘Makẹni ụnụ sị, “ibu Osolobuẹ buye m” bụ e zigụọ m wẹ sị ụnụ ekuzilẹ “ibu Osolobuẹ buye m”,

³⁹ m jẹnkọ d'e ziẹn ụnụ, gha ihun m tuhu ụnụ kẹ ibu — kẹ ụnụ kẹ obodoni m ye ụnụ lẹ ndị nẹdi ụnụ.

⁴⁰ M k'e mẹ ụnụ fa jẹnrin ejẹn, gbe ifẹnrẹn hụn wẹ jẹnkọlẹni d'a zọ ye ụnụ ihun.’ ”