Jerimaya 22 - Ika

Isi Nke Ẹbụọ Kwasị Ọgụn Ikpe Hụn Osolobuẹ Ma Ndị-nze Juda

¹ Osolobuẹ sị m, “Jẹn obi-eze alị Juda d'e zi ozini:

² “ ‘Gọn ntịn ihiẹn Osolobuẹ ku, eze Juda hụn rị ukpo Defidi a kị — kẹ ịyụ kẹ ịhaịmẹ i kẹ ndị nke i ile hụn a gha ọnụ-mgbọn obi-ezeni.

³ Osolobuẹ sị: mẹmẹ ni ihiẹn rị mma lẹ ihiẹn furuni. A gbapụha nị ndị wẹ rị a bịangbu ẹka ndị rị a bịangbuni wẹ. Emẹjalẹ ni abịamabịa lẹ ndị nwọnlẹni nẹdi lẹ ikpoho di wẹ nwụn mọbụ gi ẹka-ikẹn sọn wẹ, egbulẹ ni ndị nwọnlẹni ihiẹn wẹ mẹ ebeni.

⁴ Ụnụ dọnrin ẹnya mẹ ihiẹn ndịnị m sị ụnụ mẹ, ndị-nze ẹbozo Defidi k'a rịsọnmẹ, e gi ụgbọ-anyịnyan lẹ ẹshin a gha ọnụ-mgbọnni, wẹ lẹ ịhaịmẹ wẹ lẹ ndị nke wẹ.

⁵ “ ‘Kanị omẹni ụnụ emẹni ihiẹn ndịnị m sị ụnụ mẹ, ma isi m, obi-ezeni jẹnkọ d'e họnrin mkpọkọ-ụlọ.’ ”

⁶ Lee ihiẹn Osolobuẹ ku banyeni obi-eze Juda: “Ọsụọn'a nị obi-ezeni ma mma kẹ alị Gilẹdị, ọsụọn'a n'ọ rị m kẹ osisi Lẹbanọnụ mẹ gwoza-gwoza, ma isi m, m k'e mẹ i gba okpokoro nọkẹ atụ, ebe ịhịan bilẹni!

⁷ M họlan'ị ndị k'e tikpọn'ị — onyẹ-onyẹ gi ihiẹn ọgụn a; wẹ k'a jakịka ibe osisi sida ile wẹ gi rụn ị, kpọnye ọkụn.

⁸ “Ndị alị bu ọda k'a ghafe alịnị, a jụ ibe wẹ, ‘Kị haịn Osolobuẹ gi mẹ obodo ukuni ụdị ihiẹnni?’

⁹ Ihiẹn wẹ k'a shịarị wụ, ‘Makẹni wẹ latọ Iwu Osolobuẹ wụ Chuku wẹ tumẹni wẹ, fesọnmẹ mmọn-lẹ-iyi, a rụa wẹ.’ ”

¹⁰ Ẹlẹ eze wụ Josaya hụn nwụnhụnnị kẹ ụnụ sikọ d'a kwan mọbụ kwannị ẹkwan. Ka kwanma nị Shalum wụ Jeho-ahazị hụn rikin ẹ eze wẹ kpụnrụn nwan shi alị ọzọ, makẹni onwọnzini ogẹn o k'e gi kinhẹn mọbụ hụnzị alị a.

¹¹ Makẹni, Osolobuẹ e kugụọ oku Shalum wụ Jeho-ahazị hụn rikin nẹdi ẹ wụ Josaya eze a kị alị Juda, Shalum wẹ kpụnrụn shi alị ọzọ: Osolobuẹ sị, “Ẹlẹ o k'e kinhẹnzi ebeni.

¹² O k'a nọ ebẹhụ wẹ kpụnshi ẹ nwụn; ọ hụnkọzị alịnị.”

¹³ “Ọ rịkọnị eze gi eje-omumẹ tụn obi-eze ẹ mma, hụn gi mmẹgbu tụn a ụlọ-elu, mẹ ndị alị a tụnn'a ya ọfẹ, onwọnni ihiẹn ọ kụ wẹ!

¹⁴ Ọ sị enwẹn ẹ, ‘M jẹnkọ d'a tụnrụn obi-eze hi-ogbe, hụn nwọnsọnmẹ mmughẹ shịanị ibe-elu.’ O rụnyesọnmẹ ẹ windo shịanị, gi ibe osisi sida rigbu enwẹn ẹ mma makwama ẹhụ-ẹjan a, gi ihiẹn ma mma e nwun ufie-ufie tekwama a.”

¹⁵ “I ro nị inwọn osisi sida bu ọda k'i gi wụrụ eze? Josaya nẹdi i a hụnnị ri, ra? Kanị o mẹghọ ihiẹn furuni lẹ ihiẹn rị mma, ihiẹn nọ ghan'a.

¹⁶ O kuzighọ nị ndị igbẹnnyẹ lẹ ndị elu rị fụ ọnụ wẹ, ihiẹn nọ rịnị alị mma. Ẹlẹ ọhụn wụ ịmarịnnị m?” Ya kẹ Osolobuẹ ku.

¹⁷ “Kanị ẹnya ị lẹ obi i rịhụ ihiẹn i k'a narịn ịhịan, igbu ndị nwọnlẹni ihiẹn wẹ mẹ, ịbịangbu ịhịan lẹ ịtụnarịn wẹ ihiẹn wẹ.”

¹⁸ Lee nwan ihiẹn Osolobuẹ ku banyeni i, Jehoyakim nwa Josaya rị a kị alị Juda: Osolobuẹ sị, “Akwankọnị w'a, ‘Nwẹnẹ m a laa! Nwẹnẹ m a laa!’ Akwankọnị w'a, ‘Heuu, di-nwọnni-ẹnyi a la! Eze a laa!’

¹⁹ “Wẹ k'e li ẹ kẹ wẹ e li jaki — wẹ k'a dọkpụnrụn a d'e tuhu, we ẹ pụ ọnụ-mgbọn Jerusalẹm d'e tuhu.” Osolobuẹ sị ndị Jerusalẹm,

²⁰ “Nyinrin ni ugu Lẹbanọnụ d'a kwan ẹkwan; shizikwọ nị Bashanị d'a kwan nị wẹ nụ olu ụnụ; nyinrindẹ ni ugu Abarim d'a kwan ẹkwan — makẹni e gwerinriẹngụọ wẹ ndị-ọwụ ụnụ ụnụ te gi dọn ẹnya!

²¹ A dọghọ m ụnụ ẹka-ntịn ogẹn ẹhụ gi fu ụnụ, kanị ụnụ nọ sị, ‘Ẹnyi egọnkọ ị ntịn!’ Ẹrịra kẹ ụnụ e mẹ gha alị lala — ụnụ ara gi oku m dọn.

²² “Ufere jẹnkọ d'e buru ndị-isi ụnụ, wẹ k'a kpụnrụn ndị ọwụ ụnụ ụnụ gi dọn ẹnya shi alị ọzọ. Ogẹn ahụn ụnụ a fa, ifẹnrẹn e mẹ ụnụ makẹ njọ ile ụnụ mẹ.

²³ Yụ hụn bi obi-eze ahụn ị kpọ Lẹbanọnụ, hụn ẹhụ rị e fu imẹ ụlọ osisi sida nọkẹ nnụnụ rị ẹkụ; i k'a sụn udẹn sụnjun ẹfọ mgbe ihiẹn lalanị e gi kunrun i; ụfụ a k'e kunrun i kẹ okpoho imẹ rị e mẹ!”

Jehoyakini K'a Nwụntọ Alị Wẹ K'a Kpụnjẹn Ẹ

²⁴ Osolobuẹ sị, “Ma isi m! Ọsụọn'a nị eze Juda wụ Jehoyakini nwa Jehoyakim wụ ọla rị m mkpịnsịn-ẹka ẹka-nni m hụn m gi e biye ẹka, m jẹnkọ nwan d'a gbụ ị tuhu.

²⁵ M jẹnkọ d'e bu i che ẹka ndị rị a chọ i isi, ndị ahụn ị rị a tụ egun wẹ — hụn wụ Nebukadineza eze ndị Babilọnụ lẹ ndị Babilọnụ.

²⁶ M jẹnkọ d'a ma yụ lẹ nnẹ mụn'ị ye alị ọzọ wụlẹni alị ụnụ, ụnụ a nọdị ebẹhụ ụnụ e we nwụn.

²⁷ “Ụnụ ekinhẹnkọ alịnị hụn k'a rị a da ụnụ.”

²⁸ Okẹnnyẹni wụ Jehoyakini wụdẹ nwan mkpọkọ-ite hụn nwọnlẹni ihiẹn wẹ gi ẹ e mẹ — ra ọ wụ ihiẹn wẹ k'a mahu? Kị wẹ k'a kpụnrụnnị ya lẹ ụmụ a shi alị ọzọ? Kị wẹ k'a manị wẹ ye alị wẹ marịnlẹni?

²⁹ Alị Juda! Alị-Juda-ee! Alị-Juda-ee!! Gọnkwọ ntịn nị ị nụ ihiẹn Osolobuẹ ku:

³⁰ Osolobuẹ sị, “Gụn nị okẹnnyẹni yeni ndị mụlẹni nwa; Gụn n'a yeni ndị elu jẹnkọlẹni d'a masị e we wẹ nwụn, makẹni onwọnni nwa a ọwụlẹ ọ k'a rịnị mma, onwọnni hụn k'a nọdị ukpo-eze Defidi mọbụ kị alị Juda.”