Jerimaya 2 - Ika

Isi Nke Ẹbụọ Ihiẹn Izrẹlụ Mẹ Osolobuẹ

¹ Osolobuẹ sị m,

² “Jẹn d'a hị ihiẹnni nị ndị Jerusalẹm nụ a: Lee ni ihiẹn Osolobuẹ ku: ‘A nyanhan m kẹ ụnụ dọn wechanrịn enwẹn ụnụ kwanị m kẹ ụnụ rị okoro, kẹ ihiẹn m dọn sụọ ụnụ lekẹ nwunyẹ m lụ nke ọhụn, ụnụ nọ kweri sọn m gha imẹ atụ, alị wẹ kụnlẹni ihiẹn ọwụlẹ.

³ Izrẹlụ te wụchanrịn nke Osolobuẹ sụọ, ya wụ mkpụrụ ibuzọ ọ ghọrị ugbo ẹ; Osolobuẹ a ma ndị ile bu ẹ ri ikpe njọ, eje-ihiẹn e kunrun wẹ.’ Ya kẹ Osolobuẹ ku.

⁴ Ikpụnọ Jekọpụ, ebọn ile rị Izrẹlụ, nụ nị nwan ihiẹn Osolobuẹ ku.

⁵ Lee ni ihiẹn Osolobuẹ ku: ‘Elee eje-ihiẹn kẹ ndị nẹdi ụnụ hụn m ẹka, wẹ gi gbateni m ẹnịna? E sọnmẹ wẹ mmọn nwọnlẹni isi wẹ kpụ, wẹ nwẹn nọzilẹni nwọn isi.’

⁶ Ajụnị wẹ enwẹn wẹ, ‘Elebe kẹ Osolobuẹ rị nwan? Osolobuẹ hụn gha alị Ijiptu wepụha ẹnyi, we ẹnyi ghachanrịn atụ hụ ile, alị ọkpọ-nkụn hụ mẹ mgbugbu-mgbugbu; alị mirin ghalẹni e zue gbagbu enwẹn ẹ ishi; alị wẹ ghalẹni a gha, ịhịan bilẹni!’

⁷ Mmẹ wẹhẹ ụnụ alị e mẹ ihiẹn ọda-ọda, kẹni ụnụ ri mkpụrụ a lẹ ihiẹn rị mma o mẹ. Kanị ụnụ a banhan alị m nwẹn, mẹrụ a, mẹ ukuu m họnrin ihiẹn rụnị.

⁸ Ndị nchụn-ẹjan m ajụnị ‘Elebe kẹ Osolobuẹ rị?’ Ẹghẹẹ, ndị nwẹn gi iwu m amarịn m kaka; ndị-ndu wẹ nkẹ hụ a pa oku m. Ndị-amụma e gi ẹfan mmọn wụ Baalụ e bu amụma, e sọn mmọn nwọnlẹni isi.

⁹ Osolobuẹ sị, ‘Ya kẹ m rị a mazịnị ụnụ ikpe. M jẹnkọ d'a mazị ụmụ-ụmụ ụnụ ikpe.

¹⁰ Fetu ni Ohimin shi alị Kitim d'e lee, ụnụ a hanjẹnzikwọ ịhịan alị Kẹda d'e lekpọ; lee ni kẹ ihiẹn nọ ẹnịna e mẹtughọ:

¹¹ o nwọntughọ alị latọ mmọn wẹ femẹ ọzọ? Ọsụọn'a nị mmọn ndị ahụn ẹlẹ ezigbo ẹ. Bụ ndị nke m a latọgụọ mmẹ hụn wụ ọghọ wẹ, gi mmọn nwọnlẹni isi nọkin ẹnya m.

¹² Igwere, ya tụ ị ẹnya, ya mẹ i jụsọhị.’ Ya kẹ Osolobuẹ ku.

¹³ “Ndị nke m e mẹọlẹ njọ ẹbụọ: a latọgụọ wẹ m, mmẹ hụn wụ isi-mirin e ye ndụn; e gurusọnmẹgụọ wẹ ọmị, ọmị gbawanị ghalẹni e che mirin.

¹⁴ Igbọn kẹ Izrẹlụ wụdẹ nwan ra? Igbọn kẹ wẹ mụd'a nwan? Kị haịn nwan o gi wụrụ ihiẹn wẹ e gbukwarị?

¹⁵ E dẹngụọnị w'a kẹ ẹwọrọ; a bangụọnị w'a mban. E tikpọgụọ wẹ alị a la iwi; a dụngụọ wẹ obodo ndị rịn'a ọkụn gba wẹ okpokoro.

¹⁶ Ndị Mẹmfisi lẹ Tapanhẹsị alị Ijiptu a kọgụọ ụnụ mkpukpuriẹ, gi gbe ifẹnrẹn ye ụnụ ihun.

¹⁷ Ẹlẹ ụnụ gi ẹka ụnụ dọrị ihiẹnni ebe ụnụ nọ gbakitọ Osolobuẹ wụ Chuku ụnụ azụụn ogẹn o gi dukọ ụnụ ụzọ?

¹⁸ “Kị ụnụ rị e jẹnni nwan Ijiptu d'a ra mirin Shihọ hụn wụ agala iyi Naịlị wẹ? Kị ụnụ rị e jẹnni Asiria d'a ra mirin Iyi-Yufretisi?

¹⁹ Eje-omumẹ ụnụ jẹnkọ d'e ye ụnụ afụnfụn; ọkpahu ụnụ rị a kpahu k'a jụgbọ ụnụ. Gi n'ẹ nwan marịn, gi ẹ hụn nị ihiẹn jọgbu enwẹn ẹ lẹ nsọngbu k'ọ wụ, nị ụnụ gbakitọ m azụụn, mmẹ, Osolobuẹ wụ Chuku ụnụ, tụbehi egun m. “Ya kẹ Di-nwọnni-ẹnyi wụ Osolobuẹ ihiẹn ile rị okpuru ẹ ku.

²⁰ O teọlẹ ị kpagipụ ihiẹn m gi limẹ i, tibepụ eriri ẹ; ị sị, ‘Efekọ m'ị!’ Eziẹ-eziẹ, y'a nọ elu òke ọwụlẹ jẹn elu lẹ okpuru osisi ọwụlẹ duni e we enwẹn ụnụ a kwanị mmọn lẹ iyi — kẹ ịgbaraja dọn e mẹ ịhịan.

²¹ Mmẹ te kụn ị ye alịnị nọkẹ vaịnị rị ichẹn, hụn wụchanrịn ezigbo ẹ. Nanị k'i dọnzi nwan la m iwi nọkẹ vaịnị-ọfịa rehini?

²² Ọ sụọkwọ ị gi ncha ile wẹ gi a wụ ẹhụ wụ; gidẹ nwan hụn wẹ ghalẹni e gi a wụ wụ, njọ ị hụn ratọ ị ẹhụ apụkọ ẹnya m. Ya kẹ Di-nwọnni-ẹnyi wụ Osolobuẹ ku.

²³ K'ị rị a sịnị, ‘Arụnị m; esọnkwọnị m mmọn wụ Baalụ’? Ledẹ agụngụn ị gụn imẹ ọdanmgbugbu; rodẹ ihiẹn i mẹ; onyẹnnyẹ anyịnyan-mkpukpuke ghalẹni a saẹka a nọdị ụzọ ohu k'ị wụ, a gbashi azụụnnị lẹ azụụnnị;

²⁴ onyẹnnyẹ-jaki ọfịa atụ mụmarịngụ, e shinsọnmẹ ufere n'ọ nụ ishin okẹn jaki — o ruhụ ogẹn o k'e gi gba, onwọnni onyẹ a sa ẹka e kwọndọnn'ẹ. Okẹn jaki ara sọngbu enwẹn a chụshi ẹ ikẹn — makẹni ogẹn ẹ ruọlẹ, wẹ k'a hụnrịrị a. M te sị ị,

²⁵ ‘Kụsịkwọ makẹ akpụkụ ị gha e richanpụchanrịn, makẹ ẹkpịrị gha a kpọ ị nkụn.’ Kanị ị sị, ‘Agwazịlẹ m! Mmọn ndị ọzọ a sụọmarịngụọ m, m k'e sọnrịrị wẹ!’

²⁶ Kẹ ohin wẹ nwụn dọn a fa, ẹrịra kẹ ikpụlọ Izrẹlụ dọn fa — kẹ uwẹ kẹ ndị-nze wẹ kẹ ndị-isi wẹ kẹ ndị nchụn-ẹjan wẹ kẹ ndị-amụma wẹ.

²⁷ Wẹ sị osisi wẹ pịn, ‘Ịyụ wụ nẹdi m,’ sị ọmụma wẹ tụ ‘Ịyụ mụ m.’ E bu wẹ azụụn zinmẹ m, ẹlẹzi ihun. Kanị nsọngbu bịa, a hịma wẹ m, ‘Dodo d'a zụọpụha ẹnyi!’

²⁸ Ebe mmọn ndị ahụn ụnụ mẹmẹrin rịzị nwan? Wẹ bịa nwan, omẹni wẹ sa ẹka zụọpụha ụnụ imẹ nsọngbu! Ẹghẹẹ, y'e nwọnghọ mmọn bu ọda, Juda — mmọn buhan ọda kẹ obodo ndị rị imẹ i!”

²⁹ “Kị ụnụ rịdẹ nwan a manị m ikpe? Ụnụ ile nupụ isi okpuru m.” Ya kẹ Osolobuẹ ku.

³⁰ Afụnfụn ile m ye ndị nke i la iwi; egini wẹ mkpịnsịn m fịan wẹ bihutọ ẹka. Ụnụ e gigụọ ọpịa-agha gbu ndị-amụma wẹ zihẹni ụnụ kẹ eje-ẹwọrọ e gburi anụ.

³¹ “Ụnụ ndị agbọnị, lekwọ nị ihiẹn Osolobuẹ ku: “Ọ sị: M wụdẹ nwan atụ ẹnya Izrẹlụ ra? M wụdẹ nwan alị gbagbu enwẹn ẹ ishi ẹnya a ra? Kị haịn ụnụ ndị nke m gi a sị, ‘Ẹnyi e weri nwan enwẹn ẹnyi; ẹnyi abịakọzị ebe ị rị’?

³² Nị nwagbọọ zọ yiri ejije ẹ? Nị okpoho rị a gba ẹkụkwọ zọ yiri ihiẹn-mma a? Bụ ndị nke m a zọgụọ m — zọgele m.

³³ Ụnụ a marịnka kẹ wẹ dọn a sụọ! Ịgbaraja a mụnarịndẹ ụnụ.

³⁴ Ẹdeke rị ụnụ ẹbulu-ukun — ẹdeke ndị-igbẹnnyẹ nwọnlẹni ihiẹn wẹ mẹ — ụnụ nwụnlẹni ebe wẹ rị e gbukpọ ụlọ. Ihiẹn ndịnị ile mẹni,

³⁵ ụnụ hụkwọ a sị, ‘Onwọnni eje-ihiẹn ẹnyi mẹ; Osolobuẹ arị e weni ẹnyi iwe.’ Kanị, m jẹnkọ d'e ye ụnụ afụnfụn makẹni ụnụ sị, ‘Ẹnyi emẹni njọ.’

³⁶ K'ị rị e jẹnjẹnni e jẹnlụa, i buru onyẹni, y'e buru onyẹni? Ijiptu eyekọnị ụnụ ẹka nọkẹ kẹ Asiria dọnlẹni yeni ụnụ ẹka.

³⁷ Ụnụ k'e gidẹ ifẹnrẹn gha Ijiptu pụ — ụnụ k'a kị ẹka kwasị isi pụha, makẹni Osolobuẹ a jụgụọ ndị ụnụ gi dọn ẹnya; eyekọnị wẹ ụnụ ẹka.