Jerimaya 19 - Ika

Isi Nke Mmitenẹi Ihiẹn Osolobuẹ Gi Ite-ụrụa Ku

¹ Osolobuẹ sị m, “Jẹn d'e ṅọnrin ite ụrụa. Weri ndị i k'e weri imẹ ndị-isi lẹ ndị nchụn-ẹjan.

² Shi ni Ọdanmgbugbu Nwa-Hinọnụ, hụn nọkunmẹ ebe wẹ gha a banye Ọnụ-mgbọn Mpekele-ite. Nọ ebẹhụ hị ihiẹnni m jẹnkọ d'a gwa ị.

³ Sị wẹ: Gọn ni ntịn ihiẹn Osolobuẹ ku, ụnụ ndị-nze alị Juda lẹ ụnụ ile bi obodo Jerusalẹm. Osolobuẹ ihiẹn ile rị okpuru ẹ, hụn wụ Chuku alị Izrẹlụ, sị: m jẹnkọ d'e tikpọ ebeni otikpọ hụn o mẹni onyẹ nụ a ọ dan a ntịn taị!

⁴ M k'e mẹ ẹ makẹni ndịnị a gbakitọgụọ m azụụn, mẹrụ ebeni. A nọgụọ wẹ imẹ ẹ chụnyesọnmẹni mmọn ndị alị ọzọ rị ichẹn-ichẹn ẹjan nsẹnsi — mmọn ndị wẹ lẹ ndị nẹdi wẹ lẹ ndị-nze alị Juda marịnlẹni. E mẹgụọ wẹ ẹdeke ndị nwọnlẹni ihiẹn wẹ mẹ jun ebeni yeni ẹjan wẹ rị e gi wẹ a chụn.

⁵ A tụnsọnmẹgụọ wẹ ukpo wẹ nọ a rụa Baalụ, a nọ imẹ wẹ a kpọ ụmụ wẹ ọkụn, gi chụnyeni Baalụ ẹjan. Onwọnni ogẹn m gi sị wẹ mẹ ihiẹn nọ ẹnịna mọbụ kud'ẹ oku ẹ; uche m a gbatudẹn'ẹ.

⁶ “Lee ni nwan ẹnya, ogẹn lala hụn wẹ k'e gi kpọbehi ebeni ‘Tofẹtị’ mọbụ ‘Ọdanmgbugbu Nwa-Hinọnụ’, kpọma a ‘Ọdanmgbugbu-Ogbugbu.’

⁷ “M jẹnkọ d'a nọ ebeni kpayịya ihiẹn ile ndị Juda lẹ ndị bi imẹ Jerusalẹm romẹ. M k'e mẹ ndị-iṅẹnrẹn wẹ gi ọpịa-agha gbu wẹ, m k'e mẹ wẹ danyesọnmẹ ẹka ndị rị a chọ isi wẹ; m k'e we ozun wẹ ye nnụnụ lẹ anụmanụ ri.

⁸ M k'e tikpọchanrịn obodoni, o họnrin ihiẹn w'a mụ ẹmụ; onyẹ ghafe, egun a tụ a, o finfin isi, ma ọsụa (ọsụọ) makẹ eje-ihiẹn hụn mẹ obodoni.

⁹ M k'e mẹ wẹ ri ụmụ wẹ ikẹnnyẹ lẹ ikpoho, e ri wẹ ibe wẹ yeni ẹgụn, ogẹn ndị-iṅẹnrẹn wẹ hụn chọkọ wẹ ogbugbu e gi kehunmẹ wẹ ye imẹ obodoni!”

¹⁰ “I kugụ a, y'a nọ idẹnya ndị yụ lẹ wẹ wị tikpọ ite-ụrụa hụ,

¹¹ sị wẹ: Osolobuẹ ihiẹn ile rị okpuru ẹ sị, ‘M k'e tikpọ ndị alịnị lẹ obodoni nọkẹ ite-ụrụa hụn o mẹ ni o tikpọ, w'a ra sazị ẹka e dọnzi ẹ. Wẹ k'e li ozun jun Ọdanmgbugbu Tofẹtị ebeni d'e ru nị ahụnkọzị wẹ ebe w'e liye wẹ.

¹² Ẹrịra kẹ m jẹnkọ d'e mẹ ebeni lẹ ndị rịn'a, mmẹ wụ Osolobuẹ ku ẹ. M k'e mẹ obodoni n'ọ rị kẹ Tofẹtị.

¹³ Ụlọ ndị rị Jerusalẹm lẹ obi-eze ndị-nze Juda jẹnkọ d'a rụ nọkẹ Tofẹtị ebeni, ụlọ ile wẹ nọ elu wẹ chụnyesọnmẹni ihiẹn ile rị igwere ẹjan nsẹnsi, nọ elu wẹ huyesọnmẹni mmọn ndị ọzọ manya.’ ”

¹⁴ Jerimaya nọ gha Tofẹtị Osolobuẹ zijẹn ẹ d'e bu amụma lụa, ọ nọ turu ezi-ọgwa ụlọ-nsọ Osolobuẹ, sị ndị alị hụ ile,

¹⁵ “Osolobuẹ ihiẹn ile rị okpuru ẹ hụn wụ Chuku Izrẹlụ sị, ‘Gọn ni ntịn! M jẹnkọ nwan d'e buhẹni obodoni lẹ mmụ alị ile fihunmẹn'ẹ nsọngbu ile m ku oku ẹ, makẹni e bugụọ wẹ isi-ikẹn, jụ n'e gọnkọ wẹ ntịn oku m.’ ”