Jerimaya 17 - Ika

Isi Nke Mmẹsa E Gbugụọ Wẹ Njọ Ndị Juda Ye Wẹ Obi

¹ Osolobuẹ sị, “Igwe kẹ wẹ gi de njọ ndị Juda ye obi wẹ, ọmụma zegbu enwẹn ẹ kẹ wẹ gi de ẹ — ye wẹ akpobi lẹ mpịn rịsọnmẹ ukpo nchụn-ẹjan wẹ.

² Kẹ ụmụ wẹ ara zọdẹ ijẹn ukpo nchụn-ẹjan lẹ osisi mmọn Ashẹra wẹ hụn rịsọnmẹ ukun osisi ile duni lẹ elu òke ile jẹn elu.

³ Ufiri ẹ, kẹ ugu m rị alịnị kẹ ihiẹn ile ụnụ nwọn lẹ ihiẹn ụnụ dọnmẹ, m k'e wechanrịn wẹ ye ndị-ọzọ kwarị, wẹ lẹ ukpo-mmọn ụnụ ndị ahụn yeni njọ ile ụnụ mẹ imẹ alịnị.

⁴ Ufiri ihiẹn ụnụ mẹ, ihiẹn m ye ụnụ jẹnkọ d'a nahịn ụnụ; m jẹnkọ d'e mẹ ụnụ wụrụ igbọn ndị iṅẹnrẹn ụnụ, makẹni ụnụ a kpasugụọ m iwe, gi ẹ fụnwun okẹn ọkụn jẹnkọ d'a dụnsọnmẹni.”

Akọ-lẹ-uche Hụn Gha Ẹka Osolobuẹ Bịa

⁵ Osolobuẹ sị, “Ịbụ-ọnụ ya rịnị onyẹ k'e gi ịhịan dọn ẹnya, onyẹ hụn ịhịan mmaka wụ ikẹn ẹ, onyẹ hụn obi ẹ rịzịlẹni ebe Osolobuẹ rị.

⁶ O k'a nọ kẹ ihiẹn rị e sue alị rịlẹni mma — ọ hụnkọ ihiẹn rị mma ogẹn o gi bịa. O k'e bi alị-ọkpọnkụn rị imẹ atụ, alị nnu ịhịan ghalẹni e bi.

⁷ Kanị, ngọzi wụ nke onyẹ hụn gi Osolobuẹ dọn ẹnya — onyẹ hụn danbemẹn'ẹ.

⁸ Wẹ k'a nọ kẹ osisi wẹ kụn mkpẹnrẹn mirin, hụn mkpọgụn a e ruchanrịn mirin hụ. Ara tụ egun uwowo bịa; ogẹn ile kẹ ẹhụhụọ a gi a rị ndụn. A ra hue uhue ọkọkị; a ra mịbehi mkpụrụ.

⁹ “Onwọnni ihiẹn e dufie ịhịan nọkẹ obi ịhịan; ọ jọgbu enwẹn ẹ njọ! Onyẹ a saẹka a ghọta a?

¹⁰ “Mmẹ wụ Osolobuẹ e lele obi, e lele iroro — hụn m'e gi a kụ ịhịan ụgwọ omumẹ ẹ, ụgwọ ihiẹn ọ mẹ.”

¹¹ Nnụnụ hụn e zuru ẹkwan o yilẹni d'e gbu — lẹ onyẹ e gi mmẹgbu a kpa egho wụ ohu; o gini d'e bi ebi, egho a la; ikpanzụụn, a hụn w'a n'ọ wụ nzuzu.

¹² Okẹn Ukpo-eze ahụn jẹn elu kete-kete kẹ ẹnyi nwẹn nọ e fe ofufe!

¹³ Euu, Osolobuẹ, Onyẹ hụn Izrẹlụ rị e lee! Ifẹnrẹn jẹnkọ d'e mẹgbu ndị ile latọn'ị, Ẹjan kẹ ndị latọn'ị k'a la — makẹni a latọgụọ wẹ Isi-mirin e ye ndụn.

¹⁴ Dodo zụọ m Osolobuẹ — makẹni i zụọ m, a dịnhịn m; zụọpụha m ẹka ndịnị — makẹni i zụọpụha m, a hụn m isi, makẹni ịyụ kẹ m'a ja mma.

¹⁵ A tọ wẹ a jụ m, “Ihiẹn nwẹn ị sị ya kẹ Osolobuẹ ku? Ya d'e mẹzu nwan!”

¹⁶ Agbatọnị m ndịnị ị sị m lepụ ẹnya, ọ rịtuni m nị ogẹn nsọngbu kunrun wẹ. Y'a marịnghọ ihiẹn gha m ọnụ a pụha — idẹnya ị kẹ m nọ e ku ihiẹn m'e ku.

¹⁷ Dodo, erọnlẹ m nwan egun; ịyụ kẹ m'a gbaburu ogẹn nsọngbu.

¹⁸ Ifẹnrẹn ya mẹgbu ndị rị e kpokponi m, ka anịlẹ mmẹ nwẹn fa; rọn wẹ egun, ka anịlẹ egun tụ m. Mẹ nwan ogẹn nsọngbu kunrun wẹ, y'e tikpọ wẹ ru alị!

Osolobuẹ E Yezi Wẹ Oghere W'e Gi Wanahịn

¹⁹ Osolobuẹ sị m, “Jẹn d'e turu Ọnụ-mgbọn Ịhịan-ile, hụn ndị-nze alị Juda gha a pụ, a banhan, n'ị hị ihiẹn m k'a gwa ị, y'e jẹnsọnmẹzikwọ ọnụ-mgbọn ndị ọzọ ile rị Jerusalẹm d'a hịzị a.

²⁰ Sị wẹ: Gọn nị ntịn ihiẹn Osolobuẹ ku, ụnụ ndị-nze alị Juda lẹ ndị Juda ile lẹ ndị ile bi Jerusalẹm, hụn a gha ọnụ-mgbọn ndịnị a banhan.

²¹ Osolobuẹ sị: Kpachanpụ nị nwan ẹnya, omẹni ndụn ụnụ a sụọghọ ụnụ; ebuzilẹ ni ibu Ụhụọhịn Ezumikẹn; ebughazịlẹ ni ibu ọnụ-mgbọn ndịnị rị Jerusalẹm Ụhụọhịn Ezumikẹn.

²² Egizilẹ ni Ụhụọhịn Ezumikẹn e bupụha ibu ndịnị iwe ụnụ mọbụ rụn ọrụn ọwụlẹ. Ka e dọnmẹ ni Ụhụọhịn Ezumikẹn nsọ kẹ m dọn gwa ndị nẹdi ụnụ kanị.

²³ Kanị ndị nẹdi ụnụ egọnni ntịn, achọdẹni wẹ nị wẹ nụ; e busọnmẹ wẹ isi-ikẹn, jụ n'e gọnkọ wẹ ntịn mọbụ gi ẹ bihutọ ẹka.

²⁴ Kanị, omẹni ụnụ nwẹn e dọnringhọ ẹnya mẹ ihiẹn m ku, bughabehi ibu ọnụ-mgbọn obodoni Ụhụọhịn Ezumikẹn, dọnmẹmẹ Ụhụọhịn Ezumikẹn nsọ ghahanị ịlatọ ọrụn ụhụọhịn hụ,

²⁵ ụnụ sikọ d'e nwọnsọnmẹ ndị-nze nọ ukpo Defidi a kị lẹ ndị-isi hụn k'a gha e gi ụgbọ-anyịnyan lẹ ẹshin a gha ọnụ-mgbọn ndị rị obodoni, uwẹ lẹ ndị alị Juda lẹ ndị bi Jerusalẹm; ịhịan k'e bisọnmẹ obodoni.

²⁶ Ịhịan k'a rị a ghasọnmẹ obodo ile rị alị Juda lẹ ụmụ-alị ile rị mkpẹnrẹn Jerusalẹm lẹ ẹgbẹrẹ alị Bẹnjamini ile lẹ alị ndị rịsọnmẹ ukun-ugu ndị rị ẹbamịn ọdịdan ẹnyanwụn lẹ ndị rịsọnmẹ elu òke rị ẹbamịn ndịdan alị Juda a bịa. Wẹ k'a gha e wẹhẹ oyiye ichẹn-ichẹn Ụlọ-nsọ Osolobuẹ: kẹ ẹjan w'a dụn ọkụn kẹ oyiye ichẹn-ichẹn kẹ oyiye ọka kẹ nsẹnsi kẹ oyiye wẹ gi a kpanmịn Osolobuẹ.

²⁷ Kanị, omẹni ụnụ emẹni ihiẹn m ku banyeni idọnmẹ Ụhụọhịn Ezumikẹn nsọ, bughabehi ibu ọnụ-mgbọn rịsọnmẹ Jerusalẹm Ụhụọhịn Ezumikẹn, a mụ m ọkụn wẹ ghalẹni a s'ẹka e tinyụn ye ọnụ-mgbọn ile rị Jerusalẹm, ọ dụnpụchanrịn ụlọ-uku ile rị Jerusalẹm hụn w'a gbaban.”