Jerimaya 16 - Ika

Isi Nke Mmisin Chuku Sị Jerimaya Alụlẹ Nwunyẹ Mọbụ Mụ Ụmụ

¹ Ya Osolobuẹ nọ sị m,

² “Alụkwọlẹ nwunyẹ mọbụ mụ ụmụ alịnị.

³ Nị m gwa ị ihiẹn jẹnkọ d'e mẹ ndị wẹ mụ alịnị lẹ ihiẹn k'e mẹ ndị nẹdi wẹ lẹ ndị nnẹ wẹ:

⁴ Eje-emu jẹnkọ d'e gbu wẹ; onwọnni onyẹ jẹnkọ d'a kwannị wẹ mọbụ li wẹ; ozun wẹ jẹnkọ d'e jun alị kẹ nsịn-efin. Agha lẹ ụnwụn jẹnkọ d'e gbu wẹ; ozun wẹ k'a wụrụnị nnụnụ lẹ anụ-ọfịa ihiẹn-oriri.

Osolobuẹ Sị Jerimaya Esọnlẹ Ndị Juda Kwan Ịhịan

⁵ “Mmẹ wụ Osolobuẹ rị nwan a sị ị: Ejẹnkwọlẹ izu wẹ, ejẹnkwọlẹ d'a kwan wẹ mọbụ hụhụ onyẹ ihiẹn mẹ, makẹni arịzị m a chọ ọrịrịmma ndịnị, ihiẹn wẹ asụọzịnị m, omikẹn wẹ emẹkọzị m.

⁶ Kẹ onyẹ uku kẹ onyẹ nta jẹnkọ d'a nwụntọ alịnị; onwọnkọ onyẹ k'e lini wẹ mọbụ kwan wẹ; onwọnzikwọnị onyẹ jẹnkọ d'e be enwẹn ẹ ihiẹn mọbụ kọ ntutu ẹ n'ọ rị a kwan wẹ.

⁷ Onwọnni onyẹ k'e buye ndị umẹ mẹ ihiẹn-oriri, ọsụọn'a ọnwụn nnẹ, ọsụọn'a ọnwụn nẹdi! Onwọnni onyẹ k'e wejẹnni wẹ manya n'o gi rọkọ wẹ obi, ọsụọn'a mkpu ohu sụọ.

⁸ “Ejẹnkwọlẹ iwe ndị rị e ri oriri d'e du wẹ ri, ra.

⁹ Mmẹ wụ Osolobuẹ ihiẹn ile rị okpuru ẹ, Chuku ndị Izrẹlụ rị e ku ẹ nị m'e d'a nọ idẹnya ụnụ, ogẹn nke ụnụ, kụsị ẹbụ-ịghọghọ lẹ anwịnrịn imẹ alịnị, anụkọzị wẹ olu ikẹnnyẹ lẹ ikpoho rị a gba-ẹkụkwọ ẹfọ rị a sụọ ụsụọ.

¹⁰ “Ị gwa wẹ ihiẹn ndịnị ile, nị a jụma wẹ i, sị, ‘Kị haịn Osolobuẹ gi e kuni o k'e mẹ ẹnyi eje-ihiẹn han ẹnịna? Kịnị kẹ ẹnyi mẹ? Elee njọ kẹ ẹnyi mẹ Osolobuẹ wụ Chuku ẹnyi?’

¹¹ Sị wẹ nị Osolobuẹ sị, ‘Makẹni ndị nẹdi ụnụ kanị gbakitọ m azụụn, sọnmẹ mmọn ichẹn-ichẹn, e fe wẹ, a kpọnị wẹ isi-alị; wẹ gbakitọ m azụụn; edọnmẹni wẹ Iwu m.

¹² Kanị, ụnụ e mẹkarịgụọdẹ nwan ndị nẹdi ụnụ njọ! Onyẹ-onyẹ hụ e bu isi-ikẹn ebe ọ rị e mẹ ihiẹn eje-obi ẹ gwa a, jụ nị ụnụ egọnkọ m ntịn.

¹³ M jẹnkọ nwan d'a gha alịnị ma ụnụ tuhu, ma ụnụ ye alị ụnụ marịnlẹni, ndị nẹdi ụnụ marịnlẹni, ụnụ a nọ ebẹhụ fe mmọn-lẹ-iyi ichẹn-ichẹn uhinhin lẹ efinnaị, makẹni emẹkọnị m ụnụ omikẹn.’

Nị Ihiẹn Rịzịghọkwọ Mma

¹⁴ “Kanị, mmẹ wụ Osolobuẹ rị e ku ẹ nị ogẹn lala asịkọzị wẹ, ‘Ma Osolobuẹ hụn gha alị Ijiptu gbapụha ndị Izrẹlụ.’

¹⁵ Wẹ k'a gha a sị, ‘Ma Osolobuẹ hụn gha alị rị ẹbamịn-ugu lẹ alị ile o te chụshi ndị Izrẹlụ wekinhẹn wẹ alị wẹ.’ Makẹni m jẹnkọ d'e wekinhẹn wẹ alịnị hụn m ye ndị nẹdi wẹ kanị.

¹⁶ “Kanị, m zila nwan ndị bu ọda d'a nwụn wẹ kẹ azụụn. Omẹgụ, a kpọha m ndị k'a chụ wẹ kẹ w'a chụ ọfịa, a chụ wẹ wẹ ebe ọwụlẹ wẹ warị, elu ugu lẹ òke ile lẹ imẹ okporo ọmụma.

¹⁷ M hụ a hụn ihiẹn ile wẹ rị e mẹ, onwọnni hụn zuerini ebe m rị, onwọnni njọ wẹ m ghalẹni e legha.

¹⁸ “M jẹnkọ d'e ye wẹ afụnfụn njọ lẹ eje-ihiẹn wẹ mẹ, ye wẹ ya ụzọ ẹbụọ, makẹni e gigụọ wẹ eje-ihiẹn ndị ahụn wẹ kpụtọsọnmẹ mẹrụ alị m, ihiẹn ndị ahụn rụnị rịlẹni ndụn hụn wẹ rị e fe.”

¹⁹ Euu, Osolobuẹ, Ikẹn m lẹ Ebe m'a gbaban, Onyẹ m'e gbọnni ogẹn nsọngbu! Ndị alị ile rị elu-ụwa jẹnkọ d'e buruhẹ i, sị ị, “Mmọn ndị ahụn ndị nẹdi ẹnyi fe ẹlẹ Chuku nke-esi, ihiẹn wẹ kpụhụ kẹ wẹ wụ o nwọnni erere wẹ bannị wẹ.

²⁰ Ịhịan e mẹmẹdẹ nwan ihiẹn o sikọ d'e fe ra? Ihiẹn wẹ e mẹmẹ ẹlẹ Chuku!”

²¹ Osolobuẹ nọ sị, “M jẹnkọ nwan d'a ghọsị wẹ — m jẹnkọ d'a ghọsị wẹ ikẹn m. Ogẹn ahụn, a marịn wẹ nị mmẹ wụ Osolobuẹ.”