Jerimaya 15 - Ika

Isi Nke Mmisẹn Osolobuẹ Sị O Mẹkọzịnị Ndị Juda Omikẹn

¹ Osolobuẹ nọ sị m: “Ọsụọn'a nị Mozizi lẹ Samuẹlụ turu ihun m a rịọ m, omikẹn ndịnị emẹkọ m. Sị wẹ gha m ihun pụ! Wẹ jẹnmẹ!

² Wẹ sị ị, ‘Elebe kẹ ẹnyi jẹnkọ?’ Sị wẹ, ‘Lee ni ihiẹn Osolobuẹ ku, Ndị ọnwụn jẹnkọ d'e gbu, wẹ jẹnmẹ nị ọnwụn d'e gbu wẹ; ndị agha k'e gbu, wẹ jẹnmẹ nị agha d'e gbu wẹ; ndị ẹgụn jẹnkọ d'e gbu, wẹ jẹnmẹ nị ẹgụn d'e gbu wẹ; ndị wẹ jẹnkọ d'a kpụnrụn, wẹ jẹnmẹ ni wẹ d'a kpụnrụn wẹ.’

³ “M jẹnkọ d'e zihẹni wẹ ihiẹn ẹnọ e tikpọnị: ọpịa hụn k'e gbuni wẹ; nkitẹ ndị jẹnkọ d'a dọkpụnpụ ozun wẹ; nnụnụ lẹ anụmanụ ndị jẹnkọ d'e ritịta ozun wẹ. Ya kẹ Osolobuẹ ku.

⁴ M k'e gi ufiri ihiẹn eze Juda mbụ wụ Manasẹ nwa Hezikaya mẹ imẹ Jerusalẹm mẹ wẹ ihiẹn alị-eze ndị ọzọ ile rị ụwa jẹnkọ d'a hụn, egun a tụ wẹ.

⁵ Euu Jerusalẹm, onyẹ k'e mẹdẹn'i nwan omikẹn? Onyẹ k'a kwann'ị ẹkwan? Onyẹ jẹnkọ d'a kụsị n'ọ jụ ukwere i?

⁶ Osolobuẹ sị, ‘Y'a jụgụọ m; ọdanpụ-ọdanpụ kẹ y'a danpụsọnmẹ. M jẹnkọ nwan d'e mẹshi i ikẹn, tikpọ ị; ẹlẹ m k'e mẹzi omikẹn i.

⁷ M k'a fụchan ndịnị kẹ ọka, imẹ obodo ile rị alịnị. M k'e gbunarịnsọnmẹ ndị nke m ịhịan, tikpọ wẹ, makẹni alatọnị wẹ eje-omumẹ wẹ.

⁸ M k'e mẹ ikpoho wẹ di nwụnnahịn barahị, a karị wẹ ẹjan rị mkpẹnrẹn ohimin ọda. M k'e gi efinaị wẹhẹ onyẹ e tikpọnị d'e wiwi ndị nnẹ mụ ikorọbịa wẹ ihiẹn; e hukpu m wẹ eje-ihiẹn idẹnmuzi — hụn k'a fụgbu wẹ, tụgbu wẹ egun.

⁹ Okpoho te gi ụmụ ẹsa k'a sọhị, kwọnbepụ, anwụn a rọn'a ebe eki rị elu; ọ fa, ụya e ri ẹ. “ ‘M k'e gi ọpịa-agha gbuzi ndị k'a họdụnị — ghahanị ndị-iṅẹnrẹn wẹ.’ ” Ya kẹ Osolobuẹ ku.

Jerimaya E Kumẹ K'ọ Rị A

¹⁰ Euu nnẹ m, ọ jọkakwọ n'ị mụ m amụ! E họnringụọ m onyẹ-oku lẹ onyẹ-adịdọ! Ẹlẹ m onyẹ e zinye ịhịan egho, erini m ụgwọ, kanị ịhịan ile hụ nwan a kpọ m iyi.

¹¹ Osolobuẹ nọ sị, “Eziẹ, ọrịrịmma ị haịn m gi nwan a wụ eṅẹnrẹn i! M k'e mẹrịrị ndị-iṅẹnrẹn i bịa d'a rịọ ị ogẹn nsọngbu lẹ eje-ọnọdị e gi bịa.

¹² “Nị ụnụ saẹka kpagi igwe — igweni zeni hụn gha ẹbamịn-ugu bịa? Nị ụnụ saẹka kpagi igwe-bronzu?

¹³ M k'e we akụ-lẹ-ụba ị ile lẹ ihiẹn ile i butọ ye ndị-iṅẹnrẹn i kwarị ọfẹ — yeni njọ ile ụnụ rị e mẹ imẹ alị ụnụ ile.

¹⁴ M k'e gi i họnrin igbọn ndị-iṅẹnrẹn i imẹ alị ị marịnlẹni — makẹni m jẹnkọ d'e gi olulu mụye ọkụn hụn jẹnkọ d'a dụn ụnụ.

Jerimaya A Jụma Osolobuẹ Ajụjụ

¹⁵ “Osolobuẹ, y'a marịngụọ ihiẹn ẹnya rị a hụn m; dodo, nyanhan m, n'ị hụn ụzọ lepụ m ẹnya. Mẹgwarịnị m ndị rị e kpokponi m. Anịkwọlẹ wẹ gbu m ebe ị rị e gi ndidin e sọn wẹ; nyanhankwọ mkpari m rị e gi ufiri i a narịn.

¹⁶ K'i gwa m oku, e righọ m'a lekẹ ihiẹn-oriri, o mẹ m ghọghọ, mẹ ẹfọ sụọ m ụsụọ, makẹni ẹfan ị kẹ m'a za, Osolobuẹ, Chuku ihiẹn ile rị okpuru ẹ.

¹⁷ Esọntuni m ndị e ri, a ra; esọntuni m wẹ nwọn anwịnrịn wẹ; m'a nọdị nke m, makẹni ẹka ị rị m ukun, makẹni y'e mẹgụọ olulu ihiẹn wẹ rị e mẹ junzi mmẹ nwẹn obi.

¹⁸ Kị haịn nwan afụnfụn m gilẹni a gụ? Kị haịn nwan wẹ gi a rụ m eje-ẹhụ ghalẹni a la? I sikọ d'e mẹ m kẹ iyi a tahịnahịn onyẹ gi ẹ e dọn ẹnya, nọkẹ isi-mirin ghalẹni a gbasọnmẹ mirin?

¹⁹ “Ya kẹ Osolobuẹ nọ sị, ‘I hutọ, e werizi m'i — n'i hụn ụzọ rụnmazịnị m ọrụn; omẹni y'e ku oku furuni, ẹlẹ oku furulẹni, y'a wụsọnmẹ ọnụ m. Ndịnị nwọn kweyeni i, ẹlẹkwọ yụ k'e kweyeni wẹ!

²⁰ M k'e mẹdẹ i wụrụ ẹhụ-ẹjan ebe ndịnị rị, ẹhụ-ẹjan igwe-bronzu zegbu enwẹn ẹ. Wẹ k'a lụsọn i ọgụn, kanị onwọnni ihiẹn wẹ k'a saẹka mẹ i, makẹni m nọyeni i anọyeni — m k'a gbapụha ị; m k'a zụọpụha ị — Ya kẹ Osolobuẹ ku.

²¹ M k'a zụọpụha ị ẹka ndị-ejẹ; m k'a gbapụha ị ẹka ndị ẹfọ-njọ.’ ”