Jerimaya 14 - Ika

Isi Nke Mmẹnọ Ihiẹn Osolobuẹ Gi Ụnwụn Mẹ Ndị Nke Ẹ

¹ Ọnwan wụ ihiẹn Osolobuẹ gwa Jerimaya ogẹn ụkọ-mirin.

² “Juda ile rị nwan a kwan; obodo ndị rịn'a rị a la iwi; wẹ hụ e goo alị Juda; okẹn ẹkwan rị imẹ Jerusalẹm.

³ Ndị-isi hụ e zi idibo wẹ d'a chọ mirin; wẹ hụ e jẹn ọmị ile d'a chọ mirin, kanị arị wẹ a hụn mirin. Wẹ hụ e bulụa okpokoro ẹgbo-mirin, amarịnzị wẹ hụn w'e mẹ, e gi wẹ ẹka kpumẹ ihun yeni ifẹnrẹn.

⁴ Alị a kpọchanrịngụọ nkụn makẹni mirin ezuezini. Ndụn a gụ ndị-ugbo, e gi wẹ ẹka kpumẹ ihun yeni ifẹnrẹn.

⁵ Onyẹnnyẹ-ele rị ọfịa nkẹ hụdẹ a gba ụmụ a a tọ, makẹni ẹfịfịa w'e ri arịzịa.

⁶ Jaki-ọfịa hụ e wuzo elu-òke, e mẹ ẹkpịrị tuke-tuke lekẹ nkitẹ-ọfịa; ẹnya e d'a kpọhị wẹ ebe wẹ rị a chọ ẹfịfịa wẹ e ri.”

⁷ Ezioku-ezioku njọ ẹnyi a shịagbugụọ ẹnyi ẹri, Dodo Osolobuẹ, gi ufiri ẹfan ị tụnị ẹnyi ụya, nị ẹnyi a danpụọlẹ ọda-ọda, ẹnyi e mẹọlẹ i njọ.

⁸ Euu, Onyẹ hụn Izrẹlụ rị e lee ẹnya! Onyẹ hụ a zụọpụhan'a ogẹn nsọngbu, k'ị gbanị nkịtịn nọkẹ onyẹ-ọbịa, e mẹ kẹ onyẹ-ijẹn banhanhụ d'a ranhịn nị eki fọn?

⁹ K'ị rị nwan e mẹni kẹ onyẹ ihiẹn kunrun idẹnmuzi, kẹ odogun-agha nwọnlẹni ihiẹn ọ saẹka e mẹ? Bụ ị hụ imẹ igunrun ẹnyi, Osolobuẹ — ẹfan ị kẹ ẹnyi a za; dodo, alakwọlẹ ẹnyi tọ.

¹⁰ Lee ihiẹn Osolobuẹ ku banyeni ndịnị: “Ịkpahuni a sụọ wẹ ọda-ọda; ụkụ ara nọ wẹ ụzọ ohu. Ufiri ẹ kẹ Osolobuẹ gilẹni a nabanhan wẹ; m jẹnkọ nwan d'a nyanhan eje-omumẹ wẹ, ye wẹ afụnfụn njọ wẹ.”

¹¹ Osolobuẹ nọ sị m: “Emẹkwọlẹ ekpere n'ọ rịnị ndịnị mma.

¹² Ọsụọn'a wẹ bu ọnụ, egọnkọ m ntịn ẹkwan wẹ; ọsụọn'a wẹ chụn ẹjan w'a kpọ ọkụn lẹ ẹjan ọka, ewekọ m. Hụn nkẹ m'e gi narịn wẹ, m k'e gidẹ ọpịa-agha lẹ ẹgụn lẹ eje-emu gbu wẹ.”

¹³ Ya kẹ m nọ sị, “Euu, Di-nwọnni-ẹnyi wụ Osolobuẹ, ndị amụma wẹ hụ a sị wẹ nị ị sị, ‘Ụnụ ahụnkọ agha mọbụ ụnwụn. M jẹnkọ d'e mẹ n'ọ rịsọnmẹni ụnụ mma imẹ alịnị.’ ”

¹⁴ Osolobuẹ nọ sị m, “Amụma-ntụ kẹ ndị-amụma ahụn rị e gi ẹfan m e bu. Ẹlẹ mmẹ zi wẹ; ẹlẹ mmẹ tumẹ wẹ; onwọnni ihiẹn m sị wẹ ku. Wẹ rị a hụnnị ụnụ ọhụn wụlẹni ezioku, a gba ẹfa nwọnlẹni isi, e ku ihiẹn uche wẹ gwa wẹ.

¹⁵ Lee nwan ihiẹn mmẹ wụ Osolobuẹ ku banyeni ndị-amụma ndị ahụn gi ẹfan m e bu amụma: ẹlẹ mmẹ zi wẹ, kanị wẹ hụ a sị, ‘Kẹ ọpịa-agha kẹ ụnwụn erukọ alịnị.’ Ufiri ẹ, ọpịa-agha lẹ ụnwụn k'e gbu ndị-amụma hụ.

¹⁶ Ọpịa-agha lẹ ụnwụn k'e gbuzikwọ ndị ahụn wẹ rị e buni amụma tọ ọgbara-ogbe Jerusalẹm. Onwọnkọ onyẹ k'e lini wẹ lẹ inyẹnmẹ wẹ lẹ ụmụ wẹ ikẹnnyẹ lẹ ikpoho. M jẹnkọ d'e hu afụnfụn ahụn furuni wẹ kpu wẹ.

¹⁷ Lee ihiẹn i k'a gwa wẹ: Ẹnya-mirin ẹnya-mirin kẹ m'a kwan uhinhin lẹ efinnaị; makẹni nwagbọọ wụ alị m a rụgụọ eje-ẹhụ, a dụgụọ w'a eje-ịkpa.

¹⁸ M shi ugbo, a hụnsọnmẹ m ozun ndị wẹ gi ọpịa-agha gbu! M banye imẹ obodo, a hụn m ndị ẹgụn rị e gbu, kẹ ndị-amụma kẹ ndị nchụn-ẹjan hụ a ghahunmẹ alịnị ile bụ amarịn wẹ ihiẹn.”

¹⁹ Y'a jụchanrịngụọdẹ nwan alị Juda ra ize Zayọnụ rị e zen'i agụkọdẹ? K'ị rụnị ẹnyi eje-ẹhụnị jẹnkọlẹni d'a nị zụọ? Ẹnyi hụ a tụ ẹnya nị ihiẹn rị mma, kanị ihiẹn rị mma abịanị; ẹnyi hụ a tụ ẹnya nzụọrị, kanị ihiẹn-egun kẹ ẹnyi a hụn.

²⁰ Euu, Osolobuẹ, ẹnyi e kwerigụọ nị ẹnyi e mẹọlẹ njọ lẹni ndị nẹdi ẹnyi mẹ njọ; ẹnyi e mẹgụọ ị njọ nke-esi.

²¹ Dodo, makẹ ufiri ẹfan ị, elelịalẹ ẹnyi, elelịalẹ ukpo i ma mma. Nyanhan nkwerigbama ẹnyi lẹ ịyụ, dodo, etikpọkwọl'a.

²² Mmọn ndị ahụn nwọnlẹni isi ndị alị ọzọ e fe, elee hụn asadẹ nwan ẹka e mẹ mirin e zue? Igwere nkẹ e gidẹ nwan ihiẹn ẹka a e zihẹ mirin ra? Mba, ịyụ sụọ e mẹ ẹ — ịyụ Osolobuẹ, Chuku ẹnyi. Ịyụ kẹ ẹnyi rị nwan e lee ẹnya, makẹni ịyụ e mẹ ihiẹn ndịnị ile.