Jerimaya 13 - Ika

Isi Nke Mmẹtọ Ihiẹn Osolobuẹ Gi Nwa-mpe Ghọsị Izrẹlụ

¹ Lee ihiẹn Osolobuẹ gwa m: ọ sị m, “Jẹn d'e ṅọnrin nwa-mpe wẹ gi ẹkwa linẹ kwa, n'i jeri ẹ, ka anịkwọlẹ mirin mẹtụ a.”

² Ya m nọ jẹn d'e ṅọnrin nwa-mpe kẹ Osolobuẹ dọn gwa m; e jeri m'ẹ.

³ Ya kẹ Osolobuẹ nọ gwazị m oku, sị m,

⁴ “Weri nwan nwa-mpe hụ i ṅọn hụn i je ukun jẹn Peratị, Iyi Yufretisi, d'e bu ẹ zuemẹ oghe rị ọmụma.”

⁵ Ya m nọ shi Peratị, Iyi Yufretisi, bu ẹ zuemẹ ẹ ebahụn kẹ Osolobuẹ dọn gwa m.

⁶ Akpọhịn ole-lẹ-ole a ghafegụ, Osolobuẹ nọzị sị m, “Jẹn nwan Peratị, Iyi Yufretisi, d'e weri nwa-mpe hụ m sị ị zuemẹ ebẹhụ.”

⁷ M nọ shi Peratị, Iyi Yufretisi. M nọ gupụha a ebe m zuemẹ ẹ — kanị, o wiwigụọ nwan, onwọnzini ihiẹn wẹ gi ẹ e mẹ!

⁸ Ya kẹ Osolobuẹ nọzị gwa m oku, sị m,

⁹ “Ẹrịra kẹ m jẹnkọ d'e wiwi ihiẹn hụ Juda gi a nyan isi lẹ okẹn-ihiẹn hụ Jerusalẹm gi a nyan isi:

¹⁰ ndị-ejẹni jụ nị egikọ wẹ oku m dọn, ndịnị rị a gba isi-akwanran kẹ eje-obi wẹ dọn gwa wẹ, e sọn mmọn, e fe wẹ, a kụnị wẹ isi-alị, wẹ jẹnkọ d'a nọkẹ nwa-mpeni wiwini nwọnlẹni ihiẹn wẹ k'e gi ẹ mẹ!

¹¹ Makẹni m te we ikpụlọ Izrẹlụ ile lẹ ikpụlọ Juda ile che ẹhụ kẹ nwa-mpe dọn a rịchanrịn ịhịan ẹhụ, kẹni wẹ wụrụ ndị nke m, wụrụ ndị wẹ gi a nụ ẹfan m, wụrụ ndị wẹ gi a ja m mma lẹ ndị wẹ gi e ye m ọghọ. Kanị, egọnni wẹ m nwan ntịn.” Ya kẹ Osolobuẹ ku.

Mbubọn (Obele) Manya Jun

¹² Ya Osolobuẹ nọ sị m, “Sị wẹ nị Osolobuẹ hụn wụ Chuku Izrẹlụ, sị, ‘Manya kẹ wẹ gi a gbajun obele, (mbubọn-manya) ile.’ Wẹ sikọ d'a sị ị, ‘I ro ni ẹnyi amarịn nị w'e gi manya a gbajun mbubọn-manya?’

¹³ Y'a sị wẹ nị Osolobuẹ sị, ‘M jẹnkọ d'e mẹ ndị alịnị gụnma agụngụn ndị manya rị a tụ, marịnzịlẹni ihiẹn wẹ rị e mẹ, kẹ ndị-nze wẹ nọ ukpo Defidi a kị kẹ ndị nchụn-ẹjan kẹ ndị-amụma kẹ ịhịan ile bi obodo Jerusalẹm.

¹⁴ M k'e se isi lẹ isi gbetarị, isi ndị nẹdi lẹ ụmụ wẹ, anịkọ m omikẹn mọbụ ebere wẹ mẹ m etikpọlẹ wẹ.’ ” Ya kẹ Osolobuẹ ku. Jerimaya sị,

Osolobuẹ Sị Wẹ K'a Kpụnpụrịrị Ndị Juda Alị Wẹ

¹⁵ “Gọnkwọ nị ntịn, ụnụ e gi ẹ dọn; emẹkarịkwọlẹ ni enwẹn ụnụ — Osolobuẹ e kugụọkwọ a!

¹⁶ Kwerikwọ nị hụn Osolobuẹ wụ Chuku ụnụ ku gi ye ẹ ọghọ — o gini d'e mẹ ishi gbakpumẹ ụnụ, ụnụ gini d'a kpọgburumẹ lekẹ onyẹ-ijẹn ghakọ elu òke ebe eki rị e gi. Ụnụ rị a tụ ẹnya ukpẹ, kanị Osolobuẹ k'e mẹ ẹ wụrụ ẹkpa-ishi; o k'e mẹ ẹ wụrụ okẹn ishi.

¹⁷ Kanị, omẹni ụnụ egọnni ntịn, ya wụ nị m k'e zueri a kwan ẹkwan-ẹkwan, makẹ mpache ụnụ; ẹnya m k'a chansọnmẹ, ẹnya-mirin m e huru — makẹni wẹ jẹnkọ d'a kpụnrụn igunrun atụnrụn Osolobuẹ.

Osolobuẹ A Jụgbọ Eze Wụ Jehoyakini Lẹ Nnẹ Ẹ

¹⁸ “Osolobuẹ sị m, Sị eze rị a kịnị lẹ nnẹ ẹ, ‘Hidan nị ukpo-eze ụnụ, makẹni okpu-eze ụnụ ma mma jẹnkọ d'a gha ụnụ isi danpụ.’

¹⁹ “Wẹ sikọ d'a kpọkinchanrịn obodo ndị rị imẹ Nẹgẹvụ onwọnni onyẹ k'a kpọpụnị wẹ. Wẹ jẹnkọ d'a kpụnrụnchanrịn ndị Juda ile shi alị ọzọ — ahọdụkọ wẹ.

²⁰ Jerusalẹm, lee ẹnya, n'ị hụn ndị-iṅẹnrẹn gha ẹbamịn-ugu lala. Elebe kẹ igunrun atụnrụn wẹ buche i ẹka rị? Atụnrụn ndị nwẹn i gi a nyan isi nwan?

²¹ K'i k'e ku ogẹn Osolobuẹ k'e bu i che okpuru ndị ị rị a han ọwụ? Ọ tụrụkọ ị nọkẹ ebe imẹ rị e mẹ okpoho?

²² Ị k'a jụma enwẹn i, ‘Kị seni m ihiẹnni?’ Njọ ile i mẹ, ịya haịn wẹ gi nwan kpushi ẹbulukun i elu, gi ẹhụ ị mẹ ihiẹn sụọnị wẹ.

²³ Nị onyẹ-ogi saẹka mẹ ẹhụ a chanma ụchan? Nị liopadị saẹka wepụ ẹkịrịka rị a ẹhụ? Yụ nwẹn as'ẹka mẹ ihiẹn rị mma makẹni eje-ihiẹn a mụmarịngụọ ị.

²⁴ M k'e feyịya ị nọkẹ ẹfịfịa-ọka ufere atụ bukọ.

²⁵ Ịya wụ ihiẹn run'i, ịya kẹ m keye i — makẹni y'a zọgụọ m, gi mmọn-lẹ-iyi wụlẹni Chuku dọn ẹnya. Ya kẹ Osolobuẹ ku.

²⁶ M jẹnkọ d'e kpushi ẹbulukun i elu, a hụn wẹ ọtọ ị,

²⁷ hụn k'ị dọn e fe m, e fezi mmọn, a tụsọn ihiẹn ile, e mẹ kẹ ịgbaraja nwọnlẹni ifẹnrẹn! A hụngụọ m arụ ị rị e mẹ elu ugu lẹ òke ichẹn-ichẹn. Nke i a jọka-o, Jerusalẹm! Elee mgbe y'a wụbehi onyẹ rụnị?”