Jerimaya 12 - Ika

Isi Nke Mmẹbụọ Jerimaya A Gwaghọsị Osolobuẹ

¹ Jerimaya nọ sị, “Euu Osolobuẹ, y'a han ezigbo eṅẹn, ogẹn ile m gi e kinghọsị ị. Kanị nị ẹnyi lebankwọ ihiẹnni ẹnya: kị haịn ihiẹn gi a rịnị ndị eje-omumẹ mma? Kị haịn ẹhụ gi e fu ndị ghalẹni a gbaye Osolobuẹ?

² Ịyụ kụn wẹ, a gba wẹ mkpọgụn; e sue wẹ, mị mkpụrụ. Ogẹn ile kẹ wẹ gi e ku oku i, kanị o runi wẹ alị ẹfọ.

³ Kanị y'a marịngụọ m, Osolobuẹ; ị hụ a hụn m, e lele kẹ m dọn e ro i. Dọkpụnrụn wẹ kẹ atụnrụn d'e gbu! Bu wẹ tọnị ụhụọhịn wẹ k'e gbu wẹ!

⁴ Elee mgbe alịnị ile k'a kpọbehi nkụn? Elee mgbe ẹfịfịa rị ugbo ile k'e shinwụnbehi? Makẹni eje-omumẹ ndị bi alịnị a karị ẹka, anụmanụ lẹ nnụnụ a gụgụzịghọ. Kanị wẹ hụkwọ a sị, ‘Ihiẹn ọ rị e ro emẹkọ ẹnyi.’ ”

Chuku A Shịarị Jerimaya

⁵ Osolobuẹ nọ sị m, “Omẹni ndị-ụkụ k'i sọn gba ọsọ, e mẹ wẹ ndụn gụ ị, nanị y'a dọn nwan sọn ẹshin gba ọsọ? Ị hụ ebe fọnni a kpọgburu, k'i k'e mẹzi nwan imẹ ọfịa kinni rị mkpẹnrẹn Iyi Jọdanị?

⁶ Umunẹ i, ndị nẹdi i mụ yụ lẹ wẹ e rezighọdẹ i; e gigụọ wẹ i yi oro. Ọsụọn'a wẹ rị e ku oku i ọhụnma ebe ị rị, egikwọlẹ wẹ dọn ẹnya.

⁷ “M k'a jụ ụlọ m tọ, gbakitọ ihiẹn m azụụn; m k'e bu Izrẹlụ, okpoho nwẹn wụ obi m, che ẹka ndị-iṅẹnrẹn ẹ.

⁸ Onyẹ wụchanrịn nke m e bugụọ nụmanị m lekẹ ẹwọrọ rị imẹ ẹgboko. Ọ hụ a gan m; ihiẹn ẹ asụọzịnị m.

⁹ Ndị m kpọ nke m nọ m nwan kẹ nnụnụ e ri anụ; nnụnụ e ri anụ e fihunmẹgụọ a nwan ni wẹ maye ẹ. “D'a kpọkikomẹ ni anụ ile rị ọfịa; wẹhẹni wẹ d'e gburi ndị nke m.

¹⁰ Ndị-nze alị ichẹn-ichẹn kịla ndị-agha wẹ nọkẹ atụnrụn d'a zọgbu ugbo-vaịnị m wụ Izrẹlụ; wẹ sikọ d'a zọkpụkpọ ihiẹn-ugbo m; wẹ k'e mẹ ugbo m hụn ma mma họnrin alị la iwi ihiẹn anaị rịlẹni.

¹¹ Wẹ k'e mẹ ẹ wụrụ alị la iwi, alị ọkpọ-nkụn hụn rị a kwanghọsị m; alịnị ile k'a la iwi, makẹni onwọnni onyẹ ọ rị mkpa.

¹² Kẹ elu ugu lẹ òke rị imẹ atụ, ndị lala d'e tikpọ alịnị k'e jun wẹ, makẹni uwẹ wụ ọpịa Osolobuẹ hụn k'e gburi ndị alịnị gha isini d'e ru isini; onwọnni onyẹ k'a hụn isi wanahịn.

¹³ “Ịhịan k'a kụn ọka alịnị kanị ogun kẹ w'a hụn ghọrị; wẹ k'a rụngbu enwẹn wẹ, kanị onwọnni ihiẹn wẹ k'a rụnpụha. Ụya ya ri ụnụ makẹni ugbo ụnụ emẹni ihiẹn — makẹni Osolobuẹ e gigụọ ọnụma sọn ụnụ.”

¹⁴ Mmẹ wụ Osolobuẹ sị, “O mẹ nke eje-alị ndị ahụn ile nọkunmẹ ndị nke m Izrẹlụ, alị ndị hụn rị a napụ wẹ alị m ye wẹ, m jẹnkọ d'e huepụsọnmẹ wẹ alị wẹ nọkẹ osisi, zụọpụha ikpụlọ Juda ẹka wẹ.

¹⁵ M huepụgụ ndị alị ndị ahụn ile, m k'e mẹni Izrẹlụ omikẹn, wekinsọnmẹ onyẹ-onyẹ ukuu ẹ lẹ alị a.

¹⁶ Kanị omẹni a mụnarịn wẹ ndị nke m, bimẹ kẹ ndị nke m nke-esi, kunmẹ ẹfan m, a sị, ‘Ma Osolobuẹ’ rịkẹ kẹ wẹ dọn kuzi ndị nke m ikun Baalụ mbụ, a wụrụ wẹ ndị nke m, a gha wẹ ihun.

¹⁷ Kanị, alị ọwụlẹ gọnlẹni ntịn, m k'e huepụchanrịn a, tikpọpụ.” Mmẹ wụ Osolobuẹ ku ẹ!