Jerimaya 11 - Ika

Isi Nke Mmanaị Ndị Juda E Mẹni Ihiẹn Wẹ Lẹ Chuku Ku

¹ Ọnwan wụ oku Osolobuẹ gwa Jerimaya:

² “Gọn ntịn ihiẹn mmẹ lẹ Izrẹlụ kwerigbama, y'a gwa ndị Juda lẹ ndị bi obodo Jerusalẹm ya.

³ Sị wẹ nị ọnwan wụ ihiẹn Osolobuẹ wụ Chuku Izrẹlụ ku: ‘Onyẹ ọwụlẹ mẹlẹni ihiẹn Nkwerigbamanị chọ wụ onyẹ wẹ bụ ọnụ —

⁴ ihiẹn ndị hụn m sị ndị nẹdi ụnụ kanị e mẹ kẹ m wepụha wẹ imẹ okẹn ọkụn hụ wụ alị Ijiptu.’ M sị wẹ, ‘Humẹni ni m isi, mẹsọnmẹ ihiẹn m sị ụnụ mẹ. Ụnụ mẹ wẹ, ụnụ a wụrụ ndị nke m, mmẹ nwẹn a wụrụ Chuku ụnụ.

⁵ Ogẹn hụ, e mẹzu m nkwa hụ m kun enwẹn m kwe ndị nẹdi ụnụ kanị, nị m jẹnkọ d'e ye wẹ alị rịgbu enwẹn ẹ mma mirin-ẹran lẹ mirin-ẹnwụn jun’ k'o dọn nwan rị tannị.” Ya kẹ m nọ sị Osolobuẹ, “Isẹẹ, Osolobuẹ!”

⁶ Ya kẹ Osolobuẹ nọ sị m, “D'a hị ihiẹnni imẹ obodo ndị rị alị Juda lẹ ọgbara-ogbe ile rị imẹ obodo Jerusalẹm, sị wẹ, ‘Gọn ni ntịn ihiẹn mmẹ lẹ ụnụ kwerigbama, ụnụ e gi ẹ e bi.

⁷ Gha ogẹn m gi gha alị Ijiptu wepụha ndị nẹdi ụnụ d'e ru tannị, ẹnịna kẹ m'a gba wẹ mkpịnsịn-ẹka ẹnya, a gba wẹ ya a gbakwasị, a sị wẹ, “Mẹ ni ihiẹn m sị ụnụ mẹ.”

⁸ Kanị, egọndẹni wẹ ntịn mọbụ gi ẹ dọn; e mẹsọnmẹ wẹ ihiẹn eje-obi wẹ gwa wẹ. Ya m nọ gi ọnụ-ẹsọn ile rị imẹ nkwerigbama ahụn m butọnị wẹ hụn wẹ dọnmẹlẹni sọn wẹ.’ ”

⁹ Osolobuẹ nọzị sị m, “Ndị Juda lẹ ndị bi imẹ obodo Jerusalẹm e zugụọnị m umẹ.

¹⁰ E mẹmẹzi wẹ njọ ndị nẹdi wẹ kanị hụn kwelẹni gi oku m dọn mẹ. E sọnringụọ wẹ mmọn ndị ọzọ, femẹ wẹ. Kẹ ndị Izrẹlụ kẹ ndị Juda a latọgụọ nkwerigbama mmẹ lẹ ndị nẹdi wẹ kanị kwerigbama.

¹¹ Ya haịn Osolobuẹ gi nwan rị a sị, ‘M jẹnkọ d'e mẹ wẹ tikpọ wẹ hụn wẹ jẹnkọlẹni d'a s'ẹka wanahịn. Ọsụọn'a wẹ kwanghọsị m, egọnkọ m wẹ ntịn.

¹² Obodo ndị rị alị Juda lẹ ndị bi obodo Jerusalẹm k'a kwanghọsị mmọn ndị ahụn w'a mụyeni nsẹnsi — kanị eyekọnị wẹ wẹ ẹka imẹ nsọngbu hụ kaka —

¹³ ẹghẹẹ, Juda e nwọngụọ mmọn buhan ọda kẹ obodo ndị rị imẹ Juda, kanị o yekọnị wẹ ẹka ụhụọhịn hụ; ụnụ ndị Juda e tumẹringụọ ukpo-mmọn bu ọda kẹ ọgbara-ogbe rị imẹ Jerusalẹm han, a nọ wẹ a mụye nsẹnsi a rụa ihiẹn ifẹnrẹn ahụn wụ Baalụ.’

¹⁴ “Emẹkwọlẹni ndịnị ekpere mọbụ rịọmanị wẹ, makẹni egọnkọ m wẹ ntịn ogẹn w'e gi kpọku m imẹ nsọngbu.

¹⁵ Elee hụn Izrẹlụ m bu obi rịdẹ nwan imẹ ụlọ-nsọ m e mẹ hụnnị wẹ rị e mẹ eje-ihiẹnni ile? N'i gi anụ lẹ ịchụn ẹjan chụnpụ afụnfụn-njọ ị — bụ ị hụ e mẹ eje-ihiẹn y'e mẹ, a ghọghọ?”

¹⁶ Mmẹ wụ Osolobuẹ te kpọ ị osisi-olivu duni, hụn mkpụrụ a a la ẹnya. Kanị okẹn ẹbi sikọ nwan d'a kpọ ị, bi ọkụn ye i, agalaba ị a dụnpụ ọkụn.

¹⁷ Osolobuẹ ihiẹn ile rị okpuru ẹ, hụn kụnn'ị e kugụọ a nwan nị okẹn-ihiẹn k'e mẹ i, makẹni ụnụ ndị Izrẹlụ lẹ Juda e mẹgụọ eje-ihiẹn, kpasu m iwe yeni nsẹnsi ụnụ rị a mụyeni mmọn wụ Baalụ.

Umẹ Wẹ Zuni Jerimaya

¹⁸ Osolobuẹ ghọsị m ihiẹn wẹ romẹni m haịn m gi marịn; ịya ghọsị m ihiẹn wẹ rị e mẹ ogẹn ahụn.

¹⁹ M te nọhụ kẹ nwa-atụnrụn mẹ jụụ wẹ dukọ d'e gbu. Amarịndẹ m nị e zugụọnị wẹ m umẹ, sị, “Nị ẹnyi gbutu ni osisini — okẹnnyẹni lẹ ihiẹn rị a gha a ọnụ a pụha; nị ẹnyi gbupụn'a elu-ụwa — anyanhankọzị wẹ ẹfan a.”

²⁰ Kanị, Osolobuẹ ihiẹn ile rị okpuru ẹ, ịyụ hụn a han ezigbo eṅẹn, e lelezikwọ obi ịhịan lẹ iroro ẹ, nị m nwan gi ẹnya m hụn ebe ị nọ mẹgwarị wẹ, makẹni e bugụọ m oku m che i ẹka.

²¹ Lee nwan ihiẹn mmẹ wụ Osolobuẹ ku banyeni ndị obodo Anatọtụ rị a chọ ị ogbugbu, a sị ị, “Kubehi oku-Osolobuẹ ị rị e ku, amamgbe ẹnyi e gi ẹka gbu i.”

²² Ya Osolobuẹ ihiẹn ile rị okpuru ẹ nọ nwan sị, “M jẹnkọ d'e ye wẹ afụnfụn. Ọpịa-agha k'e gbu ikorọbịa wẹ la iwi; ẹgụn e gbu ụmụ wẹ ikẹnnyẹ lẹ ikpoho.

²³ Onwọnkọdẹ kaka akpụ onyẹ ohu m jẹnkọ d'a latọ imẹ wẹ, makẹni eje-nsọngbu kẹ m welanị ndị Anatọtụ ogẹn m'e gi ye wẹ afụnfụn.”