Jerimaya 10 - Ika

Isi Nke Iri Ntikpọ Kẹ Ịrụa-mmọn E Buhẹ

¹ Gọn ni ntịn ihiẹn Osolobuẹ rị a gwa ụnụ ndị ikpụlọ Izrẹlụ:

² Osolobuẹ sị, “Amụnarịnkwọlẹ ni alị ndị ọzọ ofufe wẹ, agbayekwọlẹ ni ihiẹn ọwụlẹ ụnụ hụn igwere, ọsụọn'a nị alị ndị ọzọ a gbaye wẹ agbaye.

³ Makẹni omẹnalị alị ndị ọzọ enwọn isi: w'e beri osisi rị ọfịa, omẹ-nka e gi izẹ o gi a tụ ihiẹn tụ a.

⁴ E gi wẹ siliva lẹ goru chọ a mma; e gi wẹ otutu-ụzụn wụ Hama dụ a ntu makẹ ọ gha a nyankwapụ.

⁵ Mmọn ndị ahụn nọ kẹ osisi wẹ yimẹ ẹwuru hụn wẹ gi a chụ nnụnụ imẹ ugbo, w'a ra ku oku. Obubu kẹ w'e bu wẹ, makẹni w'a ra jẹn ijẹn. Atụkwọlẹ ni egun wẹ, onwọnni ihiẹn w'e mẹ, onwọnzikwọnị ẹka wẹ e ye.”

⁶ Euu Osolobuẹ, onwọnni onyẹ nọ kẹ yụ; y'e hikẹ ogbe, ikẹn i hi-ogbe kẹ wẹ gi marịn ị.

⁷ Onyẹ k'a sị n'ọ gbayekọ ị, ịyụ, Eze alị ile? Mgbaye ru i eru! Makẹni imẹ ndị ile marịn ihiẹn imẹ alị ndị ọzọ lẹ ebe ile ọkịkị wẹ ru, onwọnni onyẹ nọ kẹ ịyụ.

⁸ Wẹ ile enwọn uche, w'e zuzu e zuzu; mmọn nwọnlẹni-isi wẹ gi osisi pịn rị a kuzi wẹ.

⁹ Wẹ weri siliva alị Tashishi wẹ tipịagụ, e weri wẹ goru alị Ufazị; onyẹ-nka lẹ onyẹ a kpụ goru mẹmẹgụ a, e yimẹ wẹ ẹ ẹwuru e nwun bru-bru lẹ pọpụ-pọpụ. Ndị e mẹ nka mẹmẹ wẹ ile.

¹⁰ Kanị, Osolobuẹ wụ Chuku nke-esi; ịya wụ Chuku hụn rị ndụn, Eze itẹbitẹ. O bumẹ olulu, elu-ụwa e mẹhunmẹ — onwọnni alị isi wẹ k'a saẹka che ọnụma a.

¹¹ Osolobuẹ sị m, sị wẹ: “Ẹlẹ mmọn ndịnị ke igwere lẹ ụwa, wẹ jẹnkọ d'a gụ elu-ụwa, ebe ile rị okpuru igwere.”

¹² Kanị Chuku gi ikẹn ẹ ke ụwa; ịya gi akọ-lẹ-uche ẹ mẹmẹ ụwa, gi nghọta a shịshịapụ igwere.

¹³ Olu ẹ han, mirin ile rị igwere e dẹn; o mẹ mirin e rugbarị elu-ụwa ile. O mẹ amụma e be mirin gha e zue, ọ gha ebe o butọ ihiẹn e wepụha ufere.

¹⁴ Kanị ịhịan ile wụ nzuzu, onwọnni ihiẹn wẹ marịn; mmọn wụ ihiẹn-ifẹnrẹn onyẹ kpụn'a. Ihiẹn ndị ahụn ọ kpụ ẹlẹ ezigbo ẹ — w'a ara kwọn.

¹⁵ Abannị wẹ erere, wẹ wụhụ ihiẹn ẹmụ; wẹ jẹnkọ d'a la iwi ogẹn m'e gi mẹ wẹ ihiẹn furuni wẹ.

¹⁶ Kanị Osolobuẹ, Onyẹ ahụn wụ nke Jekọpụ, anọnị kẹ uwẹ — makẹni ịya ke ihiẹn ile — Izrẹlụ wụ ebọn nke ẹ kẹti-kẹti; Ẹfan a wụ Onyẹ Ihiẹn Ile Rị Okpuru ẹ.

Ntikpọ Lalanịnị Ndị Jerusalẹm

¹⁷ Kpọnkwama nị ihiẹn ụnụ nị ụnụ e d'a gha alịnị pụ, ụnụ ndị Jerusalẹm wẹ kehunmẹ nwan.

¹⁸ Makẹni Osolobuẹ sị, “M jẹnkọ nwan d'a ma ndị bi alịnị tuhu; m k'e bu okẹn nsọngbu tọnị wẹ, ẹnya a hụn wẹ ihiẹn.”

¹⁹ Ụya e gbuẹ m! A rụgụọ m ẹhụ! A rụgụọ m eje-ẹhụ wẹ ghalẹni a zụọ! Kanị m te sị enwẹn m, “Emu sụọ rọ, nị m dingbughọ a!”

²⁰ E tikpọ wẹ ọdụ m bi, tibepụchanrịn eriri ile kwọndọnn'ẹ. Ụmụ a nwụnnahịngụọ m; arịzị w'a; onwọnzini onyẹ họdụnị — onyẹ k'a rụnkinni m ọdụ mọbụ mẹmẹni m ebe m k'a nọdị.

²¹ Ndị-ndu ẹnyi enwọn uche — w'a ra jụ Osolobuẹ uche ẹ; ya haịn ihiẹn gilẹni a rịnị wẹ nwan mma, ndị wẹ rị e du a gbayịyagụọ.

²² Gọn ntịn! Ẹnyi hụ a nụ ozi, okẹn mkpọtụ ndị agha alị rị ẹbamịn-ugu! Wẹ k'e mẹ obodo ndị rịsọnmẹ alị Juda gba okpokoro, ọ wụrụ ebe nkitẹ-ọfịa e bi.

Ekpere Jerimaya

²³ Osolobuẹ, a marịnghọ m nị ẹlẹ ịhịan nwọn enwẹn ẹ; ẹlẹ ịhịan e ku ebe o k'e jẹn.

²⁴ Jụgbọ m nwan, Osolobuẹ, ka gi ẹka alụlụa mẹ ẹ; dodo egilẹ olulu mẹ ẹ, amamgbe nke m a gụ.

²⁵ Gi ọnụma ị sọn alị ndị ahụn ghalẹni e fe i, ndị ahụn ghalẹni a kpọku ẹfan ị. Makẹni e gbuchanrịngụọ wẹ ebọn Jekọpụ; e gbuchanrịngụọ wẹ wẹ, tikpọchanrịn alị a.