Jerimaya 1 - Ika

Isi Nke Ohu Jerimaya Lẹ Ogẹn Ẹ

¹ Ọnwan wụ ihiẹn Jerimaya nwa Hil'kia de. Jerimaya wụ onyẹ ohu imẹ ndị-amụma rị obodo Anatọtụ alị Bẹnjamini.

² Hụn mẹ ẹ ahụa mmẹtọ ogẹn Josaya nwa Amọnụ gi wụ eze Juda kẹ Osolobuẹ zimẹ Jerimaya ozi ndịnị,

³ zisọnmẹ ẹ d'e runi Jehoyakim nwa Josaya a kịgụ Juda, zi ẹ d'e ru hụn mẹ ẹ ifọn isẹn imẹ ahụa nke mmanaị Zẹdikaya nwa Josaya kịma Juda — ogẹn ahụn ndị Babilọnụ gi kpụnrụn ndị rị Jerusalẹm.

Kẹ Osolobuẹ Dọn Kpọ Jerimaya

⁴ Osolobuẹ sị m,

⁵ “A marịngụọ m'ị nị m d'a kpụ ị imẹ ẹfọ nnẹ i; a họtọgụọdẹ m'i nị wẹ d'a mụ ị; m tumẹ i onyẹ-amụma alị ichẹn-ichẹn.”

⁶ Ya m nọ sị Osolobuẹ, “Euu Di-nwọnni-ẹnyi wụ Osolobuẹ, amakwọ m ku oku kaka; m wụhụ nwata.”

⁷ Kanị Osolobuẹ nọ sị m, “Asịkwọlẹ, ‘M wụhụ nwata.’ I k'e jẹnrịrị d'e kunrun onyẹ ọwụlẹ m zi i d'e kunrun, ku ihiẹn ọwụlẹ m sị ị ku.

⁸ Atụkwọlẹ egun wẹ, nị m k'a nọyeni i, zụọpụha ị.” Ya kẹ Osolobuẹ ku.

⁹ Ya kẹ Osolobuẹ nọ tịnpụ ẹka, mẹtụ m ọnụ, sị m, “Lee ẹ, e bugụọ m oku m che i ọnụ.

¹⁰ Lee ẹ, e tumẹgụọ m'ị tannị, bu alị lẹ alị-eze ichẹn-ichẹn che i ẹka, kẹn'i huepụ lẹ n'i kụtu; kẹn'i tikpọ lẹ n'i nutu; kẹn'i tụn lẹ n'i kụn.”

¹¹ Osolobuẹ nọzị sị m, “Jerimaya, k'ị rị a hụn?” M nọ sị, “M rị a hụn agalaba ‘shokẹdi’.”

¹² Osolobuẹ nọ sị m, “Y'a hụngụọ a ọhụnma, makẹni ẹrịra kẹ ẹnya m dọn rị e ‘shokẹdi’ ihiẹn m ku, kẹni m mẹzu ẹ.”

¹³ Osolobuẹ nọzị jụ m, “K'ị rị a hụn?” M nọ sị a, “Ite mirin rị a gbọnị rị ẹbamịn-ugu hụn hiehẹ ibeni kẹ m rị a hụn.”

¹⁴ Ya kẹ Osolobuẹ nọ sị m, “Wẹ k'a gha ẹbamịn-ugu hu ntikpọ kpu ndị ile rị alịnị.

¹⁵ M'e d'a kpọha alị-eze ndị rị ẹbamịn-ugu.” Ya kẹ Osolobuẹ ku. “Ndị-nze wẹ k'a bịa d'e tumẹsọnmẹ ukpo-eze wẹ ọnụ-mgbọn ile rị Jerusalẹm; wẹ k'e tikpọ mgbọn ile fihunmẹn'ẹ lẹ obodo ndị ọzọ ile rịzị alị Juda.

¹⁶ M k'a hangbu ndị nke m eṅẹn makẹ ihiẹn jọgbu enwẹn ẹ wẹ mẹ ebe wẹ nọ gbakitọ m azụụn ebe wẹ nọ mụyeni mmọn nsẹnsi, ebe wẹ nọ fe ihiẹn ẹka wẹ mẹmẹ.

¹⁷ “Kọnrin nwan ọrụn, y'e lihi n'ị gwa wẹ ihiẹn ọwụlẹ m k'a sị ị gwa wẹ. Atụkwọlẹ egun wẹ, makẹni i mẹ ẹ, m k'e rọn ị egun idẹnya wẹ.

¹⁸ Tannị, e mẹgụọ m'ị wụrụ obodo wẹ tụnhunmẹ mgbọn zeni lẹ adansụn igwe lẹ mgbọn wẹ gi igwe-bronzu mẹmẹ, hụn k'e turu sọn ndị alịnị ile dọ — kẹ ndị-nze k'a kịsọnmẹ alịnị wụ Juda kẹ ndị-isi ẹ kẹ ndị nchụn-ẹjan a kẹ ndị alịnị ile.

¹⁹ Wẹ k'a lụsọn i ọgụn, kanị asakọ wẹ ẹka mẹri i, makẹni m k'a nọyen'i, zụọpụha ị.” Ya kẹ Osolobuẹ ku.