Jẹnẹsisi 9 - Ika

Isi Nke Itenẹi Nkwa Osolobuẹ Kwe Nụa

¹ Osolobuẹ nọ gọzi Nụa lẹ ụmụ a, sị wẹ, “Mụ nị ụmụ; ba nị ụba; jun ni ụwa.

² Egun ụnụ k'a rị a tụ anụ ile, a tụ wẹ ọda-ọda, kẹ anụ ile a kpa alị kẹ nnụnụ ile e fe elu kẹ ihiẹn ile a rịhunmẹ akpakalị kẹ azụn ile rị imẹ ohimin; m rị e bu wẹ ile e che okpuru ụnụ.

³ Ihiẹn ọwụlẹ a ghahunmẹni lẹ ihiẹn ọwụlẹ rị ndụn k'a wụrụ ihiẹn-oriri ụnụ: kẹ m dọn ye ụnụ ihiẹn ile e pu alị hụn e nwun ẹhụhụọ-oyiyi ẹhụhụọ-oyiyi, e ri, ẹrịra kẹ m dọn nwan ye ụnụ ihiẹn ile nị ụnụ e ri.

Kẹ Ndụn Rịhan Mkpa

⁴ “Kanị, erikwọlẹ ni anụ lẹ ẹdeke ẹ hụn wụ ndụn a.

⁵ “Onyẹ gbu ịhịan, m k'a jụ a ukwere ẹdeke; anụ gbu ịhịan, m k'a jụ a ukwere ẹ; ịhịan gbu ịhịan, m k'a jụ a ukwere ẹ; onyẹ ọwụlẹ gbu ibe ẹ, m k'a jụ a ukwere ẹ.

⁶ Onyẹ gbu ịhịan, ịhịan k'e gbu ẹ, makẹni Osolobuẹ ke ịhịan n'o yi Osolobuẹ lẹ enwẹn ẹ.

⁷ Ụnụ nwẹn, mụba nị, mụba nị ọhụnma-ọhụnma elu-ụwa.”

⁸ Chuku nọ sị Nụa lẹ ụmụ a ya lẹ wẹ rị,

⁹ “M rị e kwe nkwa k'a rị ẹgbata mmẹ lẹ ụnụ lẹ ụmụ ụnụ lalanị

¹⁰ lẹ ihiẹn ile rị ndụn ụnụ lẹ wẹ rị, kẹ nnụnụ kẹ anụ-ụlọ kẹ anụ-ọfịa ile; anụ ile gha imẹ ụgbọ hụ pụha lẹ anụ ile jẹnkọ d'a rị imẹ ụwa —

¹¹ ẹghẹẹ, m rị nwan e kwe ụnụ nkwa nị onwọnkọzị ogẹn okẹn-mirin e gi gbuchanrịn ihiẹn ile rị ndụn, onwọnzikwọnị ogẹn okẹn-mirin e gi tikpọ ụwanị.”

¹² Osolobuẹ nọ sị, “Ọnwan wụ ahịma nkwa m rị e kwe ụnụ lẹ ihiẹn ile rị ndụn hụn ụnụ lẹ ịya rị — nkwa hụn k'a rịsọnmẹni agbọ ile lalanị:

¹³ e bugụọ m ekọn-lẹ-ogugu m che imẹ orukpu. Ịya k'a wụrụ ahịma nkwa m kwe hụn rị ẹgbata mmẹ lẹ elu-ụwa.

¹⁴ Ya wụ, ogẹn ọwụlẹ m gi mẹ mirin rumẹ elu-ụwa, nị ekọn-lẹ-ogugu a pụha,

¹⁵ a nyanhan m nkwa m kwe yụ lẹ ihiẹn ile rị ndụn. Onwọnkọzị ogẹn mirin e gi họnrin okẹn-mirin, tikpọ ihiẹn ile rị ndụn.

¹⁶ Ekọn-lẹ-ogugu pụha imẹ orukpu, m k'e legha a, gi ẹ nyanhan nkwa itẹbitẹ Chuku kwe ihiẹn ile rị ndụn rị elu-ụwa.”

¹⁷ Chuku nọ sị Nụa, “Ịya wụ ahịma nkwa m kwe ihiẹn ile rị ndụn rị elu-ụwa.”

Nụa Lẹ Ebọn Ẹ

¹⁸ Ụmụ Nụa hụn gha imẹ ụgbọ ahụn pụ-ichẹn pụha wụ Shẹm lẹ Ham lẹ Jafẹtị. Ham wụ nẹdi ndị Kenaanị.

¹⁹ Wẹ ẹtọ wụ ụmụ Nụa; ndị ile rị ichẹn-ichẹn rị elu-ụwa gha ẹhụ wẹ pụha.

²⁰ Nụa wụ onyẹ ugbo. Ọ nọ rụn alị vaịnị. Ịya bu ụzọ rụnma alị vaịnị.

²¹ Omẹgụ, Nụa nọ ra manya vaịnị ahụn, ra a, ọ tụma a. Ọ nọ gbarị ọtọ dinẹ alị imẹ ụlọ iwe ẹ.

²² Ya kẹ Ham hụn wụ nẹdi ndị Kenaanị nọ hụn ọtọ nẹdi ẹ. Ọ nọ jẹnmẹ d'a gwa umunẹ ẹ ẹbụọ ebe wẹ rị ihun-ezi.

²³ Ya kẹ Shẹm lẹ Jafẹtị nọ kịrị ẹkwa, wẹ ẹbụọ nọ kọn ẹ ye isi-uvun wẹ, gi azụụn-azụụn jẹn d'e kpumẹ nẹdi wẹ ọtọ; wẹ bupụ ihun wẹ, ahụnnị wẹ ọtọ nẹdi wẹ.

²⁴ Ogẹn manya gi nwan fọngụ Nụa ẹnya, ogẹn o gi marịn ihiẹn nwa mbi ẹ mẹ ẹ,

²⁵ ọ nọ sị, “M rị a bụ Kenaanị ọnụ: igbọn kachanrịn igbọn a wụ k'o k'a wụ ẹka umunẹ ẹ.”

²⁶ Nụa nọzị sị, “Ịja-mma ya rịnị Osolobuẹ, Chuku Shẹm! Kenaanị ya wụrụ igbọn Shẹm.

²⁷ Chuku ya mẹ Jafẹtị gha ihun; Jafẹtị ya sọn Shẹm ri ihiẹn ẹ. Kenaanị ya wụrụ igbọn Jafẹtị.”

²⁸ Mgbe okẹn-mirin ahụn gi bigụ, Nụa nọzị tọ ahụa iri kwasị ọgụn-mmẹsa.

²⁹ Ya wụ, ahụa iri kwasị ọgụn-ẹsa kwasị nnụnaị (950) kẹ Nụa tọ.