Jẹnẹsisi 8 - Ika

Isi Nke Ẹsatọ Okẹn Mirin Hụ A Kụsị, Tama

¹ Kanị Osolobuẹ hụ a nyanhan Nụa lẹ anụ-ọfịa lẹ anụ-ụlọ ile ya lẹ wẹ gba rị imẹ ụgbọ ahụn. Ya kẹ Osolobuẹ nọ zi ufere ye elu-ụwa, gi ẹ mẹ okẹn mirin ahụn tama —

² mẹ isi-mirin ile rị imẹ alị lẹ oghe ile mirin rị igwere gha e zuetu kpukin; mirin gha elu-igwere e zuetu e zuebehi.

³ Mirin ahụn jun elu-ụwa nọ tama. Ogẹn o gi zu akpọhịn iri kwasị ọgụn-ẹsa ahụn, mirin ahụn jun elu ụwa a tamagụọ ọda-ọda —

⁴ nke akpọhịn mmẹsa imẹ ifọn nke ẹsa, ụgbọ ahụn pụ ichẹn nọ deri elu ugu Araratị.

⁵ Mirin ahụn hụkwọ a tahị d'e ru ifọn nke iri. Ụhụọhịn ibuzọ imẹ ifọn nke iri ahụn, wẹ nọ leghama mkpọnụnụ ugu ichẹn-ichẹn.

Nụa A Kwademẹ Nị Wẹ Pụha

⁶ Ogẹn o gi zu akpọhịn ọgụnnaị, Nụa nọ kpọpụ windo ahụn ọ rụnye ụgbọ ahụn,

⁷ zipụ uroko, nnụnụ e ri ihiẹn ile. Nnụnụ hụ nọ fehunmẹmẹ d'e ru mgbe mirin rị elu-ụwa gi tachanrịn; o kinhẹnni.

⁸ Nụa e zipụ nduru n'ọ hụn ụzọ marịn omẹni mirin a tahịgụọ.

⁹ Kanị, echẹn ke mirin rịkwọ alị, nduru ahụnnị ebe o k'e beri, ọ nọ felụa d'e kunrun Nụa, Nụa nọ tịnpụ ẹka, nwụnbanhan a imẹ ụgbọ.

¹⁰ Ya Nụa nọ cherizi akpọhịn ẹsa, ọ nọ zipụzị nduru ahụn.

¹¹ Ogẹn ẹnyasị kẹ nduru ahụn gi lụakinhẹn d'e kunrun Nụa. Ogẹn o gi lụaha, ẹkụkwọ olivu o gihẹ nke ọhụn rị a ọnụ. Nụa nọ marịn nị mirin rị alị a tahịgụọ.

¹² O cherizi akpọhịn ẹsa ọzọzị, ọ nọ zipụzị nduru ahụn, kanị nduru ahụn ekinhẹnzini d'e kunrun ẹ.

Nụa Wẹ A Pụha Imẹ Ụgbọ

¹³ Ogẹn Nụa gi rị nwa ahụa ohu kwasị ọgụn-iri kwasị nnụ, ụhụọhịn ibuzọ imẹ ifọn nke ibuzọ, mirin ahụn a tamigụọ. Nụa nọ kpupụ okpukpu ụgbọ ahụn, lehunmẹ ẹnya, ọ nọ hụn a nị alị hụ a kọrọ.

¹⁴ Ogẹn o gi ru akpọhịn ẹsa kwasị ọgụn imẹ ifọn nke ẹbụọ, akpakalị ile a kọrọchanrịngụọ.

¹⁵ Ya kẹ Chuku nọ sị Nụa,

¹⁶ “Gha nị imẹ ụgbọ pụha, yụ lẹ nwunyẹ i lẹ ụmụ ị lẹ inyẹnmẹ ụmụ ị, hụn yụ lẹ wẹ rị.

¹⁷ Wepụhachanrịnzịkwọ ihiẹn ile rị ndụn yụ lẹ wẹ rị imẹ ụgbọ, kẹ nnụnụ kẹ anụ ndị ọzọ kẹ ihiẹn ile a rịhunmẹ alị, kẹni wẹ ma jun elu-ụwa, mụ ụmụ, ba ụba imẹ ụwa.”

¹⁸ Nụa nọ gha imẹ ụgbọ pụha, ya lẹ ụmụ a lẹ nwunyẹ ẹ lẹ inyẹnmẹ ụmụ a.

¹⁹ Anụmanụ ile lẹ ihiẹn ile a rịhunmẹ akpakalị lẹ nnụnụ ile — ya wụ, ihiẹn ile rị ndụn elu ụwa nọzị pụhachanrịn imẹ ụgbọ ahụn, onyẹ-lẹ-ụdị-a onyẹ-lẹ-ụdị-a.

Ẹjan Nụa Chụn

²⁰ Nụa nọ rụnnị Osolobuẹ ukpo wẹ n'a chụn ẹjan, werisọnmẹ anụ lẹ nnụnụ imẹ igunrun ndị ahụn Chuku sị wẹ asọlẹ, gi wẹ chụnnị Osolobuẹ ẹjan elu ukpo ahụn.

²¹ Osolobuẹ a nụ ishin ẹjan ahụn, ọ nọ sụọ a; ọ nọ sị enwẹn ẹ, “Onwọnzini ogẹn m'e gi bụzị akpakalị ọnụ makẹ ufiri ịhịan, ọsụọn'a nị eje-ihiẹn eje-ihiẹn kẹ ịhịan e ro ghakwọrị ebe ọ rị nwata lala; onwọnzikwọnị ogẹn m'e gi tikpọ ihiẹn ile rị ndụn kẹ m dọn mẹ.

²² Ụwanị e we gụ, ogẹn ọkụnkụn lẹ ogẹn ọghịghọ k'a rịsọnmẹ; ogẹn oyi lẹ ogẹn uwowo k'a rịsọnmẹ; ogẹn ọkọkị lẹ ogẹn udu-mirin k'a rịsọnmẹ; uhinhin lẹ efinnaị k'a rịsọnmẹ.”