Jẹnẹsisi 7 - Ika

Isi Nke Ẹsa Okẹn Mirin Ahụn Tikpọ Ụwa

¹ Ya kẹ Osolobuẹ nọ sị Nụa, “Banye imẹ ụgbọ, yụ lẹ ikpụlọ ị, makẹni a hụnọlẹ m nị yụ sụọ e bi obibi rị mma ẹnya m imẹ agbọnị ile.

² Werisọnmẹ mmẹnọ-mmẹnọ imẹ anụ ndị ahụn ile m sị ụnụ e ri: okẹn ẹ ẹsa, onyẹnnyẹ ẹ ẹsa; y'e werisọnmẹzi ẹbụọ-ẹbụọ imẹ anụ ndị ahụn m sị ụnụ a sọ: okẹn ẹ ohu, onyẹnnyẹ ẹ ohu;

³ y'e werizi nnụnụ rịsọnmẹ ichẹn-ichẹn mmẹnọ-mmẹnọ: okẹn ẹ ẹsa, onyẹnnyẹ ẹ ẹsa. Mẹ ẹ, kẹni anụ ndịnị lẹ nnụnụ ichẹn-ichẹn ndịnị hụn ụzọ rị ndụn, mụ ụdị wẹ jun elu ụwa.

⁴ Makẹni, akpọhịn ẹsa tannị, m k'e zihẹ mirin k'e zue ọrọgbọ akpọhịn ọgụnnaị, uhinhin lẹ efinaị; m k'e gi ẹ gbupụ ihiẹn ile rị ndụn m ke hụn rị imẹ ụwa.”

⁵ Ya Nụa nọ mẹchanrịn ihiẹn ile Osolobuẹ sị a mẹ.

⁶ Nụa rị ahụa ọgụn-iri kwasị nnụ ogẹn okẹn mirin ahụn gi bịa elu-ụwa.

⁷ Nụa lẹ ụmụ a lẹ nwunyẹ ẹ lẹ inyẹnmẹ ụmụ a nọ banye imẹ ụgbọ ahụn pụ-ichẹn kẹni wẹ wanahịn okẹn mirin ahụn.

⁸ Ụdị anụ ile nọ banyezikwọ: kẹ ndị wẹ e ri kẹ ndị w'a sọ; kẹ nnụnụ kẹ ihiẹn ile a rịhunmẹ alị,

⁹ ẹbụọ-ẹbụọ, okẹn lẹ onyẹnnyẹ okẹn lẹ onyẹnnyẹ nọ sọn Nụa banye imẹ ụgbọ ahụn pụ-ichẹn kẹ Osolobuẹ dọn ku.

¹⁰ Ogẹn o gi zu akpọhịn ẹsa, okẹn mirin ahụn nọ bidọn elu-ụwa.

¹¹ Ahụa ahụn Nụa zu nwa ahụa ọgụn-iri kwasị nnụ, nke akpọhịn mmẹsa daị imẹ ifọn nke ẹbụọ kẹ mirin ile rị imẹ alị gi wapu, elu-igwere e kpupụ.

¹² Ya mirin nọ zue elu-ụwa ọrọgbọ akpọhịn ọgụnnaị, kẹ uhinhin kẹ efinaị.

¹³ Ụhụọhịn hụzịkwọ kẹ Nụa lẹ ụmụ a ẹtọ wụ Shẹm lẹ Ham lẹ Jafẹtị lẹzi nwunyẹ Nụa lẹ inyẹnmẹ ụmụ a banye ụgbọ ahụn pụ-ichẹn —

¹⁴ uwẹ lẹ ụdị anụ-ọfịa ile rị ichẹn-ichẹn lẹ ụdị anụ-ụlọ ile lẹ ụdị ihiẹn ile a rịhunmẹ alị lẹ ụdị nnụnụ ile rị ichẹn-ichẹn.

¹⁵ Ẹrịra kẹ ihiẹn ile e kwọnni dọn sọn Nụa banye imẹ ụgbọ ahụn pụ-ichẹn, wẹ ile ẹbụọ-ẹbụọ.

¹⁶ Okẹn lẹ onyẹnnyẹ ihiẹn ndị ahụn ile rị ndụn banyechanrịn nọkẹ kẹ Osolobuẹ dọn gwa Nụa, Osolobuẹ nọ gi ẹka a kpọkin Nụa ye imẹ ụgbọ.

Ihiẹn Ile Rị Ndụn A La Wezụka Nụa Wẹ

¹⁷ Mirin ahụn hụ e jẹn elu ojijẹn-ojijẹn elu-ụwa ọrọgbọ akpọhịn ọgụnnaị; mirin hụ e jun, e jẹnwaye elu, e buli ụgbọ ahụn elu; ụgbọ hụ pụ-ichẹn nọ shiẹnrin elu mirin.

¹⁸ Mirin ahụn nọ karị ẹka elu-ụwa, e jẹn elu ojijẹn-ojijẹn, ụgbọ ahụn hụ e shiẹnrin elu mirin.

¹⁹ Mirin ahụn karị ẹka ọda-ọda, jẹn elu ọda-ọda elu ụwa, kpumẹchanrịn ugu ile kachanrịn elu ejẹn okpuru elu-igwere.

²⁰ Mirin ahụn a karị ugu ndị ahụn, gi ụbụkụ ẹbụọ kwasị ọgụn jẹnnahịn wẹ elu.

²¹ Ya ihiẹn ile rị ndụn elu-ụwa nọ nwụnhụn, kẹ nnụnụ kẹ anụ-ụlọ kẹ anụ-ọfịa kẹ ihiẹn ile e dọn ọtụtụ kẹ ịhịan ile;

²² ẹghẹẹ, ihiẹn ile e kwọnni nọ nwụnhụnchanrịn.

²³ O gbuchanrịn ihiẹn rị ndụn rị ụwa: kẹ ịhịan kẹ anụ kẹ ihiẹn ndị a rịhunmẹ alị kẹ nnụnụ ndị e fe elu; o gbupụchanrịn wẹ ile imẹ ụwa. Nụa sụọ họdụ, ịya lẹ ndị ya lẹ wẹ rị imẹ ụgbọ ahụn.

²⁴ Mirin ahụn kụrụ elu-ụwa ọrọgbọ akpọhịn iri kwasị ọgụn-ẹsa.