Jẹnẹsisi 6 - Ika

Isi Nke Isin Eje-obibi Ịhịan A Waye

¹ Ogẹn ịhịan gi bama ụba elu-ụwa, a mụzịkwọ ikpoho,

² Eje-mmọn nọ hụn nị ikpoho ndịnị wẹ a maka mma, ya kẹ eje-mmọn ndị ahụn nọ lụrụ hụn ọwụlẹ wẹ chọ.

³ Ya kẹ Osolobuẹ nọ sị, “Mmọn m anọferikọzị imẹ ịhịan, makẹni ịhịan mmaka k'ọ wụ — ufiri ẹ, ahụa ọgụn isin sụọ kẹ ịhịan sikọ d'a tọru elu ụwanị.”

⁴ Kete mgbe ahụn kẹ ndị adụn-aran, ndị Nẹfilim, rịma imẹ ụwa — makẹni, eje-mmọn ndị ahụn mẹgụ mgba ikpoho ndị ahụn ịhịan mụ, a mụnị wẹ wẹ ụmụ, uwẹ wụ ndị ahụn kpa ikẹn mbụ-mbụ hụn wẹ gi a kọ akịkọ.

Osolobuẹ A Kwan Mmanị O Gi Ke Ịhịan

⁵ Osolobuẹ a hụn a nị eje-ihiẹn hụn rị imẹ ịhịan rị a waye elu-ụwa lẹni eje-ihiẹn kẹ w'e ro ogẹn ile,

⁶ ya kẹ Osolobuẹ nọ kwan mmanị o gi ke ịhịan imẹ ụwa; ọ fụru ẹ akpobi!

⁷ Ya kẹ Osolobuẹ nọ sị, “M k'e kpọnchanpụ ịhịan elu-ụwa, ịhịan hụn m gi ẹka m ke; m k'e kpọnchanpụ ịhịan lẹ anụmanụ lẹ ihiẹn ndị hụn a rịhunmẹni lẹ ndị e fe elu. K'ọ rị m, ekeni m wẹ.”

⁸ Kanị Osolobuẹ nọ gi ẹnya rị mma lee Nụa.

Nụa Lẹ Ihiẹn Osolobuẹ Sị A Mẹ

⁹ Ọnwan wụ akịkọ Nụa: Nụa wụ onyẹ ezi-omumẹ, ịya nwọnlẹni nkọrịanị ogẹn nke wẹ. Nụa e sọn Osolobuẹ.

¹⁰ Nụa mụ ikẹnnyẹ ẹtọ wụ: Shẹm, Ham lẹ Jafẹtị.

¹¹ Ogẹn ahụn, ụwa a rụọlẹ ẹnya Osolobuẹ, ẹka-ikẹn ẹka-ikẹn jun imẹ ụwa.

¹² Osolobuẹ a hụngụọ a nị ụwa rụ arụ, makẹni ịhịan ile a mẹrụchanrịngụọ enwẹn wẹ imẹ ụwa.

¹³ Ya Osolobuẹ nọ sị Nụa, “A kwademẹgụọ m nị m jẹnkọ d'e kpọnchanpụ ịhịan ile, makẹni, ẹka-ikẹn e jungụọ ụwa makẹ ufiri wẹ. M jẹnkọ nwan d'e tikpọ wẹ lẹ ụwa.

Kẹ Nụa K'a Dọn Rụn Ụgbọ Pụ-ichẹn

¹⁴ “Rụnrụn nwan ụgbọ mirin pụ-ichẹn. Gi osisi saịprẹsị wụ akashịa rụn a. Rụnyesọnmẹ mmughẹ imẹ ẹ, y'e gi korota nyan a imẹ lẹ azụụn — kẹ imẹ ẹ kẹ azụụn a, makẹ mirin gha a banye ẹ.

¹⁵ Lee nwan kẹ y'e dọn rụn a: usue ẹ k'a wụ ụbụkụ iri kwasị ọgụnnaị kwasị nnụ; ụshịa a k'a wụ ụbụkụ mmisẹn kwasị ọgụn-ẹtọ, ojijẹn-elu ẹ k'a wụ ụbụkụ isẹn kwasị ọgụnnaị.

¹⁶ Rụn okpukpu ye elu ụgbọ hụ pụ-ichẹn, y'a latọ oghe ẹgbata ibe osisi wẹ gi mẹmẹ ẹhụ a lẹ okpukpu ẹ — oghe ahụn k'a wụ ụbụkụ ohu lẹ nkirishi; rụn ọnụmụzọ ye ẹhụ a; rụn ụgbọ ahụn pụ-ichẹn n'o nwọn agba ẹtọ nọkẹ ụlọ-elu.

¹⁷ “Lee ẹ, m shikọ d'e zihẹ okẹn mirin imẹ ụwa, gi ẹ tikpọ ihiẹn ile e kwọnni rị okpuru igwere; ihiẹn ile rị imẹ ụwa sikọ d'a nwụnhụn.

¹⁸ Kanị m k'e mẹmẹ nkwerigbama m ẹgbata mmẹ lẹ yụ; ị k'a banye ụgbọ ahụn pụ-ichẹn, yụ lẹ ụmụ ị lẹ nwunyẹ i lẹ inyẹnmẹ ụmụ ị.

¹⁹ “Werisọnmẹ ihiẹn ile rị ndụn elu-ụwa ẹbụọ-ẹbụọ, okẹn lẹ onyẹnnyẹ; onyẹ-lẹ-ụdị-a onyẹ-lẹ-ụdị-a. Webanhan wẹ imẹ ụgbọ ahụn pụ-ichẹn, kẹni wẹ sọn i rị ndụn:

²⁰ kẹ ụdị nnụnụ ichẹn-ichẹn kẹ ụdị anụ ichẹn-ichẹn kẹ ụdị ihiẹn ichẹn-ichẹn a rịhunmẹ alị — onyẹ-lẹ-ụdị-a, onyẹ-lẹ-ụdị-a; ẹbụọ-ẹbụọ imẹ wẹ ile jẹnkọ d'e buruhẹ i, kẹni i dọnmẹ wẹ ndụn.

²¹ Werizikwọ ihiẹn-oriri ile rị ichẹn-ichẹn butọ, hụn yụ lẹ wẹ k'e ri.”

²² Ya Nụa nọ mẹ ẹrịra; o mẹchanrịn ihiẹn ile Osolobuẹ sị a mẹ.