Jẹnẹsisi 50 - Ika

Isi Nke Iri Kwasị Ọgụnnaị Josẹfụ E Li Jekọpụ Ye Alị Kenanị O Ku

¹ Ya Josẹfụ nọ fiedọn nẹdi ẹ, kwan ẹkwan, susu ẹ ọnụ.

² Ya Josẹfụ nọ sị ndị ogb'ebulu ebo rị okpuru ẹ hụn e sekọ ozun sekọ nẹdi ẹ kẹ ndị Ijiptu dọn e mẹ, makẹ ọ gha e rehi. Ya ndị ogb'ebulu ebo hụ nọ sekọ ozun Izrẹlụ.

³ Ọrọgbọ akpọhịn ọgụnnaị kẹ wẹ gi sẹkọchanrịn a, makẹni ya kẹ wẹ gi e sekọgụ ozun ịhịan. Ya ndị Ijiptu ile nọ gi akp'ọhịn iri kwasị ọgụn-ẹtọ kwan Jekọpụ.

⁴ Ogẹn ịkwan ozun a ghafegụ, Josẹfụ nọ jẹn d'e kunrun ịhaịmẹ Fẹro, sị wẹ, “Dodo ni, yenini m ẹka rịọ Fẹro; sị a,

⁵ ‘Nẹdi m mẹ m bu ẹka che ẹ ọgbọdọgbọ kwe ẹ nkwa. Ọ sị m, “M'e d'a nwụn. Li m ye imẹ ili hụn m kwademẹtọ alị Kenaanị.” Dodo, nị m jẹn nwan d'e li nẹdi m, m ligụ a, e kinhẹn m.’ ”

⁶ Ya Fẹro nọ sị a, “Jẹn d'e li nẹdi i k'i dọn kunn'ẹ ya.”

⁷ Josẹfụ nọ jẹn d'e li nẹdi ẹ. Ndị-isi ile a rụnnị Fẹro ọrụn nọ sọnrin Josẹfụ: kẹ ịhịamẹ rị ọgwa a kẹ ndị isi ile rị alị Ijiptu,

⁸ uwẹ lẹ ndị ile rị ikpụlọ Josẹfụ lẹ mmunẹ Josẹfụ lẹ ikpụlọ nẹdi ẹ ile. Ụmụ wẹ lẹ atụnrụn lẹ ewu lẹ efin wẹ sụọ kẹ wẹ latọ imẹ Goshẹni.

⁹ Ndị-agha e nyin ụgbọ-ẹshin lẹ ndị e nyin ẹshin-mmaka sọnjẹnzikwọ Josẹfụ; e bukẹmẹkẹ wẹ ọda jẹnni.

¹⁰ E ru wẹ ebe wẹ nọ a kụkpọ ọka imẹ Atadị, nkọ ọwụwa-ẹnyanwụn Iyi Jọdanị, wẹ nọ gi akpakalị obi wẹ ile kwan okẹn ẹkwan. Ọrọgbọ akp'ọhịn ẹsa kẹ Josẹfụ gi nọnị nẹdi ẹ izu ebẹhụ.

¹¹ Ogẹn ndị Kenaanị bi alị ahụn gi hụn kẹ wẹ dọn kwan Jekọpụ ebẹhụ wẹ nọ a kụkpọ ọka imẹ Atadị, wẹ nọ sị, “Ndị Ijiptu a kwanka onyẹni-o!” Ya haịn wẹ gi kpọma ebahụn Ebẹlụ-Mizraim hụn wụ “Ẹkwan Ndị Ijiptu Kwan”.

¹² Ụmụ Jekọpụ mẹni nẹdi wẹ k'o dọn gwa wẹ,

¹³ buru ozun ẹ shi alị Kenaanị, li ẹ ye imẹ okporo ahụn rị Mak'pẹla, hụn nọkunmẹ Mamre, ili hụ Ebraham ṅọnnarịn Ẹfrọnụ onyẹ Hẹti ya lẹ ogige ọ rị imẹ ẹ, gi ẹ họnrin ebe w'e liye ozun.

¹⁴ Ogẹn Josẹfụ gi ligụ nẹdi ẹ, ya lẹ mmunẹ ẹ lẹ ndị ile sọnjẹn ẹ d'e li nẹdi ẹ nọ lakin alị Ijiptu.

Josẹfụ E Kushi Ẹ Ikẹn N'ọ Gbagharịgụọ Umunẹ Ẹ

¹⁵ Ogẹn umunẹ Josẹfụ gi hụn a nị nẹdi wẹ a nwụngụọ, wẹ nọ sị, “O mẹ tan nị echẹn kẹ ize ẹnyi rịkwọ Josẹfụ ẹfọ, o gi ẹ mẹgwarị ẹnyi eje-ihiẹn ile ẹnyi mẹ ẹ.”

¹⁶ Ya wẹ nọ gi ẹfan nẹdi wẹ zi ozi jẹnni Josẹfụ, sị a, “O nwọn ihiẹn nẹdi i ku n'o d'a nwụn:

¹⁷ ọ sị, ‘Gwa nị Josẹfụ nị m sị a: dodo, gbagharị mmunẹ i njọ lẹ mmẹfie wẹ, eje-ihiẹn ahụn ile wẹ mẹ i.’ Dodo, gbagharị nwan ẹnyi njọ ile ẹnyi mẹ, ẹnyi idibo Chuku ahụn nẹdi i fe.” Ogẹn ozi wẹ gi ru Josẹfụ ẹka, Josẹfụ nọ kwanma.

¹⁸ Ya mmunẹ ẹ ile nọ bịa d'e sekpun'ẹ alị, sị a, “Ẹnyi wụ igbọn i.”

¹⁹ Ya Josẹfụ nọ sị wẹ, “Atụlẹ ni egun. M wụdẹ nwan Chuku ra?

²⁰ Eje-ihiẹn kẹ ụnụ te mamanị m, kanị ihiẹn rị mma kẹ Osolobuẹ bu obi imẹ ẹ kẹni o gi ẹ rụnpụha ihiẹnni rị e mẹ kikẹnni: hụn wụ ịgbapụha ndụn ndị bu ọda.

²¹ Atụlẹ ni nwan egun; m k'e lepụ ụnụ lẹ ụmụ ụnụ ẹnya ọhụnma.” Ẹrịra k'o dọn ku ndụn ye wẹ obi, mẹ obi ru wẹ alị.

Josẹfụ A Gwa Wẹ Likwọ A Ye Alị Kenaanị

²² Ya Josẹfụ lẹ ụmụ nẹdi ẹ ile nọ biri alị Ijiptu. Ahụa iri kwasị ọgụn-isẹn kẹ Josẹfụ tọ:

²³ ọ hụnghọ ụmụ Ifrem lẹ ụmụ-ụmụ wẹ; ọ rịzịkwọ ndụn hụn ụmụ Makiri nwa Manasẹ, ọ nọ gi wẹ họnrin ụmụ a.

²⁴ Ya Josẹfụ nọ sị umunẹ ẹ “M'e d'a nwụn; kanị Chuku jẹnkọ d'a bịarịrị d'e yeni ụnụ ẹka, gha alịnị wepụ ụnụ, bu ụnụ che alị hụ o kun enwẹn ẹ kwe ndị nẹdi ụnụ wụ Ebraham, Aziki lẹ Jekọpụ nkwa a.”

²⁵ Ya Josẹfụ nọ mẹ ụmụ Izrẹlụ kun'ẹ Osolobuẹ, kwe ẹ nkwa. Ọ sị wẹ, “Osolobuẹ k'a bịarịrị d'e yeni ụnụ ẹka. O ru ogẹn ahụn, ụnụ k'e kpọnrinrịrị ọkpụkpụ m gha alịnị pụ.”

²⁶ Ya kẹ Josẹfụ nọ nwụnhụn; ọ rị nwa ahụa iri kwasị ọgụn-isẹn k'ọ nwụnhụn. E sekọgụ wẹ ozun ẹ makẹ ọ gha e rehi, wẹ nọ bu ẹ che ẹkpẹti-ozun imẹ alị Ijiptu.