Jẹnẹsisi 5 - Ika

Isi Nke Isẹn Ụmụ Adam Gha Adam D'e Ru Nụa

¹ Ebeni kẹ wẹ deyesọnmẹ ẹfan ụmụ Adam. Ogẹn Osolobuẹ gi ke ịhịan, o ke ẹ, o yi Osolobuẹ.

² Okẹn lẹ onyẹnnyẹ k'o ke wẹ. Ọ nọ gọzi wẹ, kpọ wẹ “Ịhịan”.

³ Ogẹn Adam gi rị ahụa iri kwasị ọgụn-isin, ọ nọ mụ okẹnnyẹ hụn yin'ẹ, ọ gụn a “Sẹtị”.

⁴ Ọ mụgụ Sẹtị, ọ nọ bizi ahụa nnụnaị. Ọ mụzịghọ ụmụ ndị ọzọ chen'ẹ — kẹ ikẹnnyẹ kẹ ikpoho.

⁵ Ya wụ, ahụa iri kwasị ọgụn-isin kwasị nnụnaị (930) kẹ Adam tọ, ọ nọ nwụnhụn.

⁶ Ogẹn Sẹtị gi rị ahụa isẹn kwasị ọgụn-isẹn, ọ nọ mụ Ẹnọshị.

⁷ Sẹtị a mụgụ Ẹnọshị, ọ nọ bizi ahụa ẹsa kwasị nnụnaị (807). Ọ mụzịghọ ụmụ ndị ọzọ chen'ẹ — kẹ ikẹnnyẹ kẹ ikpoho.

⁸ Ya wụ, ahụa mmẹbụọ kwasị ọgụn-isẹn kwasị nnụnaị (912) kẹ Sẹtị tọ, ọ nọ nwụnhụn.

⁹ Ogẹn Ẹnọshị gi rị ahụa iri kwasị ọgụn-ẹnọ, ọ nọ mụ Kenanị.

¹⁰ Ẹnọshị a mụgụ Kenanị, ọ nọ bizi ahụa mmisẹn kwasị nnụnaị. Ọ mụzịghọ ụmụ ndị ọzọ chen'ẹ — kẹ ikẹnnyẹ kẹ ikpoho.

¹¹ Ya wụ, ahụa isẹn kwasị ọgụn-isẹn kwasị nnụnaị kẹ Ẹnọshị tọ, ọ nọ nwụnhụn.

¹² Ogẹn Kenanị gi rị ahụa iri kwasị ọgụn-ẹtọ, ọ nọ mụ Mahalalẹlụ.

¹³ Kenanị a mụgụ Mahalalẹlụ, ọ nọ bizi ahụa ọgụnnaị kwasị nnụnaị. Ọ mụzịghọ ụmụ ndị ọzọ chen'ẹ — kẹ ikẹnnyẹ kẹ ikpoho.

¹⁴ Ya wụ ahụa iri kwasị ọgụn-isẹn kwasị nnụnaị kẹ Kenanị tọ, ọ nọ nwụnhụn.

¹⁵ Ogẹn Mahalalẹlụ gi rị ahụa isẹn kwasị ọgụn-ẹtọ, ọ nọ mụ Jarẹdi.

¹⁶ Mahalalẹlụ a mụgụ Jarẹdi, ọ nọ bizi ahụa iri kwasị ọgụn kwasị nnụnaị. Ọ mụzịghọ ụmụ ndị ọzọ chen'ẹ — kẹ ikẹnnyẹ kẹ ikpoho.

¹⁷ Ya wụ, ahụa mmisẹn kwasị ọgụn-ẹnọ kwasị nnụnaị kẹ Mahalalẹlụ tọ, ọ nọ nwụnhụn.

¹⁸ Ogẹn Jarẹdi gi rị ahụa ẹbụọ kwasị ọgụn-ẹsatọ, ọ nọ mụ Ẹnọkụ.

¹⁹ Jarẹdi a mụgụ Ẹnọkụ, ọ nọ bizi ahụa nnụnaị. Ọ mụzịghọ ụmụ ndị ọzọ chen'ẹ — kẹ ikẹnnyẹ kẹ ikpoho.

²⁰ Ya wụ, ahụa ẹbụọ kwasị ọgụn-ẹsatọ kwasị nnụnaị kẹ Jarẹdi tọ, ọ nọ nwụnhụn.

²¹ Ogẹn Ẹnọkụ gi rị ahụa isẹn kwasị ọgụn-ẹtọ, ọ nọ mụ Mẹtusẹla.

²² Ogẹn Ẹnọkụ gi mụgụ Mẹtusẹla, Ẹnọkụ nọ sọnmẹ Osolobuẹ, sọn ẹ ọrọgbọ ahụa ọgụn-mmisẹn. Ọ mụzịghọ ụmụ ndị ọzọ ogẹn ahụn — kẹ ikẹnnyẹ kẹ ikpoho.

²³ Ya wụ, ahụa isẹn kwasị ọgụn-mmẹsatọ kẹ Ẹnọkụ tọ.

²⁴ Ẹnọkụ e sọnbe Osolobuẹ, ahụnzịnị w'a — makẹni Osolobuẹ weri ẹ.

²⁵ Ogẹn Mẹtusẹla gi rị ahụa ẹsa kwasị ọgụn-itenẹi, ọ nọ mụ Lamẹki.

²⁶ Mẹtusẹla a mụgụ Lamẹki, ọ nọ bizi ahụa ẹbụọ kwasị ọgụn-mmitenẹi kwasị nnụ. Ọ mụzịghọ ụmụ ndị ọzọ chen'ẹ — kẹ ikẹnnyẹ kẹ ikpoho.

²⁷ Ya wụ, ahụa itenẹi kwasị ọgụn-ẹsatọ kwasị nnụnaị (969) kẹ Mẹtusẹla tọ, ọ nọ nwụnhụn.

²⁸ Ogẹn Lamẹki gi rị ahụa ẹbụọ kwasị ọgụn-itenẹi, ọ nọ mụ okẹnnyẹ.

²⁹ Ọ nọ gụn a Nụa, sị, “Ẹka nwatanị kẹ ẹnyi k'a gha zu ikẹn okẹn afụnfụnnị ẹnyi rị a ta a rụn ugbo akpakalị Osolobuẹ bụ ọnụ”

³⁰ Lamẹki a mụgụ Nụa, ọ nọ bizi ahụa mmisẹn kwasị ọgụn-itenẹi kwasị nnụ. Ọ mụzịghọ ụmụ ndị ọzọ chen'ẹ — kẹ ikẹnnyẹ kẹ ikpoho.

³¹ Ya wụ, ahụa mmẹsa kwasị ọgụn-mmẹsatọ kwasị nnụ kẹ Lamẹki tọ, ọ nọ nwụnhụn.

³² Ogẹn Nụa gi rị ahụa ọgụn-isẹn kwasị nnụ, ọ nọ mụma nwa, ndịnị wụ ụmụ a: Shẹm lẹ Ham lẹ Jafẹtị.