Jẹnẹsisi 49 - Ika

Isi Nke Itenẹi Kwasị Ọgụnnaị Oku Ikpanzụụn Jekọpụ Gwa Ụmụ A

¹ Omẹgụ, Jekọpụ nọ kpọkikomẹ ụmụ a ile, sị wẹ, “Nọhunmẹni m, nị m gwa ụnụ ihiẹn jẹnkọ d'e mẹ imẹ igunrun ụnụ ihun.

² Bịa nị d'e gọn ntịn, ụmụ Jekọpụ; gọn ni ntịn ihiẹn Izrẹlụ nẹdi ụnụ k'a gwa ụnụ.

Rubẹni Awụkọzị Nwa-ibuzọ

³ “Rubẹni, ịyụ wụ nwa-ibuzọ m; yụ wụ ikẹn m. Ịyụ wụ ihiẹn ibuzọ wẹ gi marịn nị m wụ okẹnnyẹ; yụ ka ọghọ e nwọn, yụ ka ndụn e nwọn.

⁴ Kanị y'a kpọ kẹ ẹbi-mirin, y'a wụkọzị ibuzọ, makẹni ị sọn mgba nẹdi i ranhịn, gi ẹ mẹrụ elu-ukpo nẹdi i. Ẹghẹẹ, o sọn mgba m ranhịn!

Livaị Lẹ Simiọnụ Enwọnkọ Alị Nke Wẹ

⁵ “Simiọnụ lẹ Livaị wụ ohu. Egbu-lẹ-egbu rị wẹ isi.

⁶ Umẹ-ndụn m y'e esọnkwọlẹ wẹ tụ iroro wẹ; y'e sọnkwọlẹ wẹ zu izu wẹ. Makẹni, e gigụọ wẹ olulu gbu ịhịan; e bepụsọnmẹgụọ wẹ okẹn-efin akwanran azụụn-ụkụ k'ọ sụọ wẹ.

⁷ Olulu wẹ ya wụrụ ihiẹn wẹ bụ ọnụ, makẹni o zekẹ; ọnụma wẹ ya wụrụ ihiẹn wẹ bụ ọnụ, makẹni ọ jọka njọ! M k'e feyịya wẹ ye ebọn Jekọpụ ile, keyịyachanrịn wẹ ye alị Izrẹlụ ile.

Juda K'a Kị

⁸ “Juda, mmunẹ i k'a ja ị mma; ẹka ị k'a pịdọn ndị iṅẹnrẹn i olu. Ụmụ nẹdi i ile k'e gbuni i osekpu.

⁹ Juda, okoro ẹwọrọ k'ị wụ, nwa m: o gbu, o ri, o lihi; ọ tịn ẹhụ, makpuru nọkẹ onyẹnnyẹ-ẹwọrọ; onyẹ kẹ egun a nị kpọtiẹn ẹ?!

¹⁰ Ọkpọ-eze aghakọ Juda ẹka pụ, ọkpọ onyẹ-ọkịkị aghakọ a ngadan pụ — d'e ru mgbe onyẹ nwọn ọkpọ ahụn e gi bịa. Ndị alị ichẹn-ichẹn k'a gha e buhẹ ihiẹn d'a chann'a ẹnya, e sekpun'ẹ alị.

¹¹ O k'e kẹn jaki limẹni osisi vaịnị; agana vaịnị rịgbu enwẹn ẹ mma k'o k'e kẹn nwa-jaki ẹ limẹni. Manya vaịnị k'o k'e gi sụ ẹkwa a; manya vaịnị hụn e nwunchanrịn ẹdeke-ẹdeke k'o k'e gi sụ ẹwuru ẹ.

¹² Ẹnya a k'e ginahịn manya vaịnị ngi; eze rị a ọnụ k'a channahịn mirin-ẹran ọchan.

Zẹbulọnụ

¹³ “Zẹbulọnụ k'e biri mkpẹnrẹn ohimin, wụrụ ebe ụgbọ-mirin e ziẹntọ. Alị a k'a shịarukwọrị alị Sidọnụ.

Isaka

¹⁴ “Isaka wụ jaki ka ẹhụ ọda-ọda hụn bu ibu azụụnnị-lẹ-azụụnnị makpuru.

¹⁵ Ọ hụn a nị ebẹhụ ọ nọ e zu ikẹn a rịka mma, o k'e bu azụụn zinmẹ wẹ dọnye ibu, we enwẹn ẹ ye wẹ nị wẹ mẹ ẹ kẹ igbọn.

Danị

¹⁶ “Danị k'a kị ndị nke ẹ, hannị wẹ eṅẹn rịkẹ ebọn ru ogo ebọn imẹ Izrẹlụ.

¹⁷ Danị k'a wụ agwọ rị mkpẹnrẹn ụzọ, ẹjụ-alị hụn rị ọkpụzọ — hụn a ta ẹshin atụ-ụkụ azụụn, onyẹ nyinkọ n'a a danshi azụụn.

¹⁸ Euu Osolobuẹ, ịyụ kẹ m rị e lekwọ n'ị zụọpụha m!

Gadị

¹⁹ “Nke Gadị, igunrun ndị ohin k'a maye ẹ, kanị wẹ lakọnị ọ chụ wẹ, maye wẹ.

Asha

²⁰ “Nke Asha, alị a k'e yejun ẹ ihiẹn-oriri ẹfọ; o k'e wepụha ezigbo ihiẹn-oriri furu ndị-nze.

Naf'tali

²¹ “Naf'tali wụ ele wẹ tọpụ; o ku oku rị mma.

Josẹfụ

²² “Josẹfụ wụ vaịnị rị a mị mkpụrụ, hụn rị ẹhụ isi-mirin; hụn wa ẹka ndị kụghafe mgbọn.

²³ Ndị-ụta e te gigụọ iwe ẹ rị wẹ ẹfọ maye ẹ, gba a ọbara nị wẹ rụ a ẹhụ.

²⁴ Kanị ụta ya nwẹn gi ẹka amahihieni, echẹn kẹ ẹka a zekwọ, makẹni ẹka Dikẹn hụ Jekọpụ gi dọn ẹnya kwọndọn ẹ; makẹni Onyẹ ahụn e du ẹnyi kẹ atụnrụn kwọndọn ẹ, Onyẹ hụn wụ Ọmụma Izrẹlụ;

²⁵ makẹni Chuku ahụn nẹdi i e fe e yen'i ẹka; makẹni Onyẹ ahụn nwọn ikẹn ile a gọzi i agọzi: kẹ ngọzi rị igwere kẹ ngọzi rị ohimin kẹ ngọzi ọmụmụ lẹ ọzụnzụn.

²⁶ Ngọzi nẹdi i ka ngọzi ile ugu ile rị ẹdẹi e ye, ka ihiẹn ile rị mma rị elu òke ile rị ẹdẹi; ngọzi ẹ ya sọnmẹ Josẹfụ, ya sọnmẹ onyẹ ahụn wụ onyẹ-isi umunẹ ẹ.

Bẹnjamini

²⁷ “Bẹnjamini wụ wofu, anụ-eri-anụ, hụn ẹfọ ghalẹni e jun: ụtụntụn ọ hụ e ri hụn o gbu; ẹnyasị ọ hụ e ke hụn o gbukwarị.”

²⁸ Uwẹ ile wụ ebọn mmẹbụọ hụn rị imẹ Izrẹlụ. Oku ndịnị ile kẹ nẹdi wẹ gwa wẹ ogẹn o gi gọzi wẹ. O yesọnmẹ wẹ ngọzi — onyẹ-lẹ-nke-ẹ, onyẹ-lẹ-nke-ẹ.

Jekọpụ Sị Wẹ Li Ẹ Ye Alị Kenaanị

²⁹ Ya kẹ Jekọpụ nọ sị wẹ, “M'e d'a laburu ndị nke ẹnyi. Li ni m ye ebẹhụ wẹ liye ndị nẹdi m, imẹ okporo ahụn rị alị Ẹfrọnụ onyẹ Hẹti;

³⁰ okporo ahụn rị alị Mak'pẹla, hụn nọkunmẹ Mamre imẹ alị Kenaanị; okporo ahụn Ebraham nẹdi m ṅọnnarịn Ẹfrọnụ onyẹ Hẹti ya lẹ ogige ahụn ọ rị imẹ ẹ, gi ẹ họnrin ebe wẹ e liye ebọn ẹ.

³¹ Ebahụn kẹ wẹ liye Ebraham lẹ Sẹra nwunyẹ ẹ; ebahụn kẹ wẹ liye Aziki lẹ Rebika nwunyẹ ẹ; ebahụn kẹ m liyezi Lia.

³² Ndị Hẹti k'o ṅọnnarịn alị ahụn lẹ okporo ahụn rịn'a.”

³³ Ogẹn Jekọpụ gi gwachanrịngụ ụmụ a ihiẹn wẹ k'e mẹ, ọ nọ kị ụkụ che elu ukpo, nwụnhụn, laburu ndị nẹdi ẹ nwụnnị.