Jẹnẹsisi 48 - Ika

Isi Nke Ẹsatọ Kwasị Ọgụn Kẹ Jekọpụ Dọn Gọzi Ifrem Lẹ Manasẹ

¹ Omẹgụ, wẹ nọ bịa d'a sị Josẹfụ, “Emu rị a kụ nẹdi i.” Ya Josẹfụ nọ weri ụmụ a ẹbụọ ahụn wụ Manasẹ lẹ Ifrem d'a hụn a.

² Ogẹn wẹ gi sị Jekọpụ, “Josẹfụ nwa ị bịa d'a hụn ị.” Ya Jekọpụ nọ tashimẹ lihi ọtọ, nọdị alị elu-ukpo.

³ Ya Jekọpụ nọ sị Josẹfụ, “Chuku Nwọn ikẹn ile bịa d'e kunrun m ogẹn m gi rị Luzu hụn rị alị Kenaanị, nọ ebahụn gọzi m.

⁴ Ọ sị m, ‘Lee ẹnya, m k'e mẹ i mụba, ba ụba ọda-ọda; m k'e gi i họnrin alị hụn nwọn alị ichẹn-ichẹn; m k'e we alịnị ye ụmụ ị n'ọ wụrụ nke wẹ jẹnrin-ejẹn.’

⁵ “Ya wụ nwan nị wẹ k'a gụn ụmụ ị ẹbụọ ahụn ị mụ nị m d'a lụapụha alị Ijiptu yeni m; ẹghẹẹ, Ifrem lẹ Manasẹ sikọ d'a wụ nke m kẹ Rubẹni lẹ Simiọnụ dọn wụ nke m.

⁶ Ụmụ ị jẹnkọ d'a mụsọn wẹ k'a wụrụ nke i. Wẹ k'a gụn wẹ ye okpuru ẹfan mmunẹ wẹ, wẹ gha e ke alị ahụn,

⁷ makẹ ufiri nnẹ i wụ Rechẹlụ hụn nwụnnahịn m ụzọ imẹ alị Kenaanị kẹ ẹnyi gha Padanị lala, ogẹn ẹnyi gi rumẹ Ẹfratị; ya m nọ li ẹ ye mkpẹnrẹn ụzọ Ẹfratị ebẹhụ.” (Hụn wụ Bẹt'lẹhẹm.)

⁸ Ogẹn Izrẹlụ gi hụn ụmụ Josẹfụ, ọ nị sị, “Elee ndị wụ ndịnị?”

⁹ Josẹfụ nọ sị a, “Ndịnị wụ ụmụ Osolobuẹ ye m ebeni.” Ọ nọ sị a, “Dodo, wezụnhannị m wẹ ebeni, nị m gọzi wẹ.”

¹⁰ Izrẹlụ a kayegụọ ẹnya ogẹnni, ara leghazị ụzọ ọhụnma. Ya Josẹfụ nọ we ụmụ a ndị ahụn nọkunmẹ nẹdi ẹ, nẹdi ẹ nọ susu wẹ ọnụ, dide wẹ.

¹¹ Ya Izrẹlụ nẹdi ẹ nọ sị a, “Ete tụzịnị m ẹnya nị m k'a hụn ị; kanị, Osolobuẹ a nịgụọzịdẹ m hụn ụmụ ị!”

¹² Ya Josẹfụ nọ wepụ wẹ ebe wẹ te rị ọgbọdọgbọ nẹdi ẹ, ọ nọ hulụanị nẹdi ẹ isi.

¹³ Josẹfụ nọ nwan werizi wẹ ẹbụbụọ, o gi ẹka-nni kwọndọn Ifrem, gi ẹka-ekpẹn kwọndọn Manasẹ. Ya kẹ Ifrem nọ rị Izrẹlụ ẹka-ekpẹn, Manasẹ a rị Izrẹlụ ẹka-nni. Josẹfụ nọ we wẹ ẹbụbụọ ẹrịra nọkunmẹ Izrẹlụ.

¹⁴ Kanị Izrẹlụ nọ bu ẹka-nni ẹ kwasị Ifrem isi, bụ ya wụ nwa-ndu; o bu ẹka-ekpẹn fetu ẹka-nni ẹ, bukwasị Manasẹ isi, bụ ya wụ nwa-ibuzọ.

¹⁵ Ọ nọ gọzimẹ Josẹfụ, sị, “Chuku ahụn ndị nẹdi m wụ Ebraham lẹ Aziki bi k'o dọn chọ, Chuku ahụn rị e lepụ m ẹnya kete m bịalẹ ụwanị d'e ru tannị,

¹⁶ ‘Mmọn-ozi’ ahụn gbapụha m imẹ eje-ihiẹn ile, ya gọzi ụmụ-ẹkanị. Wẹ za ẹfan m lẹ ẹfan ndị nẹdi m wụ Ebraham lẹ Aziki. Wẹ ba ụba ọda-ọda elu-ụwanị.”

¹⁷ Ogẹn Josẹfụ gi hụn a nị nẹdi ẹ bu ẹka-nni kwasị Ifrem, ẹfọ asụọn'a ụsụọ; ọ nọ kwọndọn ẹka nẹdi ẹ n'o wepụ a ẹka-nni isi Ifrem bu ẹ kwasị Manasẹ isi.

¹⁸ Ọ sị nẹdi ẹ, “Baba, ẹlẹ ẹnịna; hụnnị wụ nwa-ibuzọ, bu nwan ẹka-nni kwasị a isi.”

¹⁹ Ya nẹdi ẹ nọ jụ, sị a, “Nwa m, a marịngụọ m; ya nwẹn k'a wụrụzịkwọ okẹn-ịhịan. Kanị, nwẹnẹ ẹ hụn nta k'a karị a, mụ ụmụ k'a wụrụ igunrun alị bu ọda.”

²⁰ Ya ọ nọ gọzi wẹ ụhụọhịn ahụn, sị, “Ẹfan ị kẹ ndị Izrẹlụ k'e gi a gọzi ịhịan, a sị, ‘Osolobuẹ ya mẹ i n'ị rị kẹ Ifrem lẹ Manasẹ.’ ” Ọ nọ gi ẹrịra mẹ Ifrem rị Manasẹ isi elu.

²¹ Ya Izrẹlụ nọ sị Josẹfụ, “M'e d'a nwụn. Kanị, Osolobuẹ k'a nọyeni ụnụ, wekin ụnụ alị ndị nẹdi ụnụ kanị.

²² M rị nwan e ye i alị ohu e cheni hụn mmunẹ i k'e ye i, alị hụ m gi ọpịa-agha m lẹ ụta m narịn ndị Amọ.”